ប្រធានាធិបតីអាមេរិកនិងម៉ិកស៊ិកជជែកគ្នាអំពីបញ្ហាអន្តោប្រវេសន៍
ចុះផ្សាយនៅថ្ងៃ៖
ស្តាប់ - ០៥:៥២
លោក ចូ បៃដិន ប្រធានាធិបតីអាមេរិក និងសមភាគីម៉ិកស៊ិក លោក អង់ដ្រេ ម៉ាណុយអែល ឡូប៉េស្ហ៍ អូប្រាដរ បានជួបពិភាក្សាគ្នាតាមប្រព័ន្ធវីដេអូ នៅល្ងាចមិញ ស្តីពីបញ្ហាអន្តោប្រវេសន៍ ដែលកំពុងមានចរន្តលំហូរយ៉ាងខ្លាំង មិនធ្លាប់មានតាមព្រំដែនប្រទេសទាំងពីរ។ អន្តោប្រវេសន៍ក៏ជាប្រធានបទដ៏រសើបខ្លាំងណាស់ដែរ សម្រាប់រដ្ឋបាលអាមេរិក ដោយការបោះឆ្នោតពាក់កណ្តាលអាណត្តិនឹងរំកិលមកដល់ផង។
នៅល្ងាចថ្ងៃសុក្រម្សិលមិញ លោក ចូ បៃដិន ប្រធានាធិបតីអាមេរិក និងសមភាគីម៉ិកស៊ិក លោក អង់ដ្រេ ម៉ាណុយអែល ឡូប៉េស្ហ៍ អូប្រាដរ បានជួបពិភាក្សាគ្នាតាមប្រព័ន្ធវីដេអូ។ប្រមុខដឹកនាំទាំងពីរ បានជជែកគ្នា អស់រយៈពេលជិតមួយម៉ោង ជុំវិញទំនាក់ទំនងដ៏ស្មុគស្មាញរវាងអាមេរិកនិងម៉ិកស៊ិក ដែលចងជំពាក់គ្នា មិនអាចកាត់ផ្តាច់បាន ក្នុងស្ទើរគ្រប់វិស័យ មិនថាក្នុងវិស័យពាណិជ្ជកម្ម ឬបញ្ហាអន្តោប្រវេសន៍ស្របច្បាប់ ខុសច្បាប់ ឬបញ្ហាជួញដូរគ្រឿងញៀនទេ។
សហការគ្នាដោះស្រាយ
តែអន្តោប្រវេសន៍ ជាសំណុំរឿងធំ និងជាប្រធានបទចម្បងនៃកិច្ចពិភាក្សាគ្នា។ មួយផ្នែកធំនៃកិច្ចសន្ទនា ផ្តោតទៅលើបញ្ហាអន្តោប្រវេសន៍ លើការងារប្រចាំនៃកិច្ចសហប្រតិបត្តិការ កិច្ចសហប្រតិបត្តិការសេដ្ឋកិច្ច និង វិធានការដែលត្រូវចាត់តាំងឡើងដើម្បីកាត់បន្ថយលំហូរអន្តោប្រវេសន៍នៅតាមបណ្តោយព្រំប្រទល់ទាំងពីរ។
អ្នកនាំពាក្យសេតវិមានបានធានាអះអាងថា ផ្ទុយពីរដ្ឋបាលអាមេរិកមុន លោកចូបៃដិន បានបង្ហាញឆន្ទៈសហការជាមួយសមភាគី លោក អូប្រាដរ ជាត្រីមុខ។ ជាការជជែកគ្នាប្រកបដោយលក្ខណៈស្ថាបនាខ្លាំងណាស់។ ប្រធានាធិបតីអាមេរិកបានហៅប្រធានាធិបតីម៉ិកស៊ិក មិនមែនដើម្បីស្រែក សំឡុតគំរាមម៉ិកស៊ិក ដោយប្រការណាមួយឡើយ។ នេះជាការបញ្ជាក់របស់អ្នកនាំពាក្យសេតវិមាន។
មួយឆ្នាំកន្លងមកនេះ រដ្ឋបាលលោកបៃដិនបានប្រឹងប្រែងពុះពារឧបសគ្គនិងឆ្លងកាត់ការលំបាកៗច្រើនខ្លាំងណាស់ ដើម្បីស្ថាបនាទំនាក់ទំនងទ្វេភាគីទាំងវិញ។ នេះបើតាមប្រភពសុំមិនបញ្ចេញឈ្មោះ។
ប្រមុខដឹកនាំប្រទេសទាំងពីរសន្យាសាងមធ្យោបាយ គ្រប់គ្រងរលកអន្តោប្រវេសន៍ ជាលក្ខណៈតំបន់។ ប្រធានាធិបតីម៉ិកស៊ិក នឹងបញ្ជូនរដ្ឋមន្ត្រីការបរទេសរបស់ខ្លួន ទៅក្រុងវ៉ាស៊ីនតោន ភ្លាម នៅថ្ងៃចន្ទខានស្អែកនេះ ដើម្បីរុញសំណុំរឿង កិច្ចសហប្រតិបត្តិការដើម្បីអភិវឌ្ឍន៍ បានទៅមុខផង និងដើម្បីជំនួបកំពូលអាមេរិក ដែលប្រមូលគ្រប់ប្រទេសនៅលើទ្វីបអាមេរិក ឱ្យមកជួបជុំគ្នានៅខែមិថុនាខាងមុខនធផង។ ពីថ្ងៃទី ៥-៩ឧសភា គឺរូបលោកអូប្រាដរ ប្រធានាធិបតីម៉ិកស៊ិកផ្ទាល់ ជាអ្នកអញ្ជើញទៅបំពេញទស្សនកិច្ច នៅប្រទេសគុយបា និងប្រទេសក្នុងតំបន់អាមេរិកកណ្តាលចំនួនបីប្រទេស (ក្វាតេម៉ាឡា សាល់វ៉ាដរ និងហុងឌូរ៉ាស) ដែលប្រជាជននាំគ្នាធ្វើអន្តោប្រវេសន៍ទាំងហ្វូងៗ ឆ្លងតាមម៉ិកស៊ិក សំដៅសហរដ្ឋអាមេរិក។
ប្រធានាធិបតីម៉ិកស៊ិកព្រមធ្វើដំណើរទៅបរទេស អាចចាត់ទុកជាករណីពិសេសគួរឱ្យកត់សម្គាល់ បញ្ជាក់អំពីភាពធ្ងន់ធ្ងរ និងឆន្ទៈចង់ដោះស្រាយសំណុំរឿងអន្តោប្រវេសន៍ហើយ ព្រោះតាំងពីឡើងកាន់តំណែងនៅឆ្នាំ២០១៨មក លោក អូប្រាដរ ធ្វើដំណើរតិចណាស់ ដោយចេញទៅបំពេញទស្សនកិច្ចនៅអាមេរិកតែបីដងប៉ុណ្ណោះ។
កំណើនអន្តោប្រវេសន៍៥ដង
អន្តោប្រវេសន៍មិនមែនជាបញ្ហាថ្មីថ្មោងសម្រាប់អាមេរិកទេ ប៉ុន្តែជាជំងឺរ៉ាំរ៉ៃ ហើយវិបត្តិនេះជាប្រធានបទដ៏រសើបខ្លាំង សម្រាប់នយោបាយផ្ទៃក្នុងអាមេរិក និងបានក្លាយជារបៀបវារៈមួយ ក្នុងស្ទើរគ្រប់កម្មវិធីជំនួប និង ពិភាក្សានានា ព្រោះមានពាក្យចចាមអារាមបំប៉ោងថា គណបក្សប្រជាធិតេយ្យរបស់លោក ចូបៃដិន អាចនឹងទទួលបរាជ័យ នៅក្នុងការបោះឆ្នោតពាក់កណ្តាលអាណត្តិផង។ ប៉ុន្តែអ្នកទទួលខុសត្រូវជាន់ខ្ពស់រដ្ឋាភិបាលបៃដិន បានការពារខ្លួនថា អន្តោប្រវេសន៍ជាបញ្ហាប្រឈមដ៏ធំ នៅទូទាំងពិភពលោក មិនមែនតែនៅសហរដ្ឋអាមេរិកមួយទេ។ វិបត្តិអាកាសធាតុ សង្គ្រាមនៅអ៊ុយក្រែន និងសន្តិសុខចំណីអាហារ ជាដើមហេតុនាំឱ្យមានលំហូរអន្តោប្រវេសន៍បានកើនឡើងក្នុងកំរិតដ៏ខ្ពស់ មិនធ្លាប់មាននេះ។
បើតាមក្រសួងមហាផ្ទៃអាមេរិក ស្ថានភាពអន្តោប្រវេសន៍នៅតាមព្រំដែនជាមួយ ម៉ិកស៊ិក បានឡើងស្រាប់ទៅហើយ និងបន្តកើនឡើងបន្ថែមទៀតនៅខែឧសភាខាងមុខ នៅពេលវិធានការ Title ៤២ ដែលអនុញ្ញាតតាំងពី២ឆ្នាំឱ្យចាប់បញ្ជូនអន្តោប្រវេសន៍ខុសច្បាប់នៅព្រំដែន ត្រលប់ទៅវិញភ្លាម ត្រូវបញ្ចប់។ ប៉ុន្តែភ្នាក់ងារមានសមត្ថកិច្ចអាមេរិក បានធានាថាបានត្រៀមទប់ទល់សន្ទុះលំហូរអន្តោប្រវេសន៍នេះរួចជាស្រេចហើយ។ ម្យ៉ាងទៀត បើទោះបីវិធានការនៅមានជាធរមាននៅឡើយ ក៏ប៉ូលិសព្រំដែន តែងតែចាប់ខ្លួនអន្តោប្រវេសន៍ខុសច្បាប់ ជាមធ្យម៧៨០០នាក់ ក្នុងមួយថ្ងៃ តាំងពីបីសប្តាហ៍មកហើយ ពោលគឺជិត៥ដងលើសមធ្យមភាគមុនសម័យកូវីដ រវាងពី ឆ្នាំ២០១៤-២០១៩។
ជារួមទៅ គ្រប់ប្លុកនយោបាយអាមេរិកសុទ្ធតែទទួលស្គាល់ និងនិយាយស្របគ្នាថា អាមេរិកមានបញ្ហា ទើបអន្តោប្រវេសន៍កើនឡើង។ សម្រាប់សេតវិមាន បញ្ហាបណ្តាលមកពីប្រព័ន្ធអន្តោប្រវេសន៍ខូច ដែលសភាអាមេរិកត្រូវជួសជុលឡើងវិញ តែក្រុមអ្នកសាធារណរដ្ឋ បានចោទថា លោកបៃដិន បរាជ័យក្នុងបេសកកម្មការពារព្រំដែនខាងត្បូងរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ