សោកនាដកម្មស្លាប់ជនអន្តោប្រវេសន៍នៅច្រកសមុទ្របារាំងនិងអង់គ្លេស៖ តើជាកំហុសអ្នកណា?
ចុះផ្សាយនៅថ្ងៃ៖
ស្តាប់ - ០៦:៥៥
បារាំងនឹងមិនបណ្តោយឲ្យច្រកសមុទ្រLa Manche ដែលស្ថិតនៅចន្លោះព្រំដែនបារាំង និងអង់គ្លេសក្លាយជាវាលកប់ខ្មោច។ នេះជាប្រសាសន៍របស់ប្រធានាធិបតី បារាំង លោកអេម៉ានុយអែល ម៉ាក្រុង នៅប៉ុន្មានម៉ោងក្រោយ កើតមានសោកនាដកម្ម លិចទូកដឹកជនអន្តោប្រវេសន៍ បានសម្លាប់មនុស្ស២៧នាក់។ ឧប្បត្តិហេតុនេះបានកើតមានឡើង ក្រោយពីជនអន្តោប្រវេសន៍ ជាច្រើននាក់ ក្នុងនោះ មានស្រ្តីនិងកុមារ បានជិះទូកពោង ផ្សងសំណាង ឆ្ពោះទឹកដីអង់គ្លេសកាលពីថ្ងៃពុធទី ២៤វិច្ឆិកា ២០២១។
ច្រកសមុទ្របារាំង ជាមួយព្រំដែនអង់គ្លេស ក្លាយជាកន្លែងកប់ខ្មោចជនអន្តោប្រវេសន៍បន្ទាប់ពី សមុទ្រមេឌីទែរ៉ាណេ?
បារាំង និងអង់គ្លេសបានសំដែងការរន្ធត់ នៅក្រោយ កើតមានសោកនាដកម្ម ស្លាប់ជីវិតជនអន្តោប្រវេសន៍ ជាច្រើននាក់ នៅច្រកសមុទ្ររវាងបារាំង និងអង់គ្លេស កាលពីថ្ងៃពុធម្សិលមិញ។ តាមរដ្ឋមន្រ្តីក្រសួងមហាផ្ទៃបារាំង ជនអន្តោប្រវេសន៍ ២៧នាក់ ដែលនៅក្នុងនោះមាន ៧នាក់ ជាស្រ្តី និង៣នាក់ជាកុមារ បានលង់ទឹកស្លាប់ នៅក្នុងពេលធ្វើដំណើរតាមទូកពោង ផ្សងសំណាងសំដៅទឹកដីអង់គ្លេស។ តាមអាជ្ញាធរបារាំង ជនរងគ្រោះភាគច្រើនជាជនជាតិគួដ មកពីអ៊ីរ៉ាក់ និងអ៊ីរ៉ង់។ ចំណែកជនរងគ្រោះពីរនាក់ដែលនៅរស់ និងកំពុងព្យាបាលនៅមន្ទីរពេទ្យ នៅក្រោយស្រង់ចេញពីក្នុងទឹក មានម្នាក់ជាជនជាតិអ៊ីរ៉ាក់ និងម្នាក់ជាជនជាតិស៊ូដង់។
នៅក្នុងប្រវត្តិឆ្លងដែនខុសច្បាប់ពីបារាំង ទៅអង់គ្លេស នេះជាលើកទី១ ហើយ ដែលជនអន្តោប្រវេសន៍ស្លាប់ក្នុងចំនួនដ៏ច្រើន បែបនេះ។
ចាប់តាំងពីដើមឆ្នាំ ២០២១ រហូតដល់មុន សោកនាដកម្ម កាលពីថ្ងៃពុធ គេរាប់ឃើញ មានជនអន្តោប្រវេសន៍ ៧នាក់ ប៉ុណ្ណោះ ដែលស្លាប់ និងបាត់ខ្លួន នៅក្នុងពេលជិះទូកពោង ផ្សងសំណាង សំដៅទឹកដីអង់គ្លេស។
នៅថ្ងៃពុធ ប្រធានាធិបតីបារាំង និងនាយករដ្ឋមន្រ្តីអង់គ្លេស បាននិយាយគ្នាតាមទូរស័ព្ទ និងសន្យាពង្រឹងការសហការដើម្បីប្រយុទ្ធប្រឆាំងបណ្តាញក្រុមឈ្មួញជួញដូរតាមផ្លូវសមុទ្រពីបារាំង ទៅអង់គ្លេស។
តាមរដ្ឋមន្រ្តីអង់គ្លេសទទួលបន្ទុក អន្តោប្រវេសន៍ លោក Tom Pursglove ឆ្លៀតឱកាសជួបសន្ទនាជាមួយប្រធានាធិបតីបារាំង លោកនាយករដ្ឋមន្រ្តីអង់គ្លេសបានស្នើឡើងជាថ្មី ការចូលរួមរបស់ប៉ូលិសអង់គ្លេស ក្នុងការដើរល្បាត ជាមួយប៉ូលិសបារាំង នៅតាមឆ្នេរសមុទ្របារាំង ក្នុងគោលដៅទប់ស្កាត់ទាន់ពេលវេលាកុំឲ្យទូកដឹកជនអន្តោប្រវេសន៍អាចចុះទឹកសមុទ្រ សំដៅប្រទេសអង់គ្លេស។ បារាំង ធ្លាប់បានបដិសេធសំណើរបស់ភាគីអង់គ្លេសក្នុងហេតុផល បូរណភាពដែនដីរបស់បារាំង។
នៅក្នុងបទសម្ភាសន៍ជាមួយទូរទស្សន៍អង់គ្លេស នាយករដ្ឋមន្រ្តីអង់គ្លេសបានសំដែងការសោកស្តាយ និងចង្អុរដាក់រដ្ឋាភិបាលបារាំង ថា ទោះទទួលបានប្រាក់ជំនួយ ពីអង់គ្លេស ប្រមាណ ៦០លានអឺរ៉ូ សម្រាប់ឆ្នាំ ២០២១ ដល់ឆ្នាំ ២០២២ បារាំង នៅតែធ្វើការមិនបានគ្រប់គ្រាន់ដើម្បីរារាំង ទប់ស្កាត់ទូកដឹកជនអន្តោប្រវេសន៍ខុសច្បាប់។
តាមភាគីបារាំង គិតចាប់តាំងពីដើមខែមករាឆ្នាំនេះ ជនអន្តោប្រវេសន៍ ៣១ ៥០០នាក់ បានឡើងជិះទូកចេញពីឆ្នេរសមុទ្របារាំង សំដៅប្រទេសអង់គ្លេស។ ក្នុងរយៈពេលដដែល គេស្រង់ សង្គ្រោះជីវិតមនុស្សជាង ៧៨០០នាក់។ អាជ្ញាធរអង់គ្លេសវិញថា មានជនអន្តោប្រវេសន៍ ជាង ២២ ០០០នាក់ បានឆ្លងសមុទ្រ ចូលទៅដល់ទឹកដីអង់គ្លេស។
ទូកពោង ដែលរៀបចំដោយឈ្មួញ លួចដឹកមនុស្ស ខុសច្បាប់ ភាគច្រើនចាកចេញ ពី ក្រុងCalais ភាគខាងជើងបារាំង ដែលស្ថិតនៅត្រើយម្ខាងសមុទ្រ ពីទឹកដីអង់គ្លេស តែ ៣០គីឡូម៉ែត្រប៉ុណ្ណោះ។
នៅក្រោយសោកនាដកម្ម ស្លាប់ជីវិតជនអន្តោប្រវេសន៍ ដ៏ច្រើន មិនធ្លាប់មាន កាលពីថ្ងៃពុធម្សិលមិញ ប្រធានាធិបតីបារាំង បានអះអាងហើយថា នឹងមិនបណ្តោយច្រកសមុទ្រLa Manche ក្លាយជាកន្លែងកប់ខ្មោចជនអន្តោប្រវេសន៍ ដូចសមុទ្រមេឌីទែរ៉ាណេនោះទេ។
នៅក្នុងកិច្ចសន្ទនាតាមទូរស័ព្ទ កាលពីយប់ថ្ងៃពុធ នាយករដ្ឋមន្រ្តីអង់គ្លេស បូរីស ចនសុន និងប្រធានាធិបតីបារាំង លោកអេម៉ានុយអែល ម៉ាក្រុងព្រមព្រៀងគ្នាថា បារាំងនិងអង់គ្លេស នឹងបង្កើនការប្រឹងប្រែង ដើម្បីប្រយុទ្ធប្រឆាំងបណ្តាញក្រុមឈ្មួញទុច្ចរិត ដែលជាអ្នកកេងចំណេញលុយ ដោយមិនខ្វល់ពីគ្រោះថ្នាក់ អាយុជីវិតរបស់ជនអន្តោប្រវេសន៍។
តើគេត្រូវបន្ទោសអ្នកណា?
នាយករដ្ឋមន្រ្តីអង់គ្លេស និងប្រធានាធិបតីបារាំងបាននិយាយទម្លាក់កំហុសលើក្រុមជួញដូរ លួចដឹកមនុស្សខុសច្បាប់ ថា ជាអ្នកទទួលខុសត្រូវលើសោកនាដកម្ម ស្លាប់ជីវិតជនអន្តោប្រវេសន៍ នៅច្រកសមុទ្រLa Manche។
រដ្ឋមន្រ្តីក្រសួងមហាផ្ទៃបារាំងបានអះអាងថា គេបានចាប់ខ្លួនជនសង្ស័យ៥នាក់ ដែលជាប់ពាក់ព័ន្ធនឹងការលួចដឹកមនុស្សតាមទូក រហូតធ្វើឲ្យមានអ្នកស្លាប់ កាលពី ថ្ងៃ ពុធម្សិលមិញ។ តាមរដ្ឋមន្រ្តីបារាំង ក្រុមជួញដូរមនុស្ស គិតតែពីគាបយកលុយ ដោយគ្មានគិតពី គ្រោះថ្នាក់ អាយុជីវិតរបស់ជនអន្តោប្រវេសន៍។ គេវាយតម្លៃថា សម្រាប់ការឆ្លងដែនខុសច្បាប់តាទូកពីបារាំង ទៅអង់គ្លេស ឈ្មួញជួញដូរបានទារពីជនអន្តោប្រវេសន៍ ពី ២ពាន់ ទៅ ៧ពាន់អឺរ៉ូ។
ទាក់ទងនឹងក្រុមជួញដូរមនុស្ស រដ្ឋមន្រ្តីមហាផ្ទៃបារាំង បាននិយាយថា បារាំង បានប្រឹងប្រែង ប្រយុទ្ធប្រឆាំងនិងចាប់បានឈ្មួញជួញដូរមនុស្ស១៥០០នាក់។ ប៉ុន្តែ យ៉ាងណាក៏ដោយ ការប្រឹងប្រែងរបស់បារាំងតែម្នាក់ មិនអាចទប់ទល់ឈ្នះ បណ្តាញជួញដូរមនុស្ស ដែលមួយចំនួនមកពីប្រទេសអឺរ៉ុបផ្សេងទៀតនោះទេ។ ត្រង់ចំណុចនេះ រដ្ឋមន្រ្តីបារាំង បានអំពាវនាវឲ្យមានការសហការពីប្រទេសជិតខាង ដូចជាប៊ែលហ្សិក ហូឡង់ និងអាល្លឺម៉ង់ដើម្បីចែករំលែកព័ត៌មាន ជាមួយបារាំង ដើម្បី បំផ្លាញ សំបុក បណ្តាញ ក្រុមទុច្ចរិត ដែលរៀបចំ ដឹកជនអន្តោប្រវេសន៍ខុសច្បាប់ ចេញពីទឹកដី បារាំង សំដៅអង់គ្លេស
តើនេះជាកំហុសរបស់ក្រុមឈ្មួញជួញដូរមនុស្ស?
ទាំងបារាំងនិងអង់គ្លេស ទម្លាក់កំហុសលើក្រុមឈ្មួញជួញដូរមនុស្ស ព្រោះភាគីនីមួយៗមិនចង់ទទួលខុសត្រូវ ចូលរួមធ្វើឲ្យជនអន្តោប្រវេសន៍ស្លាប់នោះទេ។
ប៉ុន្តែ បើគេមើលឲ្យស៊ីជម្រៅ បើទោះបីជាអាជ្ញាធរជោគជ័យ បំផ្លាញបានសម្រេច បណ្តាញឈ្មួញជួញដូរមនុស្ស ប៉ុន្តែ គេមិនអាចទប់ស្កាត់លំហូរជនអន្តោប្រវេសន៍ នោះទេ។ បញ្ហាដើមចម របស់វាទាក់ទងនឹងបញ្ហានយោបាយអន្តោប្រវេសន៍របស់សហភាពអឺរ៉ុប ជាពិសេស បារាំងនិងអង់គ្លេស ដែលជាអ្នកពាក់ព័ន្ធផ្ទាល់ក្នុងរឿងនេះ។
តាមសមាគម អង្គការជួយសង្រ្គោះ ច្រកសមុទ្រLa Manche តាំងពីដើមឆ្នាំ ចំនួនជនអន្តោប្រវេសន៍ដែលប៉ុនប៉ង ឆ្លងដែនខុសច្បាប់ចូលទៅអង់គ្លេស តាមមធ្យោបាយ ទូកពោង មានចំនួនកាន់តែច្រើន។
ជនអន្តោប្រវេសន៍បានយកជម្រើសធ្វើដំណើរតាមទូកពោង ជាជាជម្រើសចុងក្រោយ ដើម្បីលួចឆ្លងដែនខុសច្បាប់ទៅអង់គ្លេស នៅបន្ទាប់ពី អង់គ្លេស និងបារាំង បានរឹតបន្តឹងកាន់តែខ្លាំងការត្រួតពិនិត្យ លំហូរជនអន្តោប្រវេសន៍ តាមព្រំដែនផ្លូវគោក។
គេវាយតម្លៃថា បើសិនអាជ្ញាធរបារាំង យល់ព្រមផ្តល់សិទ្ធិជ្រកកោនដល់ជនអន្តោប្រវេសន៍ ហើយអង់គ្លេស យល់ព្រម បើកផ្លូវ ឲ្យជនអន្តោប្រវេសន៍ចូលទៅសុំសិទ្ធិជ្រកកោន ដោយសន្តិវិធី នោះ ក៏គ្មានកើតមានសោកនាដកម្ម គ្មាន ជនអន្តោប្រវេសន៍ដែលផ្សងព្រេង ធ្វើដំណើរតាមទូក ពោង ដែលគ្មានសុវត្ថិភាពដែរ។ តាមស្ថាប័នអន្តោប្រវេសន៍អង់គ្លេស ជាង៩០%នៃជនអន្តោប្រវេសន៍ ដែលបានលួចឆ្លងដែនខុសច្បាប់ ទៅដល់ទឹកដីអង់គ្លេស បានដាក់ពាក្យសុំសិទ្ធិជ្រកកោននៅអង់គ្លេស។
បញ្ហាមិនមែនមកពីក្រុមឈ្មួញជួញដូរមនុស្សតែមួយមុខទេ។ គ្មានឈ្មួញសម្រាប់ជួយដឹកខុសច្បាប់ ទៅអង់គ្លេស ក៏ជនអន្តោប្រវេសន៍ ដែលមួយចំនួន ដែលមានប្រភពមកពីប្រទេសអ៊ីរ៉ាក់ អ៊ីរ៉ង់ ស៊ីរី និងយេម៉ែន ប៉ងចង់ទៅរស់នៅ នៅអង់គ្លេស ក៏នៅតែព្យាយាម រកគ្រប់មធ្យោបាយ ដើម្បីជិះទូក ឆ្លងសមុទ្រខុសច្បាប់ ទៅអង់គ្លេស។
សម្រាប់សកម្មជនការពារសិទ្ធិជនអន្តោប្រវេសន៍ ដំណោះស្រាយដើម្បីជៀសផុតសោកនាដកម្មស្លាប់ជនអន្តោប្រវេសន៍ នៅច្រកសមុទ្រ បារាំងអង់គ្លេស មានតែមួយ គឺ រដ្ឋាភិបាលអង់គ្លេស ត្រូវសម្រួល បើកផ្លូវ ឲ្យជនអន្តោប្រវេសន៍ ធ្វើដំណើរស្របច្បាប់ ចូលទៅសុំសិទ្ធិជ្រកកោន។ ការរឹតបន្តឹងព្រំដែន មិនមែនជាដំណោះស្រាយនោះទេប៉ុន្តែ ផ្ទុយទៅវិញ វានឹងជំរុញឲ្យឈ្មួញជួញដូរមនុស្សអាចកេងចំណេញលុយ ពីជនអន្តោប្រវេសន៍ ដែលបានប្តេជ្ញាហើយថា នឹងធ្វើដំណើរទៅរស់នៅប្រទេសអង់គ្លេសឲ្យបាន បើទោះបីជាពួកគេត្រូវចំណាយលុយ និងប្រថុយគ្រោះថ្នាក់ជីវិតប៉ុណ្ណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ