លោកចូ បៃដិនសន្យាដាក់ទណ្ឌកម្មធ្ងន់ធ្ងរ និងបន្ទាន់ ក្នុងករណីរុស្ស៊ីកាត់យកទឹកដីអ៊ុយក្រែន
បន្ទាប់ពីបរិហារថ្កោលទោសរុស្ស៊ី ខ្លាំងៗ នៅមហាសន្និបាតអង្គការសហប្រជាជាតិថា រុស្ស៊ីបានរំលោភច្បាប់របស់អង្គការសហប្រជាជាតិ ប្រធានាធិបតីអាមេរិក លោកចូ បៃដិនបានអះអាង កាលពីថ្ងៃសុក្រម្សិលមិញថា អាមេរិក នឹងដាក់ទណ្ឌកម្មភ្លាមៗ និងធ្ងន់ធ្ងរ ទៅលើរុស្ស៊ី បើសិនរុស្ស៊ីកាត់យកទឹកដីអ៊ុយក្រែនបន្ថែមទៀត នៅក្នុងក្របខណ្ឌនៃការរៀបចំ ការបោះឆ្នោតប្រជាមតិ នៅតំបន់កាន់កាប់ដោយកងទ័ពរុស្ស៊ី ដែលចាប់ផ្តើមពីថ្ងៃសុក្រទី ២៣កញ្ញា រហូតដល់ថ្ងៃទី ២៧កញ្ញាសប្តាហ៍ក្រោយ។
ចុះផ្សាយនៅថ្ងៃ៖
ស្តាប់ - ០២:១៣
ប្រធានាធិបតីអាមេរិក លោកចូ បៃដិនបាននិយាយចាត់ទុកការបោះឆ្នោតប្រជាមតិ ស្តីពីការភ្ជាប់តំបន់ភាគខាងកើត និងខាងត្បូងអ៊ុយក្រែន ទៅក្នុងសហព័ន្ធរុស្ស៊ី ថា ជាការបោះឆ្នោតក្លែងក្លាយ បន្លំបោកប្រាស់ ព្រោះថា នោះគ្រាន់តែលេសមួយទៀតរបស់រុស្ស៊ី ដើម្បីកាត់យកទឹកដីអ៊ុយក្រែន ដោយការចាប់បង្ខំ។
នៅក្នុងសេចក្តីប្រកាសព័ត៌មានកាលពីថ្ងៃសុក្រ ប្រធានាធិបតីអាមេរិកបានព្រមានរុស្ស៊ី របស់លោកពូទីនពីការខូចខាតធ្ងន់ធ្ងរ និងភ្លាមៗ បើសិនម៉ូស្គូ ប្រើការបោះឆ្នោតប្រជាមតិ ដ៏គួរឲ្យអាម៉ាស់ ដើម្បីក្រសោប កាត់យកទឹកដីអ៊ុយក្រែន។
នៅមុនការប្រកាសរបស់ប្រធានាធិបតីអាមេរិក ក្រុមប្រទេសមហាឧស្សាហកម្ម G7បានសេចក្តីថ្លែងការណ៍មួយ ដែលនៅក្នុងនោះ គេបានអំពាវនាវឲ្យគ្រប់ប្រទេសទាំងអស់ ទាត់ចោល កុំទទួលស្គាល់ លទ្ធផលនៃការបោះឆ្នោតប្រជាមតិ ដែលគេវាយតម្លៃថា មិនស្របច្បាប់។
ប្រទេសចិន ដែលជាដៃគូពាណិជ្ជកម្ម និងបដិសេធមិនថ្កោលទោសរុស្ស៊ី នៅក្នុងរឿងធ្វើសង្រ្គាមឈ្លានពានអ៊ុយក្រែន មិនបានចេញមុខរិះគន់រុស្ស៊ី នៅក្នុងរឿងរៀបចំការបោះឆ្នោតប្រជាមតិ ប៉ុន្តែ បានអំពាវនាវឲ្យមានការគោរពដែនអធិបតេយ្យភាពរបស់គ្រប់ប្រទេស។
តាំងពីថ្ងៃសុក្រទី ២៣កញ្ញា រហូតដល់ថ្ងៃអង្គារទី ២៧ កញ្ញា អាជ្ញាធរនៅក្នុងតំបន់ចំនួន៤ នៅភាគខាងកើត និងភាគខាងត្បូង អ៊ុយក្រែន ដែលកំពុងកាន់កាប់ដោយពួកឧទ្ទាមផ្តាច់ទឹកដីនិយម រុស្ស៊ី និងកងទ័ពរុស្ស៊ីបានរៀបចំ ការបោះឆ្នោតប្រជាមតិស្តីពីការភ្ជាប់តំបន់ទាំង៤ ទៅក្នុងសហព័ន្ធរុស្ស៊ី។
អង្គការសម្រាប់សន្តិសុខ ប្រតិបត្តិការនៅអឺរ៉ុប OSCE បានរិះគន់ការរៀបចំការបោះឆ្នោតប្រជាមតិ ដែលធ្វើឡើងនៅក្នុងបរិយាកាសអសន្តិសុខ និងគ្មានការចូលរួមត្រួតពិនិត្យរបស់អ្នកសង្កេតការណ៍អន្តរជាតិ។ នៅពេលប្រជាជនមួយចំនួន នៅក្នុងតំបន់គ្រប់គ្រងដោយពួកឧទ្ទាមនិយមរុស្ស៊ី បង្ហាញទឹកចិត្តចង់ទៅរួមរស់ជាមួយមាតុភូមិរុស្ស៊ី ប្រជាជនអ៊ុយក្រែន នៅតំបន់ភាគខាងត្បូង Kerson និងZaporijjia បានលើកឡើងពីការដាក់សម្ពាធ នៅពេល អាជ្ញាធរលើកបន្តុបដោយរុស្ស៊ី និងទាហានរុស្ស៊ី ជាអ្នកមកគោះទ្វារតាមផ្ទះ ដើម្បី ប្រាប់ឲ្យពួកគេ ទម្លាក់សន្លឹកឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ