សំណុំរឿងតៃវ៉ាន់៖ប្រធានាធិបតីចិនរំលឹកប្រធានាធិបតីអាមេរិកកុំឲ្យលលេងជាមួយភ្លើង
ប្រធានាធិបតីអាមេរិក លោកចូ បៃដិន និងប្រធានាធិបតីចិន លោកស៊ី ជីនពីងបានជួបសន្ទនាគ្នាតាមទូរស័ព្ទ កាលពីថ្ងៃ ព្រហស្បតិ៍ម្សិលមិញ។ តាមការចុះផ្សាយរបស់ទីភ្នាក់ងារព័ត៌មានរដ្ឋចិនថ្មី លោកស៊ី ជីនពីង និងលោកចូ បៃដិនបានទទួលស្គាល់ថា កិច្ចសន្ទនា រយៈពេល ជាង ២ម៉ោងរបស់អ្នកទាំងពីរធ្វើឡើង ដោយស្មោះត្រង់ឥតលាក់លៀម និងស៊ីជម្រៅ។ ប៉ុន្តែ ប្រធានាធិបតីចិន ក៏បានរំលឹកប្រាប់ប្រធានាធិបតី អាមេរិក កុំឲ្យលលេងជាមួយភ្លើង នៅក្នុងសំណុំរឿងតៃវ៉ាន់។ ការព្រមានរបស់មេដឹកនាំចិន ធ្វើឡើង បន្ទាប់ពី ប៉េកាំងបានគំរាមអាមេរិកពីផលវិបាកធ្ងន់ធ្ងរ ក្នុងករណី ប្រធានសភាអាមេរិក លោកស្រី ណាន់ស៊ី ប៉េឡូស៊ី ធ្វើទស្សនកិច្ច នៅតៃវ៉ាន់ ដែលចិនចាត់ទុកជាដែនដីខេត្តមួយ និងធ្លាប់គំរាមវាយដណ្តើមយកមកគ្រប់គ្រងវិញ នៅថ្ងៃណាមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ជំនួបទ្វេភាគីរវាងប្រធានាធិបតីអាមេរិក និងប្រធានាធិបតីចិន កាលពីថ្ងៃព្រហស្បតិ៍ ផ្តោតសំខាន់លើភាពតានតឹងរវាងប្រទេសទាំងពីរជុំវិញសំណុំរឿងតៃវ៉ាន់។ បើតាមសេតវិមាន និងទីភ្នាក់ងារព័ត៌មានចិនថ្មី នៅក្នុងកិច្ចសន្ទនាតាមទូរស័ព្ទ ដែលមានរយៈពេលជាង២ម៉ោង ប្រធានាធិបតីអាមេរិក និងប្រធានាធិបតីចិនបាននិយាយគ្នាត្រង់ទៅ ត្រង់មក ជាមួយនឹងការព្រមានគ្នា ក្នុងរឿងកោះតៃវ៉ាន់។
តាមទីភ្នាក់ងារព័ត៌មានរដ្ឋចិន លោកប្រធានាធិបតី ស៊ី ជីនពីងបានព្រមានប្រាប់សមភាគីអាមេរិក កុំឲ្យលេងជាមួយភ្លើងព្រោះថា អ្នកលេងភ្លើងរមែងរលាក ហើយលោកសង្ឃឹមថា ភាគីអាមេរិកនឹងយល់ពីច្បាស់ពីរឿងនេះ។
ប្រធានាធិបតីចិនចង់និយាយយោងដល់គម្រោងទស្សនកិច្ចរបស់លោកស្រីណាន់ស៊ី ប៉េឡូស៊ី ប្រធានសភាអ្នកតំណាងរាស្រ្តរបស់អាមេរិក នៅតៃវ៉ាន់ ដែលចិនចេញមុខប្រឆាំងដាច់ខាត។ នៅក្នុងកិច្ចសន្ទនាតាមទូរស័ព្ទជាមួយលោកចូ បៃដិន កាលពីថ្ងៃម្សិលមិញ ប្រមុខរដ្ឋចិនបានរំលឹកសាជាថ្មីថា អាមេរិកគួរគោរពគោលការណ៍ចិនតែមួយ។ លោកបានសង្កត់ធ្ងន់ដែរថា ចិនប្រឆាំងដាច់ខាត ការប្រកាសឯករាជ្យ របស់តៃវ៉ាន់ និងការលូកដៃពីកម្លាំងខាងក្រៅ។
លោកប្រធានាធិបតីអាមេរិក ចូ បៃដិនបាននិយាយប្រាប់លោកស៊ី ជីនពីងវិញដែរថា គោលនយោបាយរបស់អាមេរិក ចំពោះតៃវ៉ាន់មិនបានផ្លាស់ប្តូរ និងថា អាមេរិកប្រឆាំងដាច់ខាតនឹងការព្យាយាមជាឯកតោភាគីដើម្បីផ្លាស់ប្តូរលក្ខន្តិកៈដើម Statut quoក្នុងសំណុំរឿងតៃវ៉ាន់។ នេះបើតាមសេចក្តីថ្លែងការណ៍របស់សេតវិមាន។
គេអាចនិយាយបានថា សហរដ្ឋអាមេរិកទទួលស្គាល់ជាផ្លូវការគោលការណ៍ប្រទេសចិនតែមួយ ប៉ុន្តែជាមួយគ្នានោះ អាមេរិករបស់រដ្ឋបាលលោកចូ បៃដិនប្រឆាំងដាច់ខាតមិនឲ្យចិនកុម្មុយនិស្តប្រើកម្លាំងយោធាវាយយកតៃវ៉ាន់ទាំងកម្រោល។
សម្រាប់សេតវិមាន កិច្ចសន្ទនា ទ្វេភាគីរវាងមេដឹកនាំអាមេរិក និងចិន ជាផ្នែកមួយនៃការប្រឹងប្រែងរបស់រដ្ឋបាលលោកចូ បៃដិនដើម្បី បន្តរក្សាទំនាក់ទំនងរវាងប្រទេសទាំងពីរ ពោលគឺទុកជម្លោះឲ្យនៅដោយឡែក និង នៅតែធ្វើការជាមួយគ្នា នៅពេលមានប្រយោជន៍រួម។ មន្រ្តីសេតវិមានម្នាក់ដែលបានចូលរួមក្នុងគម្រោងរៀបចំកិច្ចសន្ទនាតាមទូរស័ព្ទរវាងមេដឹកនាំចិន និងអាមេរិក បាននិយាយបា្រប់ទីភ្នាក់ងារព័ត៌មានអង់គ្លេសReuters ថា រដ្ឋបាលលោកចូ បៃដិនគិតថា ការនិយាយផ្ទាល់រវាងមេដឹកនាំ និងមេដឹកនាំ គឺជាមធ្យោបាយដ៏ល្អបំផុតដើម្បីបន្ធូរបន្ថយភាពតានតឹងជុំវិញ កោះតៃវ៉ាន់។
សេតវិមានបានអះអាងហើយថា កំពុងធ្វើការទាក់ទងជាប់ជានិច្ចជាមួយក្រុមការងាររបស់លោកស្រី ណាន់ស៊ី ប៉េឡូស៊ី ដើម្បីច្បាស់ប្រាកដក្នុងចិត្តថា លោកស្រីបានទទួលគ្រប់ព័ត៌មាន មុននឹងលោកស្រីសម្រេចចិត្តធ្វើទស្សនកិច្ចនៅតៃវ៉ាន់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ