ហេតុអ្វីតួកគីប្តូរចិត្ត លែងប្រឆាំងឲ្យស៊ុយអែត និងហ្វាំងឡង់ចូលជាសមាជិករបស់អូតង់ ?
ចុះផ្សាយនៅថ្ងៃ៖
ស្តាប់ - ០៩:០៨
នៅក្រោយការចរចាយ៉ាងស្វិតស្វាញ ជាង ៤ម៉ោង កាលពីថ្ងៃអង្គារទី ២៨មិថុនា តួកគីដកវេតូ លែងប្រឆាំងសមាជិកភាពរបស់ស៊ុយអែត និងហ្វាំងឡង់ តទៅទៀត និងបានចុះហត្ថលេខាលើអនុស្សារណៈរួម ជាមួយស៊ុយអែត និងហ្វាំងឡង់ ដែលបើកផ្លូវឲ្យស៊ុយអែត និងហ្វាំងឡង់អាចចូលជាសមាជិកថ្មីពីរបន្ថែមទៀតរបស់អង្គការនៃសន្ធិសញ្ញា អាត្លង់ទិកខាងជើង ហៅកាត់ជាភាសាបារាំងថា អូតង់។ នៅថ្ងៃអង្គារ នៅក្រោយ រដ្ឋមន្រ្តីការបរទេសតួកគី ស៊ុយអែត និងហ្វាំងឡង់ ចុះហត្ថលេខាលើអនុស្សារណៈរួម វិមានប្រធានាធិបតីតួកគីបានចេញសេចក្តីថ្លែងការណ៍ដែលថា តួកគីបានទទួលអ្វីដែលខ្លួនធ្លាប់ទាមទារចង់បាន។
ឧបសគ្គសម្រាប់ស៊ុយអែត និងហ្វាំងឡង់ ដើម្បីអាចក្លាយជាសមាជិករបស់អូតង់ លែងមានទៀតហើយ បន្ទាប់ពី តួកគី បានបើកភ្លើងខៀវ។ នៅថ្ងៃអង្គារម្សិលមិញ ពោលគឺនៅប៉ុន្មានម៉ោងមុន អូតង់ប្រកាសបើកជំនួបកំពូលជាផ្លូវការ នៅប្រទេសអេស្ប៉ាញ រដ្ឋមន្រ្តី ការបរទេស តួកគី ស៊ុយអែត និងហ្វាំងឡង់ បានចុះហត្ថលេខាលើអនុស្សារណៈរួម មួយ ដែលនៅក្នុងនោះ តួកគី យល់ព្រម លែងប្រឆាំងការចូលជាសមាជិករបស់ស៊ុយអែត និងហ្វាំងឡង់ នៅក្នុងអង្គការអូតង់។
តួកគីបានធ្វើឲ្យគេភ្ញាក់ផ្អើល កាលពីថ្ងៃម្សិលមិញ នៅពេលរដ្ឋមន្រ្តីការបរទេសតួកគីដាក់ខ្លួនអង្គុយជាមួយ រដ្ឋមន្រ្តីការបរទេសស៊ុយអែត និងហ្វាំងឡង់ ដើម្បីចុះហត្ថលេខាលើអនុស្សារណៈរួម ដែលនៅក្នុងនោះ តួកគីសុខចិត្តយល់ព្រមឲ្យស៊ុយអែត និងហ្វាំងឡង់ចូលជាសមាជិកថ្មីបន្ថែមរបស់អង្គការសម្ព័ន្ធអាត្លង់ទិកអូតង់។ តួកគីលែងវេតូ ប្រឆាំង។ នេះជារឿងដែលគេមិនបាននឹកស្មានដល់នោះទេ សូម្បី រហូតមកដល់ថ្ងៃចន្ទម្សិលម្ង៉ៃ តួកគីនៅតែបង្ហាញជំហរប្រឆាំងដែរ។
ជាសមាជិកសំខាន់មួយរបស់អូតង់ តួកគី បានចេញមុខប្រឆាំង តាំងពីពាក់កណ្តាលខែឧសភាមកម្ល៉េះ នៅពេលប្រទេសស៊ុយអែត និងហ្វាំងឡង់ ដែលខ្លាចការគំរាមកំហែងរបស់រុស្ស៊ី បានដាក់ពាក្យសុំចូលជាសមាជិករបស់អូតង់។ តាំងពីដំបូងទី តួកគី បានចេញមុខប្រឆាំងមិនឲ្យអូតង់ទទួលយកស៊ុយអែត និងហ្វាំងឡង់ ក្នុងហេតុផលថា ប្រទេសទាំងពីរ បានផ្តល់ជំរកដល់សកម្មជនបក្សពលករគួដឌីស្ថាន PKKដែល រដ្ឋាភិបាលតួកគីចាត់ទុកជាក្រុមភេរវនិយម។ តួកគីធ្លាប់បានទាមទារឲ្យស៊ុយអែត និងហ្វាំងឡង់ធ្វើបត្យាប័ន បញ្ជូនសកម្មជនប្រឆាំងនៅបរទេសទាំងនោះ មកឲ្យរដ្ឋាភិបាលតួកគីវិញ ប៉ុន្តែ ស៊ុយអែត និងហ្វាំងឡង់ បដិសេធរហូតមក។ ម្យ៉ាងទៀត តួកគី ក៏ខឹងអន់ចិត្តនឹងស៊ុយអែត ដែរ នៅពេលប្រទេសទាំងពីរ ដាក់បម្រាម មិនឲ្យគេលក់នាំចេញអាវុធ ទៅប្រទេសតួកគី នៅក្រោយពេលដែលរដ្ឋាភិបាលតួកគីបើកប្រតិបត្តិការយោធា បង្រ្កាបទៅលើក្រុមគួដឌីស្ថាន នៅទឹកដីស៊ីរីភាគខាងជើង ក្បែរព្រំដែនតួកគី នៅឆ្នាំ ២០១៩។
តួកគីអះអាងថា ខ្លួនបានទទួលអ្វីៗដែលខ្លួនទាមទារចង់បាន
នៅថ្ងៃម្សិលមិញ បន្ទាប់ពីការចរចាយ៉ាងស្វិតស្វាញ រវាងមេដឹកនាំតួកគី ស៊ុយអែត និងហ្វាំងឡង់ នៅមុនបើកជំនួបកំពូលអូតង់នៅអេស្ប៉ាញ ប្រទេសទាំងបី តួកគី ស៊ុយអែត និងហ្វាំងឡង់នៅទីបំផុត បានរកឃើញកិច្ចព្រមព្រៀងរួមមួយ ដើម្បីឆ្លើយតបនឹងការព្រួយបារម្ភរបស់តួកគី ជាពិសេស នៅក្នុងរឿងនាំចេញអាវុធ និងការប្រយុទ្ធប្រឆាំងបណ្តាញភេរវនិយម។
នៅក្នុងសេចក្តីប្រកាសព័ត៌មាន វិមានប្រធានាធិបតីតួកគីបានអះអាងថា តួកគីបានទទួលគ្រប់អ្វីដែលខ្លួនទាមទារចង់បាន នោះ គឺ ការសហការពេញទំហឹងរបស់ស៊ុយអែត និងហ្វាំងឡង់ ដើម្បី ប្រឆាំងសកម្មជនគួដឌីស្ថាន។ តាមការប្រកាសរបស់អគ្គលេខាធិការអង្គការអូតង់ នៅក្នុងអនុស្សារណៈ ស៊ុយអែត និងហ្វាំងឡង់បានយល់ព្រមកែប្រែច្បាប់ ដើម្បីរឹតបន្តឹងការសហការជាមួយតួកគីក្នុងការប្រយុទ្ធប្រឆាំងក្រុមភេរវនិយម។ ស៊ុយអែត និងហ្វាំងឡង់បានយល់ព្រមដែរក្នុងរឿងធ្វើបត្យាប័នសកម្មជនគួដឌីស្ថាន ដែលតួកគីចាត់ទុកជាក្រុមភេរវនិយម។
បន្ទាប់ពីប្រទេសទាំងបីចុះកិច្ចព្រមព្រៀងនឹងគ្នារួចហើយ អគ្គលេខាធិការអង្គការអូតង់បានប្រកាសជាឱឡារិក ផ្លូវការ អញ្ជើញឲ្យស៊ុយអែត និងហ្វាំងឡង់ចូលរួមជាមួយបក្សសម្ព័ន្ធអូតង់។ ប្រធានាធិបតីអាមេរិក លោកចូ បៃដិន ដែលធ្លាប់បានទទួលមេដឹកនាំហ្វាំងឡង់ និងស៊ុយអែត បាននិយាយអបអរព្រោះថា កិច្ចព្រមព្រៀងរវាងប្រទេសទាំងបី នឹងទៅពង្រឹងសន្តិសុខរបស់អូតង់។ មន្រ្តីជាន់ខ្ពស់របស់សេតវិមានបាននិយាយថា ទម្រាំមានថ្ងៃនេះ អាមេរិកគឺបានខ្នះខ្នែង ជួយអន្តរាគមច្រើនណាស់។
លោកចូ បៃដិនជួបប្រធានាធិបតីតួកគី នៅថ្ងៃពុធ
អាមេរិកបានលូកដៃអន្តរាគមមែន ដើម្បីបញ្ចុះបញ្ចូលឲ្យភាគីនិយាយចុះសម្រុងគ្នា ប៉ុន្តែ អាមេរិកមិនបានធ្វើសម្បទាននោះទេ ព្រោះថា តួកគីផ្ទាល់ ដែលក៏មិនបានសុំការធ្វើសម្បទានពិសេស ណាមួយ ពីអាមេរិក ជាថ្នូនឹងការដកវេតូរបស់ខ្លួននោះដែរ។ នេះបើតាមការបញ្ជាក់របស់អ្នកនាំពាក្យរបស់សេតវិមាន។
ប៉ុន្តែ តួកគីនឹងមានរឿងនិយាយច្រើនជាមួយ អាមេរិក នៅក្នុងជំនួបកំពូលរវាងប្រធានាធិបតីអាមេរិក និងតួកគី នៅថ្ងៃពុធនេះ នៅក្រៅក្របខណ្ឌនៃជំនួបកំពូលអូតង់ នៅអេស្ប៉ាញ។
នៅមុនចាកចេញពីទីក្រុងអង់ការ៉ា ដើម្បីចូលរួមប្រជុំរបស់អង្គការអូតង់នៅអេស្ប៉ាញ ប្រធានាធិបតីតួកគី ធ្លាប់បានលើកឡើងថា សំណុំរឿងសំខាន់រវាងអាមេរិក និងតួកគី គឺ យន្តហោះចម្បាំង F16 ដែលតួកគីបានចុះកិច្ចសន្យា ទិញ និងបង់ថ្លៃខ្លះរួចហើយទៅអាមេរិក ប៉ុន្តែ ត្រូវអាមេរិកផ្អាក នៅបន្ទាប់ពី អាមេរិកខឹងតួកគី ដែលរត់ទៅទិញ ប្រព័ន្ធខែលការពារមីស៊ីលពីប្រទេសរុស្ស៊ី។ សំណុំរឿងសំខាន់មួយទៀត គឺប្រតិបត្តិការទ័ពរបស់តួកគី នៅទឹកដីភាគខាងជើងស៊ីរី ដែលជាប់ព្រំដែនជាមួយតួកគី។ តួកគីចង់បើកប្រតិបត្តិការទ័ព វាយប្រហារទៅលើក្រុមទាហានគួដឌីស្ថាន នៅស៊ីរី ដែលរដ្ឋាភិបាលតួកគីចាត់ទុកជាបក្សសម្ព័ន្ធរបស់ក្រុមគួដឌីស្ថានតួកគី។ ដើម្បីអាចបើកប្រតិបត្តិការនេះ តួកគី ត្រូវការភ្លើងខៀវពីអាមេរិកដែលជាអ្នកធ្លាប់ផ្តល់ជំនួយសព្វាវុធ ទៅឲ្យក្រុមនេះ ដើម្បីប្រយុទ្ធប្រឆាំងនឹងក្រុមជីហាតអង្គការរដ្ឋអ៊ីស្លាម។
អ្នកដែលរងគ្រោះដោយសារកិច្ចព្រមព្រៀង តួកគី ស៊ុយអែត និងហ្វាំងឡង់
អ្នកដែលចំណេញពីកិច្ចព្រមព្រៀង គឺស៊ុយអែត ហ្វាំងឡង់ ហើយតួកគីរឹតតែចំណេញជាងគេ។ ប៉ុន្តែ អ្នកដែលខាតបង់ រងគ្រោះដោយសារកិច្ចព្រមព្រៀងតួកគីស៊ុយអែត និងហ្វាំងឡង់ លើកនេះ គឺសកម្មជនគួដឌីស្ថាន និងក្រុមអ្នកប្រឆាំងរដ្ឋាភិបាលតួកគី ដែលបានរត់ទៅលាក់ខ្លួនជ្រកកោន នៅស៊ុយអែត និងហ្វាំងឡង់ នៅក្រោយរដ្ឋប្រហារមិនបានសម្រេចនៅតួកគី។
សូមបញ្ជាក់ថា នៅក្រោយរដ្ឋប្រហារមិនបានសម្រេចនៅតួកគី នៅឆ្នាំ ២០១៦ មានប្រជាជនតួកគីច្រើននាក់ណាស់ដែលបានរត់គេចខ្លួនទៅបរទេស ដើម្បីគេចពីយុទ្ធនាការបោសសម្អាតរបស់រដ្ឋាភិបាលទៅលើក្រុមអ្នកប្រឆាំង។ ប៉ុន្តែ អំណើះតទៅ សកម្មជនប្រឆាំងរដ្ឋាភិបាលតួកគីនៅស៊ុយអែត និងហ្វាំងឡង់ លែងនៅបានស្ងប់សុខទៀតហើយ។
ដើម្បី បញ្ចុះបញ្ចូលឲ្យតួកគី ឈប់វេតូ ប្រឆាំង មិនឲ្យខ្លួនចូលជាសមាជិករបស់អូតង់ ស៊ុយអែត និងហ្វាំងឡង់បានសុខចិត្តកែប្រែច្បាប់ ដើម្បីធ្វើយ៉ាងណាអាចធ្វើបត្យាប័នសកម្មជនប្រឆាំងតួកគី ដែលរដ្ឋាភិបាលតួកគី ចាត់ទុកជាភេរវជន និងកំពុងស្វែងរកតាមចាប់ខ្លួន។
អូតង់កំពុងញុះញង់រុស្ស៊ី?
រុស្ស៊ីបានចូលធ្វើសង្រ្គាមឈ្លានពានអ៊ុយក្រែន រហូតមកដល់ពេលនេះ ក៏ដោយសារតែលេសថា អូតង់មានចេតនាចង់ពង្រីកដែនឥទ្ធិពលរបស់ខ្លួនទៅ ក្បែរទឹកដីរុស្ស៊ី។ រុស្ស៊ីចូលធ្វើសង្រ្គាមនៅអ៊ុយក្រែន ក្នុងបំណងបំភ័យកុំឲ្យប្រទេសអឺរ៉ុបផ្សេងទៀតចុះចូលជាសមាជិករបស់អូតង់។ ប៉ុន្តែ ផ្ទុយទៅវិញ យុទ្ធសាស្រ្តយោធារបស់អ៊ុយក្រែន រឹតតែលើកទឹកចិត្តឲ្យស៊ុយអែត និងហ្វាំងឡង់ ចង់ចូលជាសមាជិកថ្មីបន្ថែមរបស់អូតង់។
ដោយសារតែ ខ្លាចរុស្ស៊ីធ្វើសង្រ្គាមឈ្លានពានចូលលុកលុយ ដូចដែល រុស្ស៊ីកំពុងធ្វើនៅអ៊ុយក្រែន ស៊ុយអែត និងហ្វាំងឡង់ បានញាប់ដៃជើង ដាក់ពាក្យសុំចូលជាសមាជិករបស់អូតង់។ ស៊ុយអែតសុខចិត្តលះបង់ចោលអព្យាក្រឹតជាង ២០០ឆ្នាំរបស់ខ្លួន ចំណែកហ្វាំងឡង់ក៏លែងតាំងខ្លួនជាប្រទេសអព្យាក្រឹត តទៅទៀត ដោយសុខចិត្តចូលរួមក្នុងបក្សសម្ព័ន្ធយោធាអូតង់ ក៏ព្រោះតែចង់បានខែលការពារពីមាត្រាទី៥របស់អូតង់។ មាត្រាទី៥របស់អូតង់ដែលចែងថា ការវាយប្រហារទៅលើប្រទេសសមាជិក គឺដូចជាការវាយប្រហារទៅលើអូតង់។ មាត្រាទី៥និយាយពីកាតព្វកិច្ចរបស់អូតង់ក្នុងការចូលជួយសមាជិករបស់ខ្លួន ដែលទទួលរងការវាយប្រហារពីប្រទេសផ្សេង។
ពេលនេះ ទោះជាតួកគីលែងជាឧបសគ្គ នៃការចូលជាសមាជិករបស់ស៊ុយអែត និងហ្វាំងឡង់ ប៉ុន្តែ មិនមែនមានន័យថា ស៊ុយអែត និងហ្វាំងឡង់ធូរទ្រូង រួចខ្លួននោះទេ។ ដំណើរការ នីតិវិធីដើម្បីអាចចូលជាសមាជិករបស់ប្រទេសទាំងពីរ គឺនៅត្រូវការពេលវេលា យូរខែតទៅទៀត ព្រោះគេត្រូវរង់ចាំឲ្យប្រទេសសមាជិកទាំង ៣០របស់អូតង់ផ្តល់សច្ចាប័ន សិនជាមុនសិន ទើបស៊ុយអ៊ែត និងហ្វាំងឡង់អាចចូលជាសមាជិកពេញសិទ្ធិ។
ក្តីបារម្ភចម្បង នៅពេលនេះ គឺទាក់ទងទៅនឹងបញ្ហាសន្តិសុខរបស់ប្រទេសទាំងពីរ ដែលអាចនឹងត្រូវប្រឈមនឹងការគំរាមកំហែងពីសំណាក់រុស្ស៊ី នៅក្នុងសម័យអន្តរកាល គឺចាប់ពីពេលដាក់បេក្ខភាព រហូតទៅដល់ពេលបានចូលជាសមាជិក មុននឹងអាចទទួលបានការការពារយ៉ាងពេញលេញ ពីសំណាក់អូតង់។ អ្នកនាំពាក្យរបស់វិមានក្រេមឡាំ ងលោក Dmitri Peskov ធ្លាប់បានព្រលយរួចហើយ ថា ការពង្រីកសមាជិកអង្គការអូតង់ និងពង្រីកសម្ព័ន្ធភាពយោធានៅជាប់ព្រំដែនរុស្ស៊ី គឺមិនធ្វើឲ្យ ពិភពលោកនិងតំបន់ ជួបស្ថិរភាពនោះទេ។ នៅខែកុម្ភៈ អ្នកនាំពាក្យរបស់វិមានក្រេមឡាំងរូបនេះបានលើកឡើងថា «ប្រសិនបើ ហ្វាំងឡង់ ហ៊ានសម្រេចចិត្តចូលជាសមាជិកអូតង់ គឺច្បាស់ជាទទួលផលវិបាកអាក្រក់ជាមិនខាន»។ នៅក្នុងក្តីបារម្ភនេះហើយ ដែលហ្វាំងឡង់ និងស៊ុយអែតបានព្យាយាមស្វះស្វែងរកការធានាពីប្រទេសសម្ព័ន្ធមិត្តអូតង់ ទាំងការធានាសន្តិសុខនៅក្នុងសម័យអន្តរកាល និងទាំងការពន្លឿននីតិវិធី ដើម្បីធ្វើយ៉ាងណា ឲ្យដំណាក់កាលអន្តរកាលនេះមានរយៈពេលខ្លីតាមដែលអាចធ្វើទៅបាន។
នៅពាក់កណ្តាលខែឧសភាឆ្នាំនេះ ហ្វាំងឡង់ និងស៊ុយអែត បានចុះកិច្ចព្រមព្រៀងការពារជាតិជាមួយអង់គ្លេស ដែលនៅក្នុងនោះ នាយករដ្ឋមន្ត្រីអង់គ្លេស លោក បូរិស ចនសុន បានអះអាងធានាថា ប្រសិនបើប្រទេសទាំងពីរនេះ មួយណាក៏ដោយ ដែលត្រូវរងការវាយប្រហារ គឺអង់គ្លេសនឹងផ្តល់ជំនួយជួយវាយបកវិញ រាប់ទាំងអន្តរាគមន៍យោធាអង់គ្លេសផង។
តាមរយៈកិច្ចព្រមព្រៀងត្រីភាគីនេះ ប្រទេសទាំងបីត្រូវចែករំលែកព័ត៌មានសម្ងាត់ៗជាមួយគ្នា និងចូលរួមអភិវឌ្ឍបច្ចេកទេសវិជ្ជានិងហ្វឹងហាត់យោធារួមគ្នាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ