អឺរ៉ុប ៖ ហ្កាស អគ្គីសនី បន្តឡើងថ្លៃ រដូវរងារត្រូវយ៉ាប់យឺនខ្លាំង
តម្លៃឧស្ម័ន (ហ្កាស) បន្តហក់ឡើង ជាលំដាប់និងជារៀងរាល់ថ្ងៃ ហាក់ដូចជាគ្មានអ្វីអាចទប់បានទេ នៅចំពោះមុខស្ថានភាពបច្ចុប្បន្ន។ គ្មានការនាំចូលពីរុស្ស៊ី អឺរ៉ុបពេលនេះកំពុងជួបការលំបាកខ្លាំង ក្នុងការប្រមូលទិញឧស្ម័នយកមកបំរុងទុក ឱ្យបានគ្រប់គ្រាន់។ ប្រទេសខ្លះដូចយ៉ាងអាល្លឺម៉ង់ ដែលធ្លាប់រំពឹងខ្លាំងលើឧស្ម័នរុស្ស៊ី អាចនឹងជួបការខ្វះខាត ដោយដុបៗផង នៅរដូវរងារខាងមុខ។
ចុះផ្សាយនៅថ្ងៃ៖
ស្តាប់ - ០២:២១
អឺរ៉ុបជាពិសេសអាល្លឺម៉ង់កំពុងប្រឹងទាំងឈឺចាប់ផ្តាច់ឧស្ម័នរុស្ស៊ី ដែលក្លាយជាមធ្យោបាយដាក់សម្ពាធគ្នាក្នុងបរិបទនៃសង្គ្រាមនៅអ៊ុយក្រែន។ នៅទីបំផុត ហ្កាសបានឡើងថ្លៃកប់ពពក។
២៤៩អឺរ៉ូ ក្នុងមួយMWh។ នេះជាតម្លៃឧស្ម័ន នៅថ្ងៃសុក្រទី ១៩សីហា វេលាម៉ោង ១១និង៥០នាទី ម៉ោងសកល ទល់នឹង២៤១អឺរ៉ូ កាលពីថ្ងៃព្រហស្បតិ៍ ពោលគឺជាតម្លៃដ៏ខ្ពស់បំផុត គិតចាប់ពីទីផ្សារហ្កាសអឺរ៉ុបជួបភាពជ្រួលច្របល់បង្កឡើងដោយសង្គ្រាមឈ្លានពានរបស់រុស្ស៊ីនៅអ៊ុយក្រែន ដែលបុកតម្លៃឧស្ម័នឱ្យឡើងដល់៣៤៥អឺរ៉ូម្តងកាលពីថ្ងៃទី ៧ មីនា២០២២មក។
ចាប់ពីថ្ងៃទី ១តុលាទៅ នៅអាល្លឺម៉ង់ សហគ្រាសនិងអតិថិជនទូទៅត្រូវបង់ថ្លៃ ២,៤សេនបន្ថែមទៀតក្នុង១KWh។ ជាងនេះទៅទៀត បើតាមប្រមុខដឹកនាំភ្នាក់ងារគ្រប់គ្រងថាមពលអាល្លឺម៉ង់ លោក Klaus Müller ប្រទេសគ្មានឧស្ម័នបំរុងទុកតាមផែនការកំណត់ដោយរដ្ឋាភិបាលទេ។ ដូច្នេះតំបន់ខ្លះ នឹងត្រូវខ្វះឧស្ម័នប្រើនៅរដូវរងារខាងមុខ ហើយរដូវរងារឆ្នាំបន្ទាប់នឹងកាន់តែលំបាកខ្លាំងទៀត។
បើហ្កាសឡើងថ្លៃ ភ្លើងក៏ឡើងថ្លៃតាមដែរ ដោយស្វ័យប្រវត្តិ ព្រោះតម្លៃគោលនៃអគ្គីសនីគិតផ្អែកទៅលើចំណាយរបស់រោងចក្រអគ្គីសនីដើរដោយហ្កាស (និងធ្យូងថ្ម)។ ម្យ៉ាងវិញទៀត ដោយពុំសូវមានខ្យល់ ឧស្សាហកម្មថាមពលខ្យល់ (Eolien) ផលិតអគ្គីសនីបានតិចជាងធម្មតា បានមកចូលរួមចំណែកទាញតម្លៃភ្លើងឱ្យឡើងថ្លៃដែរ។
ទន្ទឹមពេលជាមួយគ្នា កត្តាអាកាសធាតុក្តៅហួតហែងខ្លាំង បានកំរិតការផលិតអគ្គីសនី ព្រោះមេឃក្តៅពេកប៉ះពាល់យ៉ាងខ្លាំងដល់ប្រព័ន្ធបញ្ចុះកម្តៅរបស់មជ្ឈមណ្ឌលនុយក្លេអ៊ែរ និងការដឹកជញ្ជូនធ្យូងថ្មទៅកាន់រោងចក្រអគ្គីសនី។ តាមទម្លាប់ រដូវក្តៅជាពេលដែលអឺរ៉ុបប្រើថាមពលអស់តិចខ្លាំង ប៉ុន្តែឆ្នាំនេះ ក្តៅខ្លាំង អឺរ៉ុបត្រូវការភ្លើងច្រើនកាន់ច្រើនដើម្បីបញ្ចេះម៉ាស៊ីនត្រជាក់ និងកង្ហារ។ ជាលទ្ធផលតម្លៃអគ្គីសនីនាំចូល នៅអាល្លឺម៉ង់បានឡើងដល់៥០០អឺរ៉ូ ក្នុងមួយMWh ទល់នឹងប្រមាណជាង៣០០អឺរ៉ូបន្តិច កាលពីដើមខែកក្កដា២០២២។ នេះអាចចាត់ទុកថាជាវិបត្តិថាមពលដ៏ធំជាងគេបំផុតនៅអឺរ៉ុប គិតតាំងពីប៉ុន្មានទសវត្សរ៍ចុងក្រោយមក។ នេះបើតាមអ្នកវិភាគរបស់ក្រុមយុទ្ធសាស្ត្រអឺរ៉ុបMirabaud៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ