អ៊ុយក្រែនខកចិត្តនឹងទស្សនកិច្ចរបស់AIEA នៅមជ្ឈមណ្ឌលហ្សាប៉ូរីចា តែរុស្ស៊ីអបអរ
ចុះផ្សាយនៅថ្ងៃ៖
ស្តាប់ - ០៦:២៤
ក្រុមអ្នកជំនាញរបស់ទីភ្នាក់ងារថាមពលបរមាណូអន្តរជាតិAIEA បានទៅដល់មជ្ឈមណ្ឌលនុយក្លេអ៊ែរ ហ្សាប៉ូរីចា នៅរសៀលថ្ងៃព្រហស្បតិ៍ ទី ១ កញ្ញា ២០២២ ដើម្បីត្រួតពិនិត្យស្ថានភាពសន្តិសុខនុយក្លេអ៊ែរ។ ពេលត្រលប់មកដល់ក្រុងកៀវវិញ នាយកទីភ្នាក់ងារ លោក Rafael Grossi បានអះអាង មជ្ឈមណ្ឌលនុយក្លេអ៊ែរបានរងការរំលោភបំពាន ជាច្រើនលើកច្រើនសា និងបានប្រកាសថា អ្នកជំនាញមួយក្រុម បន្តធ្វើការនៅទីនោះរហូតដល់ថ្ងៃអាទិត្យ ឬដល់ថ្ងៃចន្ទទី ៥កញ្ញា។
ទោះបីជាមានឧបសគ្គរារាំងច្រើនក៏ដោយ ក៏នៅទីបំផុត ក្រុមអ្នកជំនាញរបស់ទីភ្នាក់ងារថាមពលបរមាណូអន្តរជាតិ ហៅកាត់ថា AIEA បានធ្វើដំណើរទៅដល់មជ្ឈមណ្ឌលហ្សាប៉ូរីចា នៅរសៀលថ្ងៃព្រហស្បតិ៍ ទី ១ កញ្ញា ម្សិលមិញ ដើម្បីពិនិត្យស្ថានភាពសន្តិសុខនុយក្លេអ៊ែរ។
បេសកកម្មត្រួតពិនិត្យរបស់AIEA
ក្នុងក្របខ័ណ្ឌនៃបេសកកម្មដ៏ត្រឹមត្រូវ ល្អឥតខ្ចោះ ក្រុមអ្នកជំនាញត្រូវទៅពិនិត្យគ្រប់ផ្នែកនៃមជ្ឈមណ្ឌលនុយក្លេអ៊ែរទាំងមូល រាប់ទាំងម៉ាស៊ីនប្រតិករនុយក្លេអ៊ែរ កន្លែងស្តុកសំណល់វិទ្យុសកម្ម កន្លែងស្តុកគ្រឿងចំហេះ ប្រព័ន្ធសង្គ្រោះបន្ទាន់ និងគ្រប់តំបន់ដែលអាចមានពាក់ព័ន្ធនឹងសំណល់វិទ្យុសកម្ម។ បន្ទាប់មកទៀត និងកាន់តែប្រសើរមែនទែន ក្រុមប្រតិភូអាចទៅជួបជជែកជាមួយអ្នកធ្វើការនៅក្នុងមជ្ឈមណ្ឌល ដែលជាជនជាតិអ៊ុយក្រែន ដើម្បីបានដឹងអំពីលក្ខខណ្ឌការងាររបស់ពួកគេ។
មជ្ឈមណ្ឌលហ្សាប៉ូរីចា បានធ្លាក់ក្នុងកណ្តាប់ដៃរុស្ស៊ីតាំងពីថ្ងៃទី ៤ខែមីនាមក ប៉ុន្តែអ្នកគ្រប់គ្រងមើលដំណើរការរោងចក្រ គឺជាបុគ្គលិកអ៊ុយក្រែនទេ។
ហើយជាចុងក្រោយគឺ ទៅត្រួតពិនិត្យការខូចខាតដែលបង្កឡើងដោយការផ្លោងផ្តក់គ្រាប់មកលើមជ្ឈមណ្ឌលនុយក្លេអ៊ែរ នារយៈពេលប៉ុន្មានសប្តាហ៍ចុងក្រោយនេះ មានអាទិ៍ការទៅមើលស្ថានភាពបណ្តាញអគ្គីសនី ដែលរងអគ្គីភ័យខូចអស់មួយភាគកាលពីប៉ុន្មានថ្ងៃមុន និងការដាក់ឱ្យដំណើរការឡើងវិញ នូវប្រព័ន្ធផ្ទេរទិន្នន័យជាស្វ័យប្រវត្តិ ទៅឱ្យភ្នាក់ងារAIEA ដើម្បីធានាសុវត្ថិភាពនុយក្លេអ៊ែរ ថាពិតជាគ្មានជាតិវិទ្យុសកម្មសាយភាយក្នុងបរិយាកាស។
ប៉ុន្តែAIEA មានអំណាចត្រឹមផ្តល់អនុសាសន៍ប៉ុណ្ណោះ ឯការសម្រេចធ្វើគឺស្ថិតនៅលើដៃរុស្ស៊ី ដែលជាអ្នកគ្រប់គ្រងតំបន់។
មជ្ឈមណ្ឌលនុយក្លេអ៊ែរ រងការរំលោភបំពានច្រើនលើកច្រើនសា
ក្នុងប្រវត្តិ៦៥ឆ្នាំ របស់ទីភ្នាក់ងារថាមពលបរមាណូអន្តរជាតិ នេះជាលើកទីមួយហើយដែលក្រុមអ្នកជំនាញ ត្រូវធ្វើដំណើរឆ្លងកាត់សមរភូមិប្រយុទ្ធ មុនអាចផ្តើមបេសកកម្មរបស់ខ្លួន។ បន្ទាប់ពីឆ្លងកាត់ឧបសគ្គរហូតដល់នាទីចុងក្រោយមក ដូចជាការបាញ់ផ្លោងលើតំបន់ជុំវិញមជ្ឈមណ្ឌល លើផ្លូវដែលក្រុមប្រតិភូត្រូវឆ្លងកាត់ ក្រុមអ្នកជំនាញAIEA បានចុះទៅដល់ និងធ្វើការត្រួតពិនិត្យមជ្ឈមណ្ឌលនុយក្លេអ៊ែរ រយៈពេល៤-៥ម៉ោង។
លោក រ៉ាហ្វាអែល ហ្កូស៊ី នាយកទីភ្នាក់ងារថាមពលបរមាណូ ដែលជាអ្នកដឹកនាំបេសកកម្មនៅហ្សាប៉ូរីចាផ្ទាល់ បានប្រកាសថា បានឃើញនូវអ្វីដែលចង់ឃើញ (រ៉េអាក់ទ័រ ប្រព័ន្ធសង្គ្រោះបន្ទាន់ និងប៉ុស្តិ៍បញ្ជាការ ព្រមទាំងកន្លែងផ្សេងទៀត) និងបានជួបបុគ្គលិកនិងក្រុមការងារអ៊ុយក្រែន ដែលទទួលបន្ទុកគ្រប់គ្រងដំណើរការរបស់មជ្ឈមណ្ឌលនុយក្លេអ៊ែរ ប្រកបដោយឆន្ទៈនិងវិជ្ជាជីវៈ ទោះក្នុងកាលៈទេសៈដ៏លំបាកយ៉ាងណាក៏ដោយ។ នេះគ្រាន់តែជាការងារផ្តើមតែប៉ុណ្ណោះ អធិការ៥រូប ក្នុងចំណោមប្រតិភូទាំង១៤រូប នឹងបន្តការងារត្រួតពិនិត្យ និងវាយតម្លៃស្ថានភាពសន្តិសុខរបស់មជ្ឈមណ្ឌលនុយក្លេអ៊ែរ រហូតដល់ថ្ងៃអាទិត្យ ឬថ្ងៃចន្ទទី ៥ កញ្ញាផង។ ហើយផុតពីថ្ងៃនោះទៅ AIEA នឹងបន្តរក្សាវត្តមាន ជាប់រហូតនៅមជ្ឈមណ្ឌលនេះទៀត។ នេះបើតាមប្រសាសន៍របស់លោក ហ្កូស៊ី ដដែល តែមិនបានលម្អិតថាតើរក្សាវត្តមានបែបណា និងយ៉ាងដូចម្តេចទេ។
ពេលមកត្រលប់មកក្រុងកៀវវិញ ទើបលោកនាយកទីភ្នាក់ងារបានផ្តល់ព័ត៌មានទាក់ទងនឹងស្ថានភាពសន្តិសុខ ដោយបរិហារថាមានការរំលោភបំពាន ប៉ះពាល់ដោយផ្ទាល់លើមជ្ឈមណ្ឌលនុយក្លេអ៊ែរជាច្រើនលើកច្រើនសា។ គឺជាអ្វីដែលមិនត្រូវឱ្យកើតមានជាថ្មីទេ។
ក្រុងកៀវ ខកចិត្ត
ដំណើរទៅដល់មជ្ឈមណ្ឌលនុយក្លេអ៊ែររបស់ប្រតិភូAIEA វិជ្ជមានណាស់សម្រាប់រុស្ស៊ី តែលោកប្រធានាធិបតីអ៊ុយក្រែន ហ្សេឡេនស្គី មិនពេញចិត្តនឹងប្រសាសន៍បែបប្រុងប្រយ័ត្នជ្រុលរបស់លោក រ៉ាហ្វាអែល ហ្កូស៊ីទេ។ នៅក្នុងសុន្ទរកថា ប្រចាំពេលល្ងាច លោក ហ្សេឡេនស្គី បានឆ្លៀតបន្ទោសលោក ហ្កូស៊ី ថាលាក់បាំងមិននិយាយជាសាធារណៈអំពីបញ្ហារំសាយអាវុធនៅមជ្ឈមណ្ឌលនុយក្លេអ៊ែរហ្សាប៉ូរីចា ដូចដែលអ្នកទាំងពីរបានព្រមព្រៀងគ្នា ក្នុងពេលជួបពិភាក្សានៅទីក្រុងកៀវ កាលពីថ្ងៃអង្គារ។ ក្រុងកៀវបានចោទមូស្គូថាបានពង្រាយទ័ពជាច្រើនរយនាក់ ពង្រាយកាំភ្លើងធំ និងស្តុកគ្រាប់នៅមជ្ឈមណ្ឌលនុយក្លេអ៊ែរហ្សាប៉ូរីចានេះ។
នៅល្ងាចថ្ងៃព្រហស្បតិ៍ម្សិលមិញដដែលនេះ លោក Mykhailo Podolyak ទីប្រឹក្សាដ៏ជំនិតម្នាក់របស់ប្រធានាធិបតីអ៊ុយក្រែន បានធ្លាយមាត់នៅក្នុងបទសម្ភាសន៍មួយ ប្រកាសថាសម្រាប់ក្រសែភ្នែកលោក ស្ថាប័នអន្តរជាតិនិងបេសកកម្មអន្តរការី គ្មានប្រសិទ្ធភាពសោះ គ្មានបានការ គ្មានវិជ្ជាជីវៈទេ និងមិនដែលត្រៀមលក្ខណៈធ្វើការក្នុងលក្ខខណ្ឌអាក្រក់ខ្លាំងសោះ។ បើតាមទីប្រឹក្សារូបនេះដដែល ការរិះគន់មិនមែនសំដៅលើតែភ្នាក់ងារថាមពលបរមាណូអន្តរជាតិទេ គឺរាប់ទាំងអង្គការសហប្រជាជាតិ Amnesty International និងកាកបាទក្រហមផង។ អង្គការកាកបាទក្រហម ដែលទើបបានអំពាវនាវ នៅថ្ងៃម្សិលមិញ ឱ្យបញ្ឈប់រាល់គ្រប់សកម្មភាពយោធានៅជុំវិញមជ្ឈមណ្ឌលនុយក្លេអ៊ែរ ដោយពន្យល់ថា ឱ្យគិតខុសតែបន្តិច ច្បាស់ជាមានមហន្តរាយនុយក្លេអ៊ែរផ្ទុះឡើងភ្លាម ហើយមានធ្លាយនុយក្លេអ៊ែរមែន នោះគេច្បាស់ជាជួបការលំបាក ឬ មិនអាច ផ្តល់ជំនួយមនុស្សធម៌បានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ