អ៊ុយក្រែននិងរុស្ស៊ី ទំលាក់កំហុសដាក់គ្នាសាជាថ្មី ថាបានបាញ់ប្លោងគ្រាប់ទៅលើស្ថានីយ៍នុយក្លេអ៊ែរហ្សាប៉ូរីចា
ការព្រួយបារម្ភស្តីពីគ្រោះថ្នាក់នុយក្លេអ៊ែរ នៅអ៊ុយក្រែន នៅតែមានជាប្រចាំ ខណៈស្ថានីយ៍អគ្គិសនីនុយក្លេអ៊ែរដ៏ធំរបស់អ៊ុយក្រែន ឈ្មោះ ហ្សាប៉ូរីចា បានក្លាយជាទីតាំងផ្ទាំងស៊ីបនៃការវាយប្រហារ ជាច្រើនសប្តាហ៍មកនេះ។ ហើយកាលពីថ្ងៃសៅរ៍ទី១៣សីហា កងទ័ពរុស្ស៊ី និងអ៊ុយក្រែន បានចោទ ទម្លាក់កំហុសដាក់គ្នាជាថ្មីម្តងទៀត ថាបានបាញ់ប្លោងគ្រាប់សំដៅមកលើស្ថានីយ៍នុយក្លេអ៊ែរនេះ។
ចុះផ្សាយនៅថ្ងៃ៖
ស្តាប់ - ០២:៣៩
នៅលើបណ្តាញតេឡេក្រាម ទីភ្នាក់ងារថាមពលនុយក្លេអ៊ែរអ៊ុយក្រែន បានចែកចាយបន្តនូវសាររបស់ថ្នាក់ដឹកនាំម្នាក់នៃក្រុង Energodar ដែលបានអំពាវនាវឲ្យប្រជាជនរកកន្លែងមានសុវត្ថិភាព ព្រោះកងទ័ពរុស្ស៊ីដែលគ្រប់គ្រងតំបន់នេះ កំពុងតែចាប់ផ្តើមបាញ់ប្លោងគ្រាប់ជាថ្មីទៀតហើយ។
យោងតាមសក្ខីកម្មពីប្រជាជន គឺសំឡេងគ្រាប់បាញ់ចេញពីកាណុង និងសំឡេងផ្ទុះនៅក្បែររោងចក្រអគ្គិសនីហ្សាប៉ូរីចា គឺមានរយៈពេលឃ្លាតគ្នា ខ្ទង់តែប្រមាណ ៣ ទៅ៥វិនាទីប៉ុណ្ណោះ។
ល្ងាចថ្ងៃសៅរ៍ អង្គភាពព័ត៌មាននៃកងទ័ពអ៊ុយក្រែន បានអះអាងថា គឺចោរឈ្លានពានរុស្ស៊ី បានចាប់ផ្តើមបាញ់គ្រាប់ ចេញពីភូមិមួយឈ្មោះ Vodiané សំដៅទៅស្ថានីយ៍នុយក្លេអ៊ែរហ្សាប៉ូរីចា ដែលស្ថិតនៅត្រើយខាងស្តាំងទន្លេ Dniepr ហើយដែលជាព្រំដែនបែងចែកតំបន់គ្រប់គ្រងដោយទ័ពរុស្ស៊ី និងតំបន់ស្ថិតក្នុងដៃរបស់អ៊ុយក្រែន។ ប្រភពដដែលនេះ អះអាងថា គ្រាប់មួយរបស់រុស្ស៊ីបានធ្លាក់ចំប្រព័ន្ធបូមទឹក ដែលធ្វើឲ្យខូចមួយផ្នែកធំ ដល់ប្រព័ន្ធការពារអគ្គិភ័យ របស់ស្ថានីយ៍នុយក្លេអ៊ែរ។ ជាងនេះទៀត កងទ័ពអ៊ុយក្រែនអះអាងថា កងទ័ពរុស្ស៊ីកំពុងតែត្រៀមផែនការរករឿង ដោយបន្លំប្រើទង់ជាតិរបស់អ៊ុយក្រែន។
ដោយឡែក ដូចសព្វមួយដង ភាគីរុស្ស៊ីបានចោទថាគឺកងទ័ពអ៊ុយក្រែនទេ ដែលជាអ្នកបានបាញ់ប្លោងគ្រាប់ ហើយបានធ្លាក់ទៅលើតំបន់ស្ថានីយ៍នុយក្លេអ៊ែរ។ មន្ត្រីចំណុះរុស្ស៊ីម្នាក់ឈ្មោះ Vladimir Rogov បានសរសេរលើ តេឡេក្រាមថា ជាថ្មីម្តងទៀត ទីក្រុង Energodar និងស្ថានីយ៍នុយក្លេអ៊ែរ ហ្សាប៉ូរីចា បានរងនូវការបាញ់ប្លោងពីសំណាក់កម្លាំងរបស់អ៊ុយក្រែន។
នៅក្នុងសារវីដេអូប្រចាំថ្ងៃ លោកប្រធានាធិបតីអ៊ុយក្រែន បានថ្កោលទោសភាគីរុស្ស៊ី ថាបានយកស្ថានីយនុយក្លេអ៊ែរហ្សាប៉ូរីចា ជាចំណាប់ខ្មាំង។ លោកបានលើកឡើងថាកងទ័ពរុស្ស៊ី យកស្ថានីយ៍នេះជាខែលបាំង ដើម្បីបាញ់ប្លោងគ្រាប់មកលើក្រុង Nikopol និង Marganets។
គួររំលឹកថា នេះមិនមែនជាលើកទី១ទេ ដែលភាគីទាំង២បានចោទទម្លាក់កំហុសដាក់គ្នា។ មានការព្រួយបារម្ភខ្លាំងណាស់ អំពីគ្រោះថ្នាក់នុយក្លេអ៊ែរ ដែលអាចបង្កវិនាសកម្មដ៏ធំធេង ប្រសិនបើរ៉េអាក់ទ័រនុយក្លេអ៊ែរ នៃស្ថានីយ៍ដ៏ធំជាងគេបំផុតនៅអឺរ៉ុបនេះ ត្រូវផ្ទុះខូចខាត។ កាលពីថ្ងៃទី៥សីហា គ្រាប់ផ្ទុះបានធ្វើឲ្យខូចមួយផ្នែកនៃស្ថានីយ៍ និងបានធ្វើឲ្យរ៉េអាក់ទ័រលេខ៣ ត្រូវបានឈប់ដំណើរការ។ ទាំងភាគីអ៊ុយក្រែន និងសហភាពភាពអឺរ៉ុប បានអំពាវនាវ ឲ្យរៀបចំចាត់តំបន់ជុំវិញស្ថានីយហ្សាប៉ូរីចានេះ ជាតំបន់គ្មានអាវុធ ហើយកងទ័ពរុស្ស៊ីត្រូវតែដកថយពីតំបន់ក្រុង Energodar៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ