សង្គ្រាមអ៊ុយក្រែន ៖បើតាមរូបភាពផ្កាយរណប អ៊ុយក្រែនបាត់បង់ទិន្នផលស្រូវសាលី មួយភាគបី
ដោយហេតុសង្គ្រាម រដូវសាបព្រោះសូវសាលីឆ្នាំនេះជួបភាពរអាក់រអួលយ៉ាងខ្លាំង ដូច្នេះនៅពេលរដូវច្រូតកាត់មកដល់ អ៊ុយក្រែនក៏នឹងទទួលទិន្នផលស្រូវសាលីតិចជាងធម្មតាដែរ។ បើតាមការវិភាគ របស់ក្រុមហ៊ុនKayrros តាមរយៈរូបភាពផ្កាយរណប នៅឆ្នាំ២០២២នេះ ទិន្នផលស្រូវសាលីអ៊ុយក្រែននឹងធ្លាក់ចុះ៣៥% បើប្រៀបទៅនឹងឆ្នាំ២០២១។
ចុះផ្សាយនៅថ្ងៃ៖
ស្តាប់ - ០២:១២
ក្នុងរដូវសាបព្រោះដាំស្រូវសាលីឆ្នាំនេះ កសិករ ត្រូវជួបការលំបាកដោយជាក់ស្តែង ដូចជាត្រូវគេចគ្រាប់បែក គ្រាប់ផ្លោង ពាក់កាស ពាក់អាវក្រោះ ឬខ្វះប្រេង ដើម្បីបញ្ជាយានយន្ត។ ដោយមិនអាចប្រកែកបាន ផ្ទៃដីដាំដុះបានរួមតូចជាធម្មតាយ៉ាងខ្លាំង។ រូបភាពផ្កាយរណបពីថ្ងៃទី ១៤ ដល់២២មេសា របស់ Terra de la Nasa ជាអំណះអំណាងបញ្ជាក់បន្ថែម។ ដោយប្រើវិធីសាស្ត្រគណនាទិន្នផលរុក្ខជាតិនិងធញ្ញជាតិដ៏ប្រាកដ ក្រុមហ៊ុន Kayrros ជំនាញខាងវិភាគរូបភាពផ្កាយរណបនិងដៅទីតាំងភូមិសាស្ត្រ ប៉ាន់ប្រមាណថា អ៊ុយក្រែនគិតក្នុងដំណាក់កាលនេះ នឹងមានសមត្ថភាពប្រមូលផលស្រូវសាលីត្រឹមប្រមាណតែ២១ពាន់លានតោនតែប៉ុណ្ណោះ សម្រាប់រដូវច្រូតកាត់ឆ្នាំ២០២២ ពោលគឺតិចជាងឆ្នាំ២០២១ចំនួន ១២លានតោន។ ហើយបើប្រៀបទៅនឹងមធ្យមភាគ៥ឆ្នាំចុងក្រោយកន្លងមកនេះ ទិន្នផលស្រូវសាលីអ៊ុយក្រែននឹងធ្លាក់ចុះ២៣%។ នេះបើតាមក្រុមអ្នកជំនាញដដែល ដែលព្យាករទៀតថា ដោយហេតុការប្រយុទ្ធនៅតែបន្ត និងជញ្ជ្រុំខ្លាំង លើតំបន់ភាគខាងកើតអ៊ុយក្រែន ដែលជង្រុកស្រូវសាលីរបស់ប្រទេស ទិន្នផលស្រូវសាលីជាក់ស្តែងនឹងមានកំរិតទាបជាងតួលេខខាងលើ។
កសិករដែលអាចសាបព្រោះដាំស្រូវបាននៅពេលនេះ ត្រូវប្រឈមនឹងបញ្ហាដឹកជញ្ជូន និងស្តុកទុកទៀត នៅពេលទទួលផល។ ការនាំចេញតាមផ្លូវរថភ្លើងនិងតាមផ្លូវគោក អាចជំនួសការដឹកជញ្ជូនតាមផ្លូវទឹក (នាវា) បានតែមួយភាគតូចទេ។ តែកំពង់ផែអ៊ុយក្រែននៅតាមសមុទ្ទខ្មៅ និងសមុទ្ទAzov ដែលជាច្រកផ្តោះប្តូរពាណិជ្ជកម្ម មិនអាចធានាការនាំចេញផលិតផលកសិកម្មបានឡើយ ព្រោះរុស្ស៊ីបានបិទខ្ទប់អស់ទៅហើយ។
រុស្ស៊ីនិងអ៊ុយក្រែនជាប្រទេសនាំចេញស្រូវសាលីដ៏ចំបងនៅលើពិភពលោក និងតំណាងឱ្យ៣០%នៃពាណិជ្ជកម្មធញ្ញជាតិពិភពលោក។ នៅពេលប្រទេសទាំងពីរនេះមានសង្គ្រាមនឹងគ្នា ប្រទេសជាច្រើនផ្សេងទៀតដែលរំពឹងខ្លាំងលើនាំចូលគ្រាប់ធញ្ញជាតិពីអ៊ុយក្រែននិងរុស្ស៊ី ចាប់រង្គោះរង្គើនិងធ្លាក់ក្នុងវិបត្តិអស្ថិរភាពចំណីអាហារ។ ប្រព័ន្ធផ្គត់ផ្គង់ស្បៀងអាហារពិភពលោកក៏រងផលប៉ះពាល់ទៅតាមនោះដែរ។ ហេតុដូច្នេះហើយបានជានៅថ្ងៃ ក្រុមប្រទេសមហាអំណាចកសិកម្ម ៥១ប្រទេស មានអាទិ៍សហភាពអឺរ៉ុប សហរដ្ឋអាមេរិក កាណាដា និងអូស្ត្រាលីបានជួបប្រជុំគ្នានៅទីក្រុងហ្សឺណែវ ប្តេជ្ញាធ្វើការរួមគ្នាដើម្បីធានារក្សាសុវត្ថិភាពពិភពលោក ផ្តល់ស្បៀងអាហារឱ្យបានគ្រប់គ្រាន់ មិនថាអ្នកក្រខ្លាំង អ្នកងាយរងគ្រោះឬជនធ្វើបំលាស់ទីទេ។ ទីផ្សារ កសិកម្មនិងស្បៀងអាហារត្រូវបើកចំហជានិច្ច ប្រកបដោយតម្លាភាព និងគ្មានការដាក់បម្រាមពាណិជ្ជកម្មកសិកម្ម និងកសិឧស្សាហកម្មគ្មានហេតុផលឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ