អូតង់សង្ឃឹមថានឹងអាចរកដំណោះស្រាយ ដើម្បីទទួលស៊ុយអែតនិងហ្វាំងឡង់ជាសមាជិកថ្មី
បេក្ខភាពរបស់ស៊ុយអែត និងហ្វាំងឡង់ ចូលជាសមាជិកថ្មីរបស់អង្គការសម្ព័ន្ធមិត្តអូតង់ កំពុងតែត្រូវបានតួកគីបដិសេធរារាំង។ តែយ៉ាងណា លោកស្រី Mircea Geoana អគ្គលេខាធិការរងរបស់អូតង់ បានអះអាងថា អូតង់មានសុទិដ្ឋិនិយម ថាពិតជាអាចស្វែងរកដំណោះស្រាយបាន ដើម្បីទទួលប្រទេសសមាជិកថ្មីទាំង២នេះ។
ចុះផ្សាយនៅថ្ងៃ៖
ស្តាប់ - ០២:៣៦
នៅថ្ងៃអាទិត្យទី១៥ឧសភា លោកប្រធានាធិបតីហ្វាំងឡង់ Sauli Niinisto បានបញ្ជាក់ថាប្រទេសលោកនិងដាក់ពាក្យស្នើសុំចូលជាសមាជិកថ្មី របស់អង្គការសម្ព័ន្ធមិត្តអាត្លង់ទិកខាងជើង ឬហៅកាត់ថាអូតង់។ ចំណែកប្រទេសស៊ុយអ៊ែត ដែលនៅជាប់ហ្វាំងឡង់ ក៏នឹងរៀបចំធ្វើដូចគ្នានេះដែរ។
គួររំលឹកថា ពីមុនមកប្រទេសទាំង២នេះ ថ្មីបើជាសមាជិកសហភាពអឺរ៉ុបមែន តែបានរក្សាភាពអព្យាក្រិត្យ រវាងរុស្ស៊ី និងអង្គការសម្ព័ន្ធមិត្តអាត្លង់ទិកខាងជើង ដែលអាមេរិកជាមេដឹកនាំ។ ក៏ប៉ុន្តែ ក្រោយពេលដែលរុស្ស៊ី បានលើកទ័ពចូលវាយឈ្លានពានអ៊ុយក្រែន មតិសាធារណៈហ្វាំងឡង់ និងស៊ុយអ៊ែត បានផុសផុលនាំគ្នាគាំទ្រ ជំរុញឲ្យរដ្ឋាភិបាលខ្លួន ចាប់ផ្តើមសុំចូលជាសមាជិករបស់អូតង់ ដើម្បីបានបង្អែកការពារខ្លួន។
ក្រោយការប្រកាសពីបំណងចង់ចូលជាសមាជិកអូតង់ របស់ហ្វាំងឡង់ និង ស៊ុយអែត លោកស្រី Annalena Baerbock រដ្ឋមន្ត្រីការបរទេសអាល្លឺម៉ង់ បានថ្លែងថា ស៊ុយអែត និងហ្វាំងឡង់ គឺជាមិត្ត និងជាសមាជិកគ្រួសារអឺរ៉ុបតែមួយ។ ដូច្នេះ វាច្បាស់ណាស់ ដែលអាល្លឺម៉ង់នឹងគាំទ្រជានិច្ច ចំពោះសេចក្តីសម្រេចចិត្ត របស់ប្រទេសទាំង២នេះ ក្នុងការការពារសន្តិសុខ។
ដោយឡែក តួកគី ដែលជាសមាជិកម្នាក់ដែររបស់អូតង់ បានបង្ហាញការជំទាស់ចំពោះបេក្ខភាពហ្វាំងឡង់ និងស៊ុយអែត។ លោកអ៊ែរដូហ្កាន់បានប្រកាសកាលពីថ្ងៃសុក្រថា លោកមិនអាចគាំទ្របេក្ខភាពប្រទេសទាំង២នេះបានទេ ព្រោះប្រទេស២នេះ គឺជាសំបុកសំបូរក្រុមភេរវកម្ម។
គួរបញ្ជាក់ថា រាល់បេក្ខភាពសមាជិកថ្មី គឺត្រូវតែឆ្លងកាត់ការសម្រេចយល់ព្រមជាឯកច្ឆ័ន្ទ របស់សមាជិកអូតង់ទាំងអស់។ នៅក្នុងសន្និសីទកាសែតកាលពីថ្ងៃសៅរ៍ លោកអង់តូនី ប្លីងកិន បានបញ្ជាក់ថា លោកបាននិយាយគ្នាជាមួយប្រមុខការទូតតួកគី តាមទូរស័ព្ទពីបញ្ហានេះ។ លោកបានបញ្ជាក់ទៀតថា អ្វីដែលលោកបានដឹង គឺមានសមាជិកច្រើនណាស់ គាំទ្របេក្ខភាពរបស់ហ្វាំងឡង់ និងស៊ុយអែត។ ដូច្នេះ លោកជឿថាអូតង់ប្រាកដជាអាច ស្វែងរកការស្រុះស្រួល ដើម្បីស្វាគមន៍សមាជិកថ្មីទាំង២នេះ។
ដោយឡែកលោកស្រីរដ្ឋមន្ត្រីការបរទេសអាល្លឺម៉ង់ បានលើកឡើងថាអាល្លឺម៉ង់ ចង់ជំរុញនីតិវិធីទទួលសមាជិកថ្មីជាស្ថាពរនៅលើកនេះ អាចធ្វើទៅដោយលឿនរហ័សបំផុត ដោយមិនចង់ទុកសម័យអន្តរកាល ចន្លោះពីថ្ងៃដាក់បេក្ខភាព ទៅដល់ថ្ងៃអនុម័តទទួលជាផ្លូវការ ឲ្យចំហររងចាំយូរខែ។ លោកស្រីបានបន្ថែមថា វាគឺជាការធានាសន្តិសុខ ជូនប្រទេសដែលមកសុំចូលសមាជិក ព្រោះគ្នាអាចត្រូវគេវាយប្រហារឈ្លានពាន ក្នុងអំឡុងពេលដែលអូតង់ មិនទាន់អាចធ្វើអន្តរាគមន៍បាន ទៅតាមអ្វីដែលមានកំណត់ក្នុងមាត្រា៥នៃលក្ខខន្តិកៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ