អ៊ុយក្រែនប្រារព្ធខួបឯករាជ្យជាតិ ចំខួប៦ខែនៃការឈ្លានពានរបស់រុស្ស៊ី
ចុះផ្សាយនៅថ្ងៃ៖
ស្តាប់ - ០៧:៥៦
នៅថ្ងៃពុធទី ២៤សីហា២០២២នេះ ជាថ្ងៃគម្រប់ខួបលើកទី៣១ឆ្នាំដែលអ៊ុយក្រែនបានទទួលឯករាជ្យ ពីអតីតសហភាពសូវៀត និងត្រូវចំគម្រប់ខួប៦ខែគត់ដែលរុស្ស៊ីចាប់បើកប្រតិបត្តិការពិសេសឈ្លានពានអ៊ុយក្រែន។ ៦ខែក្រោយ សមរភូមិបានរំកិលទៅភាគខាងត្បូង រុស្ស៊ីហាក់នៅតែមិនអាចបញ្ជាក់ឱ្យច្បាស់លាស់អំពីកម្មវត្ថុនៃសង្គ្រាម។ តែឆ្លងថ្ងៃជានិម្មិតរូបបែបនេះ អ៊ុយក្រែនសង្ស័យថារុស្ស៊ីអាចនឹងផ្លោងទម្លាក់គ្រាប់បែក កាន់តែសន្ធាប់ឃោរឃៅកាន់តែខ្លាំង។
តាមទម្លាប់ តាំងពីឆ្នាំ១៩៩១មក អ៊ុយក្រែនតែងប្រារព្វខួបឯករាជ្យជាតិ ដោយដង្ហែក្បួនព្យុះហយាត្រា យ៉ាងគគ្រឹកគគ្រេង។ កាលពីឆ្នាំទៅ ក្បួនព្យុះហយាត្រាមានទាំងកងទ័ពអាមេរិកនិងអង់គ្លេសចូលរួមដង្ហែផង។ ប៉ុន្តែក្នុងថ្ងៃខួបលើកទី៣១នេះ ពុំមានកម្មវិធីអ្វីរីករាយឡើយ។ រដ្ឋធានីមានដំណើរការជាធម្មតា តែស្ងាត់បន្តិច ហើយមានការឆែកឆេរស្ទើរគ្រប់ផ្លូវបំបែក និងមានស្នូរស៊ីរ៉ែន ការពារដែនអាកាសរន្ទឺលាន់ឡើងបញ្ជាក់ថាគ្រោះថ្នាក់ជិតមកដល់ផង។ ប្រជាពលរដ្ឋអ៊ុយក្រែន ត្រូវសំងំនៅក្នុងផ្ទះ។ អាជ្ញាធរក្រុងកៀវ បានចេញបម្រាម មិនឱ្យមានការជួបជុំគ្នា តាំងពីថ្ងៃចន្ទរហូតដល់ថ្ងៃព្រហស្បតិ៍ស្អែក។ នៅតាមខេត្តក្រុងផ្សេងទៀត នៅភាគខាងត្បូងជាឧទាហរណ៍ អាជ្ញាធរបានដាក់បម្រាមគោចរ រហូតដល់ព្រឹកស្អែកតែម្តង។
អាជ្ញាធរអ៊ុយក្រែនសង្ស័យថា រុស្ស៊ីអាចនឹងឆ្លៀតធ្វើសកម្មភាពបង្កហេតុ ដែលអាក្រក់ខ្លាំង វាយប្រហារយ៉ាងសាហាវខ្លាំងមកលើអ៊ុយក្រែន ក្នុងថ្ងៃពុធនេះ។ នេះតាមប្រសាសន៍របស់លោកប្រធានាធិបតីអ៊ុយក្រែន ហ្សេឡេនស្គី កាលពីថ្ងៃសៅរ៍ទី ២០សីហាម្តង និងម្តងទៀត កាលពីថ្ងៃអង្គារម្សិលមិញ។ ម្សិលមិញនេះដែរ ឯកអគ្គរដ្ឋទូតអាមេរិកប្រចាំទីក្រុងកៀវ ក៏បានផ្សព្វផ្សាយសារបែបអាសន្ន ថារុស្ស៊ីអាចនឹងបង្កើនការបាញ់ផ្លោងទម្លាក់គ្រាប់បែបខ្លាំងបន្ថែមទៀតលើអ៊ុយក្រែន ក្នុងថ្ងៃខាងមុខ ហើយផ្តល់អនុសាសន៍ឱ្យពលរដ្ឋអាមេរិកចាកចេញភ្លាមពីទឹកដីអ៊ុយក្រែន។
សហរដ្ឋអាមេរិកបន្ថែមជំនួយយោធាថ្មី ៣ពាន់លានដុល្លារ
រុស្ស៊ីបានបើកធ្វើប្រតិបត្តិការយោធាវាយលុកលើក្រុងកៀវ នៅថ្ងៃទី ២៤កុម្ភៈ ដោយគ្មាននរណាគិតស្មានដល់។ ពេលនោះយោធាអ៊ុយក្រែនហេងហាងមែនទែនព្រោះមិនបានត្រៀមលក្ខណៈសោះ ប៉ុន្តែបន្តិចម្តងៗកម្លាំងតស៊ូអ៊ុយក្រែនកាន់តែរឹងមាំ ដោយអាចច្រានកងទ័ពរុស្ស៊ីឱ្យដកចេញពីតំបន់ជុំវិញក្រុងកៀវ នៅចុងខែមីនា។ ការប្រយុទ្ធតតាំង ងាកទៅផ្តុំគ្នាខ្លាំងនៅតែតំបន់ភាគខាងកើត និងខាងត្បូងប្រទេសអ៊ុយក្រែន ដែលកងកម្លាំងរុស្ស៊ីរុលទៅមុខយ៉ាងយឺតៗ។ បានជំនួយពីលោកខាងលិច អ៊ុយក្រែនកាន់តែរឹងមាំហើយ មានឆន្ទៈតស៊ូចង់ដណ្តើមទឹកដីរបស់ខ្លួនមកវិញ ជាងពេលណាៗទាំងអស់។
សង្គ្រាមនៅអ៊ុយក្រែនបានឈានចូលដល់ខែទី៧ ឯសាមគ្គីភាពរបស់ក្រុមលោកខាងលិចចំពោះអ៊ុយក្រែនមិនបានថមថយទេ។ ក្នុងថ្ងៃប្រកបដោយនិម្មិតរូបបំផុតនេះ សហរដ្ឋអាមេរិកបានប្រកាសផ្តល់ជំនួយយោធាថ្មីទៀតដល់ក្រុងកៀវ ក្នុងទំហំទឹកប្រាក់ប្រមាណ ៣ពាន់លានដុល្លារ។ គិតតាំងពីផ្ទុះសង្គ្រាមមក នេះជាកញ្ចប់ជំនួយដ៏ធំមហាសាលបំផុត ដែលជាមូលនិធិរបស់ក្រសួងការពារជាតិ សម្រាប់ឱ្យអ៊ុយក្រែនអាចយកទៅប្រើបានភ្លាម ក្នុងការចាយវាយ ទិញអាវុធថ្មី ឬសម្រាប់ចំណាយក្នុងការបំពាក់បំប៉នយោធានិងប្រតិបត្តិការផ្សេងៗ។ កាលពីថ្ងៃសុក្រ ក្រសួងការពារជាតិអាមេរិកបានប្រកាសទម្លាយថវិកាចំនួន ៧៧៥លានដុល្លារ ចេញពីមូលនិធិនេះ ក្នុងទម្រង់ជាការផ្តល់ជំនួយមីស៊ីលបន្ថែមសម្រាប់បំពាក់កាំភ្លើងធំអាមេរិកទៅឱ្យអ៊ុយក្រែន។ អាវុធដែលបានប្តូរផ្លាស់ស្ថានភាពនៅលើសមរភូមិប្រយុទ្ធ។ នេះបើតាមការលម្អិតរបស់អ្នកទទួលខុសត្រូវក្រសួងការពារជាតិអាមេរិក។
សង្គ្រាមអ៊ុយក្រែននេះ បានជះឥទ្ធិពលយ៉ាងជាក់ស្តែងមកលើបណ្តាប្រទេសជាច្រើនលើទ្វីបអឺរ៉ុប ដែលរំពឹងលើហ្កាសនិងធ្យូងថ្មរុស្ស៊ី។ ប៉ុន្តែសហភាពអឺរ៉ុប ត្រៀមជាស្រេចនឹងគាំទ្រអ៊ុយក្រែនធ្វើសង្គ្រាមទោះយូរយ៉ាងណាក៏ដោយ។ សហភាពអឺរ៉ុបបានប្រកាសគម្រោងបើកវគ្គបំពាក់បំប៉នយោធា និងជួយរៀបចំស្ថាប័នយោធាអ៊ុយក្រែន។ ជាមួយនឹងការសន្យាមិនទទួលស្គាល់ការប៉ុនប៉ងប្តូរលក្ខន្តិកៈប្រទេសអ៊ុយក្រែនជាដាច់ខាត ប្រមុខរដ្ឋាភិបាលអាល្លឺម៉ង់បានប្រកាសបញ្ចូនអាវុធថ្មីបន្ថែមឱ្យអ៊ុយក្រែនក្នុងតម្លៃទឹកប្រាក់ប្រមាណ៥០០លានអឺរ៉ូ។ ហើយអង់គ្លេសប្រកាសបន្តគាំទ្រនិងជួយអ៊ុយក្រែនទាំងផ្នែកសេដ្ឋកិច្ច យោធា ... ចាំបាច់រហូតទាល់រុស្ស៊ីបញ្ចប់សង្គ្រាមនិងដកខ្លួនចេញ ពីអ៊ុយក្រែន។ ប្រធានាធិបតីបារាំង ម៉ាក្រុង ក៏បានប្រកាសគាំទ្រអ៊ុយក្រែនដែរ នៅថ្ងៃនេះ ដោយជំរុញឱ្យសហគមន៍អន្តរជាតិកុំបង្ហាញភាពទន់ខ្សោយ និងភាពអនុគ្រោះដល់រុស្ស៊ី ឱ្យសោះ។
សង្គ្រាមគ្មានថ្ងៃបញ្ចប់ ?
អ្នកវិភាគ មើលមិនឃើញហេតុផលដែលជំរុញឱ្យភាគីបក្សដិបក្សបញ្ចប់សង្គ្រាមទេ។ គ្រាន់តែឃើញប្រតិបត្តិការយោធារុស្ស៊ីភ្លាម សំឡេងបានឮចេញស្ទើរពីគ្រប់មាត់ព្យាករថា សង្គ្រាមអាចនឹងអូសបន្លាយយូរ។ នៅថ្ងៃទី ១៩ មិថុនា ប្រមុខដឹកនាំអង្គការអូតង់ បាន ពញ្ញាក់ស្មារតីដៃគូ ឱ្យត្រៀមលក្ខណៈប្រឈមនឹងសង្គ្រាមរាប់ឆ្នាំ។ ប្រសាសន៍របស់លោកកាន់តែសមហេតុផល នៅពីរខែក្រោយ។
តាំងពីប៉ុន្មានសប្តាហ៍មកនេះ ស្ថានភាពនៅលើសមរភូមិ ហាក់ចាប់នឹង។ កងកម្លាំងរុស្ស៊ីស្ថិតក្នុងជំហរការពារខ្លួនច្រើនជាងបើទោះបីពួកគេប៉ុនប៉ងវាយសម្រុកក៏ដោយ ក៏មិនអាច បានដូចមុន។ ឯកម្លាំងអ៊ុយក្រែនអាចនឹងមានលទ្ធភាពសម្រុកដណ្តើមទីតាំងខ្លះមកវិញបាន ក្នុងពេលខ្លីខាងមុខ។ បើតាមនាយកកម្មវិធីអឺរ៉ុប Marie Dumoulin សង្គ្រាមអ៊ុយក្រែនអាចអូសបន្លាយយ៉ាងហោចដល់ឆ្នាំ២០២៣ ព្រោះនៅឆ្នាំ២០២៤ប្រទេសទាំងពីរ អ៊ុយក្រែននិងរុស្ស៊ី ត្រូវរៀបចំការបោះឆ្នោត។ មិនដឹងថាតើការបោះឆ្នោតជ្រើសរើសប្រធានាធិបតីថ្មី អាចតើតួនាទីប៉ុណ្ណាក្នុងសង្គ្រាមហើយខាងណាបានចំណេញទេ។
ហើយសម្រាប់ពេលនេះ មានហេតុការណ៍ថ្មីអាចមកពន្លឿនជម្លោះ និងធ្វើឱ្យសង្គ្រាមមានលក្ខណៈកាន់តែមិនជាក់លាក់ខ្លាំង។ គឺ ថ្ងៃទី ២៤សីហា អាចជាកត្តាចម្រើនភាពតានតឹង ព្រោះអ៊ុយក្រែន ប្រារព្វខួប៣១ឆ្នាំនៃការបានទទួលឯករាជ្យ ក្រោយពីសហភាពសូវៀតដួលរលំទៅ ត្រូវចំថ្ងៃខួប៦ខែនៃការចាប់ផ្តើមប្រតិបត្តិយោធារុស្ស៊ី ព្រោះតាមទម្លាប់មក រុស្ស៊ីចូលចិត្តធ្វើសកម្មភាពអ្វីមួយក្នុងថ្ងៃជានិម្មិតរូបណាស់។ ទីពីរ គឺការស្លាប់របស់អ្នកស្រី ដារីយ៉ា ឌូហ្គីណា កូនស្រីរបស់មេគំនិតអ្នកជាតិនិយមស្និទ្ធនឹងក្រេមឡាំង ក្នុងភេរវកម្មក្បែរទីក្រុងមូស្គូ អាចជាការបន្ថែមគ្រឿងឱ្យសង្គ្រាមមានភាពតានតឹងមួយកំរិតទៀត។ ភ្នាក់ងារចារកិច្ចរុស្ស៊ីបានចោទថាជាស្នាដៃអ៊ុយក្រែន ដូច្នេះរុស្ស៊ីនឹងសងសឹកដោយគ្មានអាសូរលើក្រុមនិងអ្នកបញ្ជារៀបផែនការភេរវកម្មនេះទេ។ នេះជាប្រសាសន៍របស់លោកប្រមុខការទូតរុស្ស៊ី ស៊ែកហ្គៃ ឡាវ្រូស កាលពីម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ