អ្នកជំនាញ៖សង្រ្គាមអ៊ុយក្រែនបានជំរុញឲ្យអាមេរិកប្តូរជំហរនៅក្នុងតំបន់ឈូងសមុទ្រពែក្ស
ក្រោយពីបានបំពេញទស្សនកិច្ចនៅក្នុងប្រទេសអ៊ីស្រាអែល និងទឹកដីប៉ាឡេស្ទីន ប្រធានាធិបតីអាមេរិកលោកចូ បៃដិនបន្តដំណើរទៅប្រទេសអារ៉ាប៊ីសាអូឌីតដែលលោកបានទៅដល់នារសៀលថ្ងៃសុក្រ ទី១៥ កក្កដា។ នៅក្នុងទឹកដីអារ៉ាប៊ីសាអូឌីត លោកបៃដិនជួបព្រះមហាក្សត្រសាលម៉ាន ជួបរាជទាយាទបេន សាលម៉ាន និងចូលរួមនៅក្នុងជំនួបកំពូលនៃក្រុមប្រទេសក្នុងតំបន់ឈូងសមុទ្រពែក្ស។ គួរបញ្ជាក់ថាក្នុងរយៈពេលចុងក្រោយនេះ ទំនាក់ទំនងរវាងអាមេរិក និងអារ៉ាប៊ីសាអូឌីតដែលជាសម្ព័ន្ធមិត្តក្នុងតំបន់ឈូងសមុទ្រពែក្សមិនសូវជាល្អប៉ុន្មានទេ។ តាំងពីបានឡើងកាន់តំណែងប្រធានាធិបតីអាមេរិក នេះជាលើកទី១ ដែលលោកបៃដិនបានធ្វើដំណើរទៅកាន់តំបន់មជ្ឈិមបូព៌ា និយាយជារួម និងទៅកាន់ប្រទេសអារ៉ាប៊ីសាអូឌីត និយាយដោយឡែក។ ហេតុអ្វីបានជាលោកបៃដិនទៅបំពេញទស្សនកិច្ចនៅអារ៉ាប៊ីសាអូឌីតពេលនេះ?
ចុះផ្សាយនៅថ្ងៃ៖
ស្តាប់ - ០២:០១
« តាមពិតទៅ ដំណើរទស្សនកិច្ចរបស់លោកបៃដិននៅក្នុងតំបន់ឈូងសមុទ្រពែក្សបានឆ្លុះបញ្ចាំងជាពីរចំណុច ទី១ ការចុះខ្សោយឥទ្ធិពលរបស់អាមេរិកនៅក្នុងតំបន់ និងក្នុងពេលជាមួយគ្នា គឺបានបង្ហាញឲ្យឃើញពីការពង្រឹងរបស់ក្រុមប្រទេសនៅក្នុងតំបន់ឈូងសមុទ្រពែក្ស។ មួយវិញទៀត ការធ្លាក់ចុះឥទ្ធិពលរបស់អាមេរិកនៅក្នុងតំបន់បានកើតចេញពី ២ករណី ទី១ ការដកខ្លួន ឬការលែងសូវចាប់អារម្មណ៍ទៅលើតំបន់តាំងពីជំនាន់ប្រធានាធិបតីអាមេរិកលោកបារ៉ាក់ អូបាម៉ា និងទី២ អវត្តមានប្រតិកម្មរបស់អាមេរិកនៅពេលដែលក្រុមឧទ្ទាមហ៊ូទីក្នុងប្រទេសយេម៉ែនដែលគាំទ្រដោយអ៊ីរ៉ង់បានវាយប្រហារលើអារ៉ាប៊ីសាអូឌីត និងប្រទេសអេមីរ៉ាតអារ៉ាប់រួម។
តាំងពីពេលនោះមក ប្រទេសទាំងពីរនេះ អារ៉ាប៊ីសាអូឌីត និងអេមីរ៉ាតអារ៉ាប់រួមលែងមានទំនុកចិត្តលើការគាំទ្ររបស់អាមេរិកដូចមុនទៀតឡើយ។ តែតាំងពីផ្ទុះសង្រ្គាមរុស្ស៊ីឈ្លានពានអ៊ុយក្រែន និងផលវិបាករបស់សង្រ្គាមមួយនេះចំពោះសេដ្ឋកិច្ចសកល អាមេរិកបានក្លាយជាអ្នកដែលសុំឲ្យក្រុមប្រទេសនៅតំបន់ឈូងសមុទ្រពែក្សដំឡើងផលិតកម្មប្រេងសម្រាប់ជំនួសការឈប់ទិញប្រេងរុស្ស៊ីរបស់ប្រទេសនៅអឺរ៉ុប។ អ៊ីចឹងហើយបានជាលោកបៃដិន និងក្រុមអ្នកប្រជាធិបតេយ្យនៅអាមេរិកចង់សើរើមើលឡើងវិញពីនយោបាយរបស់ខ្លួនជាមួយអារ៉ាប៊ីសាអូឌីត។
ដូច្នេះពេលនេះ និងប្រឈមនឹងកំណើនឥទ្ធិពលរបស់រុស្ស៊ី ហើយចិន លោកបៃដិនត្រូវការបង្ហាញចេញនូវរូបភាពចំនួនពីរ ទី១ អាមេរិកបានរក្សាសម្ព័ន្ធមិត្តរបស់ខ្លួននៅក្នុងតំបន់ ពិសេសជាមួយអ៊ីស្រាអែល និងអារ៉ាប៊ីសាអូឌីត និងរូបភាពទី២ អាមេរិកនៅតែអាចកែនប្រមូលសម្ព័ន្ធមិត្តរបស់ខ្លួនបានប្រឈមនឹងបញ្ហាប្រឈមរបស់ខ្លួន ពិសេសបានចូលរួមចែករំលែកពីក្តីបារម្ភទាក់ទងនឹងប្រទេសអ៊ីរ៉ង់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ