អ៊ុយក្រែនអះអាងថា ស្ថានីយ៍នុយក្លេអ៊ែរហ្សាប៉ូរីចាដំណើរការឡើងវិញ តែប្រឈមនឹងការបែកធ្លាយធាតុវិទ្យុសកម្ម
រោងចក្រអគ្គិសនីនុយក្លេអ៊ែរ ហ្សាប៉ូរីចា ដែលបានរងនូវការបាញ់ប្លោងផ្ទួនប៉ុន្មានថ្ងៃមកនេះ បានចាប់ផ្តើមដំណើរការឡើងវិញហើយ កាលពីថ្ងៃសៅរ៍ម្សិលមិញ។ តែយ៉ាងណា ក្រុមហ៊ុនអគ្គិសនីអ៊ុយក្រែន បានអះអាងថា វាអាចមានហានិភ័យខ្ពស់ណាស់ ព្រោះស្ថានីយ៍នេះអាចប្រឈមនឹងភ្លើងឆេះ ព្រមទាំងការបែកធ្លាយ ធាតុវិទ្យុសកម្មថែមទៀតផង។
ចុះផ្សាយនៅថ្ងៃ៖
ស្តាប់ - ០២:២៤
រសៀលថ្ងៃសោរ៍ទី២៧សីហា នៅលើបណ្តាញតេឡាក្រាម ក្រុមអគ្គិសនីអ៊ុយក្រែន Energoatom បានអះអាងថាស្ថានីយ៍អគ្គិសនីនុយក្លេអ៊ែរ ហ្សាប៉ូរីចា បានរងនូវការបាញ់ប្លោងយ៉ាងដំណំបន្ថែមទៀត ពីសំណាក់កងទ័ពរុស្ស៊ី ក្នុងរយៈពេល២៤ម៉ោងចុងក្រោយ។ មហន្តរាយដែលអាចបង្កឡើង ដោយករណីបាញ់ប្លោងគ្រាប់ផ្ទួនៗនេះ គឺវាអាចធ្វើឲ្យបែកធ្លាយសារធាតុអ៊ីដ្រូហ្សែន និង ធាតុវិទ្យុសកម្មផ្សេងទៀត។
ក្រុមហ៊ុនអ៊ុយក្រែន ដែលជាប្រតិបត្តិករគ្រប់គ្រងដំណើរការរោងចក្រហ្សាប៉ូរីចានេះ បានអះអាងថា ហានិភ័យនេះមានខ្ពស់ខ្លាំងណាស់។ រោងចក្រនេះ បានដើរឡើងវិញនៅព្រឹកថ្ងៃសៅរ៍មែន តែអាចមិនគោរពដល់ស្តង់ដារសន្តិសុខ សុវត្ថិភាព ទាក់ទិននឹងគ្រោះអគ្គីភ័យ ព្រមទាំងការបែកធ្លាយធាតុវិទ្យុសកម្មទេ។
ដោយឡែក ពីភាគីរុស្ស៊ីវិញ គេបានអះអាងថា កងទ័ពអ៊ុយក្រែនបានបាញ់គ្រាប់កាំភ្លើងត្បាល់ ចំនួន១៧គ្រាប់ សំដៅមកតំបន់រោងចក្រអគ្គិសនីហ្សាប៉ូរីចា ក្នុងរវាង២៤ម៉ោងចុងក្រោយ។ គ្រាប់ចំនួន៤គ្រាប់ បានធ្លាក់លើដំបូលស្ថានីយ៍ ខណៈគ្រាប់ផ្សេងទៀត បានធ្លាក់នៅក្បែរតំបន់ស្តុកកាកសំណល់នុយក្លេអ៊ែរប្រើរួច និងទីតាំងស្តុកសារធាតុថ្មីដែលគេទុកយកទៅដុតផលិតចរន្តអគ្គិសនី។
យ៉ាងណាក៏ដោយ ទីភ្នាក់ងារព័ត៌មានបារាំង AFP បានទទួលស្គាល់ថា ខ្លួនមិនអាចចូលទៅកៀកនឹងទីតាំង ហើយក៏មិនអាចស្វែងរកប្រភពឯករាជ្យណាមួយ មកបញ្ជាក់អំពីការចោទប្រកាន់ របស់ភាគីទាំងសងខាងដែរ។
គួរបញ្ជាក់ថា ប៉ុន្មានសប្តាហ៍កន្លងមកនេះ សុវត្ថិភាពនៅស្ថានីយ៍អគ្គិសនីនុយក្លេអ៊ែរ ហ្សាប៉ូរីចា បានបង្កឲ្យមានការព្រួយបារម្ភជាខ្លាំង ពីសំណាក់សហគមន៍អន្តរជាតិ។ ស្ថានីយ៍នេះ ស្ថិតនៅជាយក្រុង Energodar ដែលត្រូវបានកងទ័ពរុស្ស៊ី វាយដណ្តើមកាន់កាប់តាំងតែពីខែមីនាមក។ ដោយសារតែការបាញ់ប្លោងគ្រាប់ផ្ទួនៗទៅលើស្ថានីយ៍នេះ អ្នកជំនាញបានថ្លែងការបារម្ភអំពីគ្រោះថ្នាក់នុយក្លេអ៊ែរទ្រង់ទ្រាយធំ ព្រោះស្ថានីយ៍នេះជាស្ថានីយ៍នុយក្លេអ៊ែរធំជាងគេបង្អស់នៅអឺរ៉ុប។
កាលពីថ្ងៃសុក្រ ទី២៦សីហា លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានអំពាវនាវ ឲ្យស្វែងរកដំណោះស្រាយ បញ្ជូនអ្នកជំនាញនៃទីភ្នាក់ងារថាមពលនុយក្លេអ៊ែរអន្តរជាតិ ចុះទៅត្រួតពិនិត្យដល់ស្ថានីយ៍នេះ ឲ្យបានឆាប់ជាទីបំផុត។ លោកបានអះអាងថា ពីមួយថ្ងៃទៅមួយថ្ងៃ ភាគីរុស្ស៊ីបានរុញស្ថានការណ៍នេះ ឲ្យកាន់តែអាក្រក់ ធ្ងន់ធ្ងរទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ