ស្រូវសាលីអ៊ុយក្រែនក្លាយជាចំណាប់ខ្មាំងនៃសង្រ្គាមរុស្ស៊ីឈ្លានពានអ៊ុយក្រែន
ចុះផ្សាយនៅថ្ងៃ៖
ស្តាប់ - ០៨:១១
អឺរ៉ុបបាននិយាយបរិហារុស្ស៊ីថា ជាអ្នកទទួលខុសត្រូវឲ្យកើតមានវិបត្តិស្បៀងអាហារ សព្វថ្ងៃនេះ។ នៅក្នុងកិច្ចប្រជុំរបស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទម្សិលមិញ ប្រធានក្រុមប្រឹក្សាអឺរ៉ុប លោកCharles Michelបាននិយាយរិះគន់ថា សង្រ្គាមរុស្ស៊ី ឈ្លានពានអ៊ុយក្រែនបានបង្កផលវិបាកពេញពិភពលោក ដោយបានបណ្តាលឲ្យតម្លៃទំនិញ ឡើងថ្លៃ រុញច្រានឲ្យមនុស្សជាច្រើនលាននាក់ធ្លាក់ក្នុងភាពក្រីក្រ ជួបវិបត្តិខ្វះស្បៀងអាហារ ជាពិសេសនៅក្នុងតំបន់អាហ្វ្រិក តំបន់ដើមបូព៌ា ដែលពឹងអាស្រ័យខ្លាំងលើការនាំចូលស្រូវសាលីពីអ៊ុយក្រែន និងរុស្ស៊ីដែលជាប្រទេសនាំចេញ ស្រូវសាលី គ្រាប់ធញ្ញជាតិ ច្រើនជាងគេនៅក្នុងពិភពលោក។ ការចោទប្រកាន់របស់ភាគីអឺរ៉ុបបានធ្វើឲ្យឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ ដើរចេញភ្លាម ពីអង្គប្រជុំនៅក្រុមប្រឹក្សាសន្តិសុខ។
នៅក្រុមប្រឹក្សាសន្តិសុខអង្គការសហប្រជាជាតិ ពាក្យចោទប្រកាន់របស់ប្រធានក្រុមប្រឹក្សាអឺរ៉ុប លោកស្ហាល មីស្ហែល ដែលថា រុស្ស៊ី ជាអ្នកទទួលខុសត្រូវនៃវិបត្តិស្បៀងអាហារក្នុងពិភពលោកសព្វថ្ងៃ បានជំរុញ ឲ្យ អ្នកតំណាងរុស្ស៊ីងើបដើរចេញជាបន្ទាន់ពីបន្ទប់ប្រជុំ។
ឯកអគ្គរដ្ឋទូតរុស្ស៊ី ប្រចាំអង្គការសហប្រជាជាតិ លោកVassily Nebenzia បាននិយាយប្រាប់ទីភ្នាក់ងារព័ត៌មានអង់គ្លេស Reuters ថា លោកដើរចេញពីអង្គប្រជុំ ព្រោះលោកមិនអាចទ្រាំស្តាប់ពាក្យកុហកដែលប្រធានក្រុមប្រឹក្សាអឺរ៉ុបបានលើកឡើងនៅក្នុងកិច្ចប្រជុំរបស់ក្រុមប្រឹក្សាសន្តិសុខ។
ប៉ុន្តែ ប្រធានក្រុមប្រឹក្សាអឺរ៉ុប លោកស្ហាល មីស្ហែល បាននិយាយខ្លាំងៗ នៅពេលឃើញអ្នកតំណាងរុស្ស៊ី ងើបចាកចេញ ពីបន្ទប់ប្រជុំថា លោកVassily Nebenzia ដើរចេញ ព្រោះមិនចង់ស្តាប់ការពិត។
នៅក្នុងកិច្ចប្រជុំរបស់ក្រុមប្រឹក្សាសន្តិសុខដែលដឹកនាំដោយប្រធានផ្លាស់វេន ប្រទេសអាល់បានី ប្រធានក្រុមប្រឹក្សាអឺរ៉ុបបានទម្លាក់កំហុសទៅលើសង្រ្គាមរុស្ស៊ី ឈ្លានពានអ៊ុយក្រែនថា ជាដើមហេតុបង្កឲ្យមានវិបត្តិស្បៀងអាហារក្នុងពិភពលោក។
បើតាម ប្រធានក្រុមប្រឹក្សាអឺរ៉ុប រុស្ស៊ីផ្ទាល់បានយកបញ្ហាស្បៀងមកធ្វើជាមីស៊ីលប្រឆាំងក្រុមប្រទេសកំពុងអភិវឌ្ឍ តាមរយៈ ការបិទខ្ទប់ ការនាំចេញស្រូវសាលីអ៊ុយក្រែន។ តាមប្រធានក្រុមប្រឹក្សាអឺរ៉ុប លោកស្ហាល មីស្ហែល លោកឃើញផ្ទាល់នឹងភ្នែក គ្រាប់ធញ្ញជាតិ ស្រូវសាលី រាប់លានតោន ដែលនៅជាប់គាំង នៅកំពង់ផែ អូដេសា ដែលអ៊ុយក្រែន មិនអាចដឹកនាំចេញទៅបរទេសបាន ដោយសារតែ ការបិទខ្ទប់របស់កងទ័ពរុស្ស៊ី ដែលរំលោភចូលគ្រប់គ្រងសមុទ្រខ្មៅ។
នៅមុនរុស្ស៊ីចូលធ្វើសង្រ្គាមអ៊ុយក្រែន អ៊ុយក្រែនជាប្រទេសធំទី ៤ក្នុងពិភពលោកខាងនាំចេញស្រូវសាលី និងពោត។ របាយការណ៍សម្រាប់រដូវ២០២១ និង២០២២ អ៊ុយក្រែនធ្លាប់នាំចេញស្រូវសាលី ២០លានតោន និងពោត ជាង ២៧លានតោន។ ប៉ុន្តែ ដោយសារតែការបិទខ្ទប់នៅសមុទ្រខ្មៅពីសំណាក់កងទ័ពរុស្ស៊ី សមាគមអ្នកផលិតស្រូវសាលី អ៊ុយក្រែនវាយតម្លៃថា ការនាំចេញស្រូវសាលីរបស់អ៊ុយក្រែន ទៅកាន់អាហ្វ្រិក អាស៊ី ដើមបូព៌ា និងអឺរ៉ុប នៅឆ្នាំនេះ នឹងអាចបានច្រើនបំផុត ១២លានតោន ពោលគឺតិចណាស់ បើប្រៀបធៀបនឹងការប្រមូលផលស្រូវសាលី ដែលមានដល់៦៦លានតោន។
ក្រៅពីចោទរុស្ស៊ីថា ជាអ្នកទទួលខុសត្រូវធ្វើឲ្យកើតមានវិបត្តិខ្វះស្បៀង និងចំណីអាហារ ដោយសារតែធ្វើសង្រ្គាមឈ្លានពានអ៊ុយក្រែន ប្រមុខដឹកនាំក្រុមប្រឹក្សាអឺរ៉ុបនៅបានចោទប្រកាន់រុស្ស៊ីផងដែរ បានលួចស្រូវសាលីអ៊ុយក្រែន និងបានហាមឃាត់មិនឲ្យអ៊ុយក្រែនសាបព្រួស បង្កបង្កើនផលកសិកម្ម នៅក្នុងតំបន់ដែលកងទ័ពរុស្ស៊ីចូលកាន់កាប់។
រុស្ស៊ីពិតជាលួចយកស្រូវសាលីអ៊ុយក្រែន?
រឿងលួចយកស្រូវសាលីអ៊ុយក្រែន នាំចេញទៅបរទេស ភាគីអ៊ុយក្រែនបានចេញមុខចោទប្រកាន់រុស្ស៊ី តាំងពីសប្តាហ៍មុនម្ល៉េះ។ ឯកអគ្គរដ្ឋទូតអ៊ុយក្រែន នៅតួកគី និងលីបង់ធ្លាប់បាននិយាយថា នៅពេលធ្វើសង្រ្គាមចូលកាន់កាប់តំបន់ជង្រុកស្រូវសាលី របស់អ៊ុយក្រែន ដូចជានៅកំពង់ផែ ម៉ារីយូប៉ូល និងតំបន់ភាគខាងកើតអ៊ុយក្រែន រុស្ស៊ី បានលួចដឹកស្រូវសាលី ទាំងតោនៗ សំដៅទឹកដីបរទេស ដែលក្នុងនោះមានផងដែរ រុស្ស៊ី។
រុស្ស៊ីធ្លាប់បានចេញមុខបដិសេធការចោទប្រកាន់ ប៉ុន្តែ ការចុះផ្សាយរបស់ទីភ្នាក់ងារព័ត៌មានរុស្ស៊ី ផ្ទាល់ ឈ្មោះ Tass ធ្លាប់បានសរសេរស្រង់សំដី មន្រ្តីយោធា រុស្ស៊ីម្នាក់ដែលទើបចូលគ្រប់គ្រងតំបន់Kherson របស់អ៊ុយក្រែន ដែលថា គេបានដឹកជញ្ជូនស្រូវសាលីអ៊ុយក្រែន សំដៅទឹកដីរុស្ស៊ី ដូចជាតំបន់គ្រីមេ ដែលរុស្ស៊ី បានរំលោភ កាត់យកពីអ៊ុយក្រែន នៅឆ្នាំ ២០១៤។
នៅក្នុងកិច្ចប្រជុំដាច់ដោយឡែក នៅញ៉ូវយក ប្រមុខការបរទេសអាមេរិក អង់តូនី ប្លីងកិន មានយោបល់ដូចប្រធានក្រុមប្រឹក្សាអឺរ៉ុប។ តាមលោកប្លីងកិន មានព័ត៌មានគួរឲ្យជឿជាក់ច្រើន ដែលថា រុស្ស៊ី លួចស្រូវសាលី របស់អ៊ុយក្រែន។ រូបភាពផ្កាយរណបជាច្រើនបានបង្ហាញកប៉ាល់ដឹកទំនិញរុស្ស៊ី ដែលស្ថិតក្រោមការគ្រប់គ្រងរបស់ក្រសួងការពារជាតិរុស្ស៊ីបានបើកចូលចតកំពង់ផែស៊ីរី លីបង់ និងតួកគីជាដើម។ អ្នកតំណាងអ៊ុយក្រែន នៅលីបង់ បាននិយាយហើយថា ចាប់តាំងពីធ្វើសង្រ្គាម ឈ្លានពានអ៊ុយក្រែន រុស្ស៊ី បានលួចដឹកនាំចេញស្រូវសាលី អ៊ុយក្រែន ទៅស៊ីរី ដែលជាសម្ព័ន្ធមិត្តរបស់រុស្ស៊ី។
តាមរដ្ឋមន្រ្តីការបរទេសអាមេរិក រុស្ស៊ី សព្វថ្ងៃកំពុងយកបញ្ហានាំចេញស្រូវសាឡីរបស់អ៊ុយក្រែន ជាការគំរាមយកប្រយោជន៍ នៅក្នុងសង្រ្គាមអ៊ុយក្រែន ពោលគឺរុស្ស៊ីចង់ទាមទារឲ្យប្រទេសលោកខាងលិចដកចោលទណ្ឌកម្មសេដ្ឋកិច្ចលើខ្លួន ជាមុន បើសិនគេចង់នាំចេញស្រូវសាលីអ៊ុយក្រែន។
អង្គការសហប្រជាជាតិ កំពុងខ្វាត់ខ្វែងដៃ ចរចាខ្លាំងណាស់ជាមួយរុស្ស៊ី ដើម្បី សម្រួលការនាំចេញស្រូវសាលីអ៊ុយក្រែន ដើម្បីដោះស្រាយវិបត្តិខ្វះស្បៀងអាហារ និងទំនិញឡើងថ្លៃនៅក្នុងពិភពលោក។
មានទៅ គឺមានមក
ក្នុងនាមជាអ្នកសម្របសម្រួលរវាងរុស្ស៊ី និងអ៊ុយក្រែន តួកគីបានដាក់ខ្លួនជាអ្នកដឹកនាំចេញស្រូវសាលីអ៊ុយក្រែន ប្រមាណ ២០លានតោនដែលកំពុងជាប់គាំងស្ទះ នៅកំពង់ផែអូដេសា។ តាមទីភ្នាក់ងារផ្លូវរដ្ឋតួកគី រុស្ស៊ី តួកគី អ៊ុយក្រែនបានចរចា យល់ស្របគ្នាឲ្យបង្កើតច្រកផ្លូវនាំចេញស្រូវសាលី នៅសមុទ្រខ្មៅ ពោលគឺដូចច្រកផ្លូវមនុស្សធម៌ ដែលគេធ្លាប់បានបង្កើតឡើងដើម្បីជម្លៀសប្រជាជនចេញពីតំបន់ម៉ារីយូប៉ូលយ៉ាងដូច្នេះដែរ។
រដ្ឋមន្រ្តីការបរទេសរុស្ស៊ី លោកឡាវ្រូវ ធ្វើដំណើរទៅតួកគីនៅថ្ងៃពុធស្អែក នេះ។ ប៉ុន្តែ បញ្ហានៅត្រង់ថា តើរុស្ស៊ីនឹងធ្វើសម្បទាន មិនបាញ់បំផ្លាញ កប៉ាល់ដឹកស្រូវសាលីរបស់អ៊ុយក្រែននៅសមុទ្រខ្មៅដែរឬទេ។ រុស្ស៊ីក៏ចង់បានប្រយោជន៍មកវិញដែរ បើសិនខ្លួនធ្វើសម្បទាននោះ។ អាចថា បើចង់ឲ្យរុស្ស៊ី អនុគ្រោះបើកផ្លូវឲ្យអ៊ុយក្រែន នាំចេញស្រូវសាលី រាប់លានតោន ដើម្បីចេញទៅលក់នៅបរទេស គេក៏ត្រូវគិតគូរដល់ស្រូវសាលីរបស់រុស្ស៊ីរាប់លានតោន ដែលនៅជាប់គាំងដោយសារតែការដាក់ទណ្ឌកម្មរបស់ប្រទេសលោកខាងលិចដែរ។ រុស្ស៊ីមិនអាចចេះតែបណ្តោយឲ្យអ៊ុយក្រែនបានប្រយោជន៍តែម្នាក់ឯងពីការនាំចេញស្រូវសាលីទៅទីផ្សារនោះទេ។
ដូច្នេះ ដើម្បីបញ្ចុះបញ្ចូលឲ្យរុស្ស៊ីចុះកិច្ចព្រមព្រៀង បើកផ្លូវឲ្យគេនាំចេញស្រូវសាលីអ៊ុយក្រែន តួកគី និងសហគមន៍អន្តរជាតិត្រូវតែធានាដែរថា រុស្ស៊ី នឹងបានប្រយោជន៍ខ្លះមកវិញដែរពីកិច្ចព្រមព្រៀងខាងលើ។ សួរថា តើគេព្រមដកទណ្ឌកម្មសេដ្ឋកិច្ច ពីរុស្ស៊ី ដើម្បីជាថ្នូរនឹងការចង់បានភ្លើងខៀវរបស់រុស្ស៊ី ឲ្យគេនាំចេញស្រូវសាលីរបស់អ៊ុយក្រែនដែរឬទេ។ នេះជាការសម្រេចចិត្តរបស់ក្រុមប្រទេសលោកខាងលិច។
សេណារីយ៉ូខ្មៅងងឹតសម្រាប់ស្រូវសាលីអ៊ុយក្រែន
អ៊ុយក្រែនធ្លាប់បានគិតគូរ បង្កើនការនាំចេញស្រូវសាលីតាមផ្លូវគោក ដោយជៀសវាងមិនប្រើសមុទ្រខ្មៅ។ ប៉ុន្តែ វាមានបញ្ហាមធ្យោបាយ Logistique ច្រើន ដោយសារថា ជាង ៩០%នៃស្រូវសាលីរបស់អ៊ុយក្រែន ត្រូវបានស្តុកនៅតាមកំពង់ផែ និងនៅលើកប៉ាល់ ដែលត្រូវត្រៀមខ្លួនដឹកនាំចេញទៅបរទេស។ ប៉ុន្តែ នៅពេលសង្រ្គាមឈ្លានពានរបស់រុស្ស៊ី ចាប់ផ្តើម ការដឹកជញ្ជូនតាមផ្លូវទឹកត្រូវជាប់គាំង ដោយសារតែសមុទ្រខ្មៅត្រូវស្ថិតក្រោមការកាន់កាប់របស់កងទ័ពរុស្ស៊ី។
នៅមួយរយៈចុងក្រោយនេះ អ៊ុយក្រែនបានព្យាយាមបញ្ជូនចេញ ស្រូវសាលីរបស់ខ្លួនតាមផ្លូវគោក មកប៉ែកខាងលិច អ៊ុយក្រែន សំដៅប្រទេសប៉ូឡូញ និងរូម៉ានីជាដើម ប៉ុន្តែ ការដឹកជញ្ជូនចេញអាចធ្វើឡើងក្នុងបរិមាណតិច ព្រោះថា ហេដ្ឋារចនាសម្ព័ន្ធមួយចំនួនធំ ដូចជាផ្លូវរទេះភ្លើង ត្រូវបំផ្លាញដោយសារការវាយប្រហាររបស់រុស្ស៊ី។
បញ្ហាសំខាន់ចំពោះមុខមួយទៀតរបស់អ៊ុយក្រែន នៅត្រង់ថា បើសិនអ៊ុយក្រែនមិនអាចបញ្ជូនចេញ ស្រូវសាលីក្នុងស្តុកជាង ២០តោននៅពេលនេះទេ អ៊ុយក្រែន នឹងគ្មានកន្លែងសម្រាប់ស្តុកស្រូវសាលីថ្មីដែលអ៊ុយក្រែននឹងអាចប្រមូលផលបានប្រមាណ ៧៥លានតោននៅប៉ុន្មានខែខាងមុខ។ អាចថា អ៊ុយក្រែន ជួបវិបត្តិកើនចាល់ស្រូវសាលី គ្មានកន្លែងស្តុក ប៉ុន្តែ ពិភពលោក ជួបវិបត្តិខ្វះស្បៀង ដោយសារតែសង្រ្គាមរុស្ស៊ីឈ្លានពានអ៊ុយក្រែន ដែលជាឧបសគ្គនៃការនាំចេញស្រូវសាលីអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ