សង្គ្រាមអ៊ុយក្រែន ៖ លោក ពូទីន ប្រកាសកេណ្ឌទ័ព៣សែននាក់ទៅជួយច្បាំងនៅអ៊ុយក្រែន
ចុះផ្សាយនៅថ្ងៃ៖
ស្តាប់ - ០៧:៥៣
នៅថ្ងៃពុធទី ២១កញ្ញា ២០២២នេះ លោកប្រធានាធិបតីរុស្ស៊ី វ្លាដេមៀ ពូទីន បានចុះហត្ថលេខាលើក្រិត្យមួយប្រកាសកេណ្ឌទ័ព មួយភាគមកជួយបំពេញកាតព្វកិច្ច “ធ្វើប្រតិបត្តិការយោធាពិសេសនៅអ៊ុយក្រែន”។ សេចក្តីប្រកាសនេះធ្វើឡើងតែមួយថ្ងៃក្រោយការប្រកាសធ្វើប្រជាមតិភ្ជាប់តំបន់ភាគខាងកើតនិងខាងត្បូងអ៊ុយក្រែនជាមួយរុស្ស៊ី។ ហើយជាមួយនឹងការគំរាមប្រើគ្រប់មធ្យោបាយ “ពោលគឺនុយក្លេអ៊ែរ” ដើម្បីការពារប្រទេសរុស្ស៊ី លោកពូទីន បានចោទអូតង់ថាជាដើមហេតុនាំឱ្យមានចំណាប់ថ្នូរនុយក្លេអ៊ែរ។
លោកប្រធានាធិបតី ពូទីន គ្រោងថ្លែងសុន្ទរកថាទៅកាន់ប្រជាជាតិរុស្ស៊ី តាមកញ្ចក់ទូរទស្សន៍ នៅយប់មិញទេ ប៉ុន្តែទំនងដោយភាពសំខាន់ខ្លាំងនៃខ្លឹមសារ ទើបលោកសម្រេចចិត្តធ្វើនៅព្រឹកថ្ងៃទី ២១កញ្ញាវិញ ដើម្បីឱ្យប្រជាពលរដ្ឋរុស្ស៊ីទាំងអស់ ទាំងអ្នកនៅភាគខាងកើតបំផុតនៃប្រទេស អាចស្តាប់និងទទួលព័ត៌មានបានទន្ទឹមពេលគ្នានឹងអ្នករស់នៅក្នុងរដ្ឋធានីមូស្គូ។
នៅក្នុងសុន្ទរកថា លោកពូទីន បានព្រលយបែបគំរាមកំហែង ថារុស្ស៊ីត្រៀមជាស្រេចនឹងប្រើគ្រប់មធ្យោបាយ (អាវុធនុយក្លេអ៊ែរ) ដើម្បីតបតប្រឈមនឹងក្រុមលោកខាងលិច -អូតង់ ដែលមានចង់បំផ្លាញរុស្ស៊ី ដូចបានបំផ្លាញសហភាពសូវៀត។ ហើយលើកនេះមិនមែនជាពាក្យបំផ្លើសបំភ័យទេ។ នេះជាការបញ្ជាក់របស់លោកពូទីន ដោយថែមទាំងបានប្រកាស កេណ្ឌទ័ពចំនួនបីសែននាក់ ដើម្បីបំប៉នកម្លាំងក្នុងការធ្វើសង្គ្រាមជាមួយអ៊ុយក្រែន។
គ្រប់ពលរដ្ឋរុស្ស៊ីពេញវ័យ ជាទ័ពបម្រុង ធ្លាប់បានបម្រើក្នុងជួរកងទ័ព និងដែលមានបទពិសោធន៍យោធា ត្រូវកេណ្ឌយកទៅធ្វើជាកម្លាំង ពង្រឹង និងយាមខ្សែសមរភូមិជួរក្រោយ។ បើតាមលោកពូទីន រុស្ស៊ីចាំបាច់ត្រូវការកម្លាំងជួយការពារ ព្រោះសមរភូមិប្រយុទ្ធជួរមុខ នៅភាគខាងត្បូងនិងខាងកើតប្រទេសអ៊ុយក្រែន ឡើងវែងប្រមាណជាង១ពាន់គីឡូម៉ែត្រ។
កេណ្ឌទ័ពមួយភាគ ?
ក្រិត្យកេណ្ឌទ័ពដែលលោកពូទីនបានចុះហត្ថលេខារួចហើយ ត្រូវចូលជាធរមានភ្លាមចាប់ពីថ្ងៃពុធទី ២១កញ្ញានេះតែម្តង។
មានពាក្យចចាមអារាមនិយាយអំពីការកេណ្ឌទ័ពទូទៅ ទូទាំងប្រទេសផង បើតាមប្រសាសន៍របស់លោកពូទីននេះគ្រាន់តែជាការកេណ្ឌទ័ព តែមួយភាគប៉ុណ្ណោះ។ មួយភាគដែលត្រូវនឹងចំនួនបីសែននាក់ តំណាងឱ្យប្រមាណតែជាង១%នៃចំនួនពលរដ្ឋបម្រុងដែលរុស្ស៊ីអាចកេណ្ឌយកមកកាន់អាវុធបាន។ បើកេណ្ឌទូទាំងប្រទេស រុស្ស៊ីមានសក្តានុពលអាចកេណ្ឌទ័ពសរុបបានចំនួនដល់ទៅ ២៥លាននាក់។ នេះបើតាមរដ្ឋមន្ត្រីក្រសួងការពារជាតិ។
ប៉ុន្តែ សម្រាប់ពេលនេះ លោកពូទីន មិនអាចប្រើពាក្យកេណ្ឌទ័ពទូទៅបានទេ ព្រោះបើតាមបច្ចេកទេស ការកេណ្ឌទ័ពធ្វើឡើងលុះណាតែប្រទេសមានសង្គ្រាម និងចេញធ្វើសង្គ្រាម។ តែតាំងពីដំបូងឡើងលោកពូទីនបានអះអាងប្រាប់ប្រជាពលរដ្ឋខ្លួន ថា រុស្ស៊ី បើក “ប្រតិបត្តិការយោធាពិសេសនៅអ៊ុយក្រែន” ដើម្បីរំដោះប្រជាពលរដ្ឋជាបងប្អូនពីកណ្តាប់ពួកណាហ្ស៊ីបែបថ្មីតែប៉ុណ្ណោះ។ មិនដែលប្រើឡើយពាក្យថា ធ្វើសង្គ្រាម។
មួយរយៈចុងក្រោយនេះ កងកម្លាំងរុស្ស៊ី ហាក់ទន់ដៃ ចុះខ្សោយ គ្មានតុល្យការថ្មីល្អប្រសើរទេ។ និយាយឱ្យចំកងទ័ពរុស្ស៊ីបានចាញ់នៅលើសមរភូមិ ហើយមិនអាចរើសទ័ពថ្មីមកជួយបានទេ។ ការបាត់បង់ជីវិតទាហានលើសមរភូមិក៏អស់ច្រើន។ ជាលើកទីមួយ រដ្ឋមន្ត្រីក្រសួងការពារជាតិបានផ្តល់តួលេខថាមានទាហានរុស្ស៊ី ៥៩៣៧នាក់បានស្លាប់បាត់បង់ជីវិតនៅក្នុងសមរភូមិអ៊ុយក្រែន តែតិចជាងការពិតឆ្ងាយណាស់បើតាមអ៊ុយក្រែននិងបស្ចិមលោក។
ពីប្រតិបត្តិការយោធាទៅសង្គ្រាមរវាងរុស្ស៊ីនិងអូតង់ ?
ទន្ទឹមនឹងការប្រកាសកេណ្ឌទ័ព លោកពូទីនបានបញ្ជាក់គាំទ្រការធ្វើប្រជាមតិនៅតំបន់ភាគកើតនិងខាងត្បូងអ៊ុយក្រែន។ ព្រឹត្តិការណ៍ពីរនេះ ត្រូវបានអ្នកជំនាញមើលឃើញថា ការបើកផ្លូវឱ្យមានការប្រយុទ្ធតតាំងខ្លាំងឡើងវិញ និងជាការពន្លឿនប្រតិបត្តិការយោធានៅអ៊ុយក្រែន ឱ្យប្តូរទម្រង់ទៅជាសង្គ្រាមនៅរុស្ស៊ី។
គំនិតចង់រៀបចំធ្វើប្រជាមតិភ្ជាប់តំបន់ភាគខាងកើតនិងខាងត្បូងអ៊ុយក្រែន ដែលស្ថិតក្នុងដៃកងទ័ពរុស្ស៊ី ទៅជាដែនដីក្នុងសហព័ន្ធរុស្ស៊ី បានលេចឡើងយូរមកហើយ ដោយគ្រោងប្រព្រឹត្តទៅនៅថ្ងៃទី ៤វិច្ឆិកា ដែលត្រូវចំថ្ងៃបុណ្យ “ទិវាបង្រួបបង្រួមប្រជាជនរុស្ស៊ី” ខាងមុខឯណោះ។ ប៉ុន្តែក្រុមមេដឹកនាំនិយមរុស្ស៊ី នៅភាគខាងត្បូងនិងខាងកើតអ៊ុយក្រែន ស្រាប់តែពន្លឿនពេលវេលាមកប្រកាសធ្វើនៅថ្ងៃខានស្អែក (២៣-២៧កញ្ញា)នេះវិញ យ៉ាងទាន់ហន់ និងហាក់ដូចជាមិនបានព្រាងទុកជាមុនផង។ ដូច្នេះវាពិតជាមិនមែនរឿងចៃដន្យទេ។
បើតាមអ្នកជំនាញ Alexander Baunov ដ៏ល្បីល្បាញនៅវិទ្យាស្ថានCarnegie លោកពូទីន ទំនងចង់ឃើញលទ្ធផលចាញ់ឈ្នះនៃ “ប្រតិបត្តិការយោធាពិសេស” ឱ្យបានឆាប់បំផុត ក្នុងបំណងធំមួយ គឺប្តូរផ្លាស់ទម្រង់នៃជម្លោះនៅអ៊ុយក្រែន។
គំនិតបែបនេះ ត្រូវបានបណ្តុះនិងលូតលាស់ខ្លាំង ក្រោយពីមានជំនួបនៃអង្គការសហប្រតិបត្តិការសៀងហៃ កាលពីសប្តាហ៍មុន នៅអ៊ូសបេគីស្ថាន។ កាលណោះ ដៃគូជាច្រើនរបស់រុស្ស៊ី មានជាអាទិ៍ប្រមុខដឹកនាំឥណ្ឌា និងតួកគី បានប្រាប់លោកពូទីនដោយផ្ទាល់ថាមិនមែនជាពេលត្រូវធ្វើសង្គ្រាម ទើបលោកពូទីនសន្យាបិទបញ្ចប់ដោយឆាប់រហ័សតាមដែលអាចធ្វើទៅបាន។
ឯការធ្វើប្រជាមតិវិញ បើតាមអ្នកស្រាវជ្រាវ គឺជាខ្សែរឿងតែមួយដូចកាលក្រសោបយកគ្រីមេ កាលពីឆ្នាំ២០១៤។ ថ្ងៃនេះធ្វើប្រជាមតិ ស្អែកទទួលស្គាល់ដែនដីភាគខាងកើតនិងខាងត្បូងជារបស់រុស្ស៊ី ហើយថ្ងៃស្អែកបន្ទាប់ នឹងមានការវាយប្រហារ តែលើកនេះគឺនៅលើទឹកដីរុស្ស៊ី ដើម្បីរំដោះពីដៃក្រុមណាហ្ស៊ី។ ជាសង្គ្រាមលើទឹកដីរុស្ស៊ី ដែលរុស្ស៊ីត្រូវការពារជាដាច់ខាត។ ដូច្នេះក្នុងនាមជាប្រធានាធិបតី លោកពូទីន មានសិទ្ធិស្របច្បាប់ នឹងសម្រេចកិច្ចការគ្រប់យ៉ាង ក្នុងការពារប្រទេស។ ពោលគឺជាការប្រកាសសង្គ្រាមដោយចំៗរវាងរុស្ស៊ី ជាមួយអ៊ុយក្រែននិងអូតង់។
អ្នកវិភាគនិងអ្នកជំនាញសន្និដ្ឋានថា អ្វីដែលកើតឡើងនៅថ្ងៃនេះ ជាការដាក់ឱសានវាទ ដែលមានច្រកចេញតែពីរគត់ រុស្ស៊ីឈ្នះ ឬសង្គ្រាមនុយក្លេអ៊ែរ។ គ្មានទេជម្រើសទីបី។ ប៉ុន្តែសម្រាប់ក្រុមលោកខាងលិច ភាសារបស់លោកពូទីនថ្ងៃនេះ គឺជាសញ្ញានៃការចុះខ្សោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ