មន្ទីរបញ្ចកោនបញ្ចេញលុយ ជាង ៣ពាន់លានដុល្លារសម្រាប់សង់ជញ្ជាំង នៅព្រំដែនម៉ិចស៊ិក
ក្រសួងការពារជាតិអាមេរិកនឹងលះបង់គម្រោងទិញយន្តហោះចម្បាំង និងយន្តហោះដ្រូន ដើម្បី ទុកលុយ សម្រាប់សង់ជញ្ជាំង ទៅតាមការចង់បានរបស់លោកប្រធានាធិបតីដូណាល់ ត្រាំ។ តាមអ្នកទទួលខុសត្រូវជាន់ខ្ពស់អាមេរិក ដែលបាននិយាយប្រាប់អ្នកកាសែត កាលពីថ្ងៃព្រហស្បតិ៍ម្សិលមិញ នៅ ទីក្រុងវ៉ាស៊ីនតោន មន្ទីរបញ្ចកោនអាមេរិក នឹងបញ្ចេញថវិកា ៣ពាន់ ៨រយលានដុល្លារ សម្រាប់យកទៅសាងសង់ជញ្ជាំង នៅតាមបណ្តោយព្រំដែនជាមួយ ប្រទេសម៉ិចស៊ិក។
ចុះផ្សាយនៅថ្ងៃ៖
ស្តាប់ - ០២:៥២
ទៅតាមការស្នើសុំរបស់នាយកដ្ឋាន សន្តិសុខផ្ទៃក្នុង រដ្ឋមន្រ្តីក្រសួងការពារជាតិ បានសម្រេច បញ្ចេញថវិកាកងទ័ព ៣ពាន់ ៨រយលានដុល្លារ សម្រាប់សង់ជញ្ជាំង ប្រវែង ២៨៥គីឡូម៉ែត្រ នៅតាមបណ្តោយព្រំដែនជាមួយប្រទេសម៉ិចស៊ិក។ នេះបើតាម Bob Salesses មន្រ្តីជាន់ខ្ពស់អាមេរិក ទទួលបន្ទុកខាងសំណុំរឿងសង់ជញ្ជាំង របស់លោកដូណាល់ ត្រាំ។
នៅក្នុងឯកសារដាច់ដោយឡែកមួយ ដែលក្រសួងការពារជាតិអាមេរិកបានដាក់បញ្ជូនទៅ សភាអាមេរិក កាលពីថ្ងៃព្រហស្បតិ៍ មន្ទីរបញ្ចកោនបានបញ្ជាក់លម្អិតថា នៅក្នុងចំណោមថវិកា ៣ពាន់ ៨រយលានដុល្លារ ដែលក្រសួងការពារជាតិនឹងបញ្ចេញសម្រាប់សង់ជញ្ជាំង នៅព្រំដែន ថវិកា ជាង ២ពាន់លានដុល្លារ នឹងត្រូវដកចេញពីកញ្ចប់ថវិកា ដែលក្រសួងធ្លាប់បម្រុងទុក សម្រាប់ទិញ សព្វាវុធ បំពាក់ឲ្យកងទ័ពជើងអាកាសអាមេរិកាំង ដូចជា យន្តហោះចម្បាំង F 35 យន្តហោះដ្រូន យន្តហោះដឹកសព្វាវុធ ហើយនិងយន្តហោះស៊ើបការណ៍សម្ងាត់អាមេរិកជាដើម។ មួយវិញទៀត ក្រសួងនឹងយកថវិកាដែលគេបានបម្រុងទុកសម្រាប់ប្រតិបត្តិការនៅបរទេស ដូចជា ប្រតិបត្តិការនៅស៊ីរី អាហ្វហ្កានីស្ថាន និងអ៊ីរ៉ាក់ ជាដើម ដើម្បី យកទៅបង្រ្គប់ បន្ថែម ការចំណាយលើការសាង់សង់ជញ្ជាំងនៅព្រំដែនប្រទេសម៉ិចស៊ិក។
ដោយបន្ថែម ៣ពាន់ ៨រយលានដុល្លារ ក្រសួងការពារជាតិអាមេរិកបានបញ្ចេញ ថវិកា ប្រមាណ ៩ពាន់ ៩រយលានដុល្លារ សម្រាប់សង់ជញ្ជាំង គិតចាប់តាំងពីខែកក្កដា ឆ្នាំមុន។ ដោយលើកហេតុផលទប់ស្កាត់លំហូរ ជនអន្តោប្រវេសន៍ពីបណ្តាប្រទេសនៅអាមេរិកខាងត្បូង លោកដូណាល់ ត្រាំ ធ្លាប់បានសន្យាសង់ជញ្ជាំង ជាង ៣២០០គីឡូម៉ែត្រ នៅតាមបណ្តោយព្រំដែនអាមេរិក-ម៉ិចស៊ិក។ លោកបានទាមទារសុំថវិកា ២៥ពាន់លានដុល្លារ ពីសភា ប៉ុន្តែ សភាបានបោះឆ្នោត ប្រឆាំងជារៀងរាល់លើក។ ការបោះឆ្នោតប្រឆាំងរបស់សភា បានធ្វើឲ្យលោកដូណាល់ ត្រាំ ងាកទៅប្រើកញ្ចប់ថវិកាយោធា សម្រាប់សង់ជញ្ជាំង។
ក្នុងមួយឆ្នាំៗ សភា បានអនុម័តច្បាប់ថវិកាកងទ័ពប្រមាណ ៧០០ពាន់លានដុល្លារ សម្រាប់ កម្មវិធីយោធា ដែលស្នើឡើងដោយរដ្ឋាភិបាល ប៉ុន្តែ ដែលត្រូវទទួលការអនុញ្ញាតជាចាំបាច់ពីសភាអាមេរិក។ ជាមួយគ្នានោះ ក្រសួងការពារជាតិអាមេរិកមានថវិកាដោយឡែកមួយទៀត ប្រមាណ ៦ពាន់លានដុល្លារ ដែលក្រសួងអាចប្រើក្នុងករណីចាំបាច់ និងបន្ទាន់។ តាមមន្រ្តីទទួលបន្ទុកសំណុំរឿងសង់ជញ្ជាំង រដ្ឋមន្រ្តី ក្រសួងការពារជាតិអាមេរិក លោក Mark Esper បានវាយតម្លៃថា ការសាងសង់ជញ្ជាំង គឺជារឿងអាទិភាព និងចាំបាច់ ដែលសក្តិសមនឹងប្រើថវិកាពិសេសរបស់កងទ័ព។
ក្រៅពីប្រតិកម្មរិះគន់របស់គណបក្សប្រឆាំង សមាគមការពារសិទ្ធិពលរដ្ឋអាមេរិក ដែលរិះគន់ជញ្ជាំង របស់លោកដូណាល់ ត្រាំ ថា ជាជញ្ជាំង ស្អប់ជនបរទេស បានអះអាងថា គេនឹងដាក់ពាក្យបណ្តឹងទៅតុលាការ ដើម្បី រាំងទប់ស្កាត់កុំឲ្យក្រសួងការពារជាតិអាមេរិកបញ្ចេញថវិកាបន្ថែម ទៅសង់ជញ្ជាំង ដ៏អាម៉ាសមួយនេះ នៅព្រំដែនអាមេរិក ម៉ិចស៊ិក៕
(អត្ថបទដកស្រង់ពីទីភ្នាក់ងារAFP)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ