G៧ សន្យាគាំទ្រអធិបតេយ្យភាព និងបូរណភាពទឹកដីអ៊ុយក្រែន និងរិះគន់ឥណ្ឌាដែលហាមការនាំចេញស្រូវសាលី
ចុះផ្សាយនៅថ្ងៃ៖
ស្តាប់ - ០៧:២៥
នៅថ្ងៃសៅរ៍ ទី១៤ ឧសភា ក្រុមប្រទេសមហាអំណាចឧស្សាហកម្មទាំង ៧ ក្នុងលោកហៅកាត់ G៧ បានបិទបញ្ចប់កិច្ចប្រជុំថ្នាក់រដ្ឋមន្រ្តីការបរទេសរយៈពេល ៣ថ្ងៃក្នុងប្រទេសអាល្លឺម៉ង់។ នៅក្នុងសេចក្តីថ្លែងការណ៍រួម G៧ បានសន្យាបន្តគាំទ្រលើអធិបតេយ្យភាព និងបូរណភាពទឹកដីអ៊ុយក្រែនទាំងស្រុង។ ទន្ទឹមគ្នានេះ G៧ ក៏បានបញ្ជាក់ពីការគ្មានថ្ងៃទទួលស្គាល់ជាដាច់ខាតនូវខ្សែព្រំដែនអ៊ុយក្រែនដែលរុស្ស៊ីបានព្យាយាមគូសវាសថ្មីតាមកម្លាំងបាយ។ ដោយឡែក G៧ បានរិះគន់លើការសម្រេចចិត្តរបស់ឥណ្ឌាដែលបានហាមការនាំចេញស្រូវសាលី។
សេចក្តីថ្លែងការណ៍រួមរបស់ក្រុមប្រទេស G៧ អាចមានឥទ្ធិពលតិច ឬច្រើននៅក្នុងសង្រ្គាមរុស្ស៊ីឈ្លានពានអ៊ុយក្រែន។ តែប្រហែលមិនឈានដល់បង្ខំឲ្យរុស្ស៊ីបញ្ឈប់សង្រ្គាមនៅអ៊ុយក្រែនពេលនេះបាននៅឡើយទេ។ ពិតណាស់នៅក្នុងសេចក្តីថ្លែងការណ៍រួម ក្រុមប្រទេសមហាអំណាចឧស្សាហកម្មទាំង ៧ ក្នុងលោកហៅកាត់ G៧ ដែលមានប្រទេសអាល្លឺម៉ង់ កាណាដា អាមេរិក បារាំង អ៊ីតាលី ជប៉ុន និងអង់គ្លេសបានសន្យាគាំទ្រពេញទីលើអធិបតេយ្យភាព និងបូរណភាពទឹកដីអ៊ុយក្រែនទាំងស្រុង ក្នុងនោះក៏មានតំបន់គ្រីមេដែលរុស្ស៊ីបានក្រសោកយកក្នុងឆ្នាំ ២០១៤។ តែក្នុងពេលជាមួយគ្នា G៧ បានទុកឲ្យអ៊ុយក្រែនជាអ្នកសម្រេចចិត្តដោយខ្លួនឯងនៅក្នុងរឿងទឹកដី។
អ្វីដែល G៧ ចង់និយាយនៅត្រង់ចំណុចនេះ បើអ៊ុយក្រែនយល់ថា ការធ្វើសម្បទានតំបន់ណាមួយរបស់ខ្លួនទៅឲ្យរុស្ស៊ីជាថ្នូរនឹងការធានាឲ្យមានសេរីភាព និងសន្តិភាពនៅក្នុងប្រទេស G៧ នឹងគាំទ្រលើការសម្រេចចិត្តរបស់អ៊ុយក្រែន។ ការបញ្ជាក់របស់ G៧ បានធ្វើឡើង ខណៈដែលរុស្ស៊ីកំពុងផ្តោត និងពង្រឹងការប្រយុទ្ធនៅក្នុងតំបន់ដុនបាស់ដែលមួយភាគបានគ្រប់គ្រងដោយក្រុមអ្នកទាមទារផ្តាច់ទឹកដីនិយមគាំទ្ររុស្ស៊ីតាំងពីឆ្នាំ ២០១៤។ បន្ទាប់មក បានសន្យាបន្ថែមទណ្ឌកម្មសេដ្ឋកិច្ចប្រឆាំងរុស្ស៊ី និងបានស្នើជាថ្មីឲ្យរុស្ស៊ីបញ្ឈប់សង្រ្គាមមួយដែលអ៊ុយក្រែនមិនបានអុជអាល និងបញ្ចប់ការរងទុកសោក រួមទាំងការបាត់បង់ជីវិតជនស៊ីវិល។
ទន្ទឹមគ្នានេះ G៧ មិនភ្លេចអំពាវនាវជាថ្មីឲ្យប្រទេសបេឡារុសឈប់ជួយសម្រួល និងគាំទ្ររុស្ស៊ីនៅក្នុងសង្រ្គាមឈ្លានពានអ៊ុយក្រែន។ ការអំពាវនាវដូចគ្នានេះក៏ត្រូវបាន G៧ ធ្វើទៅកាន់ប្រទេសចិនដោយស្នើឲ្យចិនកុំរារាំងលើទណ្ឌកម្មប្រឆាំងរុស្ស៊ី កុំឲ្យចិនបង្ហាញពីភាពត្រឹមត្រូវនៃសកម្មភាពរបស់រុស្ស៊ីនៅអ៊ុយក្រែន និងកុំឲ្យចិនព្យាយាមធ្វើឲ្យស្របច្បាប់លើសង្រ្គាមរុស្ស៊ីឈ្លានពានអ៊ុយក្រែនពេលនេះ។
ឥណ្ឌាពន្យល់ពីមូលហេតុអតិផរណា និងលក្ខខណ្ឌអាកាសធាតុ
ក្រៅពីប្រធានរឿងសង្រ្គាមរុស្ស៊ីឈ្លានពានអ៊ុយក្រែន G៧ បានចាប់អារម្មណ៍ដោយរិះគន់លើការសម្រេចចិត្តរបស់ប្រទេសឥណ្ឌាដែលហាមការនាំចេញស្រូវសាលី។ មានមូលហេតុសំខាន់ចំនួនពីរដែលឥណ្ឌាបានលើកឡើងដើម្បីបញ្ជាក់ពីការសម្រេចចិត្តរបស់ខ្លួនក្នុងការហាមការនាំចេញស្រូវសឡី ទី១ គឺដើម្បីគ្រប់គ្រងអត្រាអតិផរណាលើស្បៀងអាហារក្នុងស្រុក និងទី២ គឺទុកស្រូវសាលីដើម្បីចិញ្ចឹមពលរដ្ឋទាំងជិត ១ ៤០០លាននាក់របស់ខ្លួន។ ពិតណាស់ នៅពេលផ្ទុះសង្រ្គាមរុស្ស៊ីឈ្លានពានអ៊ុយក្រែនភ្លាម ឥណ្ឌាបានចេញមុខប្រកាសសន្យាធានានាំចេញស្រូវសាលីរបស់ខ្លួនក្នុងបរិមាណពី ៧លានតោនទៅ ១០លានតោនចាប់ពីថ្ងៃទី១ មេសា ឆ្នាំ ២០២២ ដើម្បីចិញ្ចឹមមនុស្សលោក។
ការសន្យានេះបានធ្វើឡើង ខណៈដែលការដាំ ការប្រមូល និងការនាំចេញស្រូវសាលីអ៊ុយក្រែន និងរុស្ស៊ីបានជាប់គាំងដោយសារសង្រ្គាម។ តែនេះដោយឥណ្ឌាមិនបានគិតពីបញ្ហាអាកាសធាតុក្តៅហួតហែងខ្លាំងដែលឥណ្ឌាបានជួបតាំងពីខែមីនា ពិសេសនាប៉ុន្មានសប្តាហ៍ចុងក្រោយនេះ។ តាមរដ្ឋាភិបាលក្រុងញូដែលី លក្ខខណ្ឌអាកាសធាតុពេលនេះអាចធ្វើឲ្យការប្រមូលផលស្រូវសាលីធ្លាក់ចុះយ៉ាងតិច ៥% ក្នុងឆ្នាំ ២០២២ បើធៀបនឹងឆ្នាំ ២០២១ ដែលប្រមូលបានប្រមាណជា ១១០លានតោន។ នេះហើយជាហេតុផលដែលឥណ្ឌាបានហាមការនាំចេញស្រូវសាលីដើម្បីទុកចិញ្ចឹមពលរដ្ឋរបស់ខ្លួន។ តែក្នុងពេលជាមួយគ្នា ឥណ្ឌាបានបញ្ជាក់ពីការរក្សាសិទ្ធិក្នុងការបន្តលក់ទៅឲ្យប្រទេសដែលត្រូវការចាំបាច់ និងថា វិធានការថ្មីនេះមិនជាប់ពាក់ព័ន្ធនឹងកិច្ចសន្យាទិញ លក់ដែលបានចុះហត្ថលេខារួចហើយទេ។
ទោះជាយ៉ាងនេះក្តី ក្រុមប្រទេស G៧ បានរិះគន់លើការសម្រេចចិត្តរបស់ឥណ្ឌា និងអំពាវនាវឲ្យឥណ្ឌារក្សាទុកទីផ្សារចំហដដែល។ « បើគ្រប់គ្នាចាប់ផ្តើមដាក់កំហិតលើការនាំចេញបែបនេះ ឬបិទទីផ្សារទាំងស្រុង វានឹងធ្វើឱ្យវិបត្តិកាន់តែអាក្រក់ឡើងៗ រួមទាំងធ្វើឱ្យប៉ះពាល់ដល់ឥណ្ឌា និងកសិករឥណ្ឌាខ្លួនឯងផង »នេះជាការថ្លែងរបស់រដ្ឋមន្រ្តីកសិកម្មអាល្លឺម៉ង់។
ឥណ្ឌាជាប្រទេសផលិតស្រូវសាលីទី១ ក្នុងលោក តែមិនមែនជាប្រទេសនាំចេញទី១ ទេ
ឥណ្ឌាជាប្រទេសផលិតស្រូវសាលីលំដាប់ទី២ ក្នុងលោក បន្ទាប់ពីប្រទេសចិន។ តែឥណ្ឌា និងចិនមិនមែនជាប្រទេសដែលបាននាំស្រូវសាលីចេញច្រើនជាងគេលើលោកទេ។ មួយវិញទៀត ចិន និងឥណ្ឌាជាប្រទេសដែលមានចំនួនប្រជាជនច្រើនគេជាងក្នុងលោកដោយមានជាង ១ ៤០០លាននាក់នៅចិន និងជិត ១ ៤០០លាននាក់នៅឥណ្ឌា។ ដូច្នេះសម្រាប់ចិន និងឥណ្ឌា ការរក្សាទុកស្រូវសាលីចិញ្ចឹមក្រពះពលរដ្ឋខ្លួនឯងជាអាទិភាពទី១ មុននឹងនាំចេញ។ នៅក្នុងបរិបទធម្មតា ពោលមុនសង្រ្គាមរុស្ស៊ីឈ្លានពានអ៊ុយក្រែន ពិភពលោកមិនចំណោតរឿងស្រូវសាលីទេ ព្រោះក្រៅពីចិន និងឥណ្ឌា រុស្ស៊ីជាប្រទេសផលិតទី៣ ហើយអ៊ុយក្រែនស្ថិតនៅលំដាប់ទី៨។
លើសពីនេះ រុស្ស៊ីជាប្រទេសនាំចេញស្រូវសាលីទី១ ក្នុងលោកបន្ទាប់ពីសហរដ្ឋអាមេរិក និងអ៊ុយក្រែន។ តែបញ្ហានៅត្រង់ថា សង្រ្គាមអ៊ុយក្រែនពេលនេះបានធ្វើឲ្យជាប់គាំងលើការដាំដុះ ប្រមូលផល និងការនាំចេញស្រូវសាលីអ៊ុយក្រែន។ ពីខាងរុស្ស៊ីដោយសារតែរុស្ស៊ីជាប់ទណ្ឌកម្មបស្ចិមលោកក្នុងសង្រ្គាមអ៊ុយក្រែនពេលនេះ រុស្ស៊ីមិនអាចនាំស្រូវសាលីចេញបានទេ។ ដូច្នេះបើប្រទេសផ្សេង ដូចយ៉ាងឥណ្ឌាបានផ្អាកការនាំចេញស្រូវសាលីរបស់ខ្លួនទៀត តើពិភពលោកមានស្រូវសាលីមកពីណាដើម្បីផ្គត់ផ្គង់ឲ្យក្រុមប្រទេសដែលពឹងលើស្រូវសាលីរុស្ស៊ី និងអ៊ុយក្រែន។ គួរបញ្ជាក់ថា អ៊ុយក្រែនក៏ជាប្រទេសនាំចេញពោតលំដាប់ទី៣ ក្នុងលោក និងជាប្រទេសកសិកម្មដំណាំផ្កាឈូករ័ត្នសម្រាប់ធ្វើប្រេងឆាដែរ។
ខណៈនេះ អ៊ុយក្រែនមិនអាចបន្តដំាស្រូវសាលី ពោត ឬផ្កាឈូករ័ត្នដូចទម្លាប់សព្វមួយដងបានទៀតទេ។ ដល់អ៊ីចឹងទៅ តម្លៃស្រូវសាលី ពោតរួមទាំងផ្កាឈូករ័ត្ននៅលើទីផ្សារអន្តរជាតិកំពុងឡើងថ្លែខ្ពស់។ ក្រុមប្រទេសដែលពឹងច្រើន ឬសឹងទាំងស្រុងលើស្រូវសាលីរុស្ស៊ី និងអ៊ុយក្រែនជាអ្នកដែលកំពុងប្រឈមខ្លាំងជាងគេ ពិសេសក្រុមប្រទេសអាហ្វ្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ