សង្គ្រាមអ៊ុយក្រែន ៖ អឺរ៉ុបនឹងហាមឃាត់មិនឱ្យទេសចររុស្ស៊ីចូលឬ ?
ចុះផ្សាយនៅថ្ងៃ៖
ស្តាប់ - ០៦:៤៧
នៅក្នុងសុន្ទរកថាបើកបវេសនកាលនយោបាយ នាល្ងាចថ្ងៃសុក្រទី ១៩សីហា លោកប្រធានាធិបតីបារាំង អេម៉ានុយអែល ម៉ាក្រុង បាននិយាយច្រើនអំពីស្ថានភាពអ៊ុយក្រែន ដោយអំពាវនាវឱ្យប្រជាពលរដ្ឋបារាំងហ៊ានលះបង់ ដើម្បីសេរីភាពនិងតម្លៃនៃលទ្ធិប្រជាធិបតេយ្យនៅអឺរ៉ុប។ លះបង់យ៉ាងណា លោកម៉ាក្រុងមិនបានលម្អិតទេ ប៉ុន្តែសង្គ្រាមរុស្ស៊ីនៅអ៊ុយក្រែន កំពុងជះឥទ្ធិពលនិងផលវិបាកយ៉ាងធ្ងន់ធ្ងរលើសេដ្ឋកិច្ចអឺរ៉ុប។ ក្នុងបរិបទបែបនេះ តើអឺរ៉ុបធ្វើអ្វីបានទៀត ដើម្បីជួយអ៊ុយក្រែន ? អ៊ុយក្រែនបានស្នើសុំឱ្យអឺរ៉ុបបន្ថែមទណ្ឌកម្ម ដោយឈប់ឱ្យទេសចររុស្ស៊ីចូលមកកំសាន្តនៅអឺរ៉ុប។ អឺរ៉ុបនឹងផ្តើមពិចារណាលើសំណើនេះនៅចុងខែ តែអឺរ៉ុបទំនងជាពិបាកទទួលយកបន្តិចហើយ។
រដ្ឋមន្ត្រីក្រសួងការបរទេសអ៊ុយក្រែន បានប្រកាសថា ពលរដ្ឋរុស្ស៊ីភាគច្រើនគាំទ្រសង្គ្រាម និងបាននាំគ្នាទះដៃអបអរសាទរ នៅពេលឃើញមីស៊ីលរុស្ស៊ីវាយប្រហារក្រុងរបស់អ៊ុយក្រែន និងសម្លាប់ពលរដ្ឋអ៊ុយក្រែនបាន។ ដូច្នេះត្រូវទុកឱ្យពួកគេរីករាយដើរហើរតែក្នុងប្រទេសគេទៅ។ នេះហើយជាហេតុផលដែលជំរុញឱ្យប្រធានាធិបតីអ៊ុយក្រែន លោក ហ្សេឡេនស្គី ស្នើសុំឱ្យក្រុមលោកខាងលិចឱ្យបិទទ្វារព្រំដែន មិនទទួលពលរដ្ឋរុស្ស៊ីនោះ។ នៅក្នុងបទសម្ភាសន៍ជាមួយកាសែតវ៉ាស៊ីនតោនប៉ុស្តិ៍កាលពីថ្ងៃទី ៨ សីហា ២០២២ លោកហ្សេឡេនស្គី បានសង្កត់ធ្ងន់ទៀតថា ពលរដ្ឋរុស្ស៊ី ត្រូវតែរស់ក្នុងភពរបស់ពួកគេ (ក្នុងប្រទេសរុស្ស៊ី) រហូតទាល់តែមានការប្តូរផ្លាស់ស្មារតី។ ប៉ុន្តែក្រេមឡាំងបានបញ្ចេញប្រតិកម្មតបវិញថា អ៊ុយក្រែនទាមទារជ្រុលហួសហេតុ។
ហ្វាំងឡង់ អេស្តូនី ប៉ូឡូញ ឆែក ផ្តើមមិនស្វាគមន៍ទេសចររុស្ស៊ី
ហ្វាំងឡង់ និងក្រុមប្រទេសនៅតំបន់បាល់ទិក បានផ្តួចផ្តើមគំនិតហាមឃាត់ទេសចររុស្ស៊ីខ្លះៗហើយ គ្រាន់តែពួកគេចង់បានជំហររួម មូលគ្នាថ្នាក់អឺរ៉ុប បន្ថែមទៀតតែប៉ុណ្ណោះ។ ហ្វាំងឡង់ដែលមានព្រំដែនជាប់រុស្ស៊ី និងដែលទទួលពាក្យសុំវីសា ១០០០ច្បាប់ក្នុងមួយថ្ងៃៗ បានសម្រេចចិត្តកាត់បន្ថយការផ្តល់ទិដ្ឋាការដល់ពលរដ្ឋរុស្ស៊ី ចំនួន១០% ចាប់ពីថ្ងៃទី ១កញ្ញាតទៅ។ តាំងពីអឺរ៉ុបបិទព្រំដែនអាកាស ដើម្បីដាក់ទណ្ឌកម្មរុស្ស៊ីដែលចូលឈ្លានពានអ៊ុយក្រែនមក ពលរដ្ឋរុស្ស៊ីកាន់តែច្រើនឡើងៗ បានសម្រុកធ្វើដំណើរចូលប្រទេសហ្វាំងឡង់ ដើម្បីអាចបន្តដំណើរទៅកាន់ប្រទេសផ្សេងៗទៀតរបស់អឺរ៉ុប តាមរយៈទិដ្ឋាការអឺរ៉ុប Schengen។ សម្រាប់លោកស្រីនាយករដ្ឋមន្ត្រី វាមិនត្រឹមត្រូវសោះដែលពលរដ្ឋរុស្ស៊ីអាចចូលមកក្នុងទឹកដីអឺរ៉ុប ដើរលេងធ្វើទេសចរណ៍ ក្នុងខណៈដែលប្រទេសរុស្ស៊ីបន្តសម្លាប់មនុស្សនៅអ៊ុយក្រែននោះ។ អេស្តូនីវិញ ក៏យល់ឃើញដូចគ្នា។ លោកស្រីនាយករដ្ឋមន្ត្រីបានប្រកាសថា ទស្សនាអឺរ៉ុប គឺឯកសិទ្ធិ (សិទ្ធិជាប់នឹងស្ថានភាពខ្លះ) មិនមែនជារឿងសិទ្ធិមនុស្សទេ ប៉ុន្តែអេស្តូនីសោកស្តាយដែលមិនអាចហាមឃាត់ពលរដ្ឋរុស្ស៊ី មិនឱ្យចូលប្រទេសខ្លួនបាន ព្រោះបុគ្គលនោះមានទិដ្ឋការចូលប្រទេសផ្សេងដែលស្ថិតនៅក្នុងក្រុមSchengenដូចគ្នា។
ទិដ្ឋាការSchengen អាចអនុញ្ញាតឱ្យទេសចរធ្វើដំណើរក្នុង២៦ប្រទេសនៅទ្វីបអឺរ៉ុប (២២ប្រទេសជាសមាជិកសហភាពអឺរ៉ុប ន័រវែស អ៊ីស្លង់ ស៊ុយអែត ស្វីស និងលីឆេនស្តែន)។
ចំណែកប៉ូឡូញ បានរឹតបណ្តឹងសេវាផ្តល់វីសា តាំងពីរុស្ស៊ីបើកប្រតិបត្តិការយោធាលើអ៊ុយក្រែនភ្លាម ដោយបញ្ឈប់ការផ្តល់ទិដ្ឋការទាំងស្រុង ដល់ពលរដ្ឋរុស្ស៊ី ឬសម្រាប់ធ្វើទេសចរណ៍ លើកលែងតែវីសាសម្រាប់ មនុស្សធម៌ រៀនសូត្រ និងធ្វើការ។
រដ្ឋមន្ត្រីការបរទេសឆែកដែលកំពុងធ្វើជាប្រធានផ្លាស់វេនសហភាពអឺរ៉ុបវិញ ក៏សម្តែងការគាំទ្រដែរថា ក្នុងអំឡុងពេលដែលក្រេមឡាំងកំពុងវាយប្រហារលើអ៊ុយក្រែនគ្មានត្រាប្រណីដូច្នេះ គេមិនអាចគិតអំពីបញ្ហាទេសចរណ៍ ដូចគ្មានអ្វីកើតឡើងបានទេ។ សាធារណរដ្ឋឆែកលែងផ្តល់ទិដ្ឋការដល់ពលរដ្ឋទូទៅរុស្ស៊ីហើយ ហើយនឹងបញ្ចូលប្រធានបទនេះ ទៅក្នុងរបៀបវារៈនៃជំនួបប្រជុំថ្នាក់រដ្ឋមន្ត្រីការបរទេសអឺរ៉ុប ទាំង២៧ នៅថ្ងៃទី៣០-៣១សីហាខាងមុខ នៅទីក្រុងប្រាក។
បិទទេសចរណ៍ អ្នកប្រឆាំងរបបពូទីន បាត់ឱកាស
ថ្វីបើសំណើនេះបានទាក់ទាញមតិសាធារណៈច្រើនប្រទេស រាប់ទាំងប្រទេសដែលពុំធ្លាប់មានប្រវត្តិស្អប់មិនទុកចិត្តរុស្ស៊ីផងក៏ដោយ ក៏វិធានការនេះទំនងគ្មានសំណាងនឹងកើតចេញជារូបរាង និងទទួលបានការអនុម័តពីសហភាពអឺរ៉ុបទេ។ ដើម្បីឱ្យទណ្ឌកម្មប្រឆាំងរុស្ស៊ីមានប្រសិទ្ធភាព អាទិភាពរបស់អឺរ៉ុបគឺរួមកម្លាំងគ្នាជាធ្លុងមួយប្រឈមនឹងក្រេមឡាំង ពោលគឺត្រូវអនុម័តជាឯកច្ឆ័ន្ទលើវិធានការប្រឆាំងរុស្ស៊ី។
តែអាល្លឺម៉ង់ ព័រទុយហ្កាល់ ឬគណៈកម្មការអឺរ៉ុបផ្ទាល់ មិនគាំទ្រទេ។ ក្រុមប្រទេសអ្នកប្រឆាំងក៏មានហេតុផលរបស់គេដែរ។ អាល្លឺម៉ង់យល់ថា កំហិតទិដ្ឋាការទេសចរណ៍អាចនឹងធ្វើឱ្យក្រុមអ្នកដែលចង់រត់ចេញពីរុស្ស៊ី គេចពីរបបពូទីន បាត់បង់ឱកាស។ ទណ្ឌកម្មអឺរ៉ុបត្រូវដៅជាបឋមលើ ម៉ាស៊ីនសង្គ្រាមរបស់រុស្ស៊ី មិនមែនសំដៅលើប្រជាពលរដ្ឋស្លូតត្រង់រុស្ស៊ីទេ។ នេះជាទស្សនៈរបស់ព័រទុយហ្កាល់។ សម្រាប់គណៈកម្មការអឺរ៉ុប ដោយមូលហេតុមនុស្សធម៌ អឺរ៉ុបចាំបាច់ត្រូវការពារ អ្នកបះបោរ អ្នកកាសែត និងគ្រួសារ។ ដូច្នេះអឺរ៉ុបត្រូវ ពិនិត្យនិងផ្តល់ទិដ្ឋការទៅតាមករណីជាក់ស្តែងនីមួយៗ។ វិធានការហាមឃាត់ទេសចររុស្ស៊ី ជាទង្វើបញ្ច្រាសនឹងតម្លៃអឺរ៉ុបខ្លួនឯង ព្រោះវាផ្ទុយនឹងគោលការណ៍គោរពសេរីភាពនៃការធ្វើដំណើរ និងនយោបាយដាក់ទណ្ឌកម្មដែលអឺរ៉ុបបានប្រកាន់យកតាំងពីដើមមក។ នេះបើតាមការពន្យល់របស់អ្នកជំនាញ។
តាំងពីផ្ទុះសង្គ្រាមនៅអ៊ុយក្រែនមក សហភាពអឺរ៉ុប បានព្យួរកិច្ចព្រមព្រៀងអឺរ៉ុប-រុស្ស៊ី ដែលសម្រួលការផ្តល់ទិដ្ឋាការរយៈពេលខ្លី ដោយហាមឃាត់មិនឱ្យក្រុមស្និទ្ធនឹងរបបពូទីន ដូចជាប្រតិភូផ្លូវការ សមាជិករដ្ឋាភិបាល អ្នកកាន់លិខិតឆ្លងដែនការទូត ប្រធានសហគ្រាស ចេញចូលអឺរ៉ុបបានទេ។ ហើយអឺរ៉ុបប្រកាសមិនស្វាគមន៍អ្នកទទួលខុសត្រូវរុស្ស៊ីចំនួន ១២១៤នាក់ រាប់ទាំងលោកពូទីនផ្ទាល់ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ