ប្រទេសអឺរ៉ុបសន្យារួមគ្នា កាត់បន្ថយការប្រើប្រាស់ឧស្ម័ន ដើម្បីជួយអាល្លឺម៉ង់
ប្រឈមនឹងបញ្ហាខ្វះឧស្ម័នប្រើប្រាស់ ដោយសារតែក្រុមហ៊ុនGazprom របស់រុស្ស៊ីបានសម្រេចកាត់បន្ថយជាខ្លាំងនូវការផ្គត់ផ្គង់ ក្រុមប្រទេសសមាជិកសហភាពអឺរ៉ុប បានស្រុះស្រួលគ្នា កាលពីថ្ងៃអង្គារម្សិលមិញ សន្យារួមគ្នាកាត់បន្ថយ សន្សំសំចៃការប្រើប្រាស់ឧស្ម័ន ឲ្យបាន១៥%។ ការសន្យារួមគ្នាកាត់បន្ថយនេះ គឺដើម្បីជួយប្រទេសអាល្លឺម៉ង់ ដែលប្រឈមនឹងបញ្ហានេះខ្លាំងជាង ព្រោះអាល្លឺម៉ង់រំពឹងខ្លាំងបំផុតទៅលើឧស្ម័នបង្ហូរមកពីរុស្ស៊ី។
ចុះផ្សាយនៅថ្ងៃ៖
ស្តាប់ - ០២:២៨
នៅរដូវរងារខាងមុខនេះ អឺរ៉ុបអាចនឹងជួបបញ្ហាខ្វះឧស្ម័នប្រើ ដោយសារតែក្រុមហ៊ុនGazprom របស់រុស្ស៊ីបានសម្រេចកាត់បន្ថយ នៅសល់តែ២០%ប៉ុណ្ណោះ នៃបរិមាណឧស្ម័នដែលផ្គត់ផ្គង់មកអឺរ៉ុប។ លោក Jozef Sikela រដ្ឋមន្ត្រីក្រសួងថាមពលសាធារណរដ្ឋឆេក បានលើកឡើងថា ប្រទេសសមាជិកអឺរ៉ុប បានបង្ហាញការសាមគ្គីគ្នា ដើម្បីដោះស្រាយបញ្ហាវិបត្តិថាមពល។ យោងតាមលោក Jozef Sikela ការប្រជុំចរចាគ្នា កាលពីថ្ងៃអង្គារទី២៦កក្កដា មានភាពតានតឹងជាខ្លាំង។ តែទីបំផុតប្រទេសសមាជិកអឺរ៉ុបបានសន្យាថានឹង រួមគ្នាកាត់បន្ថយ សន្សំសំចៃ ឲ្យបាន១៥%នៃការប្រើប្រាស់ឧស្ម័នរួម។
ដោយឡែក ប្រទេសហុងគ្រី គឺជាប្រទេសតែមួយគត់ ដែលបានជំទាស់នឹងវិធានការកាត់បន្ថយការប្រើប្រាស់ឧស្ម័ននេះ ដោយបានចាត់ទុកថា វាជាវិធានការគ្មានប្រសិទ្ធភាព ហើយមិនអាចអនុវត្តមាន។ តែយ៉ាងណា វិធានការនេះ ត្រូវបានក្រុមប្រទេសអឺរ៉ុបបោះឆ្នោតទទួលយក ដោយសម្លេងភាគច្រើនដាច់ខាត។
លោកស្រី Ursula Von der Layen ប្រធានគណកម្មការអឺរ៉ុប បានសំដែងការអបអរ ដែលក្រុមប្រទេសសមាជិកអឺរ៉ុប យល់ព្រមទទួលយកវិធានការ ដែលស្ថាប័នលោកស្រីបានស្នើ ក្នុងការកាត់បន្ថយការប្រើប្រាស់ឧស្ម័ន ចំនួន១៥%។ យោងតាមខ្លឹមសារនៃកិច្ចព្រមព្រៀងនេះ ប្រទេសទាំងអស់ ត្រូវប្រឹងប្រែង ឲ្យអស់ពីសមត្ថភាព កាត់បន្ថយការប្រើប្រាស់ចាប់ពីខែសីហាខាងមុខ រហូតដល់ខែមីនាឆ្នាំក្រោយ។ ក៏ប៉ុន្តែកិច្ចព្រមព្រៀងនេះ បានចែងកំណត់នូវករណីលើកលែងមួយចំនួន។ ក្នុងករណីដែលកង្វះឧស្ម័នកាន់តែចោទខ្លាំងឡើង នោះយន្តការកាត់បន្ថយ នឹងក្លាយជាកាតព្វកិច្ចដែលប្រទេសសមាជិកទាំងអស់ត្រូវគោរព។
គួរបញ្ជាក់ថា បញ្ហាខ្វះឧស្ម័នប្រើប្រាស់នៅអឺរ៉ុប គឺមានកម្រិតមិនដូចគ្នាទេ ពីប្រទេសមួយទៅប្រទេសមួយ។ ជាក់សស្តែងបារាំង និងអេស្ប៉ាញ ដែលមិនរំពឹងខ្លាំងលើឧស្ម័នរុស្ស៊ី មានស្តុកគ្រប់គ្រាន់ដើម្បីប្រើប្រាស់។ ដោយឡែក អាល្លឺម៉ង់វិញ កំពុងប្រឈមខ្លាំងជាងគេ ព្រោះបច្ចុប្បន្នអាល្លឺម៉ង់នៅបន្តទិញឧស្ម័នពីរុស្ស៊ីចំនួន ៣៥%នៃតម្រូវការរបស់ខ្លួន។ តែយ៉ាងណា ការសាមគ្គីរបស់ក្រុមប្រទេសអឺរ៉ុប គឺសំដៅជួយអាល្លឺម៉ង់ ដែលជាកម្លាំងចលករនៃសេដ្ឋកិច្ចអឺរ៉ុប។
លោក Robert Habeck រដ្ឋមន្ត្រីសេដ្ឋកិច្ចអាល្លឺម៉ង់ បានទទួលស្គាល់ថា អាល្លឺម៉ង់បានគិតខុសកាលពីអតីតកាល ធ្វើឲ្យខ្លួនជាប់អន្ទាក់ រំពឹងខ្លាំងលើប្រភពថាមពលរបស់រុស្ស៊ី។ តែយ៉ាងណាលោកអះអាងថា អាល្លឺម៉ង់នឹងប្រឹងប្រែងកាត់បន្ថយការប្រើប្រាស់ឧស្ម័ន ឲ្យបានលើសពី១៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ