អ៊ុយក្រែនចោទតួកគីបានទទួលយកស្រូវសាឡី ដែលរុស្ស៊ី លួចប្លន់ពីអ៊ុយក្រែន
ខណៈពេលដែលពិភពលោកអាចប្រឈមនឹងការខ្វះស្បៀង ដោយសារសង្រ្គាមអ៊ុយក្រែន ឯកអគ្គរដ្ឋអ៊ុយក្រែនប្រចាំប្រទេសតួកគីបាននិយាយចោទរុស្ស៊ីថា បានលួចស្រូវសាលីរបស់អ៊ុយក្រែន ដើម្បីនាំចេញទៅបរទេស ដែលនៅក្នុងនោះ មានផងដែរ តួកគី។ នៅថ្ងៃសុក្រទី៣មិថុនា ឯកអគ្គរដ្ឋទូតអ៊ុយក្រែន នៅលីបង់បានអះអាងដែរថា រុស្ស៊ីបានលួចដឹកស្រូវសាលីជាង ១សែនតោនចេញពីតំបន់អ៊ុយក្រែនដែលរុស្ស៊ីកាន់កាប់ សំដៅប្រទេសស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
នៅក្នុងឱកាសរំលឹកពីការខាតបង់ ការបំផ្លិចបំផ្លាញប្រទេស នៅក្រោយ ១០០ថ្ងៃនៃការឈ្លានពានរបស់រុស្ស៊ី ឯកអគ្គរដ្ឋទូតអ៊ុយក្រែន ប្រចាំតួកគី បានសរសេរក្នុងសារTwitter ចោទប្រកាន់ខ្លាំងៗរុស្ស៊ី ថា បានលួចស្រូវសាលីរបស់អ៊ុយក្រែន ដោយឥតអៀនខ្មាស។ តាមអ្នកតំណាងអ៊ុយក្រែន រុស្ស៊ីបានលួចដឹកជញ្ជូនស្រូវសាលីរបស់អ៊ុយក្រែន ទៅកាន់បរទេស ដែលនៅក្នុងនោះមានផងដែរតួកគី។
នៅក្នុងសារទ្វីតរបស់ខ្លួនកាលពីថ្ងៃសុក្រ ឯកអគ្គរដ្ឋទូតអ៊ុយក្រែនបានសរសេរដែរថា ខ្លួនបានស្វែងរកជំនួយពីតួកគី ដើម្បីដោះស្រាយបញ្ហានេះ។
តួកគីបានប្រកាន់ជំហរស្រពិចស្រពិល នៅក្នុងជម្លោះប្រដាប់អាវុធរវាងអ៊ុយក្រែន និងរុស្ស៊ី។ តួកគីដែលតាំងខ្លួនជាសម្ព័ន្ធមិត្តរបស់អ៊ុយក្រែន បានបញ្ជូនលក់យន្តហោះដ្រូនទៅឲ្យកងទ័ពអ៊ុយក្រែន ប៉ុន្តែ ជាមួយគ្នានោះ តួកគី ដែលជាសមាជិកមួយរបស់អង្គការអូតង់បានបដិសេធ មិនថ្កោលទោស និងដាក់ទណ្ឌកម្មលើរុស្ស៊ី។ រុស្ស៊ី ដែលជាប្រភពផ្គត់ផ្គង់ថាមពល និងគ្រាប់ធញ្ញជាតិដ៏សំខាន់សម្រាប់តួកគី។
ក្រៅពីតួកគី រុស្ស៊ីបានលួចនាំចេញផងដែរស្រូវសាលីរបស់អ៊ុយក្រែន ទៅប្រទេសស៊ីរី ដែលជាសម្ព័ន្ធមិត្តរបស់រុស្ស៊ី។ នៅក្នុងសេចក្តីថ្លែងការណ៍ផ្ញើទៅកាន់ទីភ្នាក់ងារព័ត៌មានអង់គ្លេស Reuters ឯកអគ្គរដ្ឋទូតអ៊ុយក្រែននៅប្រទេសលីបង់បាននិយាយថា ចាប់តាំងពីធ្វើសង្រ្គាម ចូលកាន់កាប់តំបន់មួយចំនួនរបស់អ៊ុយក្រែន នៅ៣ខែមកនេះ រុស្ស៊ីបានលួច នាំចេញស្រូវសាលី អ៊ុយក្រែន ប្រមាណ ៤សែនតោន ទៅកាន់ប្រទេសស៊ីរី។ សម្រាប់អ្នកតំណាងអ៊ុយក្រែន នៅលីបង់ នេះជាសកម្មភាពឧក្រិដ្ឋមួយទៀតរបស់រុស្ស៊ី។
នៅមុនសង្រ្គាមឈ្លានពានរបស់រុស្ស៊ី អ៊ុយក្រែនជាប្រទេសដ៏ធំទី៣ នៅក្នុងពិភពលោក ខាងនាំចេញស្រូវសាលី។ នៅមុនសង្រ្គាម អ៊ុយក្រែនតែម្នាក់ឯងអាចផ្គត់ផ្គង់ គ្រាប់ធញ្ញជាតិ និងប្រេងផ្កាឈូករ័ត្ន សម្រាប់តម្រូវការពាក់កណ្តាលរបស់ពិភពលោក។
ប៉ុន្តែ ការនាំចេញស្រូវសាលី និងគ្រាប់ធញ្ញជាតិរបស់អ៊ុយក្រែនត្រូវជាប់គាំង ដោយសារកំពង់ផែ និងផ្លូវទឹករបស់អ៊ុយក្រែន នៅសមុទ្រខ្មៅ ត្រូវស្ថិតក្រោមការគ្រប់គ្រងទាំងស្រុងរបស់កងទ័ពរុស្ស៊ី។ ចំណែករុស្ស៊ីដែលជាប្រទេសនាំចេញស្រូវសាលីសំខាន់មួយដែរនៅក្នុងពិភពលោក ក៏មិនអាចនាំចេញបានច្រើន ដោយសារតែទណ្ឌកម្មរបស់ក្រុមប្រទេសលោកខាងលិច។ ចាប់តាំងពីមានសង្រ្គាមនៅអ៊ុយក្រែន តម្លៃចំណីអាហារនៅក្នុងពិភពលោក បានហក់ឡើងខ្ពស់។ អង្គការស្បៀងអាហារពិភពលោកបានព្រមានរួចហើយថា បើសិនសង្រ្គាមនៅតែបន្ត នោះ វិបត្តិខ្វះស្បៀង និងគ្រោះអត់ឃ្លាន នឹងកើតមាន យ៉ាងធ្ងន់ធ្ងរបំផុត នៅតាមប្រទេសអាហ្វ្រិក និងដើមបូព៌ា ដែលពឹងអាស្រ័យខ្លាំងលើការនាំចូលស្រូវសាលី ពីអ៊ុយក្រែន និងរុស្ស៊ី។
ទៅតាមសំណើរបស់អង្គការសហប្រជាជាតិ តួកគី ធ្លាប់បានសុំខ្លួនដឹកជញ្ជូនស្រូវសាលី របស់អ៊ុយក្រែន នៅសមុទ្រខ្មៅ ប៉ុន្តែ ត្រូវមានការធានា សន្តិសុខពីរុស្ស៊ី។ នៅមុនដំណើរទស្សនកិច្ចរបស់ប្រមុខការបរទេសរុស្ស៊ី ទៅតួកគី នៅថ្ងៃពុធសប្តាហ៍ក្រោយ រុស្ស៊ី ធ្លាប់បានបញ្ជាក់ហើយថា ខ្លួននឹងអនុញ្ញាតឲ្យអ៊ុយក្រែន ដឹកជញ្ជូនស្រូវសាលី ចេញពីកំពង់ផែអ៊ុយក្រែន បើសិនអ៊ុយក្រែន យល់ព្រមដោះមីន នៅក្នុងសមុទ្រខ្មៅជាមុនសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ