ចិនប្រកាសថានឹងនៅតែបន្តធ្វើទំនើបកម្មសព្វាអាវុធនុយក្លេអ៊ែរ
ចុះផ្សាយនៅថ្ងៃ៖
ស្តាប់ - ០៦:៤៨
នៅថ្ងៃអង្គារ ទី៤ មករា ឆ្នាំ២០២២នេះ ស្របពេលបញ្ជាក់ថានឹងនៅតែបន្តធ្វើទំនើបកម្មសព្វាវុធនុយក្លេអ៊ែររបស់ខ្លួន ចិនបានឆ្លៀតទាមទារឲ្យរុស្ស៊ីនិងអាមេរិកកាត់បន្ថយអាវុធនុយក្លេអ៊ែរទៅវិញ។ សេចក្តីប្រកាសរបស់ចិនធ្លាក់មកក្រោយប្រទេសមហាអំណាចពិភពលោករួមមានអាមេរិក រុស្ស៊ី អង់គ្លេស បារាំង និងចិនខ្លួនឯងផងទើបចេញសេចក្តីថ្លែងការណ៍រួមគ្នាសន្យាមិនឲ្យមានសង្រ្គាមនុយក្លេអ៊ែរ។
នៅក្នុងសេចក្តីថ្លែងការណ៍រួមដ៏កម្រមួយ ប្រទេសមហាអំណាចនុយក្លេអ៊ែរចំនួន ៥ដែលជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិរួមមានអាមេរិក ចិន រុស្ស៊ី អង់គ្លេស និងបារាំងបានសន្យាបញ្ចៀសមិនឲ្យមានសង្គ្រាមនុយក្លេអ៊ែរនោះទេ។
ប្រទេសទាំង ៥បានប្រកាសថាគ្មានអ្នកណាម្នាក់ឬប្រទេសណាមួយនឹងទទួលជ័យជម្នះពីការធ្វើសង្រ្គាមនុយក្លេអ៊ែរឡើយ ហើយបានសន្យាថានឹងពង្រឹងវិធានការរបស់ពួកគេដើម្បីទប់ស្កាត់ការប្រើប្រាស់អាវុធនុយក្លេអ៊ែរដោយគ្មានការអនុញ្ញាតឬក៏ដោយអចេតនា។
ចិនប្រកាសថានឹងបន្តធ្វើទំនើបកម្មសព្វាអាវុធនុយក្លេអ៊ែរ
ក៏ប៉ុន្តែនៅមួយថ្ងៃក្រោយចេញសេចក្តីថ្លែងការណ៍ ពោលគឺនៅថ្ងៃអង្គារ ទី៤ មករា ឆ្នាំ២០២២នេះ ចិនបានគូសបញ្ជាក់ថានឹងនៅតែបន្តធ្វើទំនើបកម្មសព្វាវុធនុយក្លែអ៊ែររបស់ខ្លួន និងបានឆ្លៀតទាមទារឲ្យអាមេរិក និងរុស្ស៊ីកាត់បន្ថយអាវុធប្រភេទនេះទៀតផង។
ទីក្រុងប៉េកាំងបានពន្យល់ប្រាប់ថាការបន្តធ្វើទំនើបកម្មអាវុធនុយក្លេអ៊ែររបស់ខ្លួនគឺក្រោមហេតុផលសន្តិសុខការពារសុវត្ថិភាពជាតិដែលជាហេតុផលឲ្យគេអាចទុកចិត្តចិនបាន។
ការប្រកាសរបស់ប្រទេសចិនធ្វើឲ្យគេយល់កាន់តែច្បាស់ណាស់ថា ការនិយាយឬពាក្យសន្យាក្នុងការកាត់បន្ថយការរីកសាយភាយអាវុធនុយក្លេអ៊ែរគឺជារឿងងាយស្រួលទេ ក៏ប៉ុន្តែការអនុវត្តន៍ជាក់ស្តែងទើបវាពិបាក ជាពិសេសនៅចំពេលដែលភាពតានតឹងនិងការប្រឈមមុខដាក់គ្នាកាន់កើនឡើងរវាងមហាអំណាចពិភពលោកដូចជាចិននិងអាមេរិក ជាឧទាហរណ៍ជាក់ស្តែងស្រាប់។
ទាក់ទងចំណុចនេះគួរជ្រាបថាបើយោងតាមវិទ្យាស្ថានស្រាវជ្រាវសន្តិភាពអន្តរជាតិស្តុកខុល (Sipri) សហរដ្ឋអាមេរិកមានអាវុធនុយក្លេអ៊ែរចំនួនប្រមាណ ៥ ៥៥០ នៅក្នុងខែមករា ឆ្នាំ ២០២១ ចំណែកចិនកាលណោះវិញមានខ្ទង់ ៣៥០។
ពិភពលោកកំពុងបារម្ភពីការធ្វើទំនើកម្មសព្វាវុធរបស់ចិន
ប្រទេសចិនបាននិងកំពុងកសាងសមត្ថភាពសព្វាវុធរបស់ខ្លួនក្នុងល្បឿនដ៏លឿន។ ក្រុមអ្នកជំនាញសង្កេតឃើញថា ចិនមានភាពជឿនលឿនកាន់តែខ្លាំងនៅក្នុងវិស័យបច្ចេកវិទ្យាមីស៊ីល អាវុធនុយក្លេអ៊ែរ និងបញ្ញាសិប្បនិម្មិត។
ចិនឥឡូវនេះមិនដូចចិនកាលពីសម័យមុនឡើយ។ លោកប្រធានាធិបតី ស៊ី ជីនពីង បានចេញបញ្ជាឲ្យកងកម្លាំងប្រដាប់អាវុធរបស់ចិនធ្វើទំនើបកម្មឲ្យបាននៅឆ្នាំ ២០៣៥ និងថាចិនគួរតែក្លាយជាមហាអំណាចយោធាលំដាប់ពិភពលោកដែលមានសមត្ថភាពប្រយុទ្ធ និងឈ្នះសង្គ្រាមនៅឆ្នាំ ២០៤៩។ វាជាកិច្ចការនិងមហិច្ឆតាដ៏ធំមួយ ប៉ុន្តែមហាយក្សចិនបានកំណត់គោលដៅរបស់ខ្លួននេះរួចហើយ។
នៅប៉ុន្មានឆ្នាំចុងក្រោយនេះ មានការព្រួយបារម្ភជាសកលកាន់តែខ្លាំងឡើងអំពីទំនើបកម្មយោធារបស់ចិន ជាពិសេសបន្ទាប់ពីកងទ័ពចិនបានបាញ់សាកល្បងមីស៊ីលអ៊ីពែរសូនិកដែលមានល្បឿនលឿនជាងសំឡេងដល់ទៅ ៥ដង កាលពីខែសីហា ឆ្នាំ២០២១ កន្លងទៅ។ ក្រៅពីមានល្បឿនលឿនខ្លាំង មីស៊ីលអ៊ីពែរសូនិកដ៏ទំនើបនេះអាចបញ្ជានិងបត់បែនតាមចិត្តដែលធ្វើឲ្យប្រព័ន្ធរ៉ាដាពិបាកតាមចាប់វាបានណាស់។
ទីក្រុងវ៉ាស៊ីនតោនដែលតែងតែចោទក្រុងប៉េកាំងថាបានសាងសង់សង់ឃ្លាំងអាវុធនុយក្លេអ៊ែរយ៉ាងឆាប់រហ័ស ក៏បាននិយាយដែរថាប្រទេសចិនកំពុងពង្រីកអាវុធនុយក្លេអ៊ែររបស់ខ្លួន ជាមួយនឹងចំនួនក្បាលគ្រាប់នុយក្លេអ៊ែររហូតដល់ប្រមាណ ៧០០ នៅឆ្នាំ ២០២៧ និងអភិវឌ្ឍដល់ប្រមាណជា ១ ០០០ នៅឆ្នាំ ២០៣០។
ចិនការពារគោលនយោបាយអាវុធនុយក្លេអ៊ែររបស់ខ្លួន
ការពិតណាស់ ចិននៅតែការពារគោលជំហររបស់ខ្លួនជានិច្ច។ ជាក់ស្តែងនៅថ្ងៃអង្គារនេះ ចិនបានការពារគោលនយោបាយអាវុធនុយក្លេអ៊ែររបស់ខ្លួន ហើយឆ្លៀតនិយាយដែរថាគឺរុស្ស៊ី និងអាមេរិកដែលរហូតមកដល់ពេលនេះជាមហាអំណាចនុយក្លេអ៊ែរដ៏ធំបំផុតរបស់ពិភពលោកវិញទេ ដែលគួរកាត់បន្ថយអាវុធនុយក្លេអ៊ែររបស់ពួកគេ។
លោកហ្វូ ខុង (Fu Cong) ប្រធាននាយកដ្ឋានគ្រប់គ្រងអាវុធនៅក្រសួងការបរទេសចិនបាននិយាយប្រាប់ក្រុមអ្នកសារព័ត៌មានថាអាមេរិក និងរុស្ស៊ី មានក្បាលគ្រាប់នុយក្លេអ៊ែរច្រើនលើសលុបពោលគឺរហូតដល់ប្រមាណជា ៩០% នៃចំនួនសរុបទាំងអស់ក្នុងពិភពលោក។ ដូច្នោះហើយ សម្រាប់ទីក្រុងប៉េកាំង ប្រទេសទាំងពីរនេះដែលជាអ្នកគួរតែកាត់បន្ថយសព្វាវុធនុយក្លេអ៊ែររបស់ពួកគេដូចបានសន្យា។
ទន្ទឹមនេះ ប៉េកាំងបានក៏ច្រានចោលផងដែរនូវការចោទប្រកាន់របស់វ៉ាស៊ីនតោនដែលថាប្រទេសចិនកំពុងបង្កើនសមត្ថភាពនុយក្លេអ៊ែររបស់ខ្លួនយ៉ាងសន្ធឹក។ ប្រធាននាយកដ្ឋានគ្រប់គ្រងអាវុធរបស់ចិន អះអាងថាទីក្រុងប៉េកាំងតែងតែប្រកាន់ភ្ជាប់នូវគោលនយោបាយមិនប្រើប្រាស់អាវុធនុយក្លេអ៊ែរ និងរក្សាសមត្ថភាពនុយក្លេអ៊ែររបស់ខ្លួននៅត្រឹមកម្រិតតិចតួចបំផុតដែលជាកម្រិតត្រូវការក្រោមហេតុផលសន្តិសុខជាតិតែប៉ុណ្ណោះ។
គួរជ្រាបថា ទំនាក់ទំនងរវាងទីក្រុងប៉េកាំងនិងទីក្រុងវ៉ាស៊ីនតោនមានភាពតានតឹងខ្លាំងជុំវិញបញ្ហាជាច្រើនបន្តបន្ទាប់គ្នាក្នុងនោះក៏មានដែរចេតនារបស់ចិនក្នុងការបង្រួបបង្រួមតៃវ៉ាន់ដោយប្រើកម្លាំងទ័ពប្រសិនបើចាំបាច់។
យ៉ាងណាក៏ដោយ ភាគីចិនបានបដិសេធជុំវិញការលើកឡើងទាក់ទងនឹងលទ្ធភាពនៃការដាក់ពង្រាយអាវុធនុយក្លេអ៊ែររបស់ចិននៅជិតច្រកសមុទ្រតៃវ៉ាន់។ សម្រាប់ចិន អាវុធនុយក្លេអ៊ែរមិនមែនប្រើសម្រាប់ធ្វើសង្គ្រាម ឬប្រយុទ្ធគ្នានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ