អ៊ុយក្រែនចោទរុស្ស៊ី ថាបានបាញ់ប្លោងគ្រាប់លើស្ថានីយ៍នុយក្លេអ៊ែរមួយទៀត នៅភាគខាងត្បូង
កាលពីថ្ងៃចន្ទទី១៩កញ្ញា អ៊ុយក្រែនបានអះអាងថា រុស្ស៊ីបានបាញ់ប្លោងគ្រាប់ ទៅលើស្ថានីយ៍អគ្គិសនីនុយក្លេអ៊ែរមួយកន្លែងទៀត ដែលស្ថិតនៅភាគខាងត្បូង។ នេះជាស្ថានីយ៍អគ្គិសនីនុយក្លេអ៊ែរទី៣ហើយ របស់អ៊ុយក្រែន ដែលត្រូវបានរងការវាយប្រហារ ហើយដែលធ្វើឲ្យមានការបារម្ភកាន់តែខ្លាំងឡើងៗ ទាក់ទិននឹងគ្រោះមហន្តរាយនុយក្លេអ៊ែរធ្ងន់ធ្ងរ។
ចុះផ្សាយនៅថ្ងៃ៖
ស្តាប់ - ០២:៤៣
ទីតាំងរោងចក្រអគ្គិសនីនុយក្លេអ៊ែរ Pivdennooukraïnsk ស្ថិតនៅតំបន់ Mykolaïv ភាគខាងត្បូងអ៊ុយក្រែន បានរងនូវការវាយប្រហារ។ យោងតាមក្រុមហ៊ុន Energoatom ដែលជាក្រុមហ៊ុនផលិតអគ្គិសនីអ៊ុយក្រែន បានឲ្យដឹងថា ការបាញ់ប្លោងគ្រាប់ បានធ្លាក់ចំចម្ងាយប្រមាណតែ៣០០ម៉ែត្រប៉ុណ្ណោះ ពីរ៉េអាក់ទ័រនុយក្លេអ៊ែររបស់ស្ថានីយ៍នេះ។ តែយ៉ាងណា ក្រុមហ៊ុននេះបញ្ជាក់ថា ស្ថានីយ៍នេះនៅដំណើរការធម្មតាទេ បើទោះបីគ្រាប់មីស៊ីលផ្ទុះ ធ្វើឲ្យបែបបង្អួចកញ្ចក់អាគាររាប់រយនៅក្បែរទីតាំង និងបានកាត់ផ្តាច់បណ្តាញខ្សែចរន្តអគ្គិសនីកម្លាំងខ្លាំង ចំនួន៣ខ្សែ។
នៅលើបណ្តាញតេឡាក្រាម លោកវ្លូឌីមៀរ ហ្សេឡេនស្គី បាន អះអាងថា រុស្ស៊ីកំពុងតែធ្វើឲ្យពិភពលោកទាំងមូលប្រឈមគ្រោះថ្នាក់ តាមរយៈការវាយប្រហារមកលើស្ថានីយ៍នុយក្លេអ៊ែរ៊។ លោកបានអំពាវនាវ ឲ្យសហគមអន្តរជាតិ ត្រូវតែរួមគ្នា បិទបញ្ចប់ស្ថានការណ៍នេះឲ្យបាន មុននឹងគ្រោះថ្នាក់មហន្តរាយនុយក្លេអ៊ែរកើតឡើង។
គួរបញ្ជាក់ថា នេះគឺជាស្ថានីយ៍នុយក្លេអ៊ែរទី៣ហើយរបស់អ៊ុយក្រែន ដែលបានរងការវាយប្រហារ បន្ទាប់ពីសង្គ្រាមបានផ្ទុះឡើងនៅថ្ងៃទី២៤កុម្ភៈ។ ពេលចាប់ផ្តើមសង្គ្រាមដំបូង កងទ័ពរុស្ស៊ីបានសម្រុកវាយលុក ដណ្តើមគ្រប់គ្រងតំបន់ក្បែររោងចក្រនុយក្លេអ៊ែរ Tchernobyl ស្ថិតនៅភាគខាងជើង មុននឹងដកទ័ពថយចេញទៅវិញ។ ក្រោយមក គឺការបារម្ភ កើតមាននៅស្ថានីយ៍នុយក្លេអ៊ែរហ្សាបូរីចា ដែលបានរងគ្រាប់មីស៊ីល និងរ៉ូកែតជាច្រើនលើក ហើយធ្វើឲ្យរ៉េអាក់ទ័រទាំង៦ ត្រូវឈប់ដំណើរការទាំងស្រុង។ ទីភ្នាក់ថាមពលនុយក្លេអែរអន្តរជាតិ បានអំពាវនាវ ឲ្យរុស្ស៊ី ត្រូវតែដកកម្លាំងទ័ពចេញ ពីស្ថានីយ៍ហ្សាប៉ូរីចាជាបន្ទាន់ ដើម្បីការពារតំបន់នេះ ពីករណីមហន្តរាយនុយក្លេអ៊ែរ។
ដោយឡែក នៅតំបន់ភាគខាងជើងឯណោះ កាលពីថ្ងៃទី១៦កញ្ញា អាជ្ញាធរអ៊ុយក្រែន បានប្រទះឃើញផ្នូរកប់សពចំនួនប្រមាណ៤៥០ នៅក្នុងដីព្រៃមួយកន្លែងជាយក្រុងអ៊ីហ្សយូម បន្ទាប់ពីកងទ័ពអ៊ុយក្រែនរំដោះបានមកវិញ។ បើតាមពិនិត្យរបស់អាជ្ញាធរអ៊ុយក្រែន គឺសាកសពភាគច្រើនជាជនស៊ីវីល ខ្លះមានចំណងចងនឹងដៃ ខ្លះមានស្លាកស្នាមត្រូវគេធ្វើទារុណកម្ម។ អ្នកកាសែតបារាំង AFP បានស្រង់នូវសម្តីសាក្សីជាច្រើន នៅក្រុងអ៊ីហ្សយូម ថាពួកគេបានរងនូវការធ្វើទារុណកម្ម ពីសំណាក់កម្លាំងទាហានរបស់រុស្ស៊ី។ យ៉ាងណាក៏ដោយ នៅថ្ងៃចន្ទទី១៩កញ្ញា លោក Dimitry Peskov អ្នកនាំពាក្យវិមានក្រឹមឡាំង បានចាត់ទុកដំណឹងនៃការប្រទះឃើញផ្នូរសព ជិត៤៥០នៅក្រុងអ៊ីហ្សយូម ថាជាការប្រឌិតកុហកទាំងស្រុង របស់អ៊ុយក្រែន។
សូមរំលឹកថា កាលពីដើមខែមេសា នៅក្រុងប៊ូឆាក្បែររដ្ឋធានីកៀវ គេក៏បានប្រទះឃើញសាកសពជនស៊ីវិល ជាច្រើននាក់ដេកស្លាប់តាមផ្លូវ និងសាកសពមួយចំនួនធំទៀតក្នុងរណ្តៅរួម។ ភាគីរុស្ស៊ីបានប្រកែកថាវាជាការរៀបចំឆាកល្ខោនរបស់អ៊ុយក្រែន។ គួរកត់សំគាល់ថា ករណីជនស៊ីវិលជាច្រើនរយនាក់ ស្លាប់ក្នុងអំឡុងពេលកងទ័ពរុស្ស៊ីគ្រប់គ្រងបែបនេះ អាចចោទឡើងជាករណីឧក្រិដ្ឋកម្មសង្គ្រាម ឬឧក្រិដ្ឋកម្មប្រឆាំងមនុស្សជាតិ។ យ៉ាងណាមិញ សាធារណៈរដ្ឋឆេក ដែលជាប្រធានវិលជុំសហភាពអឺរ៉ុប បានទាមទារឲ្យបង្កើតតុលាការអន្តរជាតិពិសេសមួយដើម្បីកាត់ទោសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ