រុស្ស៊ី៖មានចាប់ខ្លួនបាតុករជាង ១ ៣០០នាក់នៅក្នុងក្បួនបាតុកម្មប្រឆាំងនឹងការកេណ្ឌទ័ពរបស់លោកពូទីន
ចុះផ្សាយនៅថ្ងៃ៖
ស្តាប់ - ០៧:៤៩
នៅក្នុងប្រទេសរុស្ស៊ី ក្បួនបាតុកម្មត្រូវបានរៀបចំជាច្រើនកន្លែងនៅទូទាំងប្រទេសដើម្បីប្រឆាំងនឹងការសម្រេចរបស់ប្រធានាធិបតីលោកពូទីនក្នុងការកេណ្ឌទ័ពមួយភាគទៅជួយច្បាំងនៅលើសមរភូមិអ៊ុយក្រែន។ តាមតួលេខផ្តល់ដោយអង្គការក្រៅរដ្ឋាភិបាល មានមនុស្សជាង ១ ៣០០នាក់ត្រូវបានប៉ូលិសចាប់ខ្លួននៅក្នុងក្បួនបាតុកម្ម។ ទន្ទឹមនឹងចុះផ្លូវធ្វើបាតុកម្ម មានពលរដ្ឋរុស្ស៊ីមួយចំនួនបានព្យាយាមចាកចេញពីរុស្ស៊ីដើម្បីគេចពីការកេណ្ឌទ័ព។ ដោយឡែក ការប្រកាសកេណ្ឌទ័ពពីលោកទីនពេលនេះត្រូវបានក្រុមអ្នកជំនាញយល់ឃើញខុសៗគ្នា។
គេអាចពន្យល់បកស្រាយក្រោមហេតុផលចំនួនពីរទាក់ទងនឹងបាតុកម្មប្រឆាំងនឹងការប្រកាសកេណ្ឌទ័ពរបស់ប្រធានាធិបតីរុស្ស៊ីលោកពូទីនពេលនេះ ទី១ ពលរដ្ឋរុស្ស៊ីមួយភាគនៅតែបន្តប្រឆាំងនឹងការដែលលោកពូទីនបានធ្វើសង្រ្គាមនៅអ៊ុយក្រែន និងហេតុផលទី២ ក្រុមគ្រួសាររុស្ស៊ីមួយភាគមិនចង់បញ្ជូនកូនចៅរបស់ខ្លួនទៅចូលរួមនៅក្នុងសង្រ្គាមមួយនេះ។ គួរបញ្ជាក់បន្តិចថានៅរុស្ស៊ី សង្រ្គាមរុស្ស៊ីឈ្លានពានអ៊ុយក្រែនត្រូវបានលោកពូទីនហៅជាប្រតិបត្តិការយោធាពិសេសក្នុងគោលដៅរំដោះពលរដ្ឋជាបងប្អូនចេញពីកណ្តាប់ដៃពួកណាហ្ស៊ីបែបថ្មី។
បញ្ហានៅត្រង់ថា សង្រ្គាមមួយនេះកំពុងអូសបន្លាយជិត ៧ខែ និងដែលនារយៈពេលចុងក្រោយនេះ ទ័ពអ៊ុយក្រែនហាក់កំពុងមានប្រៀប និងដណ្តើមបានត្រឡប់វិញនូវតំបន់មួយចំនួនពីកណ្តាប់ដៃទ័ពរុស្ស៊ី។ នេះហើយជាមូលហេតុដែលបានជំរុញឲ្យលោកពូទីនប្រកាសកេណ្ឌទ័ពបម្រុងចំនួន ៣០០ ០០០នាក់ ក្នុងថ្ងៃពុធ ទី២១ កញ្ញា។ តើមានប៉ុន្មានគ្រួសារដែលចង់បញ្ជូនកូនចៅទៅកាន់សមរភូមិសង្រ្គាម?។ ចម្លើយចំពោះសំណួរនេះ ត្រូវបានស្តែងឡើងតាមរយៈក្បួនបាតុកម្មប្រឆាំងនៅក្នុងខេត្ត ក្រុងមិនតិចជាង ៣៨ នៅទូទាំងប្រទេសរុស្ស៊ីនៅក្រុងមូស្គូ ឬនៅ Saint-Pétersbourg។
« ពូទីនចុះចេញទៅ។ បញ្ឈប់សង្រ្គាម និងគ្មានការកេណ្ឌទ័ព » ទាំងនេះជាសម្រែករបស់ក្រុមបាតុករ។ ក្បួនបាតុកម្មត្រូវបានកម្លាំងប៉ូលិសវាយបង្រ្កាបយ៉ាងហិង្សា។ មានបាតុករយ៉ាងតិច ១ ៣៣២នាក់ត្រូវបានចាប់ខ្លួន និងមានរងរបួសជាច្រើននាក់ផ្សេងទៀត។ គួររម្លឹកថា នេះមិនមែនជាលើកទី១ ទេដែលមានក្បួនបាតុកម្មទាក់ទងនឹងសង្រ្គាមនៅអ៊ុយក្រែន។ តាំងពីថ្ងៃផ្តើមសង្រ្គាមក្នុងថ្ងៃទី២៤ កុម្ភៈ មានការចាប់ខ្លួនបាតុករមិនតិចជាង ១៦ ០០០នាក់ទេ។ មួយវិញទៀតនៅរុស្ស៊ី ការចូលរួម ឬមួយក៏ការអំពាវនាវឲ្យចូលរួមនៅក្នុងបាតុកម្មប្រឆាំងសង្រ្គាមនៅអ៊ុយក្រែនជាខុសរឿងខុសច្បាប់ និងអាចដេកក្នុងគុកចំនួន ១៥ឆ្នាំ។
ចលនារត់ចេញពីរុស្ស៊ីដើម្បីគេចពីការកេណ្ឌទ័ព
ក្រៅពីចុះផ្លូវធ្វើបាតុកម្មប្រឆាំងនឹងការប្រកាសកេណ្ឌទ័ពរបស់លោកពូទីន មានពលរដ្ឋរុស្ស៊ីមួយចំនួនបាន និងកំពុងព្យាយាមរកទិញសំបុត្រយន្តហោះដើម្បីចាកចេញពីរុស្ស៊ីទៅកាន់ប្រទេសផ្សេង។ តែមានកំណត់សម្គាល់មួយតាំងពីរុស្ស៊ីចូលឈ្លានពានអ៊ុយក្រែន គឺការដែលសហភាពអឺរ៉ុបបានបិទដែនអាកាសមិនឲ្យយន្តហោះចេញពីរុស្ស៊ីចុះចតនៅលើទឹកដីអឺរ៉ុបដែលជាទណ្ឌកម្មមួយប្រឆាំងរុស្ស៊ី។ នេះដោយមិននិយាយពីចំណាត់ការរបស់ប្រទេសលោកខាងលិចផ្សេង ដូចជាអាមេរិក។
តែដើម្បីគេចពីការកេណ្ឌទ័ពពេលនេះ ពលរដ្ឋរុស្ស៊ីនាំគ្នាចាកចេញទៅកាន់ប្រទេសក្បែរខាងដែលមិនចាំបាច់មានទិដ្ឋាការ ឬក៏មិនពិបាកសុំទិដ្ឋាការ។ ក្រុមប្រទេសដែលកំពុងពេញនិយមពេលនេះមានដូចជាអាមេនី ហ្សកហ្ស៊ី អាស៊ែបៃហ្សង់ ឬមួយក៏ប្រទេសកាហ្សាក់ស្ថាន។ បន្ទាប់មក ទីក្រុងអ៊ីស្តង់ប៊ុលប្រទេសតួកគីក៏ជាគោលដៅមួយដែរ។ ក្រៅពីការចាកចេញពីរុស្ស៊ី មានពលរដ្ឋខ្លះទៀតបានធ្វើការបម្លាស់ទីក្នុងស្រុកទៅកាន់ព្រំដែនដើម្បីត្រៀមខ្លួនចាកចេញពីទឹកដីរុស្ស៊ី។ ពេញមួយថ្ងៃពុធ ទី២១ កញ្ញា ពោលនៅក្រោយការប្រកាសកេណ្ឌទ័ពរបស់លោកពូទីន ពលរដ្ឋរុស្ស៊ីមួយចំនួនបាននាំគ្នារកទិញសំបុត្រយន្តហោះដោយមានអ្នកខ្លះត្រូវរង់ចាំដល់សប្តាហ៍ក្រោយ ឬច្រើនថ្ងៃទៅមុខទើបមានកន្លែងជិះ។
នៅលើគេហទំព័រស្វែងរក ដូចយ៉ាង Google ការវាយពាក្យ « សំបុត្រយន្តហោះ » ឬឃ្លា « ចាកចេញពីរុស្ស៊ី » បានកើន ១០០ដងលើសពីថ្ងៃធម្មតា។ ទន្ទឹមគ្នានេះ តម្លៃសំបុត្រយន្តហោះបានឡើងថ្លៃខ្លាំង ១គុណ ជា ១០ ហើយទោះក្នុងតម្លៃថ្លៃខ្លាំងក៏គ្មានសំបុត្រលក់ដែរ។ មួយវិញទៀត សូម្បីតែសំបុត្រយន្តហោះជិះក្នុងស្រុកពីក្រុងមូស្គូទៅកាន់តំបន់ព្រំដែនប៉ែកខាងត្បូងក៏ឡើងថ្លៃកប់ពពកដែលពីមុនទិញក្នុងតម្លៃត្រឹម ៧០ដុល្លារបានឡើងដល់ ៧៥០ដុល្លារ។ តើមានពលរដ្ឋរុស្ស៊ីប៉ុន្មាននាក់បានចាកចេញ និងកំពុងត្រៀមខ្លួនចេញពីរុស្ស៊ីដើម្បីគេចពីយុទ្ធនាការកេណ្ឌទ័ពពេលនេះ?។ គេគ្មានតួលេខផ្លូវការទេ។
ការកេណ្ឌទ័ពនៅរុស្ស៊ីមិនមែនជារឿងងាយស្រួល?
នៅរុស្ស៊ី បុរសគ្រប់រូបសុទ្ធតែបានបំពេញកាតព្វកិច្ចយោធា ហើយក្នុងមួយឆ្នាំៗ មានយុវជនប្រមាណជា ២៥០ ០០០នាក់បានបំពេញកាតព្វកិច្ចយោធា។ មួយវិញទៀត អ្នកដែលបានបំពេញកាតព្វកិច្ចយោធាត្រូវបានគេចាត់ទុកជាទាហានបម្រុង។ នេះដោយមិនគិតពីអតីតទាហានជាច្រើនម៉ឺននាក់ផ្សេងទៀតដែលបានចូលនិវត្តន៍ទេ។ ដូច្នេះ ការស្វែងរកទ័ពបម្រុងចំនួន ៣០០ ០០០នាក់មិនមានអ្វីលំបាកទេ។ អ្វីដែលរដ្ឋាភិបាលត្រូវគិតគូរ និងសម្រេច គឺអាយុ និងកម្រិតយល់ដឹងផ្នែកកងទ័ព។ តើត្រូវសម្រេចយកចាប់ពីអាយុប៉ុន្មានទៅ និងត្រូវមានការយល់ដឹងផ្នែកកងទ័ពកម្រិតណា?។
បើទ័ពបម្រុងដែលលោកពូទីនចង់បានជាអតីតទ័ពដែលមានបទពិសោធន៍នៅលើសមរភូមិសង្រ្គាម និងចេះប្រើអាវុធស្ទាត់ជំនាញ គឺមិនមានអ្វីចោទទេ។ ចំណោតនៅត្រង់ថា អតីតទ័ពភាគច្រើនសុទ្ធតែមានអាយុច្រើនខ្លាំង។ ផ្ទុយទៅវិញ បើទ័ពបម្រុងដែលលោកពូទីនចង់បានជាក្រុមយុវជនដែលមានចំណេះដឹងយោធាត្រឹមកម្រិតបានបំពេញកាតព្វកិច្ចយោធា វាជារឿងលំបាកខ្លាំង ព្រោះគេត្រូវការហ្វឹកហ្វឺនពួកគេឲ្យបានស៊ីជម្រៅបន្ថែមទៀត។ ចំណែកការហ្វឹកហ្វឺនត្រូវការពេលយូររហូតដល់រាប់ខែក៏មាន នេះបើតាមការបញ្ជាក់របស់ក្រុមអ្នកជំនាញយោធា។
ការលំបាកមួយទៀតដែលក្រុមអ្នកជំនាញបានមើលឃើញ គឺការខ្វះគ្រឿងសព្វាវុធដែលរុស្ស៊ីកំពុងជួបប្រទះ។ ចូរកុំភ្លេចថា រុស្ស៊ីបានប្រើអាវុធច្រើនណាស់នៅក្នុងសង្រ្គាមអ៊ុយក្រែនជិត ៧ខែកន្លងទៅ។ ដូច្នេះ បើលោកពូទីនចង់បញ្ជូនទ័ពបម្រុងជាយុវជនភ្លាមៗទៅកាន់សមរភូមិសង្រ្គាមអ៊ុយក្រែនដើម្បីជួយច្បាំងទ័ពរុស្ស៊ីនៅទីនោះ គឺប្រហែលមិនខុសគ្នានឹងបញ្ជូនពួកគេឲ្យទៅស្លាប់ទេ។ គួរបញ្ជាក់ថា នៅក្នុងសង្រ្គាមជិត ៧ខែ រុស្ស៊ីបានបាត់បង់ទាហានរបស់ខ្លួនច្រើនគួរសម។ តាមក្រុងមូស្គូ មានទាហានរុស្ស៊ីស្លាប់ ៥ ៩៣៧នាក់។ តែក្រុមអ្នកវិភាគយោធាបានអះអាងថា មានស្លាប់ចន្លោះ ២០ ០០០នាក់ និង ៣០ ០០០នាក់។ ចំណែកអាមេរិកបានលើកឡើងនូវតួលេខអ្នកស្លាប់នៅចន្លោះពី ៧០ ០០០នាក់ទៅ ៨០ ០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ