៦ខែក្រោយសង្គ្រាមអ៊ុយក្រែន រុស្ស៊ីរកចំណូលបាន១៥៨ពាន់លានដុល្លារ ពីការលក់ប្រេង-ឧស្ម័ន-ធ្យូងថ្ម
ក្នុងរវាង៦ខែចុងក្រោយ គិតចាប់ពីពេលដែលរុស្ស៊ីបានលើកទ័ពទៅធ្វើសង្គ្រាមឈ្លានពានអ៊ុយក្រែន គឺរុស្ស៊ីបានរកចំណូលបានចំនួន ១៥៨ពាន់លានដុល្លារ ពីការលក់ទំនិញវត្ថុធាតុដើមថាមពលហ្វូស៊ីល ដែលមានដូចជាប្រេង ឧស្ម័ន និងធ្យូងថ្ម។ នេះគឺជាការអះអាងលើកឡើង ក្នុងរបាយការណ៍មួយ របស់មជ្ឈមណ្ឌលស្រាវជ្រាវផ្នែកថាមពលនិងខ្យល់បរិសុទ្ធ ដែលមានទីតាំងនៅប្រទេសហ្វាំងឡង់ដ៍។ យោងតាមរបាយការណ៍នេះ អ្នកដែលបន្តទិញទំនិញថាមពលពីរុស្ស៊ីច្រើនបំផុតក្នុងរវាង៦ខែនេះ គឺសហភាពអឺរ៉ុប បើទោះបីជាអឺរ៉ុបបានដាក់ទណ្ឌកម្មលើរុស្ស៊ីក៏ដោយ។
ចុះផ្សាយនៅថ្ងៃ៖
ស្តាប់ - ០២:៥០
មជ្ឈមណ្ឌលស្រាវជ្រាវ ផ្នែកថាមពល និងខ្យល់បរិសុទ្ធ (CREA) បានលើកឡើងថា ដោយសារតែតម្លៃថាមពលបានឡើងថ្លៃខ្លាំង មានន័យថា រុស្ស៊ីបានរកចំណូលបានយ៉ាងសន្ធឹក បើទោះបីជាទំហំនៃការនាំចេញ បានចុះថយក៏ដោយចុះ។ គិតចាប់ពីថ្ងៃទី២៤កុម្ភៈ ថ្ងៃប្រកាសធ្វើសង្គ្រាមនៅអ៊ុយក្រែន រុស្ស៊ីបានរកចំណូលបានសរុប ចំនួន១៥៨ពាន់លានដុល្លារ បានមកពីការលក់ប្រេង ឧស្ម័ន និងធ្យូងថ្ម។ ចំណូលនេះបានអនុញ្ញាតឲ្យរដ្ឋរុស្ស៊ី កើបប្រាក់ចំនួនយ៉ាងហោច ៤៣ពាន់លានដុល្លារ ចូលហោប៉ៅ ដើម្បីទុកចំណាយធ្វើសង្គ្រាមនៅអ៊ុយក្រែន។
របាយការណ៍របស់ CREA ស្តីពីប្រាក់ចំណូលរបស់រុស្ស៊ីក្នុងការនាំចេញទំនិញថាមពល
របាយការណ៍បានឲ្យដឹងថា ក្នុងចំណោមអ្នកដែលបានទិញទំនិញថាមពលរុស្ស៊ីច្រើនបំផុត ក្នុងរវាង៦ខែមកនេះ គឺសហភាពអឺរ៉ុប ក្នុងទំហំទឹកប្រាក់ចំនួនប្រមាណ៨៥ពាន់លានដុល្លារ។ បន្ទាប់មកទៀតគឺមានចិន តួកគី ឥណ្ឌា និងជប៉ុនជាដើម។ នៅរវាងពីខែកក្កដា ដល់ខែសីហា ទំហំនាំចេញប្រេង ឧស្ម័ន និងធ្យូងថ្មរបស់រុស្ស៊ី បានថយចុះចំនួន២៥%មែន តែបើក្រឡេកទៅមើលប្រាក់ចំណូលរបស់រុស្ស៊ីវិញ គឺបានកើនឡើងចំនួន៣០%។ ទំហំឧស្ម័ន ដែលរុស្ស៊ីនាំចេញ បានចុះថយដល់ទៅ៧០%ពិតមែន តែបើនិយាយពីចំណូលរកបានពីការលក់ឧស្ម័នវិញ គឺនៅនឹង។ ទាំងនេះ គឺដោយសារតែតម្លៃថាមពលឡើងថ្លៃខ្ពស់ នៅលើទីផ្សារអន្តរជាតិ មិនថាប្រេង ឬឧស្ម័ន។
គួរបញ្ជាក់ថា សហភាពអឺរ៉ុបបានសម្រេច ឈប់ទិញធ្យូងថ្មរុស្ស៊ីហើយ ចាប់ពីថ្ងៃទី១០សីហា ក៏ប៉ុន្តែឧស្ម័នវិញ គឺ អឺរ៉ុបនៅមិនទាន់សម្រេចចិត្តទេ ដោយសារតែនៅត្រូវការខ្លាំង។ ជាលទ្ធផល ការនាំចេញធ្យូងថ្មរបស់រុស្ស៊ីបានធ្លាក់ចុះយ៉ាងគំហុក ហើយរុស្ស៊ីមិនទាន់អាចរកអតិថិជនផ្សេង មកជំនួសអឺរ៉ុបបាននៅឡើយទេ។ ចំណែកប្រេងរបស់រុស្ស៊ីវិញ អឺរ៉ុបបានសម្រេចទណ្ឌកម្មជាដំណាក់ ដោយកាត់បន្ថយការនាំចូកពីរុស្ស៊ីបន្តិចម្តងៗ។
យ៉ាងណាក៏ដោយ របាយការណ៍បានអំពាវនាវ ឲ្យក្រុមប្រទេសលោកខាងលិច រិះរកវិធី ដើម្បីរិតបន្តឹង ទណ្ឌកម្មលើការនាំចេញប្រេងរបស់រុស្ស៊ី ដើម្បីកុំឲ្យវាអាច គេចចេញបានពីសំណាញ់ទណ្ឌកម្មបានដោយងាយ។ អ្នកស្រាវជ្រាវអះអាងថា បច្ចុប្បន្ននេះ សំណាញ់ទណ្ឌកម្មរបស់មហាអំណាចលោកខាងលិច មានក្រឡាធំៗ ងាយស្រួលគេចរបូតណាស់ ដោយរុស្ស៊ីនៅតែអាចនាំចេញទៅកាន់ប្រទេសផ្សេងទៀត។ របាយការណ៍បានលើកជាអនុសាសន៍មួយចំនួន ដូចជា អឺរ៉ុបត្រូវតែហាមឃាត់ កុំឲ្យគេយកនាវា និងកំពង់ផែរបស់អឺរ៉ុប យកទៅបំរើដល់ការដឹកជញ្ជូនប្រេងរបស់រុស្ស៊ី។ ដូចគ្នាដែរ អង់គ្លេស ត្រូវតែពិចារណា ហាមឃាត់វិស័យធានារ៉ាប់រងរបស់ខ្លួន ឲ្យឈប់រកស៊ីជាមួយវិស័យដឹកជញ្ជូនប្រេង របស់រុស្ស៊ីតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ