ទស្សនកិច្ចអាស៊ី៖ តើប្រធានសភាអាមេរិកនឹងឆ្លៀតចុះជាន់ដីតៃវ៉ាន់ដែរឬទេ?
ចុះផ្សាយនៅថ្ងៃ៖
ស្តាប់ - ០៩:២៦
ប្រធានសភាអាមេរិក លោកស្រី ណាន់ស៊ី ប៉េឡូស៊ីបានផ្តើមទស្សនកិច្ចមួយជុំនៅអាស៊ី ដោយចាប់ផ្តើមនៅប្រទេសសិង្ហបុរី នៅថ្ងៃចន្ទទី ១សីហានេះ។ ទស្សនកិច្ចមួយជុំ របស់ប្រធានសភាអាមេរិក នៅអាស៊ី ដែលមានម៉ាឡេស៊ី កូរ៉េខាងត្បូង និងជប៉ុន កំពុងស្ថិតក្នុងក្រសែភ្នែកតាមដានខ្លាំងណាស់ ជាពិសេសមហាអំណាចចិន ដែលបារម្ភថា ប្រធានសភាអាមេរិក លោកស្រី ណាន់ស៊ី ប៉េឡូស៊ីនឹងអាចចុះសំចតនៅតៃវ៉ាន់ ដែលចិនបានចេញមុខប្រឆាំងដាច់ខាត។ ប៉េកាំង ធ្លាប់បានគំរាមរួចហើយថា ទស្សនកិច្ចរបស់លោកស្រី ណាន់ស៊ី ប៉េឡូស៊ី នៅតៃវ៉ាន់គឺសកម្មភាពញុះញង់របស់អាមេរិក ដែលចិននឹងចាត់វិធានការខ្លាំងវាយបកវិញ។ នៅក្រោយការគំរាមកំហែងរបស់ចិន តើប្រធានរដ្ឋសភា អាមេរិកនឹងឆ្លៀតចុះបំពេញ ទស្សនកិច្ចនៅតៃវ៉ាន់ ដែរឬទេ?
គ្រប់គ្នាកំពុងផ្តោតក្រសែភ្នែកតាមដានទស្សនកិច្ចរបស់ប្រធានសភាអាមេរិក នៅអាស៊ី ដែលចាប់ផ្តើមនៅថ្ងៃនេះ នៅសិង្ហបុរី។ ទស្សនកិច្ចរបស់លោកស្រី ណាន់ស៊ី ប៉េឡូស៊ី នៅអាស៊ី ក្លាយជាចំណាប់អារម្មណ៍ បន្ទាប់ពីមានព័ត៌មានចុះផ្សាយថា ប្រធានសភាអាមេរិករូបនេះ អាចទៅបំពេញទស្សនកិច្ច នៅតៃវ៉ាន់។ ប៉េកាំងធ្លាប់បានព្រមានរួចហើយ ពីផលវិបាក បើសិន ប្រធានសភាអាមេរិក លោកស្រី ណាន់ស៊ី ប៉េឡូស៊ីហ៊ានធ្វើទស្សនកិច្ចនៅតៃវ៉ាន់ ដែលចិនចាត់ទុកជាដែនដីខេត្តមួយរបស់ចិន។
អមដំណើរដោយប្រធានគណៈកម្មការទទួលបន្ទុកកិច្ចការបរទេស គណៈកម្មការខាងស៊ើបការណ៍សម្ងាត់ សមាជិកសភាជំនាញខាងពាណិជ្ជកម្មអាវុធ លោកស្រីណាន់ស៊ី ប៉េឡូស៊ីបាននិយាយថា នៅក្នុងអំឡុងទស្សនកិច្ច ក្រុមរបស់លោកស្រី នឹងជួបពិភាក្សាជាមួយថ្នាក់ដឹកនាំអាស៊ី ដើម្បីពង្រឹងទំនាក់ទំនង ផលប្រយោជន៍រួម ក្នុងវិស័យអាទិភាព ដូចជា សន្តិសុខ សេដ្ឋកិច្ច ពាណិជ្ជកម្ម សិទ្ធិមនុស្ស វិបត្តិអាកាសធាតុ ជាពិសេសការធានាសន្តិភាព នៅក្នុងតំបន់។
នៅថ្ងៃចន្ទទី ១សីហា លោកស្រី ប្រធានសភាអាមេរិកបានធ្វើដំណើរទៅដល់សិង្ហបុរី ជាទី ដែលលោកនាយករដ្ឋមន្រ្តីលី ស៊ានឡុងបានបញ្ជាក់ប្រាប់ភាគីអាមេរិក ទំនាក់ទំនងស្ថិរភាពចិន និងអាមេរិកសំខាន់ណាស់សម្រាប់សន្តិភាព និងសន្តិសុខក្នុងតំបន់។
ទៅតៃវ៉ាន់ ឬមិនទៅ?
ដរាបណា យន្តហោះដឹកគណៈប្រតិភូ ដឹកនាំដោយប្រធានសភាអាមេរិក នៅមិនទាន់ទៅចុះចតនៅទឹកដីតៃវ៉ាន់ គេនៅតែមិនដឹងថា តើលោកស្រី ណាន់ស៊ី ប៉េឡូស៊ី នឹងធ្វើទស្សនកិច្ច នៅតៃវ៉ាន់ដែរឬទេ។
នៅក្នុងសេចក្តីប្រកាសព័ត៌មានកាលពីថ្ងៃអាទិត្យ ប្រធានសភាអ្នកតំណាងរាស្រ្តអាមេរិក លោកស្រី ណាន់ស៊ី ប៉េឡូស៊ី បានបញ្ជាក់ថា លោកស្រីរួមជាមួយសមាជិកសភា ៥រូបនឹងធ្វើទស្សនកិច្ចមួយជុំនៅអាស៊ី ដែលមានសិង្ហបុរី ម៉ាឡេស៊ី កូរ៉េខាងត្បូង និងជប៉ុន ប៉ុន្តែលោកស្រីមិនបានបញ្ជាក់ឈ្មោះតៃវ៉ាន់នោះទេ។ ទស្សនកិច្ចរបស់លោកស្រីនៅឥណ្ឌូប៉ាស៊ីហ្វិក មានគោលដៅ បញ្ជាក់ជំហរគ្មានផ្លាស់ប្តូររបស់អាមេរិក ក្នុងការជួយប្រទេសមិត្ត និងសម្ព័ន្ធមិត្តក្នុងតំបន់។
នៅក្នុងសេចក្តីថ្លែងការណ៍ដែលនិយាយពីដំណើរទស្សនកិច្ចនៅអាស៊ី ប្រធានសភាអាមេរិកមិនបានលើកនិយាយពាក្យតៃវ៉ាន់សូម្បី មួយម៉ាត់ ប៉ុន្តែ មិនមែនមានន័យថា លោកស្រី ណាន់ស៊ី ប៉េឡូស៊ី នឹងមិនទៅតៃវ៉ាន់នោះទេ។ លោកស្រី អាចសម្រេចចិត្តគ្រប់ពេលវេលា ធ្វើទស្សនកិច្ច ដ៏គួរ ភ្ញាក់ផ្អើល នៅតៃវ៉ាន់ក៏អាចថាបាន។ តាមអ្នកសរសេរវិចារណកថា របស់កាសែតចិន Global time ដែលមាននិន្នាការគាំទ្របក្សកុម្មុយនិស្តចិន រឿងនេះគឺអាចទៅរួច ព្រោះគេជឿថា លោកស្រីណាន់ស៊ី ប៉េឡូស៊ី អាចរកលេសទៅជាន់ទឹកដីតៃវ៉ាន់ ដូចជាយន្តហោះរបស់លោកស្រីត្រូវការចាក់សាំងបន្ទាន់ ឬមានបញ្ហាបច្ចេកទេសជាដើម គឺធ្វើយ៉ាងណាឲ្យតែបានទៅចុះចតនៅតៃវ៉ាន់ សូម្បីមួយភ្លែតក៏បានដែរ។
ទស្សនកិច្ចរបស់លោកស្រី ណាន់ស៊ី ប៉េឡូស៊ី នៅតៃវ៉ាន់នឹងធ្វើឲ្យចិនខឹងសម្បារ
តាំងពីមានការចុះផ្សាយព័ត៌មានស្តីពីដំណើរទស្សនកិច្ចរបស់លោកស្រីប្រធានសភាអាមេរិកម្ល៉េះ ប៉េកាំងធ្លាប់បានប្រតិកម្មប្រឆាំងទស្សនកិច្ចចុះចតណាមួយរបស់ប្រធានសភាអាមេរិកនៅតៃវ៉ាន់ ដែលប៉េកាំងចាត់ទុកជាការញុះញង់ ព្រោះវារំលោភដែនអធិបតេយ្យភាពរបស់ចិន។ នៅពេលលោកស្រី ណាន់ស៊ី ប៉េឡូស៊ី នៅមិនទាន់សម្រេចជាផ្លូវការថា នឹងទៅទស្សនកិច្ចនៅតៃវ៉ាន់ផង ប៉ុន្តែ ព័ត៌មានស្តីពីលទ្ធភាពធ្វើទស្សនកិច្ចរបស់លោកស្រីនៅតៃវ៉ាន់ បានក្លាយជាដើមចម នៃភាពតានតឹងកាន់តែខ្លាំងរវាងអាមេរិក និងចិន ជុំវិញកោះតៃវ៉ាន់។
ប៉េកាំងធ្លាប់បានចាត់ទុកទស្សនកិច្ចរបស់ប្រធានសភាអាមេរិកនៅតៃវ៉ាន់ ថា ជាការរំលោភខ្សែបន្ទាត់ក្រហម។ នៅក្នុងកិច្ចសន្ទនាតាមទូរស័ព្ទជាមួយប្រធានាធិបតីអាមេរិក កាលពីថ្ងៃព្រហស្បតិ៍សប្តាហ៍មុន លោកប្រធានាធិបតីស៊ី ជីនពីង បានព្រមានរួចហើយ កុំឲ្យអាមេរិកលលេងជាមួយភ្លើង ក្នុងសំណុំរឿងតៃវ៉ាន់។
លោកស្រី ណាន់ស៊ី ប៉េឡូស៊ី ដែលជាប្រធានរដ្ឋសភាជាមនុស្សដ៏មានអំណាចបំផុតនៅអាមេរិក បន្ទាប់ ពីប្រធានាធិបតី និងអនុប្រធានាធិបតី។ លោកស្រី ជាមនុស្សទី៣ ដែលអាចស្នង ចូលកាន់តំណែងប្រធានាធិបតី ក្នុងករណីមានបញ្ហាណាមួយនៅអាមេរិក។ ដូច្នេះ ដំណើរទស្សនកិច្ចណាមួយរបស់លោកស្រីនៅតៃវ៉ាន់ គឺមានន័យស្មើនឹងទស្សនកិច្ចរបស់ប្រធានាធិបតីអាមេរិកនៅតៃវ៉ាន់។ សម្រាប់ចិន ទស្សនកិច្ចរបស់ថ្នាក់ដឹកនាំជាន់ខ្ពស់របស់អាមេរិកនៅតៃវ៉ាន់ មានន័យស្មើនឹងការប្រកាសគាំទ្រ ទទួលស្គាល់រដ្ឋាភិបាលកោះតៃវ៉ាន់ ឬឯករាជ្យភាពរបស់កោះតៃវ៉ាន់ ដែលចិនប្រឆាំងដាច់ខាត។
នៅថ្ងៃចន្ទ ប៉េកាំង តាមរយៈអ្នកនាំពាក្យរបស់ក្រសួងការបរទេសបានចេញមុខព្រមានសាជាថ្មីថា ទស្សនកិច្ចរបស់លោកស្រីណាន់ស៊ី ប៉េឡូស៊ី នៅតៃវ៉ាន់ នឹងជំរុញ ឲ្យចិនចាត់វិធានការយោធាជាក់ជាមិនខាន។ កាលពីថ្ងៃសៅរ៍ ទី ៣០ ចិនបានបង្ហាញសាច់ដុំយោធា ដោយបានធ្វើសមយុទ្ធ ដោយបាញ់គ្រាប់កាំភ្លើងពិត នៅច្រកសមុទ្រតៃវ៉ាន់។ នៅថ្ងៃសៅរ៍ដដែល អ្នកនាំពាក្យរបស់ក្រសួងការពារជាតិចិនបាននិយាយថា កងទ័ពជើងអាកាសចិនមានមធ្យោបាយសមត្ថភាព ដើម្បីការពារអធិបតេយ្យភាព និងបូរណភាព ជុំវិញកោះតៃវ៉ាន់។
បើតាមអ្នកជំនាញ ទោះបីចិនចេញមុខប្រឆាំងដាច់ខាត ទស្សនកិច្ចរបស់លោកស្រី ណាន់ស៊ី ប៉េឡូស៊ីនៅតៃវ៉ាន់ ប៉ុន្តែ ចិនទំនងមិនធ្វើសង្រ្គាមឈ្លានពានចូលវាយដណ្តើមយកកោះតៃវ៉ាន់ នៅពេលនេះ ដោយសារតៃទស្សនកិច្ចរបស់លោកស្រី ប៉េឡូស៊ីនោះដែរទេ។ ប៉េកាំងប្រហែលអាចដាក់សំពាធយោធាកាន់តែខ្លាំង លើតៃវ៉ាន់ ដោយបញ្ជូនយន្តហោះចម្បាំងឲ្យទៅហោះចូលក្នុងដែនអាកាសរបស់តៃវ៉ាន់ ឲ្យកាន់តែញឹកញាប់ ដើម្បីធ្វើឲ្យតៃវ៉ាន់នៅមិនស្ងប់សុខទាល់តែសោះ។
ធ្លាប់មានប្រធានរដ្ឋសភាអាមេរិកធ្វើដំណើរទៅតៃវ៉ាន់
ប្រមុខការបរទេសអាមេរិក លោកអង់តូនី ប្លីងកិនធ្លាប់និយាយបញ្ចុះបញ្ចូល ដើម្បី បន្ថយភាពតានតឹងជាមួយភាគីចិន។ តាមរដ្ឋមន្រ្តីការបរទេសអាមេរិក នៅជាង ៤០ឆ្នាំមកនេះ មន្រ្តីអាមេរិកជាច្រើនរូប បានធ្វើទស្សនកិច្ចទៅតៃវ៉ាន់ ប៉ុន្តែ នៅទីបំផុត អាមេរិកនិងចិន នៅតែចរចាដើម្បីបន្ធូរបន្ថយភាពតានតឹងនឹងគ្នារហូតមក។ ម្យ៉ាង លោកស្រី ណាន់ស៊ី ប៉េឡូស៊ី ក៏មិនមែនជាប្រធានសភាអាមេរិកដំបូងដែលធ្វើទស្សនកិច្ចនៅតៃវ៉ាន់ដែរ។
នៅឆ្នាំ ១៩៩៧ ប្រធានសភាអាមេរិក លោកNewt Gingrich បានក្លាយជាថ្នាក់ដឹកនាំជាន់ខ្ពស់របស់អាមេរិកលើកដំបូងគេដែលធ្វើទស្សនកិច្ច នៅតៃវ៉ាន់។
ប៉ុន្តែ សម្រាប់ភាគីចិន ករណីពីរនេះ មិនដូចគ្នានោះទេ។ ទីមួយ លោក Newt Gingrich មកពីគណបក្សសាធារណរដ្ឋ មិនមែនមកពីគណបក្សកាន់អំណាច ព្រោះអាមេរិកនៅពេលនោះ ដឹកនាំដោយលោកប្រធានាធិបតីអាមេរិក ប៊ីល គ្លីនតុន មកពីប្រជាធិបតេយ្យ។ ចំណែកលោកស្រី ណាន់ស៊ី ប៉េឡូស៊ី មកពីគណបក្សកាន់អំណាច គណបក្សប្រជាធិបតេយ្យរបស់លោកចូ បៃដិន។ ទី២ទៀត បរិបទនយោបាយនៅពេលនេះ និងកាលពី២៥ឆ្នាំមុនមិនដូចគ្នា។
នៅឆ្នាំ ១៩៩៧ ចិនក្រោមការដឹកនាំរបស់លោកប្រធានាធិបតី ចាង ជីមីន កំពុងត្រៀមខ្លួនរៀបចំព្រឹត្តិការណ៍ជាប្រវត្តិសាស្រ្ត គឺការទទួលយកដែនដីហុងកុងមកគ្រប់គ្រងវិញ។ ថ្វីបើលោកធ្វើទស្សនកិច្ចទៅតៃវ៉ាន់ ប៉ុន្តែ ប្រធានរដ្ឋសភាអាមេរិក លោកNewst Gingrich ផ្ទាល់ក៏ដើរនយោបាយជំរុញទំនាក់ទំនងជាមួយចិនដែរ។ ប្រធានាធិបតីចិននាសម័យនោះ ដែលមានគោលដៅធំបំផុត គឺស្រោចស្រង់ចិនឲ្យចាកផុតពីភាពឯកោនយោបាយ និងសេដ្ឋកិច្ច ក៏មិនចង់មានរឿងមានរ៉ាវធំដុំជាមួយ អាមេរិក ដោយសារទស្សនកិច្ចរបស់ប្រធានសភាអាមេរិក លោក Newt Gingrichដែរ។
ប៉ុន្តែ ២៥ឆ្នាំក្រោយ ស្ថានការណ៍មានការផ្លាស់ប្តូរ។ ចិនសព្វថ្ងៃបានក្លាយជាប្រទេសអ្នកមាន ជាមហាអំណាចសេដ្ឋកិច្ច ដែលលែងត្រូវការជំនួយរបស់អាមេរិកទៀតហើយ។ សម្រាប់អ្នកជំនាញមួយចំនួន ដោយសារហេតុផលនយោបាយក្នុងស្រុក ពោលគឺនៅមុនការបោះឆ្នោត ក្នុងជួរបក្សកុម្មុយនិស្ត នៅប៉ុន្មានខែខាងមុខ នៅពេលគេត្រូវប្រកាសផ្តល់អំណាចដឹកនាំអាណត្តិទី៣ឲ្យលោក ស៊ី ជីនពីង លោក ចិន ស៊ី ជីនពីងទំនងចាត់វិធានការធំដុំណាមួយ ក្នុងករណីលោកស្រី ប្រធានសភាអាមេរិកធ្វើទស្សនកិច្ចនៅតៃវ៉ាន់ ដើម្បីកុំឲ្យមនុស្សប្រជែងជាមួយលោកក្នុងជួរគណបក្សចោទប្រកាន់លោកថា លោកធូររលុង នៅចំពោះមុខនយោបាយញុះញង់របស់អាមេរិក។ ប៉ុន្តែ សម្រាប់អ្នកជំនាញមួយក្រុមទៀត ការចាត់វិធានការដៃដែកណាមួយ ដូចជាការបង្កជម្លោះប្រដាប់អាវុធ ចូលឈ្លានពានតៃវ៉ាន់នឹងអាចធ្វើឲ្យចិនមានជោគវាសនាដូចរុស្ស៊ី នៅអ៊ុយក្រែន ដែលនេះជាសញ្ញាមិនល្អទេ សម្រាប់សេដ្ឋកិច្ចរបស់ចិន។ សម្រាប់បក្សកុម្មុយនិស្តចិន កំណើនសេដ្ឋកិច្ចជាអំណះអំណាងសំខាន់បំផុត ដើម្បីធានាការរក្សាអំណាច នៅក្នុងក្រសែភ្នែករបស់ប្រជាជន។
នៅអាមេរិក វិញ ការអាក់ខាន មិនបានធ្វើទស្សនកិច្ចរបស់លោកស្រី ណាន់ស៊ី ប៉េឡូស៊ី នៅតៃវ៉ាន់ នឹងត្រូវអ្នកនយោបាយមកពីគណបក្សប្រឆាំង (បក្សសាធារណរដ្ឋ) ចាត់ទុកថា ជារឿងអន់ណាស់ និងជារឿងអាម៉ាស់របស់គណបក្សកាន់អំណាច ដែលចុះចាញ់ពាក្យគំរាមកំហែងរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ