ហេតុអ្វីបានជាបារាំង និងអង់គ្លេសដំឡើងសំឡេងដាក់គ្នានៅពេលនេះ?
បារាំងនិងអង់គ្លេសបានដំឡើងសំឡេងដាក់គ្នាកាន់តែខ្លាំងដោយសារជម្លោះទាក់ទងនឹងការនេសាទ នៅក្រោយ Brexit។ នៅក្រោយ អាជ្ញាធរបារាំងចាប់ឃាត់ ទូកនេសាទអង់គ្លេស កាលពីថ្ងៃព្រហស្បតិ៍ ក្រសួងការបរទេសអង់គ្លេសបានសម្រេចកោះហៅឯកអគ្គរដ្ឋទូតបារាំងនៅទីក្រុងឡុងដ៍ឲ្យចូលឆ្លើយបំភ្លឺនៅថ្ងៃសុក្រទី ២៩តុលានេះ។
ចុះផ្សាយនៅថ្ងៃ៖
ស្តាប់ - ០២:៤៣
ក្រសួងការបរទេសអង់គ្លេសបានសម្រេចកោះហៅឯកអគ្គរដ្ឋទូតបារាំងប្រចាំទីក្រុងឡុងដ៍ ដើម្បីឲ្យឆ្លើយបំភ្លឺ ជុំវិញ ការគំរាមរបស់បារាំង ដែលប្រុងចាត់វិធានការ ប្រឆាំង អង់គ្លេសចាប់ពីថ្ងៃទី២វិច្ឆិកាសប្តាហ៍ក្រោយ។
ដោយចោទអង់គ្លេស ថា បានផ្តល់បណ្ណអនុញ្ញាត ក្នុងចំនួនតិចតួច ដល់អ្នកនេសាទបារាំង រដ្ឋាភិបាលបារាំងបានព្រមាននៅ សប្តាហ៍នេះថា នឹងចាត់វិធានសងសឹក បើសិនអង់គ្លេសនៅតែមិនព្រមផ្តល់បណ្ណអនុញ្ញាតគ្រប់ចំនួន ដល់ទូកនេសាទបារាំង ទៅតាមការចែងក្នុងកិច្ចព្រមព្រៀងBrexit។
ទៅតាមវិធានការដែលរដ្ឋាភិបាលបារាំង គំរាម អនុវត្ត ចាប់ពីថ្ងៃអង្គារសប្តាហ៍ក្រោយ បារាំងនឹងហាមមិនឲ្យទូកនេសាទអង់គ្លេសចូលចតនៅកំពង់ផែមួយចំនួនរបស់បារាំង។ លើសពីនោះ អាជ្ញាធរបារាំងនឹងពង្រឹងការត្រួតពិនិត្យផ្នែកពន្ធគយ លើទូកនេសាទក៏ដូចជា រថយន្តដឹកទំនិញ អង់គ្លេស ដែលឆ្លងកាត់ទឹកដីបារាំង។
សម្រាប់រដ្ឋមន្រ្តីជលផលបារាំង នេះមិនមែនជាសង្រ្គាម ប៉ុន្តែ ជាការប្រយុទ្ធ ដើម្បីទាមទារសិទ្ធិឲ្យអ្នកនេសាទបារាំង។ តាមមន្រ្តីបារាំង អ្នកនេសាទបារាំង ជាង ២០០នាក់នៅតែរង់ចាំការផ្តល់បណ្ណអនុញ្ញាត ពីភាគីអង់គ្លេសឲ្យចូលទៅនេសាទក្នុងដែនទឹករបស់អង់គ្លេស។
ភាគីអង់គ្លេសវិញ អះអាងថា ខ្លួនបានផ្តល់បណ្ណអនុញ្ញាតនេសាទ ក្នុងដែនទឹកអង់គ្លេស ក្នុងចំនួន គ្រប់គ្រាន់ ប្រមាណ ៩៨% ដល់ទូកនេសាទអឺរ៉ុប ដែលនៅក្នុងនោះ មានទូកនេសាទបារាំង។ ប៉ុន្តែ ភាគីបារាំងវិញ ថា អង់គ្លេសបានផ្តល់តែ ៩០% ដោយកាត់បន្ថយ បណ្ណអនុញ្ញាត សម្រាប់ទូកនេសាទបារាំង។
ជាការសងសឹកទៅនឹងអង់គ្លេស នៅយប់ថ្ងៃពុធ ឈានចូលដល់ថ្ងៃព្រហស្បតិ៍ កប៉ាល់ល្បាតបារាំង បានចាប់ទូកនេសាទអង់គ្លេសពីរគ្រឿង ឲ្យបង់ប្រាក់ ពិន័យ និងបានចាប់ឃាត់ទុកទូកនេសាទអង់គ្លេសមួយគ្រឿង ដែលអាជ្ញាធរបារាំងចោទប្រកាន់ថា បានចូលនេសាទខុសច្បាប់ ក្នុងដែនទឹកបារាំង។
តាមប្រភពរដ្ឋអាជ្ញាបារាំង ក្រៅតែពីបង់ប្រាក់ពិន័យជាង ៧ម៉ឺនអឺរ៉ូ ម្ចាស់ទូកនេសាទអង់គ្លេស ត្រូវបង្ហាញមុខនៅតុលាការបារាំង នៅខែសីហាឆ្នាំក្រោយ។ ម្ចាស់ទូកនេសាទអង់គ្លេសដែលបានអះអាងប្រាប់អ្នកកាសែតថា ខ្លួនមានលិខិតស្នាមត្រឹមត្រូវតាមច្បាប់ បានចាត់ទុកករណីចាប់ឃាត់ទូករបស់ខ្លួនថា ជារឿងនយោបាយ វិវាទ រវាងរដ្ឋាភិបាលបារាំង និងអង់គ្លេស។
រដ្ឋមន្រ្តីបារាំងទទួលបន្ទុកកិច្ចការអឺរ៉ុប បានព្រមានដែរថា បើសិនអង់គ្លេសមិនព្រមដោះស្រាយវិវាទលើកនេះ បារាំងនឹងចាត់វិធានការធ្ងន់ជាងនេះ ដោយត្រូវកាត់ផ្តាច់ភ្លើងសម្រាប់ Jersey កោះស្វ័យតអង់គ្លេស ដែលស្ថិតនៅចន្លោះទឹកដីបារាំង និងអង់គ្លេស។ វិធានការរបស់បារាំង អាចប៉ះពាល់ដល់វិស័យដឹកជញ្ជូន និងការនេសាទរបស់អង់គ្លេស ព្រោះថា អង់គ្លេសត្រូវការកំពង់ផែ ទឹកដីបារាំង សម្រាប់ជាច្រកចូល ដឹកទំនិញ គ្រឿងសមុទ្រទៅកាន់ទីផ្សារអឺរ៉ុប។
មន្រ្តីអឺរ៉ុប និងក្រុមហ៊ុនបារាំង អង់គ្លេស ដែលធ្វើការក្នុងវិស័យខាងលើ បានអំពាវនាវឲ្យរដ្ឋាភិបាល ដែលជាភាគីជម្លោះ ទាំងពីរ ស្វែងរកដំណោះស្រាយរួម ជាជាង ប្រកាន់មុខយក្ស ដែលធ្វើឲ្យភាគីទាំងពីរខាតប្រយោជន៍ដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ