លោកអូឡាហ្វ ស្ហុលស៍ ៖ រុស្ស៊ីមានចំណែកទទួលខុសត្រូវ លើការផ្គត់ផ្គង់ស្បៀងអាហារទូទាំងពិភពលោក
លោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ បានទូរស័ព្ទទៅនិយាយជាមួយលោកពូទីន កាលពីថ្ងៃព្រឹកថ្ងៃសុក្រទី១៣ឧសភា ។ នៅក្នុងការសន្ទនាទនេះ លោកប្រមុខរដ្ឋាភិបាលអាល្លឺម៉ង់ បានប្រាប់ទៅលោកពូទីនថា រុស្ស៊ីមានចំណែកទទួលខុសត្រូវធំណាស់ នៅក្នុងការផ្គត់ផ្គង់វត្ថុធាតុដើមស្បៀងហារ សម្រាប់ពិភពលោកទាំងមូល។ វត្ថុធាតុដើមស្បៀងអាហារ ដែលកំពុងតែឡើងថ្លៃខ្លាំង បង្កឲ្យមានវិបត្តិនៅតាមប្រទេសកាន់តែច្រើនឡើងៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
យោងតាមលិខិតប្រកាស របស់វិមានក្រឹមឡាំង លោកពូទីន ប្រធានាធិបតីរុស្ស៊ី បានប្រាប់ទៅលោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ថា “ប្រតិបត្តិការយោធាដែលរុស្ស៊ីកំពុងតែធ្វើនៅអ៊ុយក្រែន គឺដើម្បីបោសសំអាត ប្រទេសនេះ ឲ្យអស់ស្អាតពីទ្រឹស្តីណាហ្ស៊ីសម័យថ្មី”។ លោកពូទីន ក៏បានអះអាងទៀតថា គឺភាគីអ៊ុយក្រែន ដែលបានយកជើងរាទឹក ដាក់ឧបសគ្គដល់ការចរចា នាពេលកន្លងមកនេះ។
ដោយឡែក យោងតាមការបញ្ជាក់ពីរដ្ឋាភិបាលអាល្លឺម៉ង់ នៅក្នុងកិច្ចសន្ទនាតាមទូរស័ព្ទ រយៈពេល៧៥នាទីនេះ លោកអូឡាហ្វ ស្ហុលស៍ បានឆ្លើយប្រាប់ទៅលោកពូទីនវិញថា ការចោទថាអ៊ុយក្រែនកំពុងស្ថិតក្រោមការដឹកនាំ របស់ទ្រឹស្តីណាហ្ស៊ីសម័យថ្មីនោះ វាគឺជាការចោទគ្មានមូលដ្ឋានសោះ ហើយវាជារឿងចាំបាច់ ដែលត្រូវបិទបញ្ចប់សង្រ្គាមនេះ។ លោកអូឡាហ្វ ស្ហុលស៍ បានលើកឡើងទៀតថា រុស្ស៊ីមានតួនាទី និងការទទួលខុសត្រូវធំណាស់ នៅក្នុងការផ្គត់ផ្គង់ទំនិញវត្ថុធាតុដើមស្បៀងអាហារ សម្រាប់ពិភពលោក។
គួរបញ្ជាក់ថា សង្គ្រាមនៅអ៊ុយក្រែន កំពុងតែធ្វើឲ្យទីផ្សារវត្ថុធាតុដើមស្បៀងអាហារ មានភាពជ្រួលច្របល់ជាខ្លាំង។ រុស្ស៊ី និងអ៊ុយក្រែន គឺជាជង្រុងដ៏សំខាន់របស់ពិភពលោក ដូចជាគ្រាប់ពោត ស្រូវសាឡី និងគ្រាប់ធុញ្ញជាតិមួយចំនួនទៀតសម្រាប់ផលិតធ្វើប្រេងឆា។ តម្លៃវត្ថុធាតុដើមទាំងនេះ បានឡើងជាលំដាប់ ធ្វើឲ្យតម្លៃទំនិញតាមទីផ្សារឡើងថ្លៃ។ យោងតាមការព្យាករណ៍ ក្នុងឆ្នាំ២០២២នេះ ទិន្នផលគ្រាប់ពោតរបស់អ៊ុយក្រែន អាចនឹងធ្លាក់ចុះជាងពាក់កណ្តាល ដោយសារតែងសង្គ្រាម។
ជាងនេះទៀត ស្រូវសាឡីអ៊ុយក្រែនចំនួនប្រមាណ ២,៥លានតោន កំពុងជាប់គាំងនៅកំពង់ផែ មិនអាចត្រូវបានដឹកចេញបាន ដោយសារតែកងទ័ពរុស្ស៊ីឡោមព័ទ្ធកំពង់ផែអូដេសា។ កាលពីថ្ងៃទី១០ឧសភា លោកប្រធានាធិបតីហ្សេឡេនស្គី បានថ្លែងសារ អំពាវនាវ ឲ្យសហគមអន្តរជាតិត្រូវជួយអន្តរាគមន៍ ដើម្បីរំដោះបើកកំពង់ផែក្រុងអូដេសាឲ្យបាន ដើម្បីដឹកទំនិញស្បៀងរបស់អ៊ុយក្រែនចេញទៅក្រៅ។
យោងតាមអង្គការមនុស្សធម៌ និងអង្គការសហប្រជាជាតិ ការឡើងថ្លៃទំនិញស្បៀងអាហារនៅក្នុងពេលនេះ អាចនឹងរុញច្រានមនុស្សជាច្រើនលាននាក់ ឲ្យជួបគ្រោះទុរ្ភឹក្ស ជាពិសេសនៅតាមប្រទេសតំបន់អាហ្វ្រិក។ យ៉ាងណាមិញ រដ្ឋមន្ត្រីការបរទេស នៃក្រុមប្រទេសសេដ្ឋកិច្ចនាំមុខ G7 បានជួបប្រជុំគ្នា កាលពីរសៀលថ្ងៃសុក្រ ដើម្បីនិយាយគ្នា អំពីវិធានការមួយចំនួន ដើម្បីធានាកុំឲ្យទីផ្សារតម្លៃវត្ថុធាតុដើមស្បៀងអាហារ ជ្រួលច្របល់ខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ