ជំនួបកំពូលអាមេរិក-អាស៊ាន ៖ លោកបៃដិនបង្ហាញគម្រោងជាក់លាក់ប្រឈមនឹងចិន
ចុះផ្សាយនៅថ្ងៃ៖
ស្តាប់ - ០៧:៤៨
ជំនួបកំពូលអាស៊ាន-អាមេរិក ពីរថ្ងៃ បានចាប់បើក នៅល្ងាចថ្ងៃព្រហស្បតិ៍ទី ១២ឧសភា ដោយលោកប្រធានាធិបតីអាមេរិក ចូ បៃដិន បានទទួលស្វាគមន៍ក្រុមប្រមុខដឹកនាំប្រទេសអាស៊ានទាំងអស់ ជាលើកទីមួយ នៅសេតវិមាន។ តាមរយៈជំនួបកំពូលនេះ សហរដ្ឋចង់ បង្ហាញអំពីឆន្ទៈនយោបាយអាមេរិកចំពោះតំបន់អាស៊ីអាគ្នេយ៍ ដែលចិនពង្រីកវត្តមានកាន់តែខ្លាំងឡើងៗនិងឥតឈប់ឈរ។ ដើម្បីទប់ឥទ្ធិពលចិនក្នុងតំបន់ លោកប្រធានាធិបតីចូបៃដិន មានគម្រោងដ៏ជាក់លាក់ និងកែច្នៃពាណិជ្ជកម្មបែបថ្មីជាមួយអាស៊ីអាគ្នេយ៍។
ជំនួបអាមេរិក-អាស៊ានដែលគ្រោងធ្វើដំបូងខែមីនា តែត្រូវបានលើកមកធ្វើនៅថ្ងៃទី ១២-១៣ឧសភាវិញ ជាជំនួបពិសេស។ បើតាមសេចក្តីថ្លែងការណ៍របស់កម្ពុជាដែលជាប្រធានផ្លាស់វេនអាស៊ាន នេះជាជំនួបកំពូលអាមេរិក-អាស៊ានពិសេសលើកទីពីរតែប៉ុណ្ណោះ តែត្រូវជាលើកទីមួយបង្អស់ដែលប្រមុខដឹកនាំអាស៊ានទាំងអស់បានមកជួបជុំគ្នា បានទទួលស្វាគមន៍ប្រមុខដឹកនាំនៃបណ្តាប្រទេសជាសមាជិកអាស៊ានទាំងអស់ នៅសេតវិមាន និងក៏លើកទីមួយដែរ គិតចាប់តាំងពីឆ្នាំ២០៦មក ដែលជំនួបប្រព្រឹត្តទៅក្រោមការដឹកនាំរបស់ប្រធានាធិបតីអាមេរិក។
ដូច្នេះជំនួបនេះ មានអត្ថន័យពិសេស បញ្ជាក់ថា ទោះពិភពលោកវីវក់នឹងសង្គ្រាមនៅអ៊ុយក្រែនយ៉ាងណាក៏ដោយ ក៏រដ្ឋបាលលោកបៃដិនមិនភ្លេចតំបន់ឥណ្ឌូប៉ាស៊ីហ្វិក បណ្តោយឱ្យគូប្រជែងចិន បង្ហាញវត្តមានយ៉ាងខ្លាំងក្លា និងយ៉ាងរំភើយម្នាក់ឯងក្នុងតំបន់ឡើយ។ អាមេរិកមិនអូសទាញអាស៊ាន អាស៊ី ឱ្យធ្វើសង្គ្រាមត្រជាក់ថ្មីទេ ! អ្នកទទួលខុសត្រូវជាន់ខ្ពស់អាមេរិកបានបង្ហើបប្រាប់អ្នកសារព័ត៌មានថា អាមេរិកមិនសុំឱ្យក្រុមប្រទេសអាស៊ានធ្វើការជ្រើសរើសរវាងអាមេរិកឬចិនឡើយ ប៉ុន្តែអាមេរិកចង់ឱ្យតំបន់អាស៊ីអាគ្នេយ៍យល់ថាអាមេរិកនៅក្បែរជានិច្ច និងកំពុងស្ថាបនាទំនាក់ទំនងដ៏រឹងមាំមួយជាមួយ។
១៥០លានសម្រាប់តំបន់អាស៊ីអាគ្នេយ៍
ដើម្បីយកចិត្តក្រុម១០ប្រទេសអាស៊ាន និងទប់ឥទ្ធិពលចិន ល្ងាចមិញលោកបៃដិន បានបង្ហាញគម្រោងផ្តួចផ្តើមដ៏ជាក់លាក់មួយជាមួយអាស៊ីអាគ្នេយ៍ ដែលមានតម្លៃសរុប ១៥០លានដុល្លារ។
ជាគម្រោងដ៏តួចណាស់ បើប្រៀបទៅនឹងចិន ដែលកាលពីខែវិច្ឆិកា២០២១ បានសន្យាផ្តល់ជំនួយអភិវឌ្ឍន៍បីឆ្នាំដល់អាស៊ាន សម្រាប់ប្រយុទ្ធប្រឆាំងនឹងជំងឺរាតត្បាតកូវីដនិងស្តារសេដ្ឋកិច្ចឡើងវិញ ចំនួនដល់ទៅ ១៥០០លានដុល្លារឯណោះ។ ហើយបើប្រៀបទៅនឹងទំហំទឹកប្រាក់ជិត៤០ពាន់លានដែលសភាអាមេរិកត្រូវអនុម័តសម្រាប់យកទៅជួយអ៊ុយក្រែន គឺកាន់តែតិចខ្លាំងមែនទែនណាស់ !
នៅក្នុងកញ្ចប់១៥០លានដុល្លារដែលអាមេរិកសន្យាជួយអាស៊ាន សម្រាប់អភិវឌ្ឍន៍ហេដ្ឋារចនាសម្ព័ន្ធ សន្តិសុខ សុខាភិបាល និងវិស័យផ្សេងទៀត ដើម្បីរារាំងឥទ្ធិពលចិននៅក្នុងតំបន់នោះ ៦០លានដុល្លារ នឹងយកទៅប្រើក្នុងវិស័យការពារសន្តិសុខផ្លូវទឹក ពោលគឺដើម្បីការពារកុំឱ្យមានការលួចនេសាទដោយខុសច្បាប់ ព្រោះដូចរចនាបានដឹងស្រាប់ថា ក្នុងតំបន់ដែនទឹក ជុំវិញសមុទ្ទចិនខាងត្បូង ជាប្រភពនៃជម្លោះរវាងចិននិងប្រទេសជិតខាងដូចយ៉ាងវៀតណាម និងហ្វីលីពីន ឥតដាច់។ អាមេរិកជួយវិស័យនេះព្រោះចង់ការពារអាស៊ាន កុំឱ្យជួបករណីឈ្លានពានថ្មី មិនថាការឈ្លានពានដែនទឹក ឬបញ្ហាសមុទ្ទចិនខាងត្បូងទេ។ នេះជារបៀបលើកទឹកចិត្តឱ្យអាស៊ាន ប្រកាន់ជំហរដាច់ខាតចំពោះទង្វើឈ្លានពានរុស្ស៊ីលើអ៊ុយក្រែន។
មួយកញ្ចប់ធំទៀត ទំហំ៤០លាន នឹងត្រូវវ៉ាស៊ីនតោនយកទៅវិនិយោគក្នុងវិស័យថាមពលស្អាត ប៉ុន្តែអាមេរិកសង្ឃឹមថានឹងអាចធ្វើការជាមួយក្រុមហ៊ុនឯកជន ដើម្បីឱ្យការវិនិយោគក្នុងវិស័យគន្លឹះនេះឡើងដល់២ពាន់លាននៅថ្ងៃអនាគត។
គម្រោងពាណិជ្ជកម្មកែច្នៃ IPEF
ចិនជាដៃគូពាណិជ្ជកម្មលំដាប់ទីមួយរបស់អាស៊ាន វ៉ារដាច់អាមេរិកឆ្ងាយណាស់។ ដូច្នេះផែនការផ្តួចផ្តើមថ្មីរបស់លោកបៃដិនមួយនេះ អាមេរិកបានដឹងយ៉ាងច្បាស់ថា មិនអាចទៅប្រកួតប្រជែងជាមួយចិនបានទេ។
ប៉ុន្តែអាមេរិកសំលឹងនិងចង់រំពឹងលើវិស័យឯកជន និងចង់មានពាណិជ្ជកម្មជាមួយអាស៊ាន តាមគំរូពាណិជ្ជកម្មដែលមានក្របខ័ណ្ឌបែបទូលំទូលាយខ្លាំង ក្រសោបលើតំបន់ឥណ្ឌូប៉ាស៊ីហ្វិកទាំងមូល។ គំរូពាណិជ្ជកម្មច្នៃប្រឌិតថ្មី ធ្លាប់ត្រូវបានលោកប្រមុខការទូតអាមេរិក អង់តូនី ប្លីងកិន លើកឡើងកាលពីចុងឆ្នាំ២០២១ និងត្រូវប្រកាសជាផ្លូវការ នៅសប្តាហ៍ក្រោយពេលលោកប្រធានាធិបតី ចូបៃដិន អញ្ជើញទៅបំពេញទស្សនកិច្ចនៅតូក្យូនិងសេអ៊ូល។
បើតាមទីប្រឹក្សារបស់លោកប្រធានាធិបតីអាមេរិកទទួលបន្ទុកកិច្ចការអាស៊ី លោក Kurt Campbell ប្រទេសអាស៊ានខ្លះនឹងទទួលបានប្រយោជន៍ធំណាស់ពីគម្រោងក្របខ័ណ្ឌពាណិជ្ជកម្មសម្រាប់ឥណ្ឌូប៉ាស៊ីហ្វិក ថ្មី ហៅកាត់ថា (Indo-Pacific Economic Framework, IPEF)។ គម្រោងពាណិជ្ជកម្មថ្មី នឹងនាំអាមេរិកឱ្យចូលទៅធ្វើពាណិជ្ជកម្មជាផ្លូវការជាមួយដៃគូ ត្រង់ចំណុចជាអាទិភាព ដូចជាស្តារបណ្តាញផ្គត់ផ្គង់ភស្តុភារដែលជួបភាពរអាក់រអួលតាំងពីផ្ទុះវិបត្តិកូវីដមក ឱ្យបានប្រសើរឡើងវិញ - ប្រយុទ្ធប្រឆាំងនឹងអំពើពុករលួយ ឬជំរុញវិស័យថាមពលស្អាត។ តែខុសពីកិច្ចព្រមព្រៀងពាណិជ្ជកម្មមុនៗ គំរូពាណិជ្ជកម្មថ្មីរបស់លោកបៃដិន មិនធានាបើកទីផ្សារឱ្យប្រទេសដៃគូ ចូលសហរដ្ឋអាមេរិកដោយសេរីទេ។ មហាអំណាចសេដ្ឋកិច្ចទីមួយពិភពលោក ព្រមផ្តល់ការអនុគ្រោះ ដរាបណាប្រទេសផ្សេងព្រមធ្វើសម្បទាន។
គំរូពាណិជ្ជកម្មថ្មីលោកប្រធានាធិបតីចូបៃដិន មានទម្រង់ជាកូនកាត់ ដោយបង្ហាញយ៉ាងច្បាស់ថាសហរដ្ឋអាមេរិកមិនរួសរាន់ស្តារកិច្ចព្រមព្រៀងពាណិជ្ជកម្មផ្តោះប្តូរសេរីទេ និងមានជំហរបែបការពារប្រយោជន៍ជាតិនិយមខ្លាំងដូចសម័យលោកត្រាំអ៊ីចឹង។ សូមរំលឹកថា ក្រោមអាណត្តិលោក បារ៉ាក់ អូបាម៉ា ជាប្រធានាធិបតីអាមេរិក ហើយលោកបៃដិនជាអនុប្រធានាធិបតី អាមេរិកមាននយោបាយការបរទេសផ្តល់អាទិភាពចំបងដល់តំបន់អាស៊ី ដោយបានសម្រេចកិច្ចព្រមព្រៀងពាណិជ្ជកម្មផ្តោះប្តូរសេរីអន្តរប៉ាស៊ីហ្វិក (TPP)។ តែអាមេរិករបស់លោកប្រធានាធិបតីដូណាល់ត្រាំ បានដកខ្លួនចេញវិញក្រោមហេតុផលថាកិច្ចព្រមព្រៀងនោះបានធ្វើឱ្យខាតប្រយោជន៍ពលករអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ