អូមីក្រុងធ្វើឲ្យប្រទេសនៅអឺរ៉ុបចាត់វិធានការរឹតបន្តឹងនៅថ្ងៃបុណ្យឆ្លងឆ្នាំសកល
ចុះផ្សាយនៅថ្ងៃ៖
ស្តាប់ - ០៩:១១
ជាមួយនឹងសន្ទុះឆ្លងលឿនខ្លាំងនៃមេរោគបំប្លែងខ្លួន អូមីក្រុង ប្រទេសនៅអឺរ៉ុបចាប់ផើ្តមចាត់វិធានការរឹតបន្តឹងឡើងវិញនៅ ថ្ងៃបុណ្យឆ្លងឆ្នាំសកល ថ្ងៃសុក្រទី ៣១ធ្នូ២០២១។ មេរោគបំប្លែងខ្លួន អូមីក្រុង និងដែលតា បានធ្វើឲ្យចំនួនអ្នកឆ្លងថ្មី ស្ទុះកើនខ្លាំង បំបែកឯតទគ្គកម្ម រាល់ថ្ងៃ ដូចជានៅប្រទេសបារាំង ជាដើម ជាទី ដែលចំនួនមនុស្សឆ្លងកូវីដបានកើនឡើងដ៏ខ្ពស់ ដល់ទៅ ជាង ២សែននាក់ ក្នុងមួយថ្ងៃពុធម្សិលមិញ។ នៅក្នុងពិភពលោក ចំនួនមនុស្សឆ្លងមេរោគកូវីដ មានជាមធ្យម ជាង ៩សែននាក់ ក្នុងមួយថ្ងៃ ដែលជាចំនួនដ៏ច្រើន មិនធ្លាប់មាន គិតចាប់តាំងពីជំងឺកូវីដ បានផ្ទុះឡើងដំបូង នៅទីក្រុងវូហានប្រទេសចិន កាលពី២ឆ្នាំមុន។
នៅពេល ចំនួនអ្នកឆ្លងកូវីដថ្មីចេះតែកើនឡើង បំបែកឯតទគ្គកម្មរាល់ថ្ងៃ ប្រទេសមួយចំនួន នៅអឺរ៉ុប តាំងពីបារាំង អ៊ីតាលី ក្រិក អាល្លឺម៉ង់ ជាដើម បានបង្កើនវិធានការរឹតបន្តឹងបន្ថែម នៅក្នុងឱកាសថ្ងៃឆ្លងឆ្នាំសកល។
ពីថ្ងៃទី ២២ ដល់ថ្ងៃទី ២៨ធ្នូ មនុស្សប្រមាណ ៩៣៥០០០នាក់ ក្នុងពិភពលោកបានឆ្លងមេរោគកូវីដ ក្នុងមួយថ្ងៃៗ។ តួលេខរបស់ទីភ្នាក់ងារព័ត៌មានបារាំង AFP បានបង្ហាញថា បើប្រៀបធៀបសប្តាហ៍កន្លងទៅ ករណីឆ្លងកូវីដបានកើនឡើង ៣៧%។
ដោយសារជំងឺកូវីដនៅមិនទាន់ទៅណាឆ្ងាយ ដូច្នេះ គេមិនអាចរៀបចំពិធីបុណ្យឆ្លងឆ្នាំសកលដោយសេរី និងអធិកអធម ដូចកាលពីប៉ុន្មានឆ្នាំមុនៗនោះទេ។ ដូចឆ្នាំ ២០២០ ពិភពលោកត្រូវប្រារព្ធបុណ្យចូលឆ្នាំថ្មី ក្នុងបរិយាកាសដ៏ប្រុងប្រយ័ត្នបំផុត ដើម្បី ការពារ ទប់ស្កាត់ការឆ្លងរាលដាលជំងឺកូវីដ១៩ ជាពិសេស នៅក្នុងកាលៈទេសៈដែលមេរោគកូវីដបំប្លែងខ្លួនថ្មី អូមីក្រុង ងាយនឹងឆ្លង ហើយឆ្លងលឿនខ្លាំង ទ្វេរដងបើប្រៀបធៀបនឹងមេរោគដែលតា ដែលមានប្រភពមកពីឥណ្ឌា។
ប៉ុន្តែ ខុសពីឆ្នាំ ២០២០ ដែល ពិធីបុណ្យឆ្លងឆ្នាំសកលត្រូវធ្វើឡើងក្នុងបរិយាកាសដ៏តឹងតែង បំផុត ដោយសារត្រូវអនុវត្តវិធានការបិទខ្ទប់ប្រទេស បម្រាមគោចរ និងហាមមិនឲ្យគេធ្វើកម្មវិធីបុណ្យអធឹកអធម នៅឆ្នាំនេះ វិធានការសុខាភិបាល សម្រាប់ឱកាសបុណ្យឆ្លងឆ្នាំសកលមានលក្ខណៈធូរស្រាលជាងមុន។ ឧទាហរណ៍ នៅប្រទេសបារាំង ដោយសារតែករណីឆ្លងកូវីដថ្មី កើនឡើងលឿនស្លេវ ដូចបាញ់ព្រួញ ដល់ទៅ ជាង ២សែនករណីក្នុងមួយថ្ងៃយ៉ាងដូច្នេះ រដ្ឋាភិបាលបានផ្តោតសំខាន់លើយុទ្ធនាការចាក់វ៉ាក់សាំងដូសទី៣ ឬដូសជំរុញ។ នៅថ្ងៃពុធ បន្ថែមពីលើវិធានការថ្នាក់ជាតិ អាជ្ញាធរ នៅទីក្រុងប៉ារីស ក៏ដូចជានៅក្នុងតំបន់Iles de France ទាំងមូល ជាទីដែលនឹងអាចមានកម្មវិធីជួបជុំអបអរបុណ្យចូលឆ្នាំថ្មីច្រើននោះ បានសម្រេចចាត់វិធានការ តម្រូវឲ្យគេពាក់ម៉ាស នៅតាមផ្លូវឡើងវិញ ចំណែក បារដែលជាកន្លែងជួបជុំផឹកស៊ី រាំច្រៀង ត្រូវបិទទ្វារបន្តទៀត រហូតដល់ពាក់កណ្តាលខែមករា។
នៅប៉ារីស អាជ្ញាធរបានកាត់បន្ថយម៉ោង ជប់លៀងឆ្លងឆ្នាំ មកនៅត្រឹមម៉ោង ២ភ្លឺ ចំណែក ការជួបជុំផឹកស៊ី នៅកន្លែងសាធារណៈ ដើម្បីអបអរបុណ្យចូលឆ្នាំថ្មី ត្រូវហាមឃាត់។ តាមក្រសួងមហាផ្ទៃបារាំង ប៉ូលិស និងទាហានជិត ៩ពាន់នាក់ ត្រូវពង្រាយនៅយប់ថ្ងៃបុណ្យឆ្លងឆ្នាំដើម្បី ធានាឲ្យមានការគោរពវិធានការរឹតបន្តឹងសុខភាព។ អ្នកដែលប្រឆាំង មិនគោរព ពាក់ម៉ាស ជាដើម ត្រូវប្រឈមបង់ប្រាក់ពិន័យ ១៣៥អឺរ៉ូ។
នៅក្រិក អាជ្ញាធរបានហាមមិនឲ្យគេចាក់ភ្លេងនៅតាមភោជនីយដ្ឋាន និងនៅតាមបារ រង្គសាល ដើម្បី កាត់បន្ថយចំណង់របស់មនុស្សមិនឲ្យទៅជួបជុំ សប្បាយឆ្លងឆ្នាំ នៅក្រៅផ្ទះ។ នៅអាល្លឺម៉ង់ ក្រៅតែពីបញ្ជាឲ្យបិទរង្គសាល អាជ្ញាធរបានហាមមិនឲ្យមានការជួបជុំមនុស្សច្រើនជាង ១០នាក់ សម្រាប់អ្នកដែលបានចាក់វ៉ាក់សាំង និងអនុញ្ញាតឲ្យមានការជួបជុំតែរវាង២គ្រួសារប៉ុណ្ណោះ សម្រាប់អ្នកដែលមិនបានចាក់វ៉ាក់សាំង។ នៅប្រទេសម៉ិកស៊ិក អភិបាលក្រុងបានសម្រេចលុបចោលការប្រារព្ធពិធីបុណ្យចូលឆ្នាំថ្មីតែម្តង ដើម្បីបង្ការទប់ស្កាត់រលកឆ្លងថ្មី ដែលអាច ខ្លាំងដូចទឹកហូរបាក់ទំនប់ ដោយសារអូមីក្រុង។
មេរោគបំប្លែងខ្លួនអូមីក្រុងមិនសូវគ្រោះថ្នាក់ខ្លាំង ធ្វើឲ្យមនុស្សធ្លាក់ខ្លួនឈឺធ្ងន់ធ្ងរ ដូចជាមេរោគកូវីដ ដែលតា ប៉ុន្តែ ហេតុអ្វី គេត្រូវរឹតបន្តឹង នៅថ្ងៃបុណ្យឆ្លងឆ្នាំសកល?
អាជ្ញាធរសុខាភិបាលនៅតាមប្រទេសដែលកំពុងមានការឆ្លងខ្លាំង ដូចជាបារាំង អង់គ្លេស អាមេរិក ជាដើម ទទួលស្គាល់ថា ទោះជាករណីឆ្លងកូវីដបានកើនឡើង លឿនខ្លាំង ដោយសារមេរោគកូវីដបំប្លែងខ្លួន អូមីក្រុង ប៉ុន្តែ ចំនួនអ្នកជំងឺធ្លាក់ខ្លួនឈឺធ្ងន់ នៅតាមមន្ទីរពេទ្យ មិនសូវកើនឡើងខ្លាំង ដូចកាលពី១ឆ្នាំ មុននោះទេ។ ការអះអាងនេះបានបញ្ជាក់សាជាថ្មី មេរោគកូវីដបំប្លែងខ្លួន អូមីក្រុង ងាយឆ្លង ហើយឆ្លងលឿន ប៉ុន្តែ មិនសូវគ្រោះថ្នាក់ គំរាមកំហែងដល់ជីវិត ដូចជា មេរោគដែលតា។ ប៉ុន្តែ នេះមិនមែនមានន័យថា គេត្រូវមើលស្រាលវាដែរ។ ទោះជាអូមីក្រុងមិនគ្រោះថ្នាក់ធ្វើឲ្យអ្នកឆ្លងធ្លាក់ខ្លួនឈឺខ្លាំង ប៉ុន្តែ រឿងនេះ កើតមានសម្រាប់តែអ្នកដែលបានចាក់វ៉ាក់សាំងរួចហើយតែប៉ុណ្ណោះ។ ជាក់ស្តែង នៅអង់គ្លេស ក្រុមគ្រូពេទ្យបាននិយាយប្រាប់នាយករដ្ឋមន្រ្តីអង់គ្លេស ថា អ្នកដែលធ្លាក់ខ្លួនឈឺធ្ងន់៩០%ក្នុងបន្ទប់សង្រ្គោះបន្ទាន់ គឺជាអ្នកដែលមិនបានចាក់វ៉ាក់សាំងដូសជំរុញ។
បើសិន អូមីក្រុងងាយឆ្លង និងឆ្លងលឿនខ្លាំង ជាងមេរោគដែលតា ដល់ទៅ ២ដង យ៉ាងដូច្នេះ វានឹងឆ្លងរីកសាយភាយទៅដល់អ្នកដែលមិនបានចាក់វ៉ាក់សាំង និងអ្នកដែលនៅមិនទាន់បានចាក់វ៉ាក់សាំងដូសទី៣ ឬដូសជំរុញ។ អ្វីដែលគេឲ្យគេបារម្ភខ្លាំងពីផលវិបាករបស់វា គឺការដាក់សម្ពាធ ទៅលើប្រព័ន្ធមន្ទីរពេទ្យ។
នៅថ្ងៃពុធម្សិលមិញ អគ្គនាយកអង្គការសុខភាពពិភពលោកបានព្រមានសាជាថ្មី ពីការគំរាមកំហែងរបស់អូមីក្រុងទៅលើប្រព័ន្ធមន្ទីរពេទ្យ និងសុខភាពរបស់បុគ្គលិកពេទ្យ ដែលកាន់តែហត់នឿយខ្លាំង ដោយសារ ត្រូវព្យាបាល អ្នកជំងឺកូវីដ ២ឆ្នាំមកនេះ។ ត្រូវដឹងថា បើទោះជាអូមីក្រុងមិនគ្រោះថ្នាក់ដល់ជីវិត ប៉ុន្តែ វាបានឆ្លងលឿនទៅមនុស្សគ្រប់មជ្ឈដ្ឋាន។ មន្ទីរពេទ្យ ទីភ្នាក់ងារជួយសង្រ្គោះ ដូចជា Pompier ក្រុមពន្លត់អគ្គិភ័យ ដែលមាននាទីជាអ្នកដឹកអ្នកជំងឺទៅពន្ទីរពេទ្យដែរនោះចាប់ផ្តើមខ្វះបុគ្គលិកបណ្តើរៗ ដោយសារពួកគេមួយចំនួន បានឆ្លងមេរោគកូវីដ ឬត្រូវធ្វើចត្តាឡីស័ក ដោយសារជាករណីជាប់ពាក់ព័ន្ធនឹងអ្នកជំងឺកូវីដ។ បើសិនមន្ទីរពេទ្យ ខ្វះបុគ្គលិកធ្វើការ បូកផ្សំនឹងចំនួនអ្នកជំងឺកូវីដ ឡើងចាល់នៅមន្ទីរពេទ្យ យ៉ាងដូច្នេះ ចង់ឬមិនចង់ នឹងអាចមនុស្សស្លាប់ ដោយសារតែគ្មានការព្យាបាលដិតដល់។
ការចាក់វ៉ាក់សាំងមិនស្មើភាពគ្នាក្នុងពិភពលោកផ្តល់ឱកាសឲ្យមេរោគកូវីដបំប្លែងខ្លួនថ្មីបន្ត លេចមុខគំរាមកំហែងពិភពលោក
នៅឆ្នាំមុន គេធ្លាប់សង្ឃឹមច្រើនថា វ៉ាក់សាំងនឹងជួយឲ្យគេងើបចាកផុត ពីវិបត្តិកូវីដ។ ប៉ុន្តែ ២ឆ្នាំ មកហើយ មេរោគកូវីដនៅតែរុកគួនមនុស្សលោកមិនឲ្យបានសុខ នោះបើទោះបីជាគេបានរកឃើញ វ៉ាក់សាំងបង្ការមេរោគកូវីដក្តី។ មានមតិមួយចំនួនបានចោទឡើងវិញ ពីសារៈប្រយោជន៍នៃ ថ្នាំបង្ការជំងឺកូវីដ។
វ៉ាក់សាំងបង្ការជំងឺកូវីដ ដែលគេបានរកឃើញ និងផលិតចែកចាយ ចាក់ពេញពិភពលោកសព្វថ្ងៃ នៅមិនទាន់មានសមត្ថភាពទៅប្រយុទ្ធប្រឆាំង ធ្វើឲ្យមេរោគកូវីដរលាយបាត់ពីផែនដីនោះទេ។ ប៉ុន្តែ វាបានជួយឲ្យអ្នកដែលបានចាក់ពេញគ្រប់ដូសហើយ មិនធ្លាក់ខ្លួនឈឺធ្ងន់។ រឿងនេះសំខាន់ណាស់។ គេនៅចាំបានថា នៅពេល មេរោគកូវីដកំពុងធ្វើទុក្ខខ្លាំង ហើយគេនៅមិនទាន់មានវ៉ាក់សាំង នៅចុងឆ្នាំ ២០២០ មនុស្សស្លាប់ដោយសារកូវីដនៅក្នុងពិភពលោកមានចំនួនច្រើន រាប់ម៉ឺននាក់ ក្នុងមួយថ្ងៃៗ ប៉ុន្តែ ចាប់តាំងពីមានវ៉ាក់សាំង មនុស្សដែលធ្លាក់ខ្លួនឈឺធ្ងន់ និងត្រូវចូលព្យាបាលនៅ បន្ទប់សង្រ្គោះបន្ទាន់ ហើយនិងចំនួនមនុស្សស្លាប់ បានធ្លាក់ថយចុះ ជាបន្តបន្ទាប់ នៅ៣សប្តាហ៍ចុងក្រោយនេះ នោះបើទោះបីជាករណីឆ្លងកូវីដបានកើនឡើងដល់កម្រិតមួយដ៏ខ្ពស់ក៏ដោយ។
ម្យ៉ាង គេជឿថា វ៉ាក់សាំងបង្ការកូវីដនៅតែមិនទាន់អាចយកឈ្នះ បង្រ្កាបឲ្យមេរោគកូវីដរលត់រលាយទៅវិញ បាន ក៏ដោយសារតែ កម្រិតចាក់វ៉ាក់សាំងបង្ការកូវីដ នៅតែមិនពេញលេញ គ្រប់ទីកន្លែងក្នុងពិភពលោក។ ការចាក់វ៉ាក់សាំងបង្ការកូវីដប្រមូលផ្តុំច្រើនតែនៅបណ្តាប្រទេសអ្នកមាន ចំណែក នៅប្រទេសក្រីក្រ នៅតែខ្វះវ៉ាក់សាំង គ្មានវ៉ាក់សាំង គ្រប់គ្រាន់សម្រាប់ចាក់ឲ្យប្រជាជនរបស់ខ្លួន។ ដរាបណា ការចែកចាយវ៉ាក់សាំង នៅតែមិនស្មើភាគគ្នា នៅតែលំអៀងទៅរកប្រទេសអ្នកមានមួយក្តាប់តូច នោះ ទោះវ៉ាក់សាំងរកឃើញថ្មី មានប្រសិទ្ធិភាពប៉ុណ្ណា ក៏នៅតែមិនអាចទៅលុបបំបាត់មេរោគកូវីដបានដែរ។ មេរោគកូវីដ ដែលសកម្មខ្លាំង ក្នុងចំណោមប្រជាជនដែលគ្មានបានចាក់វ៉ាក់សាំង កាន់តែអាចផ្លាស់ប្តូររូបរាង បំប្លែងខ្លួនថ្មី រហូត ហើយនិងនៅតែអាចឆ្លងរាលដាល គំរាមកំហែងពិភពលោក គ្មានថ្ងៃបញ្ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ