ប្រឈមនឹងបញ្ហាជនអន្តោប្រវេសន៍ ប្រទេសអឺរ៉ុបខាងកើតខ្លះ នាំគ្នាសង់ជញ្ជាំង របងបន្លាលួសតាមព្រំដែន
ប្រទេសសមាជិកសហភាពអឺរ៉ុប ស្ថិតនៅភាគខាងកើត ឆៀងខាងជើង ដូចជាប៉ូឡូញ និងលីទុយអានី ជាដើម កំពុងប្រឈមនូវការមកដល់ របស់ជនអន្តោប្រវេសន៍ជាច្រើនពាន់នាក់។ ប្រឈមនឹងបញ្ហានេះ ប្រទេសទាំងនេះ បាននាំគ្នាសាងសង់ជញ្ជាំង របងបន្លាលួសនៅតាមបណ្តោយព្រំដែន ដើម្បីរារាំងជនភៀសខ្លួន។ លោករដ្ឋមន្ត្រីក្រសួងមហាផ្ទៃអាល្លឺម៉ង់ បានបង្ហាញជំហរគាំទ្រចំពោះវិធានការរបៀបនេះ។ បញ្ហានេះ កំពុងតែបង្កឲ្យមានរកាំរកូសថ្មីមួយទៀត នៅក្នុងសហភាពអឺរ៉ុប។
ចុះផ្សាយនៅថ្ងៃ៖
ស្តាប់ - ០២:២៧
ចាប់តាំងពីខែសីហា គេសង្កេតឃើញ មានជនអន្តោប្រវេសន៍ជាច្រើនពាន់នាក់ ភាគច្រើនមកពីតំបន់មជ្ឈឹមបូព៌ា បានព្យាយាមឆ្លងចូលទឹកដីអឺរ៉ុប ដោយឆ្លងកាត់តាមប្រទេសបេឡារុស។ ប្រទេសអឺរ៉ុបខ្លះ បានសង្ស័យថា គឺបេឡារុស ដែលជាអ្នកបើកព្រំដែន បណ្តោយឲ្យជនអន្តោប្រវេសន៍ សម្រុកចូលឆ្លងចូលដីអឺរ៉ុប ជាការសងសិក ចំពោះការដែលអឺរ៉ុប បានដាក់ទណ្ឌកម្មលើខ្លួន រឿងរំលោភសិទ្ធិមនុស្ស។
ប្រឈមនឹងបញ្ហា លំហូរជនអន្តោប្រវេសន៍ យ៉ាងគំហុកនេះ ប្រទេសប៉ូឡូញ បានទាមទារទៅកាន់សហភាពអឺរ៉ុប ឲ្យផ្តល់ប្រាក់ឲ្យខ្លួនចំនួន ៣៥០លានអឺរ៉ូ ដើម្បីយកទៅសាងសង់របងបន្លាលួស នៅតាមបណ្តោយព្រំដែនជាមួយបេឡារុស។ ដោយឡែក អាជ្ញាធរលីទុយអានីវិញ បានចាប់ផ្តើមសាងសង់របងបន្លាលួស នៅតាមបណ្តោយព្រំដែនខ្លួន ជាមួយបេឡារុស ហើយ។
នៅថ្ងៃទី២៤តុលា លោក Horst Seehofer រដ្ឋមន្ត្រីក្រសួងមហាផ្ទៃអាល្លឺម៉ង់ បានលើកឡើងថា វាជារឿងស្របច្បាប់ និងសមហេតុផល ដែលអឺរ៉ុបត្រូវតែការពារព្រំដែនខាងក្រៅរបស់ខ្លួន មិនឲ្យមានជនភៀសខ្លួន ឬជនអន្តោប្រវេសន៍ខុសច្បាប់ចូលមក។ លោកបានអះអាងទៀតថា អាល្លឺម៉ង់ នឹងបង្កើនកម្លាំង យាមល្បាតតាមព្រំដែន ជាមួយប៉ូឡូញដែរ ដើម្បីរារាំងអ្នកឆ្លងចូលដោយខុសច្បាប់។ តែយ៉ាងណា លោកអះអាងថា អាល្លឺម៉ង់ នឹងមិនបិទព្រំដែនជាមួយប៉ូឡូញទេ។
គួរបញ្ជាក់ថា យោងតាមអាជ្ញាធរអាល្លឺម៉ង់ បើគិតពីដើមឆ្នាំនេះមក មានអន្តោប្រវេសន៍ចំនួនប្រមាណ ៥ពាន់នាក់ហើយ ដែលបានមកដល់ដីអាល្លឺម៉ង់ ដោយឆ្លងមកពីប្រទេសបេឡារុស មុននឹងចូលដល់ប៉ូឡូញ ហើយឆ្លងមកអាល្លឺម៉ង់។ កាលពីថ្ងៃទី ៧តុលា រដ្ឋមន្ត្រីមហាផ្ទៃនៃប្រទេសសមាជិកអឺរ៉ុប ចំនួន១២ មាន អូទ្រីស ប៊ុលហ្ការី ឈីពរ៍ ដាណឺម៉ាក អេស្តូនី ក្រិក ហុងគ្រី លីទុយអានី ឡេតូនី ប៉ូឡូញ សាធារណរដ្ឋឆេក និងស្លូវ៉ាគី បានស្នើទៅកាន់គណកម្មការអឺរ៉ុប ថាអឺរ៉ុប ត្រូវតែផ្តល់ថវិកា ដើម្បីសាងសង់របងព្រំដែន ដើម្បីទប់ជនអន្តោប្រវេសន៍។
ក៏ប៉ុន្តែ លោកស្រី Ursula von der Leyen ប្រធានគណកម្មការអឺរ៉ុប បានឆ្លើយថា សហភាពអឺរ៉ុប នឹងមិនឧបត្ថម្ភថវិកា ក្នុងការសាងសង់របង បន្លាលួសតាមព្រំដែនទេ។ បញ្ហាអន្តោប្រវេសន៍ នៅភាគខាងជើង ឈាងខាងកើតអឺរ៉ុបនេះ កំពុងតែបង្កឲ្យមានបញ្ហារកាំរកូស បែកបាក់ផ្ទៃក្នុងអឺរ៉ុប ខណៈដែលសំណុំរឿងកំណែទម្រង់វិធានច្បាប់អឺរ៉ុប ទាក់ទិននឹងការទទួលជនភៀសខ្លួន និងអន្តោប្រវេសន៍ កំពុងស្ថិតនៅគាំង គ្មានដំណោះស្រាយ ជាច្រើនឆ្នាំមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ