អ៊ុយក្រែន ៖ ភ្នាក់ងារថាមពលបរមាណូអន្តរជាតិចេញទៅមជ្ឈមណ្ឌលនុយក្លេអ៊ែរហ្សាប៉ូរីចា
នាយកទីភ្នាក់ងារថាមពលបរមាណូអន្តរជាតិហៅកាត់ថាអាអ៊ីអឺអា AIEA បានជូនដំណឹងនៅព្រឹកថ្ងៃចន្ទទី ២៩ សីហា ២០២២នេះ ថាក្រុមការងាររបស់ភ្នាក់ងារ កំពុងធ្វើដំណើរឆ្ពោះទៅមជ្ឈមណ្ឌលនុយក្លេអ៊ែរអ៊ុយក្រែន ហ្សាប៉ូរីចា។ នារយៈពេលប៉ុន្មានសប្តាហ៍ចុងក្រោយមកនេះ រោងចក្រនុយក្លេអ៊ែរហ្សាប៉ូរីចា បានក្លាយជាផ្ទាំងស៊ីបនៃការវាយប្រហារ ដែលជាអាចជាគ្រោះហានិភ័យនាំឱ្យមានគ្រោះថ្នាក់នុយក្លេអ៊ែរយ៉ាងធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០២:០៤
ដឹកនាំលោកនាយក រ៉ាហ្វាអែល ហ្ក្រូស៊ី ផ្ទាល់តែម្តង ក្រុមការងាររបស់ទីភ្នាក់ងារថាមពលបរមាណូអន្តរជាតិកំពុងធ្វើដំណើរទៅ ហ្សាប៉ូរីចា ដើម្បីធានាការពារសន្តិសុខអ៊ុយក្រែន និងមជ្ឈមណ្ឌលនុយក្លេអ៊ែរដ៏ធំជាងគេនៅអឺរ៉ុប។ នេះជាសារទ្វីតរបស់លោក រ៉ាហ្វាអែល ហ្ក្រូស៊ី នាយកទីភ្នាក់ងារAIEA ដោយគូសបញ្ជាក់ថា បេសកកជនដែលមានគ្នាសរុបជាង១០នាក់ នឹងចុះទៅដល់ផ្ទាល់កន្លែង ក្នុងសប្តាហ៍នេះយ៉ាងយូរ។
នាយកទីភ្នាក់ងារ AIEA បានទាមទារចុះទៅត្រួតពិនិត្យរោងចក្រនុយក្លេអ៊ែរហ្សាប៉ូរីចា តាំងពីជាច្រើនសប្តាហ៍មកហើយ ដោយព្រមានអំពីហានិភ័យជាក់ស្តែងនៃគ្រោះមហន្តរាយនុយក្លេអ៊ែរ។
ប៉ុន្តែដោយហេតុតែមានសកម្មភាពយោធារុស្ស៊ី នេះជាបេសកកម្មដ៏លំបាកបំផុតរបស់ទីភ្នាក់ងារ។ នេះបើតាមសំដីរបស់រដ្ឋមន្ត្រីក្រសួងការបរទេសអ៊ុយក្រែន។ ព្រួយបារម្ភខ្លាំងខ្លាចមានមហន្តរាយនុយក្លេអ៊ែរ ក្រុមប្រទេសលូតលាស់ខ្លាំងជាងគេ G៧ បានចេញសេចក្តីថ្លែងការណ៍ នៅថ្ងៃចន្ទនេះដែរ ឱ្យមានការធានាសេរីភាព និងសុវត្ថិភាពជូនបេសកកជនអាអ៊ីអឺអា ក្នុងនៅពេលបំពេញការងារនៅក្នុងមជ្ឈមណ្ឌលហ្សាប៉ូរីចា។
នៅរវាងពីថ្ងៃព្រហស្បតិ៍និងថ្ងៃសុក្រ មជ្ឈមណ្ឌលនិងម៉ាស៊ីនប្រតិករទាំង៦ បានកាត់ផ្តាច់ទាំងស្រុង ដោយហេតុតែដាច់បណ្តាញអគ្គីសនី មុនអាចភ្ជាប់ឡើងវិញបាន។ ក្រោយពីបានព្រមានកាលពីថ្ងៃសៅរ៍អំពីគ្រោះរីកសាយភាពជាតិវិទ្យុសកម្មនិងអគ្គីភ័យនៅរោងចក្រនុយក្លេអ៊ែរនេះប្រសិនបើមានការវាយប្រហារគ្នាថ្មីទៀត នៅថ្ងៃចន្ទនេះក្រុមហ៊ុនអគ្គីសនីអ៊ុយក្រែន Energoatom បានអះអាងតាមបណ្តាញសង្គមថា មជ្ឈមណ្ឌលនុយក្លេអ៊ែរហ្សាប៉ូរីចា ដំណើរការទាំងរំលោភវិន័យសន្តិសុខខាងផ្នែកសាយភាយវិទ្យុសកម្មនិងអគ្គីភ័យ។
មានផ្តុំម៉ាស៊ីនប្រតិករចំនួន៦ ក្នុងចំណោមម៉ាស៊ីនប្រតិករនុយក្លេអ៊ែរសរុប១៥របស់អ៊ុយក្រែន មជ្ឈមណ្ឌលនុយក្លេអ៊ែរហ្សាប៉ូរីចា បានធ្លាក់ក្នុងកណ្តាប់ដៃកងទ័ពរុស្ស៊ីតាំងពីដើមខែមីនាមក ពោលគឺក្រោយពីរុស្ស៊ីបានបើកប្រតិបត្តិការចូលឈ្លានពានអ៊ុយក្រែន បានប៉ុន្មានថ្ងៃ។ ហើយ រោងចក្រមានទីតាំងស្ថិតនៅជិតសមរភូមិប្រយុទ្ធភាគខាងត្បូងរវាងកងកម្លាំងរុស្ស៊ីនិងអ៊ុយក្រែនបំផុត។ កៀវនិងមូស្គូ បានចោទប្រកាន់គ្នាទៅវិញទៅមក ថាបានបាញ់ផ្លោងនិងទម្លាក់គ្រាប់បែក ដែលអាចនឹងប៉ះពាល់ដល់មជ្ឈមណ្ឌលនុយក្លេអ៊ែរនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ