សង្រ្គាមអ៊ុយក្រែន៖លោកពូទីនយល់ព្រមឲ្យបញ្ជូនទាហានស៊ីឈ្នួលស៊ីរីទៅអ៊ុយក្រែន
ប្រទេសរុស្ស៊ីបានបញ្ចូលយុទ្ធសាស្រ្តថ្មីមួយទៀតទៅក្នុងសង្រ្គាមអ៊ុយក្រែនដោយនៅថ្ងៃសុក្រ ទី១១ មីនា ប្រធានាធិបតីលោកពូទីនបានយល់ព្រមឲ្យមានការបញ្ជូនទាហានស៊ីឈ្នួលជនជាតិស៊ីរីទៅកាន់អ៊ុយក្រែន។ ទន្ទឹមគ្នានេះ លោកពូទីនក៏បានបញ្ជាក់ពីការសិក្សាលើសំណើពង្រឹងវត្តមានកម្លាំងទ័ពរុស្ស៊ីនៅតាមព្រំដែនជាប់ក្រុមប្រទេសសមាជិករបស់អង្គការអូតង់។ ចំណែកប្រមុខអង្គការអូតង់មិនបានឆ្លើយតបនឹងការលើកឡើងរបស់លោកពូទីននេះទេ តែបានបញ្ជាក់ថា អូតង់មានការទទួលខុសត្រូវក្នុងការបញ្ជៀសមិនឲ្យសង្រ្គាមអ៊ុយក្រែន រុស្ស៊ីក្លាយជាសង្រ្គាមចំហរវាងរុស្ស៊ី និងអូតង់។
ចុះផ្សាយនៅថ្ងៃ៖
ស្តាប់ - ០២:១៥
គំនិតឲ្យមានការបញ្ជូនទាហានស៊ីឈ្នួលស្ម័គ្រចិត្តជនជាតិស៊ីរីទៅកាន់សមរភូមិសង្រ្គាមអ៊ុយក្រែន គឺជាសំណើរបស់រដ្ឋមន្រ្តីក្រសួងការពារជាតិរុស្ស៊ីលោកស៊ែរហ្គី ស្ហយហ្គូ។ តាមលោកស៊ែរហ្គី ស្ហយហ្គូ អ្នកដែលស្ម័គ្រចិត្តចង់ទៅអ៊ុយក្រែនច្រើនជាមនុស្សមកពីតំបន់ដើមបូព៌ា ពិសេសជនជាតិស៊ីរី។ ដោយមិនបាច់ពិចារណាច្រើន សំណើរបស់ប្រមុខការពារជាតិត្រូវបានប្រធានាធិបតីលោកពូទីនយល់ព្រមភ្លាមៗនៅក្នុងកិច្ចប្រជុំក្រុមប្រឹក្សាសន្តិសុខ។ ការយល់ព្រមនេះត្រូវបានលោកពូទីនលើកយកហេតុផលទៅពន្យល់ថា ក្រុមប្រទេសលោកខាងលិចដែលគាំទ្រអ៊ុយក្រែនក៏បានប្រមូល និងបញ្ជូនទាហានស៊ីឈ្នួលក្នុងលោកទៅកាន់អ៊ុយក្រែនដោយធ្វើឡើងជាចំហទៀតផង។
ចំណែកលោកឌីមីទ្រី ប៉េស្កូវ អ្នកនាំពាក្យរបស់លោកពូទីនបានបន្ថែមដោយចំអកថា បើបស្ចិមប្រទេសត្រេកត្រអាលនឹងវត្តមានទាហានស៊ីឈ្នួលគ្រប់ជាតិសាសន៍នៅអ៊ុយក្រែន រុស្ស៊ីក៏មានទាហានស៊ីឈ្នួលដែលចង់ទៅប្រយុទ្ធនៅអ៊ុយក្រែនដែរ។ ឃើញថា វត្តមានទាហានស៊ីឈ្នួលនៅលើសមរភូមិអ៊ុយក្រែនពេលនេះនឹងធ្វើឲ្យសង្រ្គាមអ៊ុយក្រែន រុស្ស៊ីកាន់តែសន្ធោសន្ធៅឡើង។ ទន្ទឹមនឹងយល់ព្រមឲ្យមានការបញ្ចូនទាហានស៊ីឈ្នួលស៊ីរីទៅជួយច្បាំងទាហានរុស្ស៊ីនៅអ៊ុយក្រែន បុរសខ្លាំងរុស្ស៊ីក៏បានបញ្ជាក់ពីការសិក្សាលើសំណើឲ្យពង្រឹងវត្តមានកម្លាំងទ័ពរុស្ស៊ីនៅតាមព្រំដែនជាប់ក្រុមប្រទេសសមាជិករបស់អង្គការអូតង់។
នៅក្នុងន័យនេះ លោកពូទីនបានប្រាប់រដ្ឋមន្រ្តីការពារជាតិឲ្យរៀបចំរបាយការណ៍មួយ។ គួរបញ្ជាក់ថាតាំងពីរុស្ស៊ីឈ្លានពានអ៊ុយក្រែន អូតង់បានដាក់ពង្រាយទ័ពជាច្រើនពាន់នាក់នៅក្នុងបណ្តាប្រទេសសមាជិកដែលមានព្រំដែនជាប់រុស្ស៊ី និងអ៊ុយក្រែន។ ប្រមុខអង្គការអូតង់លោកយែន ស្តុលទែនប៊ែរមិនបានប្រតិកម្មតបនឹងការថ្លែងរបស់លោកពូទីនទេ តែបានព្យាយាមបញ្ជាក់ថា អូតង់មានទំនួលខុសត្រូវក្នុងការបញ្ជៀសកុំឲ្យសង្រ្គាមរុស្ស៊ី អ៊ុយក្រែនក្លាយជាសង្រ្គាមចំហរវាងរុស្ស៊ី និងអូតង់។ ទន្ទឹមគ្នានេះ លោកយែន ស្តុលទែនប៊ែរក៏បានអំពាវនាវឲ្យលោកពូទីនបញ្ឈប់សង្រ្គាមមួយនេះ និងស្វែងរកដំណោះស្រាយតាមផ្លូវចរចា។ ប្រមុខអង្គការអូតង់បាននិយាយដូចនេះនៅក្នុងវេទិកាការទូតមួយរៀបចំដោយប្រទេសតួកគីក្នុងថ្ងៃសុក្រ ទី១១ មីនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ