សង្រ្គាមអ៊ុយក្រែន៖ អាល្លឺម៉ង់ពិគ្រោះជាមួយប្រជាជនដើម្បីបង្កើតយុទ្ធសាស្រ្តសន្តិសុខជាតិ
សង្រ្គាមរុស្ស៊ីឈ្លានពានអ៊ុយក្រែនមិនត្រឹមធ្វើឲ្យអាល្លឺម៉ង់ស្ទុះស្ទារពង្រឹងវិស័យការពារជាតិ ដោយ បង្កើនថវិកាកងទ័ពយ៉ាងច្រើនសម្បើម (១០០ពាន់លានអឺរ៉ូ) តែប៉ុណ្ណោះទេ ប៉ុន្តែ វាធ្វើឲ្យអាល្លឺម៉ង់ភ្ញាក់រលឹក បោះជំហានលើផ្លូវមួយដែលអាល្លឺម៉ង់ មិនដែលធ្លាប់ធ្វើពីមុនមក។ នោះ គឺការបង្កើតយុទ្ធសាស្រ្តសន្តិសុខជាតិ ដោយមានការចូលរួមផ្តល់យោបល់ពីសំណាក់ពលរដ្ឋអាល្លឺម៉ង់។
ចុះផ្សាយនៅថ្ងៃ៖
ស្តាប់ - ០២:០៨
សង្រ្គាមរុស្ស៊ីឈ្លានពានអ៊ុយក្រែនបានចូលដល់ខែទី ៦។ នៅចំពោះមុខសង្រ្គាម ដែលអាល្លឺម៉ង់បារម្ភខ្លាចថា នឹងអាចរាលដាលនៅទឹកដីអឺរ៉ុប រដ្ឋាភិបាលអាល្លឺម៉ង់ចាប់ផ្តើមត្រូវការពលរដ្ឋរបស់ខ្លួន។
ទៅតាមតម្រូវការរបស់អាជ្ញាធរ រាល់ឃុំចំនួន៧ របស់អាល្លឺម៉ង់ ត្រូវបញ្ជូនប្រជាជនចំនួន៥០នាក់ដែលចេញមកពីការចាប់ឆ្នោត។ អ្នកទាំងនោះដែលអាចជានិស្សិត មន្រ្តីរដ្ឋការ បុគ្គលិកក្រុមហ៊ុនឯកជន ឬអ្នកចូលនិវត្តមិនបានជាប់កំណែនយោធា ប៉ុន្តែ ពួកគេត្រូវជាប់កាតព្វកិច្ចចូលរួមក្នុងការពិភាក្សា ដើម្បីបង្កើត”យុទ្ធសាស្រ្តសន្តិសុខជាតិ”។
តើត្រូវធ្វើយ៉ាងណាដើម្បីឲ្យកងទ័ពអាល្លឺម៉ង់មានការទាក់ទាញ? តើគេត្រូវត្រលប់ទៅអនុវត្តច្បាប់ស្តីពីកាតព្វកិច្ចយោធា ដែរឬទេ? តើធ្វើយ៉ាងម៉េចដើម្បីការពារលទ្ធិប្រជាធិបតេយ្យ ឬធ្វើយ៉ាងណាដើម្បីធានាការផ្គត់ផ្គង់ថាមពលក្នុងប្រទេស? ទាំងនេះជាសំណួរ ដែលអ្នកចូលរួមអាល្លឺម៉ង់ ត្រូវផ្តល់ចម្លើយ។ រាល់គំនិតយោបល់របស់ប្រជាពលរដ្ឋអាល្លឺម៉ង់ ដែលមានផងដែរ ក្តីបារម្ភរបស់ពួកគេ នឹងត្រូវដាក់បញ្ចូលជាអនុសាសន៍ ដែលរដ្ឋាភិបាលអាល្លឺម៉ង់ប្រើជាឯកសារយោងសម្រាប់ការសម្រេចចិត្ត។
ចាប់តាំងពីរុស្ស៊ីចូលធ្វើសង្រ្គាមឈ្លានពានអ៊ុយក្រែន នៅអាល្លឺម៉ង់ ក្តីបារម្ភពីអសន្តិសុខមានសន្ទុះលឿនខ្លាំង។ ៨០%នៃប្រជាជនអាល្លឺម៉ង់ចាត់ទុករុស្ស៊ី ជាការគំរាមកំហែងសម្រាប់ប្រទេសរបស់ពួកគេ។ វាជារឿងដែលគេមិននឹកស្មានដល់ ព្រោះថា នៅមុនសង្រ្គាមរុស្ស៊ីឈ្លានពានអ៊ុយក្រែន ប្រជាជនអាល្លឺម៉ង់ភាគច្រើនបានគិតថា អឺរ៉ុបមានសន្តិភាពជាអមតៈ ព្រោះអឺរ៉ុបមានតែមិត្តនៅជុំវិញ គឺគ្មានសត្រូវនោះទេ។ ដូច្នេះអាល្លឺម៉ង់មិនចាំបាច់ត្រូវក្លាយជាមហាអំណាចយោធានោះទេ។ ប៉ុន្តែ ជាមួយសង្រ្គាមអ៊ុយក្រែន អ្វីៗបានប្រែប្រួល។
យុទ្ធសាស្រ្តសន្តិសុខជាតិដែលកើតចេញមកពីការពិភាក្សា ពិគ្រោះយោបល់ជាមួយពលរដ្ឋអាល្លឺម៉ង់ គឺជាត្រីវិស័យចង្អុរទិសថ្មី សម្រាប់ជួយឲ្យអាល្លឺម៉ង់អាចបោះជំហានទៅមុខ រកឃើញកន្លែង តួនាទីថ្មីរបស់ខ្លួន នៅក្នុងសករាជភូមិសាស្រ្តនយោបាយ ដែលបើកមុខថ្មី ដោយសារសង្រ្គាមរុស្ស៊ីឈ្លានពានអ៊ុយក្រែន។ តាមរដ្ឋាភិបាលអាល្លឺម៉ង់ បន្ទាប់ពីប្រមូលគ្រប់មតិយោបល់របស់ពលរដ្ឋ អង្គការសមាគម និងអ្នកជំនាញ គេគ្រោងនឹងបោះពុម្ពចេញផ្សាយ សៀវភៅយុទ្ធសាស្រ្តស្តីពីសន្តិសុខជាតិអាល្លឺម៉ង នៅចុងឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ