បារាំងនិងអង់គ្លេស ចុះកិច្ចព្រមព្រៀងបន្ថែមមធ្យោបាយ ទប់អន្តោប្រវេសន៍ខុសច្បាប់ឆ្លងសមុទ្រ
រដ្ឋាភិបាលបារាំង និងអង់គ្លេស បានចុះកិច្ចព្រមព្រៀងមួួយ កាលពីថ្ងៃសៅរ៍ទី២៨វិច្ឆិកា ដើម្បីសហការគ្នា ទប់ស្កាត់អន្តោប្រវេសន៍ខុសច្បាប់ ដែលប្រថុយជីវិតឆ្លងសមុទ្រ ពីបារាំង ទៅអង់គ្លេស។ សូមបញ្ជាក់ថា ឆ្នេរសមុទ្រដែលស្ថិតនៅភាគខាងជើងបង្អស់ នៃប្រទេសបារាំង មានចំងាយតែជាង៣០គីឡូម៉ែត្រតែប៉ុណ្ណោះ។ តំបន់នេះបានក្លាយជាគោលដៅ នៃក្រុមអន្តោប្រវេសន៍ខុសច្បាប់ រាប់ពាន់នាក់ជារៀងរាល់ឆ្នាំ ដែលមានបំណងឆ្លងទៅប្រទេសអង់គ្លេស។
ចុះផ្សាយនៅថ្ងៃ៖
ស្តាប់ - ០២:៤៦
លោកស្រី Priti Patel រដ្ឋមន្ត្រីក្រសួងមហាផ្ទៃអង់គ្លេស បានបញ្ជាក់នៅតាមកញ្ចក់ទូរទស្សន៍ BBC ថា អង់គ្លេសនិងបារាំង បានចុះកិច្ចព្រមព្រៀងមួយទៀត កាលពីថ្ងៃសៅរ៍ទី ២៨វិច្ឆិកា។ កិច្ចព្រមព្រៀងនេះ នឹងបន្ថែមមធ្យោបាយសំខាន់ៗ ដើម្បីឲ្យអាជ្ញាធរទាំងសងខាង អាចឈានទៅទប់ស្កាត់ ការឆ្លងដោយខុសច្បាប់ របស់ជនអន្តោប្រវេសន៍។
លោកស្រីរដ្ឋមន្ត្រីអង់គ្លេស បញ្ជាក់ថា ចាប់ពីថ្ងៃទី១ធ្នូទៅ ក្រៅពីបន្ថែមកម្លាំងឆ្មាំត្រួតពិនិត្យ យាមល្បាតនៅតាមចំណុចគោលដៅសំខាន់ នៅតាមឆ្នេរសមុទ្របារាំង គឺអាជ្ញាធរ និងបន្ថែមមធ្យោបាយបច្ចេកវិទ្យាតាមដាន ដូចជាការប្រើយានដ្រូន និងរ៉ាដា ដើម្បីតាមចាប់រូបភាព ងាយស្រួលធ្វើអន្តរាគមន៍ ស្ទាក់ ទប់ស្កាត់ឲ្យទាន់ពេលវេលា។
សូមរំលឹកថា សំណុំរឿងគ្រប់គ្រង ជនអន្តោប្រវេសន៍ខុសច្បាស់នេះ គឺជាប្រភពនៃការមិនចុះសម្រុងគ្នាមួយ រវាងអាជ្ញាធរបារាំង និងអាជ្ញាធរអង់គ្លេស។ អង់គ្លេសចោទបារាំង ថាធ្វេសប្រហែស មិនរៀបចំទប់ស្កាត់ឲ្យបានម៉ដ្ឋចត់ បណ្តោយឲ្យជនអន្តោប្រវេសន៍ឆ្លងចូលមកទឹកដីអង់គ្លេស។ ចំណែក បារាំងវិញ បានលើកឡើងថា វាជាភារកិច្ច របស់អាជ្ញាធរអង់គ្លេស ដែលត្រូវយាមល្បាត ត្រួតពិនិត្យព្រំដែនរបស់ខ្លួន ព្រោះថាអាជ្ញាធរបារាំង មិនអាចទៅហាមឃាត់បំណងធ្វើដំណើរទៅអង់គ្លេស របស់ក្រុមជនអន្តោប្រវេសន៍ឡើយ។ ភាគីបារាំង បានទាមទារ ថាប្រសិនបើអង់គ្លេស ចង់ធ្វើការនេះឲ្យមានប្រសិទ្ធិភាព គឺត្រូវតែចូលរួមផ្តល់ជាមធ្យោបាយ សម្ភារៈនិងថវិកា ឲ្យអាជ្ញាធរបារាំង។
សូមបញ្ជាក់ថា ឆ្នេរសមុទ្រតំបន់កាឡេ (Calais) ភាគខាងជើងប្រទេសបារាំង មានចំងាយតែជាង៣០គីឡូម៉ែត្រប៉ុណ្ណោះ ពីឆ្នេរសមុទ្រអង់គ្លេស។ ពេលមេឃស្រឡះ គេអាចមើលឃើញត្រើយម្ខាងទៀត បានយ៉ាងច្បាស់ ដែលនេះបានញ៉ាំងឲ្យក្រុមឈ្មួចទុច្ចរិត រកស៊ីដឹកបញ្ជូនជនអន្តោប្រវេសន៍ តាមទូកពោងតូចៗ ឆ្លងពីបារាំង ទៅអង់គ្លេស។ ជនអន្តោប្រវេសន៍ខ្លះ បានទាំងប្រថុយជីវិត ហែលទឹកសមុទ្រទៅផង។ កាលពីចុងខែតុលា ទូកជនអន្តោប្រវេសន៍មួយបានលិច បណ្តាលឲ្យស្លាប់មនុស្ស៤នាក់ និងបាត់ខ្លួន៣នាក់។
គិតពីខែមករា ដល់ចុងខែសីហា ឆ្នាំ២០២០ អាជ្ញាធរបារាំង បានស្ទាក់ឃាត់បានជនអន្តោប្រវេសន៍នៅក្នុងសមុទ្រតំបន់នេះ បានចំនួន៦២០០នាក់។ ចំណែកនៅក្នុងមួយខែកញ្ញាកន្លងទៅនេះវិញ គេបានឃាត់ជនអន្តោប្រវេសន៍ ចំនួន១៣០០នាក់ ដែលមានបំណងឆ្លងទៅអង់គ្លេស។ ភាគច្រើននៃជនអន្តោប្រវេសន៍ដែលមានបំណងឆ្លងទៅអង់គ្លេស គឺមកពីអ៊ីរ៉ង់ អ៊ីរ៉ាក់ អាហ្វហ្កានីស្ថាន និងមកពីដែនដីគួកឌីស្ថាន។ នៅព្រឹកថ្ងៃអាទិត្យទី២៩វិច្ឆិកានេះ ក្រុមសង្គ្រោះសមុទ្របារាំង បានស្រង់មនុស្សចំនួន៤៥នាក់ ក្នុងនោះមានស្ត្រីមានផ្ទៃពោះ និងមានកុមារផង ដែលទូករបស់ពួកគេកំពុងតែហៀបលិចក្នុងសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ