សមាជិកសហភាពអឺរ់ុប ជំរុញឱ្យអង្គការសហប្រជាជាតិបញ្ចេញសកម្មភាពទប់ស្កាត់លំហូរអន្តោប្រវេសន៍
សមាជិកសហភាពអឺរ៉ុបចំនួនបួនប្រទេស បានស្នើសុំឱ្យអង្គការសហប្រជាជាតិចាត់វិធានការប្រឆាំងនឹងប្រទេសបេឡារុស ដែលលើកចិត្តឱ្យជនអន្តោប្រវេសន៍ឱ្យឆ្លងព្រំដែនដោយខុសច្បាប់ចូលក្នុងដែនដីសហភាពអឺរ៉ុប។ សម្រាប់ក្រុមប្រទេសទាំងបួននៅតំបន់ប៉ែកខាងកើតអឺរ៉ុប ទង្វើរបស់បេឡារុសនេះ មាន “ទម្រង់ជាការសងសឹក” អឺរ៉ុប។
ចុះផ្សាយនៅថ្ងៃ៖
នាយករដ្ឋមន្ត្រី ប៉ូឡូញ ឡេតូនី លីទុយអានី និងអេស្តូនី បានចេញសេចក្តីថ្លែងការណ៍រួមថា “រដ្ឋាភិបាលរបស់លោកអាឡិចសង់ លូកាឆេនកូ បានរៀបគម្រោង និងរៀបចំឱ្យមានចរន្តអន្តោប្រវេសន៍ហូរចូលអឺរ៉ុបជាស្វ័យប្រវត្តិ។ យកអន្តោប្រវេសន៍ និងជនភៀសខ្លួន មកគំរាមសន្តិសុខសហភាពអឺរ៉ុប គឺជាការរំលោភសិទ្ធមនុស្ស។”
នារយៈពេលប៉ុន្មានខែចុងក្រោយនេះ មានអន្តោប្រវេសន៍រាប់ពាន់នាក់ ភាគច្រើនជាពលរដ្ឋមានដើមកំណើតនៅតំបន់ដើមបូព៌ា បានរត់ឆ្លងចូលមកក្នុងទឹកដីសហភាពអឺរ៉ុបតាមព្រំដែនបេឡារុស។ សម្រាប់សហភាពអឺរ៉ុបនេះ ជាទម្រង់មួយនៃការវាយប្រហារសងសឹក ពីសំណាក់បេឡារុសចំពោះសហភាពអឺរ៉ុប ដែលទើបបានដាក់ទណ្ឌកម្មរបបដឹកនាំបេឡារុសយ៉ាងចាស់ដៃ។
ហេតុដូច្នេះហើយបានជាក្រុមប្រទេសទាំងបួនយល់ថា ទង្វើមិនល្អរបស់បេឡារុសលើជនអន្តោប្រវេសន៍ គួរតែត្រូវបញ្ជូនទៅឱ្យអង្គការសហប្រជាជាតិ ជាពិសេសក្រុមប្រឹក្សាសន្តិសុខចាត់ចែង។ នេះបើតាមសេចក្តីថ្លែងការណ៍ដដែល ដោយគូសបញ្ជាក់ និងស្នើសុំឱ្យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន ចាត់វិធានការសកម្មដើម្បីសម្រួលស្ថានការណ៍ និងជំរុញឱ្យបេឡារុស គោរពច្បាប់អន្តោប្រវេសន៍អន្តរជាតិ។
ជាមួយនឹងពាក្យប្តេជ្ញាការពារជនអន្តោប្រវេសន៍ទាំងនោះ ស្របតាមច្បាប់អន្តរជាតិ បើពួកគេបានឆ្លងមកដល់ក្នុងទឹកដីខ្លួន ប្រទេសទាំងបួនក៏បានជំរុញឱ្យសហភាពអឺរ៉ុប រឹតបន្តឹងវិធានការដែរ ដើម្បីកុំឱ្យមានករណីលំហូរអន្តោប្រវេសន៍រៀបចំដោយបេឡារុសទៀត។
រដ្ឋមន្ត្រីក្រសួងការពារជាតិប៉ូឡូញ បានថែមទាំងប្រកាសតាមប្រព័ន្ធសង្គមទៀតថា ប៉ូឡូញនឹងសាងសង់ជញ្ជាំងកម្ពស់២ម៉ែត្រកន្លះ នៅតាមបណ្តោយព្រំដែនជាមួយបេឡារុស ប្រវែង៤០៧គីឡូម៉ែត្រ ដើម្បីកុំឱ្យជនអន្តោប្រវេសន៍អាចឆ្លងចូលទឹកដីប៉ូឡូញបាន។
ប៉ូឡូញ ឡេតូនី និងលីទុយអានី ជាសមាជិកសហភាពអឺរ៉ុបបីប្រទេសដែលមានព្រំដែនជាប់ជាមួយបេឡារុស។ អាជ្ញាធរបេឡារុស តែងតែរុញអន្តោប្រវេសន៍ចេញពីប្រទេសឆ្ពោះទៅព្រំដែនអឺរ៉ុប ជាហេតុធ្វើឱ្យពួកគេធ្លាក់ក្នុងស្ថានភាពទ័លច្រក។ ក្រុមជនភៀសខ្លួនអាហ្វហ្កានីស្ថានមួយក្រុម កំពុងជាប់កុនតាំងពីពីរសប្តាហ៍មកហើយនៅចំណុចព្រំដែនរវាងប៉ូឡូញនិងប៉េឡារុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ