កម្មសិទ្ធិបញ្ញាលើវ៉ាក់សាំង និងសន្តិសុខស្បៀង៖ការខ្វែងគំនិតគ្នានៅអង្គការពាណិជ្ជកម្មពិភពលោក
ចុះផ្សាយនៅថ្ងៃ៖
ស្តាប់ - ០៨:១៤
សន្តិសុខស្បៀង ការព្យួរកម្មសិទ្ធិបញ្ញាលើវ៉ាក់សាំងបង្ការកូវីដ១៩ បញ្ហាអាកាសធាតុ និងកិច្ចព្រមព្រៀងស្តីឧបត្ថម្ភធនសម្រាប់វិស័យនេសាទ។ ទាំងនេះជាសំណុំរឿងក្តៅគគុក ដែល អង្គការពាណិជ្ជកម្មពិភពលោក ហៅកាត់ជាភាសាអង់គ្លេស WTO លើកមកនិយាយនៅក្នុងកិច្ចប្រជុំថ្នាក់រដ្ឋមន្រ្តី លើកទី ១២ ដែល ចាប់បើកតាំងពីថ្ងៃអាទិត្យទី ១២ និងត្រូវបិទបញ្ចប់នៅថ្ងៃពុធទី ១៥មិថុនា។ នៅពេលប្រទេសសមាជិកទាំង ១៦៤ កំពុងបើកការចរចាយ៉ាងមមាញឹក នៅក្នុងកិច្ចប្រជុំនៅទីក្រុងហ្សឺណែវ ប្រទេស ស្វ៊ីស អ្នកជំនាញ បានរំលឹកមិនឲ្យគេសង្ឃឹមអ្វីច្រើនពីលទ្ធផលនៃកិច្ចប្រជុំរបស់WTO ព្រោះថា ការចរចាទាំងឡាយដើម្បីឈានទៅបង្កើតឲ្យមានកិច្ចព្រមព្រៀងនឹងធ្លាក់ទឹក គ្រាន់តែ ប្រទេសមួយ លើកដៃបោះឆ្នោត ប្រឆាំង។
នៅក្នុងកិច្ចប្រជុំ តាំងពីថ្ងៃអាទិត្យ ម្សិលម្ង៉ៃ ប្រទេសសមាជិករបស់អង្គការពាណិជ្ជកម្មពិភពលោក បានជជែកលើសំណុំរឿងសំខាន់ៗបី ដែលជាកង្វល់ចំបងរបស់ពិភពលោក ដូចជា បញ្ហាអសន្តិសុខស្បៀង កិច្ចព្រមព្រៀងស្តីពីវិស័យនេសាទ ហើយនិងកម្មសិទ្ធិបញ្ញាលើថ្នាំបង្ការជំងឺកូវីដ ១៩។
ទាក់ទងនឹងបញ្ហាអសន្តិសុខស្បៀងអាហារ ប្រទេសសមាជិករបស់អង្គការពាណិជ្ជកម្មពិភពលោក កំពុងពិភាក្សាគ្នា រកដំណោះស្រាយបន្ទាន់ ដើម្បី បញ្ចេញស្រូវសាឡីរបស់អ៊ុយក្រែន ដែលកំពុងជាប់គាំង នៅកំពង់ផែ ដោយសារតែសង្រ្គាមវាយប្រហាររបស់រុស្ស៊ី។ អង្គការសហប្រជាជាតិ ធ្លាប់បានព្រមានរួចហើយថា សង្រ្គាមនៅអ៊ុយក្រែន ដែលជាជង្រុកស្រូវសាឡី ដ៏ធំមួយរបស់ពិភពលោក នឹងអាចធ្វើឲ្យមនុស្សពី៨ ទៅ ១០លាននាក់ បន្ថែមទៀត ក្នុងពិភពលោកដែលនឹងជួបគ្រោះអត់ឃ្លាន ខ្វះអាហារូបត្ថម្ភ ជាពិសេស នៅតំបន់អាហ្វ្រិក និងដើមបូព៌ា។
នៅក្នុងកិច្ចប្រជុំរបស់អង្គការពាណិជ្ជកម្មពិភពលោកនៅទីក្រុង ហ្សឺណែវកាលពីថ្ងៃម្សិលមិញ រដ្ឋមន្រ្តីកសិកម្មអ៊ុយក្រែន បានឡើងនិយាយថា សង្រ្គាមឈ្លានពានរបស់រុស្ស៊ីបានធ្វើឲ្យអ៊ុយក្រែន បាត់បង់ដីកសិកម្ម ២៥%។ ប៉ុន្តែ សម្រាប់ឆ្នាំនេះ អ៊ុយក្រែននៅតែអាចប្រមូលផលស្រូវសាលី បានច្រើនគ្រប់គ្រាន់សម្រាប់តម្រូវការពិភពលោក។ បញ្ហានៅត្រង់ថា អ៊ុយក្រែនមិនអាចនាំចេញស្រូវសាឡីរបស់ខ្លួន ទៅបរទេសបាន ដោយសារតែ ច្រកសមុទ្រខ្មៅ ទាំងមូល កំពុងស្ថិតក្រោមការកាន់កាប់របស់កងទ័ពរុស្ស៊ី។
ក្នុងពេលដែលពិភពលោកកំពុងប្រឈមនឹងវិបត្តិខ្វះស្បៀង អង្គការសហប្រជាជាតិ បានអំពាវនាវផងដែរ ដល់ប្រទេសកសិកម្មផ្សេងទៀត ដែលជាសមាជិករបស់អង្គការពាណិជ្ជកម្មពិភពលោក ដូចជាឥណ្ឌាជាដើម កុំឲ្យធ្វើច្បាប់រឹតបន្តឹងការនាំចេញចំណីអាហារ។ ការអំពាវនាវនេះធ្វើឡើង នៅក្រោយ ប្រទេសឥណ្ឌា បានសម្រេចកំណត់បរិមាណស្ករ នាំចេញ ចាប់ពីខែមិថុនានេះ នៅបន្ទាប់ឥណ្ឌា ទើបសម្រេចផ្អាកការនាំចេញស្រូវសាលី ក្នុងហេតុផលធានាសន្តិសុខស្បៀងសម្រាប់ប្រជាជនរបស់ខ្លួន។ ស្រូវសាលីជារឿងមួយ ប៉ុន្តែអ្វីដែលកំពុងបារម្ភខ្លាចខ្លាំងជាងគេ គឺនៅពេលឥណ្ឌា អាចនឹងរឹតត្បិត ឬផ្អាកការនាំចេញអង្ករ មួយមុខទៀត។
ដើម្បីដោះស្រាយបញ្ហាបន្ទាន់ នៅចំពោះមុខវិបត្តិខ្វះស្បៀង អង្គការពាណិជ្ជកម្មពិភពលោកចង់បង្កើតឲ្យបាន កិច្ចព្រមព្រៀងពីរ នៅក្នុងកិច្ចប្រជុំលើកនេះ គឺការហាមឃាត់នូវការរឹតបន្តឹងលើការនាំចេញស្បៀង និងសន្តិសុខចំណីអាហារ។ ប៉ុន្តែ ក្តីសង្ឃឹមថា នឹងបង្កើតឲ្យបានកិច្ចព្រមព្រៀង មានតិចតួចស្តួចស្តើង ដោយសារតែការបោះឆ្នោត ប្រឆាំងរបស់ឥណ្ឌា ដែលជាជង្រុកកសិកម្មដ៏សំខាន់មួយក្នុងពិភពលោក។
ឥណ្ឌាអាចសម្លាប់កិច្ចប្រឹងប្រែងរបស់អង្គការពាណិជ្ជកម្មពិភពលោក ដែលចង់ឲ្យគេបញ្ឈប់ការឧបត្ថម្ភធនសម្រាប់វិស័យនេសាទ
ការឧបត្ថម្ភធនលើវិស័យនេសាទ គឺជាសំណុំរឿងដ៏កម្រ ដែលប្រទេសសមាជិករបស់អង្គការពាណិជ្ជកម្មពិភពលោកធ្លាប់បាននិយាយចរចា ចុះសម្រុងគ្នាច្រើន។ គួរបញ្ជាក់ថា បន្ទាប់ពីនិយាយចរចាអស់ជាច្រើនឆ្នាំ ប្រទេសសមាជិករបស់អង្គការពាណិជ្ជកម្មពិភពលោក នៅទីបំផុត បានយល់ព្រម ឲ្យមានកិច្ចព្រមព្រៀង មួយ ដែលហាមឃាត់ ការផ្តល់ឧបត្ថម្ភធន របស់រដ្ឋាភិបាល សម្រាប់អ្នកនេសាទ ក្នុងហេតុផលថា ការឧបត្ថម្ភទុនរបស់រដ្ឋាភិបាលបានជំរុញ ឲ្យមានការនេសាទច្រើនហួសជ្រុល ដែលអាចធ្វើឲ្យអន្តរាយ សត្វសមុទ្រ។
ឥណ្ឌាធ្លាប់បានយល់ព្រមជាគោលការណ៍ ឲ្យមានកិច្ចព្រមព្រៀង ដែលនឹងទៅបិទបញ្ចប់ ជំនួយឧបត្ថម្ភទុនរបស់រដ្ឋសម្រាប់អ្នកនេសាទក្នុងស្រុក ប៉ុន្តែ ចង់សុំឲ្យគេលើកលែង ក្នុងរយៈពេល២៥ឆ្នាំទៀត។ ២៥ឆ្នាំ គឺវែងជាងរយៈពេល ១០ឆ្នាំ ដែលគេបានកំណត់ក្នុង កិច្ចព្រមព្រៀង របស់អង្គការពាណិជ្ជកម្មពិភពលោកសម្រាប់បណ្តាប្រទេសកំពុងអភិវឌ្ឍដូចជាឥណ្ឌា។ ប្រសិនបើគេមិនឆ្លើយតបទៅនឹងការចង់បានរបស់ឥណ្ឌាទេ នោះគឺអង្គការពាណិជ្ជកម្មពិភពលោកពិបាកនឹងសង្ឃឹមថា នឹងអាចបង្កើតកិច្ចព្រមព្រៀងស្តីពីការឧបត្ថម្ភធនលើវិស័យនេសាទ។
ការខ្វែងគំនិតគ្នាលើសំណុំរឿងស្តីពីការលើកលែងកម្មសិទ្ធិបញ្ញា លើវ៉ាក់សាំងបង្ការកូវីដ អង្គការពាណិជ្ជកម្មពិភពលោកកម្រនឹងអាចបង្កើតចេញបាននូវកិច្ចព្រមព្រៀង ចាប់តាំងពីឆ្នាំ ២០១៣មក រហូតធ្វើឲ្យគេចោទសំណួរពីសមត្ថភាព របស់អង្គការពាណិជ្ជកម្មពិភពលោក ដែលមានតួនាទីដោះស្រាយជម្លោះ វិវាទពាណិជ្ជកម្មនៅក្នុងពិភពលោក។
នៅក្នុងកិច្ចប្រជុំកាលពីថ្ងៃចន្ទទី ១៣ មិថុនា ក្រៅតែ ពីមិនអាចបញ្ចុះបញ្ចូលឲ្យប្រទេសសមាជិកឲ្យនិយាយចុះសម្រុងគ្នា លើការនេសាទ ការធានាសន្តិសុខស្បៀងហើយនោះ អង្គការពាណិជ្ជកម្មពិភពលោកនៅតែមិនអាចជំនះលើការខ្វែងគំនិតគ្នា ស្តីពីការលើកលែងកម្មសិទ្ធិបញ្ញាលើវ៉ាក់សាំង បង្ការកូវីដ១៩។ នៅក្រោយការពិភាក្សារាប់ម៉ោង កាលពីចន្ទ ទី ១៣មិថុនា ក្តីសង្ឃឹមថា នឹងមានកិច្ចព្រមព្រៀង ស្តីពីការលើកលែងកម្មសិទ្ធិបញ្ញា លើថ្នាំបង្ការកូវីដ មានកាន់តែតិចទៅៗ។
ប្រទេសសមាជិករបស់អង្គការពាណិជ្ជកម្មពិភពលោកបានពិភាក្សាគ្នាជិតបានសម្រេចលើអត្ថបទព្រាង ស្តីកិច្ចព្រមព្រៀងមួយស្តីពីការសម្របសម្រួលចរាចរណ៍ វត្ថុធាតុដើម ឧបករណ៍ចាំបាច់សម្រាប់ប្រយុទ្ធប្រឆាំងនឹងជំងឺកូវីដ។ ប៉ុន្តែ គេនៅតែខ្វែងគំនិត និយាយមិនចុះសម្រុងគ្នា លើការលើកលែងកម្មសិទ្ធិបញ្ញា សម្រាប់ផលិតវ៉ាក់សាំង។
ប្រទេសកំពុងអភិវឌ្ឍដូចជាឥណ្ឌា និងអាហ្រ្វិកខាងត្បូង ជាអ្នកផ្តួចផ្តើម ទាមទារឲ្យគេលើកលែងកម្មសិទ្ធិបញ្ញាផលិតវ៉ាក់សាំង ដើម្បីបង្កើនការផលិតវ៉ាក់សាំង សម្រាប់ការចែកចាយទូលំទូលាយក្នុងពិភពលោក។ ប៉ុន្តែ អង់គ្លេសនិងស្វ៊ីស ដែលជាប្រទេសផលិតវ៉ាក់សាំងបង្ការជំងឺកូវីដ១៩បានចេញមុខ ការពារកម្មសិទ្ធិបញ្ញា របស់ក្រុមហ៊ុនឧស្សាហកម្មផលិតឱសថក្នុងស្រុកដែលបានស្រាវជ្រាវរកឃើញវ៉ាក់សាំង។
អាមេរិករបស់រដ្ឋបាលលោកចូ បៃដិន បានយល់ស្របឲ្យគេលើកលែងកម្មសិទ្ធិបញ្ញា លើវ៉ាក់សាំង មួយរយៈសិន ក្នុងដំណាក់កាលនៃការឆ្លងរាតត្បាត ប៉ុន្តែ បានដាក់លក្ខខណ្ឌ ទាមទារឲ្យមានការចែងជាអក្សរច្បាស់ៗ ក្នុងកិច្ចព្រមព្រៀងថា ប្រទេសដែលមានសមត្ថភាពនាំចេញវ៉ាក់សាំង ប្រឆាំងកូវីដ ដូចជាចិន ជាដើម គឺគ្មានសិទ្ធិនឹងទទួលបានការលើកលែងកម្មសិទ្ធិបញ្ញាលើវ៉ាក់សាំង។ ចិនធ្លាប់បានប្រកាសបើកផ្លូវឲ្យប្រទេសកំពុងអភិវឌ្ឍផ្សេងទៀត អាចផលិត និងនាំចេញវ៉ាក់សាំង ប៉ុន្តែ សម្រាប់អាមេរិក ដរាបណាចិននិយាយតែមាត់ គ្មានសរសេរក្នុងក្រដាស នោះអាមេរិកគ្មានថ្ងៃជឿជាក់ និងយល់ព្រមឲ្យគេលើកលែងកម្មសិទ្ធិបញ្ញាផលិតវ៉ាក់សាំងដែលក្រុមហ៊ុនអាមេរិកបានរកឃើញមុនគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ