អឺរ៉ុបចង់កំណត់តម្លៃថាមពលនាំចូលពីរុស្ស៊ី តើរុស្ស៊ី ឬអឺរ៉ុបដែលនឹងពិបាកដកដង្ហើមជាងគេ?
ចុះផ្សាយនៅថ្ងៃ៖
ស្តាប់ - ០៧:២៨
នៅក្នុងសង្រ្គាមរុស្ស៊ីឈ្លានពានអ៊ុយក្រែនដែលបានឈានចូលជិត ៦ខែនាថ្ងៃព្រហស្បតិ៍ ទី៨ កញ្ញានេះ សហភាពអឺរ៉ុបហាក់មិនបានបន្ធូរដៃដើម្បីសង្កត់ ក រុស្ស៊ីទេ។ អ្វីដែលសហភាពអឺរ៉ុបកំពុងគិតគូរពេលនេះ គឺកំណត់តម្លៃថាមពល ពិសេសតម្លៃប្រេង និងឧស្ម័នដែលអឺរ៉ុបទិញពីរុស្ស៊ី។ តែប្រធានាធិបតីរុស្ស៊ីលោកពូទីនបានព្រមានរួចហើយថា បើសហភាពអឺរ៉ុបហ៊ានចាត់វិធានការមួយនេះ លោកនឹងបិទរ៉ូប៊ីណេប្រេង និងឧស្ម័ន រួមទាំងថាមពលផ្សេងទៀតដែលរុស្ស៊ីបានលក់ទៅឲ្យសហភាពអឺរ៉ុប។
គម្រោងកំណត់តម្លៃថាមពលនាំចូលពីរុស្ស៊ីដែលសហភាពអឺរ៉ុបកំពុងគិតគូរពេលនេះ គឺផ្តោតសំខាន់លើឧស្ម័ន។ មានកម្មវត្ថុសំខាន់ចំនួនពីរដែលសហភាពអឺរ៉ុបកំពុងសម្លឹងឃើញពីការកំណត់តម្លៃឧស្ម័ន។ កម្មវត្ថុទី១ គឺទប់កុំឲ្យតម្លៃឧស្ម័ន និងតម្លៃភ្លើងអគ្គិសនីហក់ឡើងកាន់តែខ្លាំងថែមទៀតនៅអឺរ៉ុបដែលកំពុងប៉ះពាល់ខ្លាំងដល់ពលរដ្ឋ រួមទាំងក្រុមហ៊ុន រោងចក្រសហគ្រាស។ តាមរយៈវិធានការមួយនេះ អឺរ៉ុបចង់ជួយកាត់បន្ថយការចំណាយរបស់ពលរដ្ឋទៅលើប្រេង និងឧស្ម័ន រួមទាំងជួយទ្រទ្រង់លើសកម្មភាពរបស់ក្រុមហ៊ុន រោងចក្រ សហគ្រាសដែលពឹងខ្លាំងលើឧស្ម័ន។
ចំណែកកម្មវត្ថុសំខាន់ទី២ គឺសំដៅកាត់បន្ថយប្រាក់ចំណូលរបស់រុស្ស៊ីដែលបានពីការលក់ឧស្ម័នឲ្យអឺរ៉ុប មានន័យថា រុស្ស៊ីនឹងទទួលបានប្រាក់ពីការលក់ឧស្ម័នឲ្យសហភាពអឺរ៉ុបតិចជាងមុន។ គួរបញ្ជាក់ថា នៅមុនសង្រ្គាមរុស្ស៊ីឈ្លានពានអ៊ុយក្រែន សហភាពអឺរ៉ុបបាននាំចូលឧស្ម័នរុស្ស៊ីរហូតដល់ទៅ ៤០%។ តែសព្វថ្ងៃនេះ ឧស្ម័នរុស្ស៊ីដែលអឺរ៉ុបបាននាំចូលនៅសល់ប្រមាណតែ ៩% ប៉ុណ្ណោះ។ ក៏ប៉ុន្តែ ដោយសារតែតម្លៃឧស្ម័នបានឡើងថ្លៃខ្លាំងពេក ទឹកប្រាក់ដែលរុស្ស៊ីទទួលបានពីការលក់ឧស្ម័នឲ្យអឺរ៉ុបនៅតែមានច្រើន នោះបើទោះបីជារុស្ស៊ីលក់បានក្នុងបរិមាណតិចជាងមុនក៏ដោយ។
ដូច្នេះ ផ្ទាំងស៊ីបថ្មីមួយទៀតរបស់សហភាពអឺរ៉ុបនៅក្នុងទណ្ឌកម្មសង្កត់ ក រុស្ស៊ី គឺកំណត់តម្លៃឧស្ម័នរុស្ស៊ីនៅក្នុងកម្រិតណាមួយដើម្បីទម្លាក់ចំណូលរបស់រុស្ស៊ី និងធ្វើឲ្យរុស្ស៊ីខ្សត់លុយក្នុងការបន្តធ្វើសង្រ្គាមនៅអ៊ុយក្រែន។ តែប្រធានាធិបតីរុស្ស៊ីលោកពូទីនបានព្រមានរួចហើយថា បើអឺរ៉ុបហ៊ានចាត់វិធានការមួយនេះ លោកនឹងបិទរ៉ូប៊ីណេថាមពលទាំងស្រុង មិនថាប្រេង ឬឧស្ម័ន។
អឺរ៉ុបគ្រោងឈប់ទិញឧស្ម័នរុស្ស៊ីទាំងស្រុងនៅរង្វង់ឆ្នាំ ២០២៣?
អស់ជាច្រើនឆ្នាំកន្លងមកដែលអឺរ៉ុបបានទិញឧស្ម័នពីរុស្ស៊ី និងដែលរុស្ស៊ីបានលក់ឧស្ម័នឲ្យអឺរ៉ុប។ ដូច្នេះ ការឈប់ទិញ ឬការឈប់លក់ទាំងស្រុងមិនមែនជារឿងងាយស្រួលសម្រាប់អឺរ៉ុប និងសម្រាប់រុស្ស៊ី។ មួយវិញទៀត ឧស្ម័នជាថាមពលមួយមិនដូចថាមពលផ្សេងដែលងាយស្រួលក្នុងការដឹកជញ្ជូន ព្រោះវាជាវត្ថុខ្យល់។ ការដឹកជញ្ជូនឧស្ម័នមានពីររបៀប គឺបង្ហូរតាមបំពង់ និងដឹកតាមកប៉ាល់។ តែដើម្បីអាចដឹកតាមកប៉ាល់បាន គេត្រូវបំប្លែងទៅជាវត្ថុរាវជាមុន ហើយត្រូវបំប្លែងជាឧស្ម័នវិញមុននឹងយកទៅប្រើ។ នេះជានិតិវិធីមួយស្មុគស្មាញដែលត្រូវចំណាយពេលយូរ និងចំណាយលុយច្រើន។
ការទិញ លក់រវាងអឺរ៉ុប និងរុស្ស៊ីដែលនៅក្បែរគ្នាជារឿងងាយស្រួលដោយធ្វើឡើងតាមបំពង់បង្ហូរលើដី ឬតាមបាតសមុទ្រ។ ដូច្នេះបើអឺរ៉ុបឈប់ទិញឧស្ម័នរុស្ស៊ីទាំងស្រុង ឬរុស្ស៊ីឈប់លក់ឲ្យអឺរ៉ុបទាំងស្រុង អឺរ៉ុបត្រូវទិញពីអ្នកផ្សេង ហើយរុស្ស៊ីត្រូវលក់ឲ្យអ្នកផ្សេង។ តែចំណោតនៅត្រង់ថា អឺរ៉ុបពិបាករកឧស្ម័នពីកន្លែងផ្សេងដើម្បីជំនួសឧស្ម័នរុស្ស៊ី ហើយរុស្ស៊ីក៏ពិបាករកម៉ូយផ្សេងដើម្បីជំនួសម៉ូយអឺរ៉ុប។ អ៊ីចឹងហើយបានជាជំនួញឧស្ម័នរវាងអឺរ៉ុប និងរុស្ស៊ីកំពុងបន្តមាន ទោះមានតិចជាងមុនក៏ដោយ។ អឺរ៉ុបដឹងថា ទណ្ឌកម្មប្រឆាំងរុស្ស៊ីក្នុងវិស័យថាមពលធ្វើឲ្យរុស្ស៊ីឈឺចុកចាប់ខ្លាំង ហើយរុស្ស៊ីក៏ដឹងដែរថា អឺរ៉ុបឈឺចាប់ខ្លាំងដូចគ្នា បើគ្មានឧស្ម័នរុស្ស៊ី។
ទោះជាយ៉ាងនេះក្តី សេណារីយ៉ូឈានទៅគ្មានឧស្ម័នរុស្ស៊ីទាំងស្រុងរបស់អឺរ៉ុបប្រហែលជារឿងចៀសមិនរួច ព្រោះតាមគម្រោង អឺរ៉ុបគ្រោងឈប់ពឹងលើឧស្ម័នរុស្ស៊ីបន្តិចម្តងៗពីពេលនេះទៅដំណាច់ឆ្នាំ ២០២៣។ គួររម្លឹកថា មានថាមពលចំនួន ៣ប្រភេទដែលអឺរ៉ុបបានទិញពីរុស្ស៊ី គឺឧស្ម័ន ប្រេង និងធ្យូងថ្ម។ ធ្យូងថ្មត្រូវបានអឺរ៉ុបឈប់ទិញតាំងពីខែសីហា ហើយប្រេងត្រូវបានអឺរ៉ុបគ្រោងឈប់ទិញប្រេងទាំងស្រុងនៅដំណាច់ឆ្នាំ ២០២២ នេះ។ ដូច្នេះ គម្រោងកំណត់តម្លៃឧស្ម័នរុស្ស៊ីរបស់អឺរ៉ុបពេលនេះជាវិធានការបន្ទាប់ឈានទៅឈប់ពឹងលើថាមពលរុស្ស៊ីទាំងស្រុងតែម្តង។
អឺរ៉ុបកំពុងថប់ដង្ហើមខ្លួនឯងដោយការដាក់ទណ្ឌកម្មប្រឆាំងរុស្ស៊ី?
អ្វីដែលច្បាស់ អឺរ៉ុបកំពុងជួបវិបត្តិថាមពលដែលមានទាំងការខ្វះភ្លើងអគ្គិសនី និងការខ្វះឧស្ម័ន។ រឿងប្រេងប្រហែលជាមិនសូវចោទប៉ុន្មានទេ ព្រោះអឺរ៉ុបអាចរកទិញពីអ្នកផ្សេងបាន។ តែចំណោតខ្លាំងនៅក្នុងរឿងឧស្ម័នដែលអឺរ៉ុបបានពឹងខ្លាំងលើរុស្ស៊ី។ នៅរដូវរងារខាងមុខ តម្រូវការថាមពលនឹងកើនឡើងដោយសារតែពលរដ្ឋត្រូវការដើម្បីប្រើម៉ាស៊ីនកម្តៅនៅក្នុងផ្ទះ។ នេះដោយមិនគិតពីតម្រូវការថាមពលរបស់រោងចក្រ សហគ្រាសនៅក្នុងសង្វាក់ផលិកម្មទេ។ សម្រាប់រដូវរងារខាងមុខ អឺរ៉ុប និងប្រទេសអឺរ៉ុបមិនសូវចំណោតក្នុងរឿងខ្វះឧស្ម័នប៉ុន្មានទេ ព្រោះអឺរ៉ុបបានរហ័សរហួនទិញឧស្ម័នស្តុកបានច្រើននៅមុនពេលកំណត់។
ជាមួយនឹងការបន្តទិញឧស្ម័នពីរុស្ស៊ី និងពីប្រទេសផ្សេង ការស្តុកឧស្ម័នរបស់អឺរ៉ុបពេលនេះមានកម្រិតជាង ៨០% ដែលសឹងគ្រប់គ្រាន់សម្រាប់ទប់ទល់នឹងរដូវរងារខាងមុខ។ ទន្ទឹមគ្នានេះ និងដើម្បីបំពេញបន្ថែមលើការខ្វះថាមពល អឺរ៉ុប និងប្រទេសអឺរ៉ុបបាន និងកំពុងអំពាវនាវឲ្យប្រើថាមពលដោយសន្សំសំចៃ។ ជាក់ស្តែងក្នុងប្រទេសបារាំង ប្រធានាធិបតីលោកម៉ាក្រុងបានកំណត់កម្មវត្ថុសន្សំសំចៃថាមពលចំនួន ១០%។ នៅក្នុងន័យនេះ លោកម៉ាក្រុងបានអំពាវនាវឲ្យមានការចូលរួមពីគ្រប់ស្ថាប័ន ក្រុមហ៊ុន និងរោងចក្រ សហគ្រាសទាំងអស់ មិនថារដ្ឋ ឬឯកជន ពិសេសគឺពលរដ្ឋបារាំងគ្រប់រូប។
លោកម៉ាក្រុងបានអះអាងដោយព្រមានថា ការកាត់ភ្លើងរយៈពេលខ្លី ឬវែងនៅតាមតំបន់មួយចំនួន ឬការដាក់វេនចែកចាយភ្លើងរវាងតំបន់មួយ និងតំបន់មួយនៅរដូវរងារខាងមុខជារឿងមិនអាចចៀសរួច ប្រសិនបើបារាំងគ្មានភ្លើងអគ្គិសនីប្រើគ្រប់គ្រាន់។ គេមិនដឹងថា តើទណ្ឌកម្មអឺរ៉ុបប្រឆាំងរុស្ស៊ីក្នុងឧស្ម័ននេះនឹងធ្វើឲ្យអ្នកណាថប់ដង្ហើមជាងអ្នកណាទេ។ អ្វីដែលគេកំពុងមើលឃើញ អឺរ៉ុបហាក់កំពុងរងផលវិបាកពីទណ្ឌកម្មដែលបានដាក់លើរុស្ស៊ីក្នុងវិស័យថាមពល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ