វិបត្តិថាមពល៖ហេតុអ្វីបានជាអឺរ៉ុបចង់ធ្វើកំណែទម្រង់ស៊ីជម្រៅលើវិស័យថាមពល
ចុះផ្សាយនៅថ្ងៃ៖
ស្តាប់ - ០៦:៤៣
ប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែនបានថ្លែងសុន្ទរកថានយោបាយប្រចាំឆ្នាំនៅក្នុងសភាអឺរ៉ុបនាថ្ងៃពុធ ទី១៤ កញ្ញា។ សុន្ទកថារបស់លោកស្រីអួរស៊ូឡា វ៉ុនឌែរ ឡេយែនបានធ្វើឡើង ខណៈដែលសង្រ្គាមរុស្ស៊ីឈ្លានពានអ៊ុយក្រែនកំពុងបន្ត និងចំពេលដែលអឺរ៉ុបកំពុងជួបវិបត្តិថាមពល។ នៅក្នុងសុន្ទរកថា ប្រធានគណៈកម្មការអឺរ៉ុបបានលើកឡើងនូវប្រធានបទជាច្រើន ក្នុងនោះមានគម្រោងធ្វើកំណែទម្រង់ស៊ីជម្រៅនៅលើវិស័យមួយចំនួន ពិសេសទីផ្សារថាមពល។ ដោយឡែកក្នុងថ្ងៃពុធនេះដែរ លោកស្រីអួរស៊ូឡា វ៉ុនឌែរ ឡេយែនបំពេញទស្សនកិច្ចជាថ្មីនៅក្នុងប្រទេសអ៊ុយក្រែន។
តាំងពីឡើងកាន់តំណែងប្រធានគណៈកម្មការអឺរ៉ុប នេះជាលើកទី៣ ដែលលោកស្រីអួរស៊ូឡា វ៉ុនឌែរ ឡេយែនបានថ្លែងសុន្ទរកថាប្រចាំឆ្នាំនៅក្នុងសភាអឺរ៉ុប។ គ្រាន់តែថា ការថ្លែងលើកនេះរបស់លោកស្រីធ្វើឡើងនៅក្នុងបរិបទមួយខុសពីលើកមុន។ កាលពីមួយឆ្នាំមុន គឺនៅក្នុងបរិបទនៃជំងឺឆ្លងសកលកូវីដ១៩ ហើយពេលនេះ គឺនៅក្នុងបរិបទមួយដែលសង្រ្គាមបានផ្ទុះឡើងនៅអឺរ៉ុបតាមរយៈសង្រ្គាមរុស្ស៊ីឈ្លានពានអ៊ុយក្រែន។ ដូចគ្រប់គ្នាបានដឹងរួចហើយថា សង្រ្គាមមួយនេះបាន និងកំពុងបន្តជះផលវិបាកខ្លាំងដល់ពិភពលោក ពិសេសនៅផ្ទៃក្នុងអឺរ៉ុប។ វិបត្តិដែលអឺរ៉ុបកំពុងជួបប្រទះខ្លាំងជាងគេ គឺវិបត្តិថាមពល ពិសេសការខ្វះភ្លើងអគ្គិសនី និងការខ្វះឧស្ម័នប្រើប្រាស់។
នេះក៏ដោយសារតែអឺរ៉ុបដែលបានពឹងខ្លាំងលើថាមពលរុស្ស៊ី ពិសេសឧស្ម័នបានកាត់បន្ថយ និងគ្រោងបញ្ឈប់ការនាំចូលប្រេង និងឧស្ម័នរុស្ស៊ីទាំងស្រុងនាពេលខាងមុខ។ នៅក្នុងសុន្ទករថាជិត ១ម៉ោង លោកស្រីវ៉ុនឌែរ ឡេយែនបានសន្យាធ្វើកំណែទម្រង់ទាំងស្រុង និងស៊ីជម្រៅលើទីផ្សារអគ្គិសនី។ បន្ទាប់មក លោកស្រីវ៉ុនឌែរ ឡេយែនបានលើកឡើងពីការបង្កើតឲ្យមានស្តុកយុទ្ធសាស្រ្តនូវវត្ថុធាតុដើម និងការទិញបន្ថែមនូវយន្តហោះចំនួន ១០គ្រឿង រួមទាំងឧទ្ធម្ភាគចក្រចំនួន ៣គ្រឿងសម្រាប់ប្រើនៅក្នុងអន្តរាគមន៍ជួយពន្លត់អគ្គីភ័យ ពិសេសភ្លើងឆេះព្រៃនៅក្នុងប្រទេសសមាជិកអឺរ៉ុប។
គួរបញ្ជាក់ថាថ្មីៗកន្លងទៅ អឺរ៉ុបបានបញ្ជូនយន្តហោះ និងឧទ្ធម្ភាគចក្រពន្លត់អគ្គីភ័យពីប្រទេសក្រិក ស៊ុយអែត ឬអ៊ីតាលីឲ្យទៅជួយពន្លត់ភ្លើងឆេះព្រៃក្នុងប្រទេសបារាំង និងអាល្លឺម៉ង់។
អាទិភាពលើថាមពលអ៊ីដ្រូសែន
អ្វីដែលអឺរ៉ុបចង់បាននៅក្នុងវិស័យថាមពល គឺការពន្លឿនឆ្ពោះទៅរកថាមពលកកើតឡើងវិញ ឬហៅថាមពលមិនចេះរីងស្ងួត។ នៅក្នុងសំណុំរឿងនេះ គណៈកម្មការអឺរ៉ុបធ្លាប់បានបង្ហាញចេញក្នុងខែឧសភាកន្លងទៅនូវផែនការមួយដែលមានឈ្មោះថា « RePower EU »។ តាមរយៈផែនការមួយនេះ អឺរ៉ុបចង់បង្វែរពីថាមពលដែលពឹងលើប្រេង ឧស្ម័ន ឬឥន្ធនៈផូស៊ីលទៅជាថាមពលស្អាត ឬហៅថាមពលបៃតងដែលមិនបញ្ចេញឧស្ម័នផ្ទះកញ្ចក់ ដូចជាថាមពលព្រះអាទិត្យ ឬថាមពលបានពីកង្ហារយក្សជាដើម។ តាមពិត ការគិតគូររឿងថាមពលស្អាតរបស់អឺរ៉ុបមិនមែនជារឿងថ្មីទេ។ គ្រាន់តែថា សង្រ្គាមរុស្ស៊ីឈ្លានពានអ៊ុយក្រែនបានដាស់តឿន និងរុញអឺរ៉ុបឲ្យបង្កើនល្បឿនកាន់តែលឿនជាងមុន។
នៅក្នុងន័យនេះ លោកស្រីវ៉ុនឌែរ ឡេយែនបានឲ្យអាទិភាពលើថាមពលអ៊ីដ្រូសែនដែលជាថាមពលបៃតង ឬហៅ « អ៊ីដ្រូសែនបៃតង »។ ដើម្បីកសាងអនាគតទីផ្សារថាមពលអ៊ីដ្រូសែនបៃតង លោកស្រីវ៉ុនឌែរ ឡេយែនបានប្រកាសបង្កើតធនាគារថ្មីមួយដោយដាក់ឈ្មោះ « ធនាគារអភិវឌ្ឍអ៊ីដ្រូសែនបៃតង » និងគ្រោងដាក់ទុនទុនវិនិយោគចំនួន ៣ ០០០លានអឺរ៉ូ។ តាមរយៈធនាគារអភិវឌ្ឍអ៊ីដ្រូសែនបៃតងនេះ អឺរ៉ុបចង់ផលិតអ៊ីដ្រូសែនបៃតងឲ្យបាន១០លានតោនក្នុងមួយឆ្នាំពីពេលនេះទៅឆ្នាំ ២០៣០។
ដោយឡែកនៅក្នុងបញ្ហាតម្លៃអគ្គិសនីឡើងថ្លៃខ្ពស់នៅអឺរ៉ុបសព្វថ្ងៃ លោកស្រីវ៉ុនឌែរ ឡេយែនមិនញញើតនឹងវាយប្រហារលើក្រុមហ៊ុនផលិតអគ្គីសនីដែលបានឆ្លៀតដំឡើងថ្លៃភ្លើងមិនសមហេតុសមផល។ តាមលោកស្រីវ៉ុនឌែរ ឡេយែន ថ្លៃផលិតអគ្គិសនីកកើតឡើងវិញមានតម្លៃទាប តែក្រុមហ៊ុនបានលក់ចេញក្នុងតម្លៃខ្ពស់ខ្លាំង។ ទង្វើរបៀបនេះត្រូវបានលោកស្រីវ៉ុនឌែរ ឡេយែនហៅជាការឆ្លៀតឱកាសពីសង្រ្គាម និងជាការកេងចំណេញលើខ្នងអ្នកប្រើអគ្គិសនី។
បង្កើតស្តុកយុទ្ធសាស្រ្តសម្រាប់វត្តុធាតុដើមយុទ្ធសាស្រ្ត
មានវត្ថុធាតដើមយុទ្ធសាស្រ្តចំនួនពីរមុខដែលលោកស្រីវ៉ុនឌែរ ឡេយែនចង់ឲ្យអឺរ៉ុបចង់បង្កើតឲ្យមានស្តុកយុទ្ធសាស្រ្ត គឺលោហៈកម្រ និងលីចូម។ កម្មវត្ថុនៃការបង្កើតឲ្យមានស្តុកយុទ្ធសាស្រ្តនូវវត្ថុធាតុដើមទាំងពីរនេះ គឺដើម្បីបញ្ជៀសពីការខ្វះខាត និងពីការពឹងលើអ្នកដទៃដូចដែលអឺរ៉ុបបានពឹងលើប្រេង និងឧស្ម័នរបស់រុស្ស៊ី។ គួរបញ្ជាក់ថាបច្ចុប្បន្ន ចិនជាអ្នកគ្រប់គ្រងលើការផ្គត់ផ្គង់លោហៈកម្រ និងលីចូមភាគច្រើនឲ្យពិភពលោក ពោលដូចគ្នានឹងរុស្ស៊ីដែលបានផ្គត់ឧស្ម័នភាគច្រើនឲ្យអឺរ៉ុប។
លោកស្រីវ៉ុនឌែរ ឡេយែនបានបញ្ជាក់ថានាពេលឆាប់ៗ លោហៈកម្រ និងលីចូមជាផលិតផលដែលនឹងសំខាន់ ចាំបាច់ និងត្រូវការជាងប្រេង និងឧស្ម័នទៅទៀត។ តាមប្រធានគណៈកម្មការអឺរ៉ុបរូបនេះដដែល តម្រូវការលោហៈកម្រនៅអឺរ៉ុបនឹងគុណមួយជាប្រាំពីពេលនេះទៅឆ្នាំ ២០៣០។ ដូច្នេះវាជារឿងបន្ទាន់បំផុតដែលអឺរ៉ុបត្រូវគិតគូរពីការស្វែងរកការផលិត និងការស្តុកទុកដោយខ្លួនឯងនូវវត្ថុធាតុដើមយុទ្ធសាស្រ្តទាំងពីរនេះ។ តែលោកស្រីវ៉ុនឌែរ ឡេយែនមិនភ្លេចរម្លឹកថាសព្វថ្ងៃនេះ ចិនជាប្រទេសតែមួយគត់ក្នុងលោកដែលគ្រប់គ្រងសឹងផ្តាច់មុខលើទីផ្សារលោហៈកម្រ និងលីចូម។
សូមរម្លឹកថា លីចូមត្រូវបានគេយកទៅប្រើសម្រាប់ផលិតអាគុយអគ្គិសនី ហើយលោហៈកម្រប្រើសម្រាប់ផលិតបន្ទះឈីប អេក្រង់ LCD ឬមួយក៏ឧបករណ៍យោធាជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ