សហភាពអឺរ៉ុបគ្រោងចេញធ្វើបេសកកម្មបណ្តុះបណ្តាលយោធាអ៊ុយក្រែន
សហភាពអឺរ៉ុបនឹងផ្តល់ការគាំទ្រដ៏សំខាន់មួយដល់យោធាអ៊ុយក្រែន។ ក្រៅពីផ្តល់ជំនួយជាសម្ភារៈ សហភាពអឺរ៉ុប មានគម្រោងរៀបចំបេសកកម្មបញ្ជូនអ្នកជំនាញមួយក្រុមធំ ទៅបង្ហាត់បង្វឹកយោធាអ៊ុយក្រែន ដើម្បីអាចធ្វើសង្គ្រាមប្រឈមតតាំងនឹងរុស្ស៊ីបាន។ នេះបើតាមសេចក្តីជូនដំណឹងរបស់ប្រមុខការទូតសហភាពអឺរ៉ុប លោក ហ្សូសេព បូរែល Josep Borrell។
ចុះផ្សាយនៅថ្ងៃ៖
ស្តាប់ - ០១:៥០
អឺរ៉ុបនឹងសម្រេចគ្នា ហើយអនុម័តបេសកកម្មផ្តល់ការបំពាក់បំប៉នដល់យោធាអ៊ុយក្រែន នៅសប្តាហ៍ក្រោយ ក្នុងឱកាសជួបប្រជុំក្រុមប្រឹក្សាយោធាសហភាពអឺរ៉ុបនៅទីក្រុងប្រាក។ នេះបើតាមការបញ្ជាក់របស់លោកប្រមុខការទូតសហភាពអឺរ៉ុប ដោយបន្ថែមថា វគ្គបណ្តុះបណ្តាល នឹងប្រព្រឹត្តនៅក្នុងប្រទេសជិតខាង។
បើតាមលោកប្រមុខការទូត សហភាពអឺរ៉ុបលើកគម្រោងនេះឡើងព្រោះយល់ថា សង្គ្រាមនៅអ៊ុយក្រែន មិនមែនជាសង្គ្រាមតូចតាច ជាមួយទ័ពព្រៃទេ តែជាសង្គ្រាមដែលភាគីបង្កហេតុមានអាវុធយុទ្ធភ័ណ្ឌដ៏សម្បើមអស្ចារ្យ និងមានកម្លាំងដល់ទៅរាប់សិបម៉ឺននាក់។ ប្រឈមនឹងសង្គ្រាមទ្រង់ទ្រាយធំបែបនេះ សហភាពអឺរ៉ុបក៏ត្រូវតែចេញធ្វើបេសកកម្មទ្រង់ទ្រាយធំដែរ ទើបសមល្មមនឹងជម្លោះ។ ជាសង្គ្រាមដ៏វែង និងដែលទំនងត្រូវអូសបន្លាយពេលយូរទៀត។ ហេតុដូច្នេះហើយបានជាសហភាពអឺរ៉ុបមានផែនការ ផ្តល់ជំនួយជាការបំពាក់បំប៉នទាហាន និងជួយរៀបចំស្ថាប័នយោធាអ៊ុយក្រែន មិនមែនត្រឹមតែផ្តល់ជំនួយជាសម្ភារៈយោធា និងការបើកវគ្គបណ្តុះបណ្តាលធម្មតាទេ។ ប៉ុន្តែលោកប្រមុខការទូត បានបដិសេធមិនផ្តល់ព័ត៌មានលម្អិតទាក់ទងនឹងបេសកកម្មនេះទេ។
នេះមិនមែនជាបេសកកម្មលើកទីមួយរបស់សហភាពអឺរ៉ុបទេ។ លោកបូរែល បានអះអាងបច្ចុប្បន្ននេះ អឺរ៉ុបមានបេសកកម្មយោធាចំនួន១៧ នៅទូទាំងពិភពលោក មានជាអាទិ៍បេសកកម្មបង្វឹកបង្ហាត់យោធានៅតាមបណ្តាប្រទេសដែលសហការជាមួយអឺរ៉ុប ម៉ាលី ម៉ូហ្សំប៊ិច នីហ្សេ ឬឆាដ។
ជាងនេះទៅទៀត លោកប្រមុខការទូតសហភាពអឺរ៉ុប បានរំលឹកថា មានប្រទេស ក្នុងរង្វង់សហភាពអឺរ៉ុប និងក្រៅរង្វង់អឺរ៉ុប ច្រើនដែលបានផ្តល់សម្ភារៈបរិក្ខារយោធាដល់អ៊ុយក្រែន និងខ្លះមានផែនការ “ទ្វេភាគី” ជួយបង្វឹកបង្ហាត់យោធាអ៊ុយក្រែនរួចស្រេចទៅហើយ ឱ្យចេះប្រើសម្ភារៈបញ្ជូនទៅពីអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ