អាមេរិកនិងសម្ព័ន្ធមិត្តថ្កោលទោសពួកតាលីបង់ជុំវិញការសម្លាប់អតីតមន្ត្រីរដ្ឋាភិបាល
ចុះផ្សាយនៅថ្ងៃ៖
ស្តាប់ - ០៦:២៦
សហរដ្ឋអាមេរិកនិងប្រទេសសម្ព័ន្ធមិត្ត កាលពីថ្ងៃសៅរ៍ ៤ធ្នូម្សិលមិញ បានថ្កោលទោសពួកតាលីបង់ នៅក្រោយរបាយការណ៍ក្រុមសិទ្ធិមួយមនុស្សបង្ហាញថាទាហានតាលីបង់បន្តតាមប្រមាញ់សម្លាប់សមាជិកនៃអតីតមន្រ្តីនិងកងទ័ពរដ្ឋាភិបាលអាហ្វហ្កានីស្ថាន។ បើយោងតាមអង្គការឃ្លាំមើលសិទ្ធិមនុស្សមានអតីតទាហានរដ្ឋាភិបាលជាច្រើននាក់ត្រូវបានគេប្រហារជីវិតចាប់តាំងពីពាក់កណ្តាលខែសីហាមក។ តើរបាយការណ៍និយាយអ្វីខ្លះពីការធ្វើទុក្ខបុកម្នេញរបស់របបតាលីបង់? ហើយថាតើអាមេរិក និងសម្ព័ន្ធមិត្តមានប្រតិកម្មតបយ៉ាងណាជុំវិញបញ្ហានេះ?
របាយការណ៍អំពីការសម្លាប់អតីតមន្ត្រីរដ្ឋាភិបាលអាហ្វហ្កានីស្ថាន
នៅដើមសប្តាហ៍នេះ អង្គការឃ្លាំមើលសិទ្ធិមនុស្ស(HRW) បានចេញរបាយការណ៍មួយកម្រាស់ ២៥ ទំព័រទាក់ទិនបញ្ហាសិទ្ធិមនុស្សនៅក្នុងប្រទេសអាហ្វហ្កានីស្ថានក្រោមការគ្រប់គ្រងរបស់ពួកតាលីបង់។
របាយការណ៍នេះបង្ហាញថាតាំងពីពួកតាលីបង់ចូលកាន់កាប់ប្រទេសជិតបួនខែមកនេះ មានការប្រហារជីវិតនិងការចាប់ពង្រត់អតីតមន្ត្រីរដ្ឋាភិបាលអាហ្វហ្កានីស្ថានចំនួនជាង១០០ នាក់។ ពួកគេទាំងនោះមានតាំងពីបុគ្គលិកយោធា ប៉ូលិស ភ្ញាក់ងារស៊ើបការសម្ងាត់ និងកងជីវពល។
របាយការណ៍កម្រាស់២៥ ទំព័រខាងលើបានកត់ត្រាដែរថាមានការសម្លាប់សមាជិកចំនួន ៤៧ នាក់នៃអតីតកងកម្លាំងសន្តិសុខអាហ្វហ្កានីស្ថានដែលបានចុះចាញ់ឬក៏ត្រូវបានចាប់ខ្លួនដោយពួកតាលីបង់នៅចន្លោះពីថ្ងៃទី១៥ សីហា ដល់ថ្ងៃទី៣១ ខែតុលា ឆ្នាំ២០២១នេះ។
សហរដ្ឋអាមេរិកនិងសម្ព័ន្ធមិត្តថ្កោលទោសរបបតាលីបង់
ប៉ុន្មានថ្ងៃក្រោយអង្គការឃ្លាំមើលសិទ្ធិមនុស្សចេញផ្សាយរបាយការណ៍ដែលចងក្រងឯកសារអំពីការសម្លាប់ឬក៏ការចាប់ខ្លួនអតីតមន្ត្រីរដ្ឋាភិបាលអាហ្វហ្កានីស្ថាន អាមេរិកនិងក្រុមប្រទេសសម្ព័ន្ធមិត្តជាច្រើន បានចេញថ្កោសទោសចំពោះទង្វើរបស់ពួកតាលីបង់ដោយមិនបង្អង់ចាំយូរឡើយ។
នៅក្នុងសេចក្តីថ្លែងការណ៍រួមមួយ កាលពីថ្ងៃសៅរ៍ ទី៤ ធ្នូ ម្សិលមិញ ក្រុមប្រទេសចំនួន ២២ ដឹកមុខដោយអាមេរិករួមមាន សហភាពអឺរ៉ុប អូស្ត្រាលី អង់គ្លេស ជប៉ុន និងប្រទេសផ្សេងៗទៀតបានថ្កោលទោសពួកតាលីបង់ និងបានទាមទារឲ្យរបបអ៊ីស្លាមមួយនេះគោរពតាមការសន្យារបស់ខ្លួនដែលថាមិនធ្វើទុក្ខបុកម្នេញ ឬកាប់សម្លាប់អតីតមន្ត្រីនិងអតីតកងទ័ពរដ្ឋាភិបាលអាហ្វហ្កានីស្ថាននោះទេ។
តាមរយៈសេចក្តីថ្លែងការណ៍រួមគ្នា សហរដ្ឋអាមេរិកនិងក្រុមប្រទេសសម្ព័ន្ធមិត្តបានគូសបញ្ជាក់ពីការព្រួយបារម្ភយ៉ាងខ្លាំងរបស់ពួកគេចំពោះការរកឃើញរបស់របាយការណ៍នៃអង្គការសិទ្ធិមនុស្ស។ ពួកគេបានអំពាវនាវឲ្យមានការស៊ើបអង្កេតពេញលេញលើគ្រប់ករណីនៃការសម្លាប់ក្រៅប្រព័ន្ធតុលាការ និងការបាត់ខ្លួនដោយបង្ខំ។ ចំណែកអ្នកដែលប្រព្រឹត្តខុសត្រូវតែទទួលខុសត្រូវចំពោះទង្វើរបស់ពួកគេ។
ទន្ទឹមនេះ អាមេរិកនិងសម្ព័ន្ធមិត្តដទៃទៀតបានអំពាវនាវផងដែរឲ្យក្រុមតាលីបង់អនុវត្តនូវការលើកលែងទោសដល់អតីតបុគ្គលិកយោធាអាហ្វហ្កានីស្ថាននៃរដ្ឋាភិបាលចាស់ដែលធ្លាប់ទទួលបានការគាំទ្រពីទីក្រុងវ៉ាស៊ីនតោន។
សម្រាប់អាមេរិកនិងសម្ព័ន្ធមិត្តសកម្មភាពតាមប្រមាញ់សម្លាប់របស់ពួកតាលីបង់ដែលមានក្នុងរបាយការណ៍គឺជាការរំលោភសិទ្ធិមនុស្សធ្ងន់ធ្ងរណាស់ ហើយវាផ្ទុយទៅនឹងការសន្យារបស់ពួកតាលីបង់ដែលធ្លាប់បានប្រកាសក្តែងៗថានឹងលើកលែងទោសគូប្រជែងរបស់ខ្លួន។
នៅក្នុងសេចក្តីថ្លែងការណ៍ដដែល ក្រុមប្រទេសដឹកមុខដោយអាមេរិកទាំងជាង ២០ ប្រទេសក៏បានរំឭកឡើងវិញដែរថាពួកគេនឹងទទួលស្គាល់ឬមិនទទួលស្គាល់របបគ្រប់គ្រងតាលីបង់គឺដោយអាស្រ័យលើសកម្មភាពជាក់ស្តែងរបស់ តែមិនមែនជាពាក្យសម្តីសន្យាតែមាត់ឡើយ។
ការរំលោភសិទ្ធិនៅអាហ្វហ្កានីស្ថាន
បញ្ហាគោរពសិទ្ធិមនុស្សនិងសិទ្ធិស្ត្រីជាដើមគឺជាចំណុចរស៊ើបខ្លាំងសម្រាប់របបតាលីបង់។ ចំណុចទាំងនេះ គឺជាឯកតាសម្រាប់សហគមន៍អន្តរជាតិជាពិសេសប្រទេសលោកខាងលិចវាស់វែងថ្លឹងថ្លែងមុននឹងប្រកាសទទួលស្គាល់រដ្ឋាភិបាលគ្រប់គ្រងដោយពួកតាលីបង់។
មេដឹកនាំថ្មីរបស់អាហ្វហ្កានីស្ថានបាននិងកំពុងស្វែងរកការទទួលស្គាល់ជាអន្តរជាតិចំពោះការគ្រប់គ្រងរបស់ពួកគេ។ មេដឹកនាំតាលីបង់សព្វថ្ងៃដែលចង់ទទួលបានការគោរពរាប់អានពីអន្តរជាតិ បានសន្យាថានឹងកែប្រែរបៀបគ្រប់គ្រងថ្មី។ ពួកគេបានប្រកាសថានឹងមិនសងសឹកគូប្រជែង គោរពសិទ្ធិស្រ្តីនិងគោរពសិទ្ធិសេរីភាពសារពត៌មានជាដើម។ល។
ក៏ប៉ុន្តែ អង្គការឃ្លាំមើលសិទិ្ធមនុស្សបាននិយាយនៅក្នុងរបាយការណ៍របស់ខ្លួនថាបន្ទាប់ពីចូលកាន់កាប់ប្រទេសវិញ មេដឹកនាំតាលីបង់បានបន្តអនុវត្តការដាក់ទណ្ឌកម្មដោយហិង្សាដដែលលើអតីតគូប្រជែង។
អង្គការសហប្រជាជាតិដែលយល់ថារបាយការណ៍របស់អង្គការឃ្លាំមើលសិទ្ធិមនុស្សគួរឲ្យទុកចិត្តបាន បានសម្តែងការព្រួយបារម្ភអំពីការតាមប្រមាញ់តាមសម្លាប់សមាជិកនៃអតីតមន្រ្តីនិងកងទ័ពរដ្ឋាភិបាលអាហ្វហ្កានីស្ថានពីសំណាក់ទាហាតាលីបង់ដើម្បីសងសឹក។
ដោយឡែក ទីក្រុងវ៉ាស៊ីនតោនបានជួបពិភាក្សាជាមួយមន្ត្រីតាលីបង់កាលពីដើមសប្តាហ៍នេះដែលជាជុំទីពីរនៃការពិភាក្សាចាប់តាំងពីការចាកចេញរបស់កងទ័ពអាមេរិក។ នៅក្នុងកិច្ចពិភាក្សាឯទីក្រុងដូហាប្រទេសកាតា មន្ត្រីអាមេរិកធ្លាប់បានជំរុញរួចហើយឲ្យក្រុមតាលីបង់ដែលជាអ្នកប្រកាន់វិន័យអ៊ីស្លាមតឹងរ៉ឹងផ្តល់សិទ្ធិទទួលបានការអប់រំដល់ស្ត្រី និងកុមារីនៅទូទាំងប្រទេស។
ក្នុងអំឡុងពេលពិភាក្សាជាមួយថ្នាក់ដឹកនាំតាលីបង់កាលណោះ អាមេរិកក៏បានសម្តែងផងដែរនូវការព្រួយបារម្ភយ៉ាងខ្លាំងរបស់ខ្លួនទាក់ទងនឹងការចោទប្រកាន់ជាច្រើនអំពីទង្វើរំលោភសិទ្ធិមនុស្សនៅក្នុងប្រទេសអាហ្វហ្កានីស្ថានក្រោមការគ្រប់គ្រងរបស់ពួកតាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ