លោកពូទីនចុះហត្ថលេខាលើច្បាប់ដាក់ទោសធ្ងន់អ្នកដែលមិនព្រមចូលប្រយុទ្ធ នៅសមរភូមិ
ប្រឈមនឹងបាតុកម្មប្រឆាំងការកេណ្ឌទ័ព និងការធ្វើចំណាកស្រុករបស់ពលរដ្ឋរុស្ស៊ី ប្រធានាធិបតីរុស្ស៊ី លោក ពូទីនបានចុះហត្ថលេខា លើកំណែទម្រង់ច្បាប់ព្រហ្មទណ្ឌ ដែលសំដៅដាក់ទោសធ្ងន់រាល់ជនណាដែលបដិសេធមិនចូលប្រយុទ្ធ ក្នុងសមរភូមិ ឬចុះចាញ់ប្រគល់ខ្លួនទៅឲ្យសត្រូវដោយគ្មានការអនុញ្ញាតពីថ្នាក់លើ។ កំណែទម្រង់ច្បាប់ព្រហ្មទណ្ឌទើបត្រូវបានសភាឌូម៉ា បោះឆ្នោតអនុម័ត កាលពីថ្ងៃ សុក្រ នៅក្នុងបរិបទនៃការកេណ្ឌទ័ពនៅរុស្ស៊ី និងត្រូវចូលជាធរមាន ចាប់ពីថ្ងៃសៅរ៍ទី ២៤កញ្ញា។
ចុះផ្សាយនៅថ្ងៃ៖
នៅថ្ងៃសៅរ៍ លោកប្រធានាធិបតីពូទីនបានចុះហត្ថលេខាលើកំណែទម្រង់ច្បាប់ព្រហ្មទណ្ឌ ដែលមានខ្លឹមសារពង្រឹងការដាក់ទោសទាហានណាដែលបដិសេធ មិនប្រយុទ្ធក្នុងសមរភូមិ។ តាមកំណែទម្រង់ច្បាប់ព្រហ្មទណ្ឌ ដែលត្រូវបានផ្សព្វផ្សាយនៅលើគេហទំព័ររដ្ឋាភិបាលរុស្ស៊ី រាល់ទាហានដែលរត់ចោលជួរ ទាហានដែលទម្លាក់អាវុធចុះចាញ់ ដោយគ្មានការអនុញ្ញាត ទាហានដែលបដិសេធមិនប្រយុទ្ធក្នុងសមរភូមិ ឬទាហានដែលមិនស្តាប់បង្គាប់ថ្នាក់លើនឹងត្រូវប្រឈមនឹងការផ្តន្ទាទោសដាក់ពន្ធនាគារ១០ឆ្នាំ។
កំណែទម្រង់ច្បាប់ព្រហ្មទណ្ឌថ្មីមានចែងផងដែរ ពីការដាក់ទោសពន្ធនាគារ ១៥ឆ្នាំសម្រាប់ទាហានដែលធ្វើសកម្មភាពលួចគាស់ទ្រព្យសម្បត្តិប្រជាជន។
កំណែទម្រង់ច្បាប់ព្រហ្មទណ្ឌ ស្តីពីការពង្រឹង ដាក់ទោសធ្ងន់លើ កូនទាហាន ត្រូវបានសភាឌូម៉ាបោះឆ្នោតអនុម័ត កាលពីថ្ងៃសុក្រ នៅក្នុងខណៈពេលដែលវិធានការកេណ្ឌទ័ពរបស់លោកពូទីន ត្រូវប្រឈមនឹងចលនាបាតុកម្ម ប្រឆាំង។
នៅថ្ងៃពុធ ការប្រកាសរបស់លោកពូទីន ដែលគ្រោងកេណ្ឌទ័ពបម្រុងមួយភាគរបស់រុស្ស៊ី ប្រមាណ ៣០០ ០០០នាក់ សម្រាប់ទៅប្រយុទ្ធនៅប្រទេសអ៊ុយក្រែន បានធ្វើឲ្យប្រជាជនរុស្ស៊ី មួយចំនួនភ័យព្រួយ និងសម្រេចចិត្តចាកចេញពីប្រទេស សំដៅប្រទេសជិតខាង និងសហភាពអឺរ៉ុប។
ក្នុងកាលៈទេសៈ ដែលម៉ូស្គូប្រើគ្រប់មធ្យោបាយដើម្បី រើសបញ្ចូលកងទ័ពស្ម័គ្រចិត្ត លោកប្រធានាធិបតីរុស្ស៊ីបានចុះហត្ថលេខាលើក្រឹត្យផ្សេងមួយទៀត ដែលជួយសម្រួលជនបរទេសក្នុងការដាក់ពាក្យសុំសញ្ជាតិរុស្ស៊ី។ តាមក្រឹត្យដែលលោកពូទីនចុះហត្ថលេខាកាលពីថ្ងៃសៅរ៍ ជនបរទេសដែលចូលបម្រើក្នុងជួរកងទ័ពរុស្ស៊ីក្នុងរយៈពេល១ឆ្នាំ នឹងអាចដាក់ពាក្យសុំសញ្ជាតិរុស្ស៊ី ដោយលែងចាំបាច់ត្រូវការ ការបញ្ជាក់ការស្នាក់នៅរយៈពេល៥ឆ្នាំ នៅរុស្ស៊ី ដូចមុន។
ក្រឹត្យប្រធានាធិបតីរុស្ស៊ីសំដៅជាពិសេស ជនអន្តោប្រវេសន៍មកពីបណ្តាប្រទេសអាស៊ីកណ្តាល ដែលកំពុងធ្វើការ ក្នុងទឹកដី រុស្ស៊ី។ នៅថ្ងៃសៅរ៍ ចៅហ្វាយក្រុងម៉ូស្គូបានប្រកាសថា នឹងបើកមជ្ឈមណ្ឌលរើសកងទ័ពនៅជំរំជនអន្តោប្រវេសន៍ នៅប៉ុន្មានថ្ងៃខាងមុខ។ នៅមុនការប្រកាសកេណ្ឌទ័ពរបស់លោកពូទីនទៅទៀត ប្រធានាធិបតីរបស់អ៊ូសបេគីស្ថាន និងកៀហ្ស៊ីស៊ីស្ថាន បានអំពាវនាវឲ្យប្រជាជនរបស់ខ្លួន ដែលកំពុងរស់នៅ ធ្វើការនៅរុស្ស៊ី កុំឲ្យប្រលូកខ្លួន ចូលធ្វើសង្រ្គាម នៅអ៊ុយក្រែន។
ប្រធានាធិបតីអ៊ុយក្រែន លោកហ្សេឡេនស្គីវិញ បានអំពាវនាវកាលពីថ្ងៃសុក្រ ឲ្យពលរដ្ឋអ៊ុយក្រែន ដែលរស់នៅក្នុងតំបន់កាន់កាប់របស់កងទ័ពរុស្ស៊ី រត់លាក់ខ្លួន ឬធ្វើផែនការបំផ្លិចបំផ្លាញប្រយោជន៍រុស្ស៊ី ក្នុងករណីដែលពួកគេត្រូវចាប់បង្ខំឲ្យចូលបម្រើក្នុងជួរកងទ័ពរុស្ស៊ី។
គួរបញ្ជាក់ដែរថា នៅមួយថ្ងៃ ក្រោយ លោកពូទីន ប្រកាសកេណ្ឌទ័ព៣សែននាក់បន្ថែមទៀត សម្រាប់ទៅប្រយុទ្ធនៅអ៊ុយក្រែន ប្រធានាធិបតីអ៊ុយក្រែន បានបង្ហោះសារវីដេអូ មួយ ដែលនៅក្នុងនោះ លោកបាននិយាយជា ភាសារុស្ស៊ី លើកទឹកចិត្តឲ្យប្រជាជនរុស្ស៊ីធ្វើបាតុកម្មប្រឆាំងនយោបាយកេណ្ឌទ័ព ឬបើមិនដូច្នេះទេ រត់ចោលប្រទេស។ ចុងក្រោយ ពួកគេនៅតែ អាចទម្លាក់អាវុធ ចុះចូលជាមួយទាហានអ៊ុយក្រែន ដើម្បីឈប់ឃុបឃិត ប្រព្រឹត្តបទឧក្រិដ្ឋជាមួយ ទាហានរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ