អង្គការFAO ទាញសញ្ញាអាសន្នពីបញ្ហាសន្តិសុខស្បៀង បង្កឡើងដោយសង្រ្គាមអ៊ុយក្រែន
អង្គការចំណីអាហារនិងកសិកម្មហៅកាត់ថា FAO ដែលជាទីភ្នាក់ងារមួយរបស់អង្គការសហប្រជាជាតិបានព្រមាន កាលពីថ្ងៃសុក្រថា នឹងមានមនុស្ស ពី ៨ ទៅ១៣លាននាក់បន្ថែមទៀតនៅក្នុងពិភពលោក ដែលអាចរងគ្រោះ ខ្វះអាហាររូបត្ថម្ភ បើសិន ការនាំចេញស្បៀងអាហារពីរុស្ស៊ី និងអ៊ុយក្រែន រងប៉ះពាល់ដោយសារការអូសបន្លាយសង្រ្គាមនៅអ៊ុយក្រែន។ តាមអង្គការស្បៀងអាហារ និងកសិកម្មរបស់អង្គការសហប្រជាជាតិ តម្លៃស្បៀងអាហារពិភពលោកអាចកើនឡើង ពី៨% ទៅ ២០%ដោយសារសង្រ្គាមអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២២
សង្រ្គាមឈ្លានពានរុស្ស៊ី នៅប្រទេសអ៊ុយក្រែនប៉ះពាល់ដោយប្រាកដ ប្រជាជនអ៊ុយក្រែនមុនគេ ដែលកំពុងរងគ្រោះ ស្លាប់ និងរបួសដោយសារការវាយប្រហាររបស់ទាហានរុស្ស៊ី។ ប៉ុន្តែ អង្គការស្បៀងអាហារ និងកសិកម្មនៃអង្គការសហប្រជាជាតិ ហៅកាត់ជាភាសាអង់គ្លេសFAOបានវាយតម្លៃថា សង្រ្គាមអូសបន្លាយនៅអ៊ុយក្រែន នឹងជះឥទ្ធិពលអាក្រក់ ប៉ះពាល់ដល់ជីវិត ប្រជាជន នៅក្នុងប្រទេសជាង ៥០ ដែលពឹងអាស្រ័យខ្លាំងលើការនាំចូលស្រូវសាឡី ពីរុស្ស៊ី និងអ៊ុយក្រែន។ អេហ្ស៊ីប តួកគី បង់ក្លាដែស អ៊ីរ៉ង់ ទិញនាំចូលស្រូវសាឡី ៦០%ពីរុស្ស៊ី និងអ៊ុយក្រែន។
តាម អគ្គនាយកអង្គការFAO លោកQu Dongyu សង្រ្គាមប្រយុទ្ធគ្នានៅអ៊ុយក្រែន ដែលបាបង្អាក់សកម្មភាពធ្វើកសិកម្ម នៅអ៊ុយក្រែន ហើយនិងការដាក់ទណ្ឌកម្មលើការនាំចេញរបស់រុស្ស៊ី ពីសំណាក់ប្រទេសលោកខាងលិច នឹងជះផលអាក្រក់លើសន្តិសុខស្បៀងពិភពលោក ពីព្រោះថា អ៊ុយក្រែន និងរុស្ស៊ី ជាជង្រុកផលិតស្រូវសាឡី និងគ្រាប់ធញ្ញជាតិនាំមុខគេក្នុងពិភពលោក។ រុស្ស៊ី ជាប្រទេសនាំចេញស្រូវសាឡីច្រើនជាងគេ ចំណែកអ៊ុយក្រែនស្ថិតនៅចំណាត់ថ្នាក់ទី៥។ កសិផលរបស់រុស្ស៊ី និងអ៊ុយក្រែន រួមចូលគ្នា តំណាងឲ្យ២ភាគ៣នៃការនាំចេញគ្រាប់ធញ្ញជាតិក្នុងពិភពលោក។
នៅថ្ងៃសុក្រ ប្រធានាធិបតី បារាំង លោកអេម៉ានុយអែល ម៉ាក្រុងបានព្រមានថា សង្រ្គាមអ៊ុយក្រែននឹងធ្វើឲ្យអឺរ៉ុប និងអាហ្វ្រិកជួបអស្ថិរភាព ក្នុងផ្នែកចំណីអាហារ នៅក្នុងរយៈពេល ១ឆ្នាំទៅមុខ។ សម្រាប់អគ្គនាយកអង្គការFAO បញ្ហាអសន្តិសុខស្បៀង បង្កឡើងដោយសង្រ្គាមអូសបន្លាយនៅអ៊ុយក្រែន នឹងអាចធ្វើឲ្យមនុស្សពី ៨ ទៅ ១៣លាននាក់បន្ថែមទៀតនៅក្នុងពិភពលោក ដែលអាចជួបបញ្ហាខ្វះអាហារូបត្ថម្ភ នៅឆ្នាំ នេះ និងឆ្នាំក្រោយ។ តំបន់អាស៊ីប៉ាស៊ីហ្វិក អាហ្វ្រិកខាងជើង តំបន់ដើមបូព៌ា និងអាហ្រ្វិកជុំវិញតំបន់សាហារ៉ានឹងរងប៉ះពាល់ដោយសារបញ្ហាអសន្តិសុខស្បៀង ដែលមួយផ្នែកបណ្តាលមកពីសង្រ្គាមអ៊ុយក្រែន។
នៅក្នុងសេចក្តីប្រកាសព័ត៌មាន កាលពីថ្ងៃសុក្រ អង្គការសហប្រជាជាតិបានណែនាំគ្រប់ប្រទេស បន្ត ការដោះដូរពាណិជ្ជកម្ម និងទិញនាំចូលស្បៀង តាមតែអាចទៅបាន ដើម្បី ការពារសកម្មភាពផលិតកម្ម ក្នុងគោលដៅ បំពេញតម្រូវការជាតិ និងអន្តរជាតិ។ អង្គការFAO បានក្រើនរំលឹកផងដែរ ថ្នាក់ដឹកាំរដ្ឋាភិបាល បង្កើតកម្មវិធីការពារសង្គម ព្រោះថា ដោយសារជម្លោះប្រដាប់អាវុធនៅអ៊ុយក្រែន មនុស្សកាន់តែច្រើននៅក្នុងពិភពលោកនឹងអាចងាយធ្លាក់ខ្លួនក្នុងភាពក្រីក្រ និងគ្រោះអត់ឃ្លាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ