សង្គ្រាមអ៊ុយក្រែន ៖ លោកខាងលិចផាត់រុស្ស៊ីចេញពីប្រព័ន្ធអនុគ្រោះពាណិជ្ជកម្ម
ចុះផ្សាយនៅថ្ងៃ៖
ស្តាប់ - ០៧:៥០
ចូលដល់ថ្ងៃទី១៧ កងទ័ពរុស្ស៊ីបង្កើនការវាយប្រហារកាន់តែសន្ធាប់ឡើង នៅតាមក្រុងធំៗផ្សេងៗរបស់អ៊ុយក្រែន ហើយបន្តការបាញ់ផ្លោងលើលំនៅដ្ឋាននិងរចនាសម្ព័ន្ធស៊ីវិល ជាពិសេសនៅក្រុងកំពង់ផែម៉ារីយូប៉ូល។ បើស្ថានភាពនៅតែបន្តបែបនេះ ក្រុមលោកខាងលិចព្រមាននឹងដាក់ទណ្ឌកម្មថ្មីដ៏ធ្ងន់ធ្ងរបន្ថែមទៀត។ បស្ចិមលោកនិងក្រុមប្រទេសមហាឧស្សាហកម្មហ្សេ៧ បានលុបឈ្មោះរុស្ស៊ីចេញពីបញ្ជីរដ្ឋទទួលការអនុគ្រោះពន្ធ។ សហភាពអឺរ៉ុបបានសម្រេចបង្កើនកញ្ចប់ថវិកាទ្វេមួយជាពីរសម្រាប់ផ្តល់ជំនួយសព្វាវុធដល់អ៊ុយក្រែន។
បើតាមប្រភពអ៊ុយក្រែន កងទ័ពរុស្ស៊ីកំពុង សម្រុក វាយខ្លាំង នៅរដ្ឋធានី និងក្រុងធំៗ នៅភាគខាងកើត និងខាងត្បូងប្រទេស។ កងកម្លាំងរុស្ស៊ីបានរុលមកដល់កាន់តែកៀកមាត់ច្រកចូលក្រុងនៅទិសខាងកើតរដ្ឋធានីកៀវ និងចាប់វាយប្រហារលើទីតាំងការពារអ៊ុយក្រែន នៅខាងលិចនិងខាងជើងរដ្ឋធានីទៀត ក្នុងបំណងឡោមព័ទ្ធបិទខ្ទប់ក្រុងកៀវតែម្តង។ នៅភាគខាងត្បូងប្រទេសវិញ ជាពិសេសនៅក្រុងកំពង់ផែម៉ារីយូប៉ូល ជាយុទ្ធសាស្ត្រ ដែលទាហានរុស្ស៊ីបាញ់ជម្រំ ជាង១០ថ្ងៃមកហើយនោះ ភាពហិនហោចមានខ្លាំងណាស់។ បន្ទាប់ពីបានវាយប្រហារមន្ទីរសម្ភព រុស្ស៊ីបានវាយផ្លោងលើវិហារអ៊ីស្លាមមួយ នៅក្រុងមារីយូប៉ូល បណ្តាលឱ្យស្លាប់ជនស៊ីវិលប្រមាណ៨០នាក់ ក្នុងនោះខ្លះជាជនជាតិតួកគីផង។ នេះបើតាមសារ របស់រដ្ឋមន្ត្រីក្រសួងការបរទេសអ៊ុយក្រែន នៅថ្ងៃសៅរ៍នេះ។
បង្កើនជំនួយសព្វាវុធ បង្កើនទណ្ឌកម្ម
ប្រឈមនឹងទង្វើរបស់រុស្ស៊ី លោកខាងលិចគ្មានអ្វីក្រៅពីបន្តប្រើអាវុធសេដ្ឋកិច្ច គឺការដាក់ទណ្ឌកម្ម មួយហើយមួយទៀត ដាក់លើរុស្ស៊ី ដោយសង្ឃឹមថានឹងអាចបញ្ឈប់មហច្ឆិតាលោកពូទីនបាន។ ក្រោយពីជួបប្រជុំគ្នាអស់ពីរថ្ងៃដែលផ្តោតជាពិសេសលើសង្គ្រាមអ៊ុយក្រែន សហភាពអឺរ៉ុប បានប្រកាសបង្កើនជំនួយសព្វាវុធសម្រាប់អ៊ុយក្រែន ទ្វេដង ដោយសម្រេចទម្លាយថវិកាចំនួន ៥០០លានបន្ថែម ពីទឹកប្រាក់៥០០លានប្រកាលកាលពីលើកមុន ដែលសរុបទៅឡើងដល់ ១០០០លានអឺរ៉ូ។ នេះជាកញ្ចប់ថវិកាដ៏ធំជាប្រវត្តិសាស្ត្រសហភាពអឺរ៉ុបដែលយកទៅប្រើប្រាស់ក្នុងជំនួយយោធា។ ទឹកប្រាក់នេះ នឹងយកទៅសងរដ្ឋនីមួយៗដែលបានបញ្ចេញអាវុធក្នុងស្តុកទៅឱ្យអ៊ុយក្រែន។ រដ្ឋាភិបាលអ៊ុយក្រែនបានស្នើសុំចំៗនូវសព្វាវុធដែលស្រួលប្រើ និងដែលទាហានអ៊ុយក្រែនអាចប្រើកើត ដូចជា មីស៊ីលបាញ់យន្តហោះ មីស៊ីលបាញ់រថក្រោះ។ អាវុធទាំងនេះបានជួយអ៊ុយក្រែនឱ្យបង្អាក់និងពន្យឺតដំណើររបស់ងកទ័ពរុស្ស៊ីបានច្រើន។
សមាជិកសហភាពអឺរ៉ុបទាំង២៧ប្រទេស បានត្រូវរ៉ូវគ្នា បង្ហាញសាមគ្គីភាពនយោបាយជាមួយអ៊ុយក្រែនដោយប្រកាសថា អ៊ុយក្រែនជាគ្រួសារអឺរ៉ុប និងប្រកាសពង្រឹងពង្រីកកិច្ចព្រមព្រៀងអឺរ៉ុបអ៊ុយក្រែនចុះហត្ថលេខាកាលពីឆ្នាំ២០១៤។ តែមិនអឺរ៉ុបមិនបាននិយាយជាផ្លូវការចូល រឿងអ៊ុយក្រែនជាសមាជិកសហភាពអឺរ៉ុបទេ។
លើសំណុំរឿងហ្កាស/ឧស្ម័នវិញ ក្រុមមេដឹកនាំអឺរ៉ុបបានជជែកគ្នាអំពីគម្រោងកាត់បន្ថយ ២/៣ការពឹងផ្អែកលើរុស្ស៊ីក្នុងផ្នែកថាមពល ចាប់ពីចុងឆ្នាំ២០២២នេះទៅ។ បច្ចុប្បន្ននេះអឺរ៉ុបនាំចូលឧស្ម័នពីរុស្ស៊ីដល់ទៅ៤០%នៃសេចក្តីត្រូវការរបស់ខ្លួន។ ប៉ុន្តែ តាមគម្រោងអឺរ៉ុបនឹងមានឯករាជ្យថាមពលលែងរំពឹងលើរុស្ស៊ីចាប់ពីឆ្នាំ២០២៧។ នេះបើតាមការបញ្ជាក់របស់លោកស្រីប្រធានក្រុមប្រឹក្សាអឺរ៉ុប Ursula von der Leyen។ បានន័យថា សហភាពអឺរ៉ុបនឹងមិនធ្វើវិនិយោគថ្មីក្នុងវិស័យថាមពលជាមួយរុស្ស៊ីទៀតទេ។
ជាចុងក្រោយ បើរុស្ស៊ីនៅតែបន្តបាញ់ផ្លោង លើក្រុងរបស់អ៊ុយក្រែន និងបន្តធ្វើសង្គ្រាមទៀត នោះសហភាពនឹងដាក់ទណ្ឌកម្មថ្មីបន្ថែមមួយខ្សែទៀត។ នេះបើតាមប្រសាសន៍របស់លោកប្រធានាធិបតីបារាំង អេម៉ាណុយអែល ម៉ាក្រុង ដោយព្រមានថា ទណ្ឌកម្មថ្មីបន្ថែមនោះអាចជាការឈប់នាំចូលប្រេង/ឧស្ម័នរុស្ស៊ី ដែលពេលនេះអឺរ៉ុបមិនប៉ះពាល់។
ដករុស្ស៊ីពីប្រព័ន្ធអនុគ្រោះពន្ធ
តាំងពីថ្ងៃទី ២៤កុម្ភៈ ថ្ងៃរុស្ស៊ីបើកការវាយប្រហារលើអ៊ុយក្រែនមក ក្រុមបស្ចិមលោក បានចាត់វិធានការ ដាក់ទណ្ឌកម្មសេដ្ឋកិច្ចប្រឆាំងនឹងរុស្ស៊ីបីវគ្គមកហើយ ដែលធ្វើឱ្យសេដ្ឋកិច្ចរុស្ស៊ីត្រដរខ្យល់យ៉ាងខ្លាំង ហើយលុយរូប្ល៍ ធា្លក់ថ្លៃជាគំហុក។
ដើម្បីគាបនិងសម្ងួតសេដ្ឋកិច្ចរុស្ស៊ីឱ្យកាន់តែឯកា លោកខាងលិច ក្រុមហ្សេ៧ និងសហរដ្ឋអាមេរិកនឹងប្រើទណ្ឌកម្មវគ្គថ្មី ចាប់ពីថ្ងៃសៅរ៍នេះទៅ ដោយលុបរុស្ស៊ីចេញពីប្រព័ន្ធអនុគ្រោះពន្ធ និងដាក់ទណ្ឌកម្មហាមឃាត់មិនឱ្យរុស្ស៊ីនាំចេញនិងនាំចូលនូវផលិតផលមួយចំនួនធំ។
កន្លងមករុស្ស៊ី មានឈ្មោះជារដ្ឋបានទទួលការអនុគ្រោះជាពិសេស ក្នុងប្រព័ន្ធពាណិជ្ជកម្ម ដែលអាចសម្រួលរុស្ស៊ីក្នុងការនាំចេញផលិតផលជាច្រើន។ ប៉ុន្តែឥលូវលោកខាងលិចលុបឈ្មោះរុស្ស៊ីចេញពីបញ្ជីអនុគ្រោះហើយ ដូច្នេះសហរដ្ឋអាមេរិក និងសហភាពអឺរ៉ុប អាចហាមឃាត់ ឬ ដាក់ដំឡើងពន្ធនាំចូលលើផលិតផលរបស់រុស្ស៊ី ពោលគឺរុស្ស៊ីនឹងមានលក្ខន្តិកៈពាណិជ្ជកម្មប្រហាក់ប្រហែលនឹងប្រទេសអ៊ីរ៉ង់ ឬកូរ៉េខាងជើង។
បន្ថែមពីលើនេះទៀត ក្រុមមហាសេដ្ឋីជំនិតរបស់លោកពូទីន និងអ្នកកាន់អំណាចរុស្ស៊ី ជាច្រើននាក់បន្ថែមទៀត នឹងជាប់ចូលក្នុងបញ្ជីខ្មៅជាប់ទណ្ឌកម្មអាមេរិក។ នេះបើតាមការប្រកាសរបស់លោក ចូ បៃដិន ប្រធានាធិបតីអាមេរិក។ អាមេរិកនឹងហាមឃាត់ការនាំចេញផលិតផលប្រណិតៗ (នាឡិក ឡាន ...) ទៅរុស្ស៊ី និងបេឡារុស និងការនាំចូលគ្រឿងសមុទ្ទ ស្រា ពេជ្រ ពីរុស្ស៊ីទៀត។ ហើយក្រុមហ៊ុនអាមេរិកដែលប្រើប្រាស់រូបិយបណ្ណអេឡិចត្រូនិក ក៏ត្រូវសម្របគោរពតាមទណ្ឌកម្មរបស់អាមេរិកដាក់លើរុស្ស៊ីដែរ។
នៅក្នុងសេចក្តីថ្លែងការណ៍ លោកស្រីប្រមុខដឹកនាំអឺរ៉ុប បានប្រកាសថា រុស្ស៊ីលែងអាចប្រើសិទ្ធិជាសមាជិកមូលនិធិរូបិយវត្តុអន្តរជាតិ និងធនាគារពិភពលោក មួយរយៈ។ សម្ព័ន្ធហ្សេ៧ នឹងពិគ្រោះគ្នានៅសប្តាហ៍ខាងមុខ ដើម្បីដាក់ទណ្ឌកម្មលើក្រុមគ្រួសារលោកពូទីនផង និងដើម្បីធានាកុំឱ្យក្រុមមហាសេដ្ឋីរុស្ស៊ីអាចពង្វាងទណ្ឌកម្មបានទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ