នៅមហាសន្និបាតអ.ស.ប រុស្ស៊ីសន្យាការពារតំបន់អ៊ុយក្រែនដែលនឹងភ្ជាប់ខ្លួនមកក្នុងទឹកដីរុស្ស៊ី
ចុះផ្សាយនៅថ្ងៃ៖
ស្តាប់ - ០៧:៣៧
នៅប៉ុន្មានថ្ងៃក្រោយ រងការរិះគន់ និងថ្កោលទោសខ្លាំងៗ ពីមេដឹកនាំប្រទេសលោកខាងលិច នៅមហាសន្និបាត អង្គការសហប្រជាជាតិ នៅក្នុងរឿង រៀបចំការបោះឆ្នោតប្រជាមតិ ដើម្បីភ្ជាប់យកតំបន់៤របស់អ៊ុយក្រែន មកក្នុងសហព័ន្ធរុស្ស៊ី ប្រមុខការបរទេសរុស្ស៊ី កាលពីថ្ងៃសៅរ៍ម្សិលមិញ បានប្រើវេទិការបស់អង្គសន្និបាតរបស់អង្គការសហប្រជាជាតិ ដើម្បី វាយបកលោកខាងលិចថា ប៉ុនប៉ងបំផ្លាញរុស្ស៊ី។ នៅមហាសន្និបាតអង្គការសហប្រជាជាតិ រដ្ឋមន្រ្តីការបរទេសរុស្ស៊ី លោកឡាវ្រូវ Lavrov បានប្រកាសដែរថា រុស្ស៊ីសន្យា នឹងការពារទាំងស្រុងដែនដីអ៊ុយក្រែន ដែលក្លាយជាកម្មសិទ្ធិរបស់រុស្ស៊ី នៅក្រោយ ការបោះឆ្នោតប្រជាមតិ។ តើរុស្ស៊ីមានអំណះអំណាងអ្វីមកនិយាយការពារខ្លួន នៅក្នុងមហាសន្និបាតអង្គការសហប្រជាជាតិ ពីរឿងធ្វើសង្រ្គាមឈ្លានពានរបស់ខ្លួន និងនយោបាយកាត់យកទឹកដីរបស់អ៊ុយក្រែន?
បន្ទាប់ពីរងការវាយប្រហាររិះគន់ពីមេដឹកនាំលោកខាងលិច ដោយសារការរៀបចំបោះឆ្នោតប្រជាមតិ ដើម្បីកាត់យកទឹកដីអ៊ុយក្រែន រុស្ស៊ី តំណាងដោយរដ្ឋមន្រ្តីការបរទេសបានឡើងនិយាយការពារខ្លួន នៅមហាសន្និបាតអង្គការសហប្រជាជាតិ។ រុស្ស៊ីបានចូលធ្វើសង្រ្គាមឈ្លានពានអ៊ុយក្រែន ជាង៧ខែមកហើយ។ ចាប់តាំងពីថ្ងៃសុក្រ អាជ្ញាធរនៅតំបន់ចំនួន៤របស់អ៊ុយក្រែន ដែលកាន់កាប់ដោយកងទ័ពរុស្ស៊ី ក៏កំពុងរៀបចំការបោះឆ្នោតប្រជាមតិ ស្តីពីការភ្ជាប់ខ្លួន ក្នុងទឹកដីរុស្ស៊ីទៀត។
នៅមហាសន្និបាតអង្គការសហប្រជាជាតិ ប្រមុខការបរទេសរុស្ស៊ី លោកSergei Lavrovបានឡើងនិយាយការពារប្រតិបត្តិការយោធាពិសេស នៅអ៊ុយក្រែន ថា វាកើតឡើង ដោយសារតែរុស្ស៊ី គ្មានជម្រើស។
តាមរដ្ឋមន្រ្តីការបរទេសរុស្ស៊ី ដោយសារតែអសមត្ថភាពចរចារបស់ក្រុមប្រទេសលោកខាងលិច ហើយនិងមហិច្ឆតាធ្វើសង្រ្គាមរបស់រដ្ឋាភិបាលអ៊ុយក្រែន ដែលវាយប្រហារទៅលើប្រជាជន នៅតំបន់ដុនបាស់ ភាគខាងកើតអ៊ុយក្រែន រុស្ស៊ី គ្មានជម្រើសអ្វីផ្សេងក្រៅពី បញ្ជូនកងទ័ពទៅបើកប្រតិបត្តិការពិសេស នៅអ៊ុយក្រែន ដើម្បីការពារជនជាតិរុស្ស៊ី អ្នកនិយាយភាសារុស្ស៊ី ដែលកំពុងរងការគំរាមសន្តិសុខ នៅតំបន់ដុនបាស់។ ដើម្បីបញ្ជាក់អំណះអំណាងរបស់ខ្លួន រដ្ឋមន្រ្តីការបរទេសរុស្ស៊ី បានស្រង់សំដីរបស់ប្រធានាធិបតីអ៊ុយក្រែន លោកហ្សេឡេនស្គី ដែលបាននិយាយកាលពីខែសីហាកន្លងទៅថា សម្រាប់អ្នកដែលមានអារម្មណ៍ថា ខ្លួនមានឈាមជ័ររុស្ស៊ី ត្រូវចាកចេញពីអ៊ុយក្រែន បើសិនពួកគេគិតពីអនាគត កូនចៅរបស់ពួកគេ។
នៅត្រង់ចំណុចនេះ ប្រមុខការបរទេសរុស្ស៊ីបាននិយាយប្រាប់មហាសន្និបាតអង្គការសហប្រជាជាតិ ថា ប្រជាជន នៅតំបន់ទាំង៤របស់អ៊ុយក្រែន រៀបចំ ការបោះឆ្នោតប្រជាមតិ ដើម្បីភ្ជាប់ខ្លួនទៅក្នុងទឹកដីរុស្ស៊ី ក៏ព្រោះតែសំដីរើសអើងរបស់ប្រធានាធិបតីអ៊ុយក្រែននោះឯង។ ប្រជាជនទាំងនោះ ចង់ទាមទារគ្រប់គ្រងទឹកដី ដែលធ្លាប់ជាកម្មសិទ្ធិរបស់ជីដូនជីតារបស់ពួកគេ។ ដូច្នេះ រុស្ស៊ីមានតែ ជំរុញ ឲ្យក្តីប្រាថ្នារបស់ពួកគេបានសម្រេច ហើយរុស្ស៊ីសន្យានឹងការពារទាំងស្រុង ទឹកដីអ៊ុយក្រែនទាំងនោះ ក្នុងករណីដែលលទ្ធផលឆ្នោតប្រជាមតិបង្ហាញថា ពួកគេចង់មកភ្ជាប់ខ្លួនក្នុងទឹកដីរុស្ស៊ី។
មួយវិញទៀត បើតាម ប្រមុខការបរទេសរុស្ស៊ី រលកស្អប់អ្នកនិយាយរុស្ស៊ី មិនត្រឹមមាននៅក្នុងរដ្ឋាភិបាល អ៊ុយក្រែន ដែលរុស្ស៊ីចាត់ទុកថា ដឹកនាំដោយក្រុមណាហ្ស៊ីថ្មីតែប៉ុណ្ណោះទេ ប៉ុន្តែ គេឃើញ រលកស្អប់ជនជាតិរុស្ស៊ី នៅក្នុងចំណោមប្រទេសលោកខាងលិច បានកើតមានកាន់តែច្រើន មិនធ្លាប់មានពីមុនមក។
ប៉ុន្មានថ្ងៃក្រោយមេដឹកនាំលោកខាងលិច នាំមុខដោយលោកចូបៃដិន ឡើងនិយាយថ្កោលទោសរុស្ស៊ី នៅមហាសន្និបាតអង្គការសហប្រជាជាតិ ពីរឿងធ្វើសង្រ្គាមឈ្លានពានអ៊ុយក្រែន ហើយចុងក្រោយ គឺការរៀបចំបោះឆ្នោតប្រជាមតិ ដើម្បីកាត់យកទឹកដីអ៊ុយក្រែន បន្ថែមទៀត រដ្ឋមន្រ្តីការបរទេសរុស្ស៊ី (ដល់វេនរបស់ខ្លួនម្តង) បានប្រើវេទិកានៅមហាសន្និបាតអង្គការសហប្រជាជាតិកាលពីថ្ងៃសៅរ៍ម្សិលមិញ ដើម្បីរិះគន់ ចោទប្រកាន់ ក្រុមប្រទេសលោកខាងលិច នាំមុខដោយអាមេរិក កំពុងប៉ុនប៉ង ចង់បំផ្លាញរុស្ស៊ី។
នៅមហាសន្និបាតអង្គការសហប្រជាជាតិ ប្រមុខការបរទេសរុស្ស៊ី ប្រកាសសន្យាការពារទាំងស្រុង តំបន់អ៊ុយក្រែនដែលធ្វើប្រជាមតិភ្ជាប់ខ្លួនទៅសហព័ន្ធរុស្ស៊ី
នៅក្នុងសន្និសីទដ៏វែងដែលរៀបចំឡើងនៅក្រោយការឡើងថ្លែងនៅមហាសន្និបាតអង្គការសហប្រជាជាតិ ប្រមុខការបរទេសរុស្ស៊ីបាននិយាយចំអកដាក់ក្រុមប្រទេសលោកខាងលិចថា កំពុងកើតរោគចិត្ត និងថា រុស្ស៊ីនឹងគោរពឆន្ទៈ ការសម្រេចចិត្តរបស់ប្រជាជនដែលធ្លាប់រស់នៅឈឺចាប់ ជាច្រើនឆ្នាំដោយសាររបបណាហ្ស៊ី នៅអ៊ុយក្រែន និងដែលចង់ភ្ជាប់ខ្លួនទៅរស់នៅជាមួយរុស្ស៊ី។
តាមការចុះផ្សាយរបស់កាសែតក្នុងស្រុករុស្ស៊ី TASS សភាឌូម៉ារបស់រុស្ស៊ី គ្រោងនឹងបើកការពិភាក្សាស្តីពីការដាក់បញ្ចូលតំបន់ ភាគខាងត្បូង និងភាគខាងកើត អ៊ុយក្រែន ទៅក្នុងទឹកដីរុស្ស៊ី នៅថ្ងៃព្រហស្បតិ៍ ទី ២៩កញ្ញា ពោលគឺនៅ២ថ្ងៃ ក្រោយបិទបញ្ចប់ការបោះឆ្នោតប្រជាមតិ នៅក្នុងតំបន់ទាំង៤នោះ។
នៅពេលសួរថា តើរុស្ស៊ីនឹងប្រើអាវុធនុយក្លេអ៊ែរ ដើម្បីការពារទឹកដីអ៊ុយក្រែន ដែលរុស្ស៊ីនឹងដាក់ភ្ជាប់ទៅក្នុងទឹកដីរុស្ស៊ី នៅក្រោយការបោះឆ្នោតប្រជាមតិ ប្រមុខការបរទេសរុស្ស៊ី បានបញ្ជាក់ថា ទឹកដីទាំងឡាយណា ដែលត្រូវភ្ជាប់ចូលក្នុងផែនទី ទឹកដីរុស្ស៊ី ទៅតាមការចែងរបស់រដ្ឋធម្មនុញ្ញ នឹងទទួលបានការការពារពីរដ្ឋរុស្ស៊ី។ មានន័យថា រាល់ច្បាប់ មនោគមវិជ្ជា យុទ្ធសាស្រ្តរបស់សហព័ន្ធរុស្ស៊ី នឹងត្រូវអនុវត្តពេញដែនដីរុស្ស៊ី។ ដោយសង្កត់ធ្ងន់ពីមនោគមវិជ្ជារបស់រុស្ស៊ី ទាក់ទងនឹងការប្រើប្រាស់អាវុធនុយក្លេអ៊ែរ រដ្ឋមន្រ្តីការបរទេសរុស្ស៊ី បានិយាយអះអាងថា រុស្ស៊ី មានមនោគមវិជ្ជាស្តីពីសន្តិសុខនុយក្លេអ៊ែរ ដែលជាឯកសារបើកចំហរ និយាយពីសិទ្ធិប្រើអាវុធប្រល័យជីវិត។
នៅក្រោយប្រធានាធិបតីរុស្ស៊ី ប្រកាសប្រើគ្រប់មធ្យោបាយ ដើម្បីការពារទឹកដីរុស្ស៊ី អនុប្រធានក្រុមប្រឹក្សាសន្តិសុខជាតិរុស្ស៊ី បាននិយាយថា មធ្យោបាយដែលលោកពូទីន លើកឡើងនោះ មានផងដែរ ការប្រើអាវុធយុទ្ធសាស្រ្តនុយក្លេអ៊ែរ។
ចិន និងឥណ្ឌាអំពាវនាវឲ្យមានការចរចាដើម្បីរកច្រកចេញឲ្យវិបត្តិអ៊ុយក្រែន
ឡើងថ្លែងនៅថ្ងៃតែមួយ ជាមួយរដ្ឋមន្រ្តីការបរទេសរុស្ស៊ី នៅមហាសន្និបាតអង្គការសហប្រជាជាតិ ប្រមុខការបរទេសចិន លោកវ៉ាង យី និងរដ្ឋមន្រ្តីការបរទេសឥណ្ឌា Subrahmanyam Jaishankar មិនបានបង្ហាញជំហរគាំទ្ររុស្ស៊ី ហើយក៏មិននិយាយចំៗពីការបោះឆ្នោតប្រជាមតិ របស់រុស្ស៊ី ក្នុងការកាត់យកទឹកដីអ៊ុយក្រែនដែរ។
ប៉ុន្តែ ទោះជាមិនរិះគន់ចំៗរុស្ស៊ី ប៉ុន្តែ គេយល់ខ្លះថា រដ្ឋមន្រ្តីការបរទេសចិន និងរដ្ឋមន្រ្តីការបរទេសឥណ្ឌារអៀសចិត្តដែរ ដែលឃើញ រុស្ស៊ី ដែលចិន និងឥណ្ឌា បដិសេធមិនថ្កោលទោស ក្នុងរឿងធ្វើសង្រ្គាមឈ្លានពានអ៊ុយក្រែន នៅតែបន្ត ផ្គើន រៀបចំ ការបោះឆ្នោតប្រជាមតិ ដើម្បីកាត់យកទឹកដីអ៊ុយក្រែន ហើយនិងបានគំរាមប្រើអាវុធនុយក្លេអ៊ែរទៀត។
ឥណ្ឌា និងចិន ដែលសំឡឹងផលប្រយោជន៍ពីទំនាក់ទំនងសេដ្ឋកិច្ច ជាពិសេសការទិញប្រេង និងអាវុធពីរុស្ស៊ី នៅពេលនេះ ហាក់ដកខ្លួន ឃ្លាតឆ្ងាយបន្តិចពីរុស្ស៊ី និងបានទាមទារឲ្យភាគីជម្លោះត្រលប់មកចរចា និងគោរព ដែនអធិបតេយ្យភាពរៀងៗខ្លួន។
ថ្លែងនៅមហាសន្និបាតអង្គការសហប្រជាជាតិ រដ្ឋមន្រ្តីការបរទេសឥណ្ឌាបាននិយាយថា នៅពេលសង្រ្គាមអ៊ុយក្រែន កាន់តែឆេះសន្ធោសន្ធៅ គេបានសួរពីជំហររបស់ឥណ្ឌា តើនៅខាងណា?
រដ្ឋមន្រ្តីការបរទេសឥណ្ឌាបានបញ្ជាក់ថា ឥណ្ឌាឈរនៅខាងសន្តិភាព នៅខាងភាគីដែលគោរពច្បាប់អន្តរជាតិ និងនៅខាងក្រុមដែលទាមទារឲ្យមានការចរចា ការទូតដើម្បី រកច្រកចេញឲ្យវិបត្តិអ៊ុយក្រែន។ ដូច្នេះ ជំហររបស់ឥណ្ឌាច្បាស់ណាស់គឺគាំទ្រសកម្មភាពរបស់អង្គការសហប្រជាជាតិដើម្បី បើកការចរចាជំរុញសន្តិភាពរវាងអ៊ុយក្រែន និងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ