តួកគីគំរាមរារាំងមិនឱ្យស៊ុយអែតនិងហ្វាំងឡង់ចូលជាសមាជិកអូតង់
ប្រធានាធិបតីតួកគី លោក អ៊ែរដូហ្កាន បានប្រកាសប្រឆាំងនឹងការសុំចូលជាសមាជិកអង្គការអូតង់/ណាតូ របស់ហ្វាំងឡង់និងស៊ុយអែត។ ប្រសិនបើការគំរាមកំហែងរបស់តួកគីក្លាយជាការពិត នោះប្រទេសទាំងពីរមិនអាចក្លាយជាសមាជិកអង្គការបានឡើយ ព្រោះក្នុងដំណើរបែបបទតម្រូវឱ្យមានការគាំទ្រឯកច្ឆ័ន្ទពីប្រទេសជាសមាជិកទាំងអស់។
ចុះផ្សាយនៅថ្ងៃ៖
ស្តាប់ - ០២:១៨
តួកគីគ្មានយោបល់វិជ្ជមានទាក់ទងនឹងបេក្ខភាពរបស់ហ្វាំងឡង់និងស៊ុយអែតទេ ព្រោះតួកគីមិនចង់ឃើញអូតង់ប្រព្រឹត្តកំហុសដដែល ជាលើកទីពីរ ដូចពេលក្រិកសុំចូលជាសមាជិកអង្គការដើម្បីប្រឆាំងនឹងតួកគី។ នេះជាសេចក្តីប្រកាសរបស់លោកប្រធានាធិបតីតួកគី អ៊ែរដូហ្កាន ដោយឆ្លៀតបន្ទោសហ្វាំងឡង់និងស៊ុយអែត ថា បានផ្តល់ជម្រកដល់សកម្មជនបក្សពលករគួឌីស្ថាន ដែលអង់ការ៉ាចាត់ទុកជាក្រុមភេរវនិយម។
ការគំរាមខ្ទប់បេក្ខភាពស៊ុយអែតនិងហ្វាំងឡង់ថ្ងៃនេះ បានបង្កការភ្ញាក់ផ្អើលខ្លាំង ព្រោះហ្វាំងឡង់ ដែលត្រូវប្រកាសដាក់ពាក្យសុំចូលជាសមាជិកអូតង់ជាផ្លូវការនៅថ្ងៃអាទិត្យទី ១៥ឧសភា ខាងមុខទន្ទឹមនឹងប្រទេសស៊ុយអ៊ែតជិតខាង មានទំនុកចិត្តខ្លាំងណាស់។ នាយករដ្ឋមន្ត្រីហ្វាំងឡង់ធ្លាប់បានអះអាងកាលពីខែមេសាថាតួកគីគាំទ្រកម្មវត្ថុរបស់ហ្វាំងឡង់។ ចំណែកសមាជិកអង្គការអូតង់ភាគច្រើន ព្រមទាំងអគ្គលេខាធិការអង្គការផ្ទាល់ផង ក៏បានត្រៀមលក្ខណៈទទួលស្វាគមន៍ហ្វាំងឡង់និងស៊ុយអ៊ែតរួចជាស្រេចទៅហើយ។ ប៉ុន្តែឥលូវដំណើរការពង្រីកសមាជិកអូតង់ បែរជាអាចនឹងត្រូវខកខានទៅវិញ។ សូមបញ្ជាក់ថា នៅពេលប្រទេសណាមួយសម្រេចដាក់ពាក្យសុំចូលជាសមាជិកជាផ្លូវការហើយ សមាជិកអូតង់ត្រូវយល់ព្រមជាឯកច្ឆ័ន្ទទើបប្រទេសនោះអាចចូលក្នុងប្លុកបាន។
ប្រកាសប្រឆាំងនឹងបេក្ខភាពហ្វាំងឡង់និងស៊ុយអ៊ែត អាចនឹងធ្វើឱ្យតួកគី អាប់ឱនកិត្តិយស និងជាប់ឈ្មោះជាប្រទេសគាំទ្ររុស្ស៊ី និងដែលតែងបរិហារថាការចូលជាសមាជិកអង្គការអូតង់ជាការគំរាមកំហែងសន្តិសុខរុស្ស៊ី និងត្រូវទទួលរងផលវិបាកសម្រាប់អឺរ៉ុបទាំងមូល។ បើតាមអ្នកវិភាគ តួកគីគួរតែយកគំនិតប្រឆាំងនេះទៅចរចាដោយបិទទ្វារ។ តាំងពីរុស្ស៊ីចូលឈ្លានពានអ៊ុយក្រែនមក តួកគីព្យាយាមរក្សាទំនាក់ទំនងល្អជាមួយភាគីជម្លោះទាំងពីរ។ តួកគីរំពឹងលើរុស្ស៊ីយ៉ាងខ្លាំងលើផ្នែកសេដ្ឋកិច្ច តែជាអ្នកផ្គត់ផ្គង់ដ្រូនឱ្យក្រុងកៀវ។ តួកគីធ្លាប់ទាំងបានសាកល្បងដើរតួនាទីជាអន្តរការីនាំប្រទេសទាំងពីរឱ្យជួបចរចាគ្នាបញ្ចប់សង្គ្រាមបានពីរដង តែគ្មានលទ្ធផល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ