ហេតុអ្វីបានជាអាមេរិកផ្តើមបែរងាកទៅរកតំបន់មជ្ឈិមបូព៌ាជាថ្មី?
ចុះផ្សាយនៅថ្ងៃ៖
ស្តាប់ - ០៨:៣៩
ថ្ងៃសៅរ៍ ទី១៦ កក្កដាជាថ្ងៃចុងក្រោយនៃដំណើរទស្សនកិច្ចមួយជុំតំបន់មជ្ឈិមបូព៌ារបស់ប្រធានាធិបតីអាមេរិកលោកចូ បៃដិន។ បន្ទាប់ពីប្រទេសអ៊ីស្រាអែល និងដែនដីប៉ាឡេស្ទីន លោកបៃដិនកំពុងស្ថិតក្នុងប្រទេសអារ៉ាប៊ីសាអូឌីតដែលលោកបានទៅដល់នារសៀលថ្ងៃសុក្រ ទី១៥ កក្កដា។ នៅអារ៉ាប៊ីសាអូឌីត លោកបៃដិនបានជួបសន្ទនាជាមួយព្រះមហាក្សត្រសាលម៉ាន និងរាជទាយាទបេន សាលម៉ាន។ បន្ទាប់មក លោកបៃដិនចូលរួមនៅក្នុងកិច្ចប្រជុំកំពូលរបស់ក្រុមប្រឹក្សានៃកិច្ចសហប្រតិបត្តិការឈូងសមុទ្រពែក្ស។
មានការកត់សម្គាល់ចំនួនពីរនៅក្នុងដំណើរទស្សនកិច្ចរបស់លោកបៃដិននៅប្រទេសអារ៉ាប៊ីសាអូឌីត ទី១ ការទទួលលោកបៃដិននៅអាកាសយានដ្ឋាន និងទី២ ជំនួបរវាងលោកបៃដិនជាមួយថ្នាក់ដឹកនាំអារ៉ាប៊ីសាអូឌីត ពិសេសជាមួយរាជទាយាទបេន សាលម៉ាន ឬហៅ MBS។ គេបានសង្កេតឃើញថា ការទទួលស្វាគមន៍លោកបៃដិនដែលជាមេដឹកនាំមហាអំណាចក្នុងលោកនៅអាកាសយានដ្ឋានក្រុងជេដដាដែលជាក្រុងកំពង់ផែនៃសមុទ្រក្រហមមានភាពសោះកក្រោះ។ សោះកក្រោះព្រោះអារ៉ាប៊ីសាអូឌីតបានបញ្ជូនត្រឹមអភិបាលខេត្តឡាម៉ិក និងភរិយាឲ្យទៅទទួលលោកបៃដិននៅពេលលោកចុះពីជណ្តើរយន្តហោះដល់ដី។
ទន្ទឹមគ្នានេះ គេក៏គ្មានឃើញការរៀបចំពិធីផ្លូវការទទួលលោកបៃដិនយ៉ាងអធិកអធមដូចការទទួលប្រមុខរដ្ឋ ឬប្រមុខរដ្ឋាភិបាលបរទេសផ្សេងដែរ។ ក្រោយពីបាននិយាយសារសង និងស្វាគមន៍ចំពោះវត្តមានមនុស្សមួយក្រុមតូចនៅអាកាសយានដ្ឋានបានប៉ុន្មាននាទី លោកបៃដិនក៏បានឡើងរថយន្តរបស់លោកភ្លាមៗ។ រូបភាពមួយទៀតដែលមិនអាចកំបាំងភ្នែកអ្នកដទៃបាន ពិសេសក្រុមអ្នកកាសែតអារ៉ាប៊ីសាអូឌីត និងបរទេស គឺការដែលលោកបៃដិនត្រូវបានទទួលដោយរាជទាយាទបេន សាលម៉ាន។ នៅពេលដែលព្រះអង្គម្ចាស់ MBS ទទួលលោកបៃដិនចុះពីរថយន្ត គេមិនឃើញមានការចាប់រលាក់ដៃ និងភាពស្និតស្នាលអ្វីទេ ពោលគឺមានត្រឹមតែជល់កណ្តាប់ដាក់គ្នាប៉ុណ្ណោះ។
ការជួបទល់មុខដែលបង្កប់ដោយភាពទើសទាល់
អារ៉ាប៊ីសាអូឌីត ពិសេសរាជទាយាទបេន សាលម៉ានមិនសប្បាយចិត្តនឹងលោកបៃដិន។ គេអាចយល់បានពីចំណុចនេះ ហើយលោកបៃដិនខ្លួនលោកក៏ប្រហែលជាបានរង់ចាំនូវការទទួលស្វាគមន៍ក្នុងទ្រង់ទ្រាយរបៀបនេះដែរ។ មានការលើកឡើង វាជារឿងល្អទៅវិញសម្រាប់លោកបៃដិនដែលរាជទាយាទបេន សាលម៉ានមិនបានទៅទទួលស្វាគមន៍លោកនៅអាកាសយានដ្ឋាន។ ជារឿងល្អ ព្រោះវាបានអនុញ្ញាតឲ្យលោកបៃដិនគេចពីការជួបរាជទាយាទបែន សាលម៉ានទល់មុខប្រកបភាពទើសទាល់។ តាមពិតទៅ ទំនាក់ទំនងរវាងអាមេរិក និងអារ៉ាប៊ីសាអូឌីតនិយាយជារួម និងរវាងលោកបៃដិន និងរាជទាយាទបេន សាលម៉ាន និយាយដោយឡែកបានជួបភាពរកាំរកូសដោយសាររឿងឃាតកម្មសម្លាប់លោកហ្សាម៉ាល់ ខាស្ហូហ្ស៊ីក្នុងស្ថានកុងស៊ុលអារ៉ាប៊ីសាអូឌីតប្រចាំប្រទេសតួកគីកាលពីឆ្នាំ ២០១៨។
លោកខាស្ហូហ្ស៊ីជាអ្នកកាសែតអារ៉ាប៊ីសាអូឌីតដែលមិនញញើតរិះគន់លើការដឹកនាំរបស់រាជទាយាទបេន សាលម៉ាន។ តាមក្រសួងស៊ើបការសម្ងាត់អាមេរិក ឃាតកម្មសម្លាប់លោកខាស្ហូហ្ស៊ីត្រូវបានបញ្ជាដោយព្រះអង្គម្ចាស់បេន សាលម៉ាន។ តែនៅទីបំផុត លោកបៃដិនចៀសមិនរួចពីការចូលជួបសន្ទនាជាមួយរាជទាយាទបេន សាលម៉ាន។ ចូរកុំភ្លេចថា មានងារជាស្តេចស្នងរាជមែន តែព្រះអង្គម្ចាស់បេន សាលម៉ានជាមនុស្សខ្លាំង មានឥទ្ធិពល និងកំពុងដឹកនាំរ៉ាប៊ីសាអូឌីតសព្វថ្ងៃ។ តែលោកបៃដិនបានបញ្ជាក់នៅមុខក្រុមអ្នកកាសែតថា លោកបានលើករឿងឃាតកម្មសម្លាប់លោកខាស្ហូហ្ស៊ីទៅនិយាយជាមួយព្រះអង្គម្ចាស់បេន សាម៉ាន និងបានប្រាប់ព្រះអង្គម្ចាស់ឲ្យយល់ថា បើមានរឿងរ៉ាវដូចគ្នានេះកើតឡើងជាថ្មី ព្រះអង្គម្ចាស់នឹងមានចម្លើយពីលោកដោយលោកបៃដិនមិនបានលំអិតជាចម្លើយអ្វីទេ។
អាមេរិកបានរកឃើញឡើងវិញនូវកន្លែងរបស់ខ្លួននៅក្នុងតំបន់
នៅក្នុងជំនាន់ប្រធានាធិបតីអាមេរិកលោកបារ៉ាក់ អូបាម៉ា អាមេរិកបានដកខ្លួនឆ្ងាយបន្តិចពីតំបន់មជ្ឈិមបូព៌ា។ តែនេះមិនមែនមានន័យថា អាមេរិកបានបំភ្លេចចោលតំបន់មជ្ឈិមបូព៌ាទាំងស្រុងទេ ទោះក្នុងកាលៈទេសៈណាក៏ដោយ ពិសេសអ៊ីសា្រអែល និងអារ៉ាប៊ីសាអូឌីត។ ចូរកុំភ្លេចថា អ៊ីសា្រអែល និងអារ៉ាប៊ីសាអូឌីតជាសម្ព័ន្ធមិត្តចាក់ទឹកមិនលេចរបស់អាមេរិកនៅក្នុងតំបន់តាំងពីដើមមកដល់ឥឡូវ។ ភាពរកាំរកូស ការខកចិត្ត និងការមើលមុខគ្នាមិនសូវចំប្រាកដជាមាន។ តែប្រហែលជាគ្មានការបែរខ្នងដាក់គ្នាដោយគ្មានថ្ងៃវិលវិញនោះឡើយ។
អាមេរិកត្រូវការអារ៉ាប៊ីសាអូឌីត និងប្រទេសផ្សេងនៅក្នុងតំបន់ដើម្បីដោះស្រាយបញ្ហានៅក្នុងតំបន់។ ចំណែកអារ៉ាប៊ីសាអូឌីត និងប្រទេសផ្សេងក្នុងតំបន់ត្រូវការអាមេរិកឲ្យជួយការពារខ្លួនប្រឈមនឹងសត្រូវក្នុងតំបន់ ពិសេសការគំរាមកំហែងនុយក្លេអ៊ែរពីប្រទេសអ៊ីរ៉ង់។ លើសពីនេះ សង្រ្គាមរុស្ស៊ីឈ្លានពានអ៊ុយក្រែនសព្វថ្ងៃបានធ្វើឲ្យអាមេរិកផ្តើមរឹតចំណងជាមួយអារ៉ាប៊ីសាអូឌីត និងក្រុមប្រទេសក្នុងតំបន់ឈូងសមុទ្រពែក្សកាន់តែខ្លាំងជាងពេលណាៗទាំងអស់។
នាឱកាសមានវត្តមានក្នុងទឹកដីអារ៉ាប៊ីសាអូឌីត លោកបៃដិនបានឆ្លៀតចូលរួមនៅក្នុងកិច្ចប្រជុំកំពូលរបស់ក្រុមប្រឹក្សានៃកិច្ចសហប្រតិបត្តិការឈូងសមុទ្រពែក្សនាថ្ងៃសៅរ៍ ទី១៦ កក្កដា។
១៨កិច្ចព្រមព្រៀងសហប្រតិបត្តិការរវាងអាមេរិក និងអារ៉ាប៊ីសាអូឌីត
តាមសេចក្តីប្រកាសព័ត៌មានរបស់រដ្ឋាភិបាលអារ៉ាប៊ីសាអូឌីត ក្រុងវ៉ាស៊ីនតោន និងក្រុងរីយ៉ាដបានព្រមព្រៀងគ្នាលើកិច្ចព្រមព្រៀងសហប្រតិបត្តិការចំនួន ១៨កិច្ចព្រមព្រៀងដែលផ្តោតលើវិស័យចម្រុះតាំងពីអវកាស ហិរញ្ញវត្ថុ ថាមពល និងវិស័យសុខភាព។ ក្រៅពីលទ្ធផលជាលក្ខណៈទ្វេភាគី អាមេរិកក៏ទទួលបានការសម្រេចចិត្ត និងការសន្យារបស់អារ៉ាប៊ីសាអូឌីតសម្រាប់ប្រយោជន៍ក្នុងតំបន់ដែលមាន ៣សំខាន់ ទី១ អារ៉ាប៊ីសាអូឌីតយល់ព្រមបើកដែនអាកាសរបស់ខ្លួនសម្រាប់ក្រុមហ៊ុនដឹកជញ្ជូនទាំងអស់នៅក្នុងតំបន់ដោយមានអ៊ីស្រាអែលមួយផង ទី២ អារ៉ាប៊ីសាអូឌីត និងក្រុមប្រទេសក្នុងតំបន់ឈូងសមុទ្រពែក្សយល់ព្រមភ្ជាប់បណ្តាញភ្លើងអគ្គិសនីទៅឲ្យប្រទេសអ៊ីរ៉ាក់ដើម្បីឲ្យអ៊ីរ៉ាក់កាត់បន្ថយការពឹងលើអ៊ីរ៉ង់ និងទី៣ អារ៉ាប៊ីសាអូឌីតបានសន្យាពន្យារ និងពង្រឹងបទឈប់បាញ់នៅក្នុងប្រទេសយេម៉ែនដែលបានចាប់ផ្តើមតាំងពី ១៥សប្តាហ៍។
ទន្ទឹមគ្នានេះ លោកបៃដិនចង់ឃើញអារ៉ាប៊ីសាអូឌីតបង្កើនផលិតកម្មប្រេងរបស់ខ្លួនក្នុងគោលដៅចំនួនពីរ ទី១ ដើម្បីបញ្ចុះតម្លៃប្រេងដែលកំពុងឡើងថ្លៃខ្ពស់ និងទី២ ដើម្បីជួយបំពេញតម្រូវការដល់ប្រទេសអឺរ៉ុបដែលឈប់ទិញប្រេងរុស្ស៊ីដោយសាររុស្ស៊ីឈ្លានពានអ៊ុយក្រែន។ ដោយឡែកនៅក្នុងកិច្ចប្រជុំកំពូលរបស់ក្រុមប្រឹក្សានៃកិច្ចសហប្រតិបត្តិការឈូងសមុទ្រពែក្ស ប្រធានាធិបតីអាមេរិកលោកបៃដិនប្រកាសពីការសន្យារបស់អាមេរិកក្នុងការជួយគាំទ្រដល់សន្តិសុខស្បៀងរយៈពេលខ្លី និងយូរដល់តំបន់មជ្ឈិមបូព៌ា និងអាហ្រ្វិកខាងជើងដែលមានទឹកប្រាក់ ១ ០០០លានដុល្លារ។
លោកបៃដិនបានបញ្ជាក់ក្នុងថ្ងៃសុក្រ ទី១៥ កក្កដានាពេលបំពេញទស្សនកិច្ចក្នុងប្រទេសអ៊ីស្រាអែលថា អាមេរិកមិនអាចទុកឲ្យចិន និងរុស្ស៊ីចូលខ្លួនទៅបំពេញកន្លែងទំនេរនៅតំបន់មជ្ឈិមបូព៌ាបានឡើយ។ តាមរយៈឃ្លានេះនាំឲ្យគេយល់បានថា លោកបៃដិនចង់លើកស្ទួយចក្ខុវិស័យ និងពង្រឹងតួនាទីអាមេរិកនៅតំបន់មជ្ឈិមបូព៌ាឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ