តើការបំផ្ទុះរថយន្តបំផ្លាញ ស្ពានគ្រីមេ អាចទៅដុតកំហឹងរបស់លោកពូទីន?
ចុះផ្សាយនៅថ្ងៃ៖
ស្តាប់ - ០៧:៣១
គណៈកម្មាធិការស៊ើបអង្កេត រុស្ស៊ីបានបើកការស៊ើបអង្កេតឧក្រិដ្ឋកម្មទៅលើហេតុការណ៍ផ្ទុះបំផ្លាញ ស្ពានគ្រីមេ នៅព្រឹកថ្ងៃសៅរ៍នេះ។ តាមគណៈកម្មាធិការស៊ើបអង្កេតរុស្ស៊ី ដែលដកស្រង់ផ្សាយដោយកាសែតក្នុងស្រុក នៅវេលាម៉ោង ៦ព្រឹក ម៉ោងនៅរុស្ស៊ី រថយន្តដឹកទំនិញមួយគ្រឿងបានផ្ទុះ នៅលើស្ពានគ្រីមេ និងរាលដាល ធ្វើឲ្យផ្ទុះឆេះស៊ីទែនដឹកប្រេង ដែលគេកំពុងដឹកសំដៅឧបទ្វីបគ្រីមេ ដែលរុស្ស៊ី បានកាត់យកពីអ៊ុយក្រែន កាលពីឆ្នាំ ២០១៤។តាមអាជ្ញាធររុស្ស៊ី តុល្យការចុងក្រោយបង្ហាញថា មានមនុស្ស៣នាក់ស្លាប់នៅក្នុងហេតុការណ៍បំផ្ទុះឆេះស្ពានគ្រីមេនៅថ្ងៃទី ៨តុលា។ តើការបំផ្ទុះបំផ្លាញស្ពានដែលជាសមិទ្ធិផលរបស់លោកពូទីន និងជានិមិត្តរូបនៃការកាត់យកទឹកដីអ៊ុយក្រែន ពីសំណាក់រុស្ស៊ី អាចជាស្នាដៃរបស់អ៊ុយក្រែន?
រូបភាពនៅលើបណ្តាញសង្គម ដូចជាតេឡេក្រាម និងទ្វីតធ័រ ដែលអាជ្ញាធររុស្ស៊ីនៅទៀបកោះគ្រីមេ បានបង្ហោះផ្សាយនៅព្រឹកព្រលឹមថ្ងៃសៅរ៍ បានបង្ហាញភ្លើងឆេះសន្ធោសន្ធៅលើស្ពានគ្រីមេ ដែលតភ្ជាប់ពីទឹកដីរុស្ស៊ី ទៅកាន់គ្រីមេ។
តាមគណៈកម្មាធិការស៊ើបអង្កេតរុស្ស៊ី នៅម៉ោងប្រមាណ ៦ព្រឹកនេះ រថយន្តដឹកទំនិញមួយគ្រឿងបានផ្ទុះ នៅលើស្ពាន នៅប៉ែកខាងទឹកដីរុស្ស៊ី។ កម្លាំងផ្ទុះរបស់វាបានរាលដាលទៅដល់ស៊ីទែនដឹកប្រេង នៅលើស្ពានរទេះភ្លើងក្បែរនោះ។ តាមអាជ្ញាធររុស្ស៊ី ស៊ីទែនដឹកប្រេង ចំនួន ៧បានផ្ទុះឆេះដ៏សន្ធោសន្ធៅនៅលើស្ពាន មុននឹងត្រូវគេពន្លត់ចប់សព្វគ្រប់មកវិញ។
នៅក្រោយ ហេតុការណ៍ផ្ទុះឆេះ នៅលើស្ពាន អាជ្ញាធរបានបិទចរាចរណ៍លើស្ពានទាំងស្រុង ព្រោះថា កម្លាំងផ្ទុះរបស់រថយន្ត បានទៅបំផ្លាញ ធ្វើឲ្យស្ពានមួយផ្នែក សម្រាប់ការចរាចរណ៍រថយន្ត បាក់ធ្លាក់ចូលក្នុងទឹក ចំណែក ស្ពានរទេះភ្លើងរងការខូចខាតយ៉ាងដំណំ ដោយសារភ្លើងឆេះស៊ីទែនប្រេង។
អ្នកទទួលខុសត្រូវរុស្ស៊ីសម្រាប់តំបន់ខឺសិន ដែលជាក្រុងជិតខាងរបស់គ្រីមេបាននិយាយថា ដោយសារកម្លាំងផ្ទុះឆេះខ្លាំង គេត្រូវការពេលវេលាយ៉ាងហោច ២ខែ ដើម្បីជួសជុល មុននឹងដាក់ឲ្យដំណើរការប្រើប្រាស់ឡើងវិញ។
តើស្ពានគ្រីមេសំខាន់ប៉ុណ្ណាសម្រាប់រុស្ស៊ី ?
ស្ពានគ្រីមេជាច្រកផ្លូវដ៏សំខាន់សម្រាប់រុស្ស៊ី មិនថា ក្នុងផ្នែកយុទ្ធសាស្រ្តយោធានៅអ៊ុយក្រែន និងភូមិសាស្រ្តនយោបាយរបស់រុស្ស៊ី។
ស្ពានគ្រីមេ ជានិមិត្តរូបនៃនយោបាយភ្ជាប់ទឹកដីរបស់រុស្ស៊ី នៅបន្ទាប់ពី រុស្ស៊ី កាត់យកដោយខុសច្បាប់ ឧបទ្វីបគ្រីមេ ពីអ៊ុយក្រែន នៅឆ្នាំ ២០១៤។ ត្រូវដឹងថា នៅក្រោយប្រកាសភ្ជាប់តំបន់គ្រីមេទៅក្នុងទឹកដីរុស្ស៊ី នៅឆ្នាំ ២០១៤ ប្រធានាធិបតីរុស្ស៊ី លោកពូទីនបានបញ្ជាឲ្យគេសាងសង់ស្ពានតភ្ជាប់ពីដែនដីរុស្ស៊ីភាគខាងត្បូង ទៅកាន់ឧបទ្វីបគ្រីមេ។ ជាមួយថវិកាសាងសង់ មហាសាល ៣,៧ពាន់លានដុល្លារ លោកពូទីនបានទៅសម្ពោធ ដាក់ឲ្យប្រើប្រាស់ស្ពាន នៅឆ្នាំ ២០១៨។ មន្រ្តីរុស្ស៊ីឧស្សាហ៍និយាយអួតសរសើរស្ពាន គ្រីមេ ថា ជាមោទនភាពរបស់រុស្ស៊ី ព្រោះថា ស្ពានប្រវែង ជាង ១៧គីឡូម៉ែត្រ ជាស្ពានឆ្លងសមុទ្រដ៏វែងជាងគេនៅអឺរ៉ុប។
មួយវិញទៀត ស្ពានគ្រីមេមិនត្រឹមជានិមិត្តរូបនៃនយោបាយរុស្ស៊ី កាត់យកទឹកដីគ្រីមេរបស់អ៊ុយក្រែន ប៉ុន្តែ វាជាច្រកសំខាន់ដែលរុស្ស៊ីប្រើ សម្រាប់ដឹកជញ្ជូនទ័ព ភស្តុភា និងសព្វាវុធ ទៅសមរភូមិប្រយុទ្ធនៅទឹកដីអ៊ុយក្រែន។
តើការបំផ្ទុះរថយន្ត ដែលឈានទៅបំផ្លាញ ស្ពាន គ្រីមីមួយផ្នែក ជាស្នាដៃអ្នកណា?
នៅថ្ងៃសៅរ៍ ភាគីរុស្ស៊ីនៅមិនទាន់ បានកំណត់ ចោទប្រកាន់ត្រង់ៗថា ការបំផ្ទុះរថយន្តដែលបានបំផ្លាញស្ពានគ្រីមេជាស្នាដៃរបស់អ៊ុយក្រែននោះទេ។ តាមអ្នកនាំពាក្យរបស់ក្រេមឡាំង ប្រធានាធិបតីរុស្ស៊ី លោកពូទីនបានបញ្ជាឲ្យគេបើកការស៊ើបអង្កេត បន្ទាន់ នៅក្រោយការផ្ទុះឆេះ នៅលើស្ពានគ្រីមេ។
ប៉ុន្តែ ក្នុងអំឡុងពេលរង់ចាំការសន្និដ្ឋានរបស់គណៈកម្មការស៊ើបអង្កេត ប្រធានសភា នៅតំបន់គ្រីមេដែលលើកបន្តុបដោយរដ្ឋអំណាចរុស្ស៊ី បានបរិហាររួចហើយថា គឺអ៊ុយក្រែនដែលជាមេគំនិតបំផ្លាញស្ពានគ្រីមេ។
អ៊ុយក្រែនអាចជាផ្ទាំងស៊ីប ត្រូវគេចង្អុរមុខចោទប្រកាន់ ព្រោះថា ការបំផ្លិចបំផ្លាញប្រយោជន៍រុស្ស៊ី នៅទឹកដីគ្រីមេ ជាក្តីប្រាថ្នារហូតមករបស់អ៊ុយក្រែន។ កន្លងមក អ៊ុយក្រែនក៏ធ្លាប់រងការចោទប្រកាន់ថា ជាអ្នកនៅពីក្រោយ ការបំផ្ទុះគ្រាប់ជាច្រើន ដង នៅទឹកដីគ្រីមេ។ ជាក់ស្តែង នៅបន្ទាប់ពីរុស្ស៊ី លើកឡើងពីករណី បង្កវិច្ឆេទកម្ម ទៅលើមូលដ្ឋាន ទ័ពរុស្ស៊ី Djankoïនៅគ្រីមេ កាលពីខែ សីហា អ៊ុយក្រែនក្រោយមក បានចេញមុខទទួលស្គាល់ថា ការបំផ្ទុះបំផ្លាញកន្លែងស្តុកគ្រាប់របស់រុស្ស៊ី នៅមូលដ្ឋានទ័ពនៅគ្រីមេ ជាស្នាដៃរបស់ខ្លួន។
ប៉ុន្តែ លើកនេះ អ៊ុយក្រែនមិនបានចេញមុខប្រកាសទទួលខុសត្រូវលើការបំផ្ទុះគ្រាប់ ដែលបំផ្លាញស្ពានគ្រីមេ។ ផ្ទុយទៅវិញ មន្រ្តីធំៗរបស់អ៊ុយក្រែន ដែលនៅក្នុងនោះមានផងដែរទីប្រឹក្សាសន្តិសុខជាតិរបស់លោកប្រធានាធិបតីហ្សេឡេនស្គី បានសរសេរសារទ្វីតជាបន្តបន្ទាប់ ចំអកឡកឡើយដាក់រុស្ស៊ី ដូចជាថា ការផ្ទុះឆេះស្ពាន គ្រាន់តែជាការចាប់ផ្តើម ឬជាអំណោយសម្រាប់បុណ្យខួបកំណើតរបស់លោកពូទីនជាដើម។
នៅក្នុងសារទ្វីតដែលបង្ហាញរូបភាពភ្លើងឆេះស្ពាន លោកMykhailo Podolyak ទីប្រឹក្សារបស់ប្រធានាធិបតីអ៊ុយក្រែនបានចាត់ទុកហេតុការណ៍ឆេះស្ពាននៅគ្រីមេថា គ្រាន់តែជាការចាប់ផ្តើម និងថា អ្វីដែលខុសច្បាប់ គួរតែត្រូវបំផ្លាញ។ អ្វីដែលលួចពីអ៊ុយក្រែន ត្រូវត្រលប់មកអ៊ុយក្រែនវិញ និង អ្វីៗដែលស្ថិតក្រោមការកាប់កាប់របស់រុស្ស៊ី នឹងត្រូវវាយរំដោះឲ្យមានសេរីភាពឡើងវិញ។
មន្រ្តីអ៊ុយក្រែនខ្លះបានប្រៀបករណីផ្ទុះបំផ្លាញស្ពានគ្រីមេលើកនេះ ទៅនឹងហេតុការណ៍ឆេះលិចនាវាចម្បាំងរបស់រុស្ស៊ី MOSKVAកាលពីខែមេសា។ ដើមឡើយ រុស្ស៊ី អះអាងថា ត្រូវខូចបំផ្លាញ ដោយសារភ្លើងឆេះ ពីខាងក្នុង ប៉ុន្តែ តាមពិត គឺត្រូវរងគ្រាប់មីស៊ីលរបស់អ៊ុយក្រែន។ កាលណោះ ដើម្បីវាយសងសឹកវិញ រុស្ស៊ី បានបាញ់មីស៊ីលយ៉ាងសន្ធឹកវាយប្រហារលើកងទ័ពអ៊ុយក្រែន។
តើរុស្ស៊ីនឹងប្រតិកម្មយ៉ាងណា?
នៅពេលមានហេតុការណ៍ផ្ទុះគ្រាប់ នៅ ទឹកដីគ្រីមេដែលជាកម្មសិទ្ធិរបស់រុស្ស៊ី អាជ្ញាធររុស្ស៊ីធ្លាប់បានអះអាងថា ស្ពានគ្រីមេ ដែលស្ថិតឆ្ងាយ ពីសមរភូមិអ៊ុយក្រែន (ស្ថិតនៅមួយចំហៀងទៀតរបស់ឧបទ្វីបគ្រីមេ) មិនងាយនឹងរងការវាយប្រហារពីអ៊ុយក្រែននោះទេ។
រុស្ស៊ីផ្ទាល់ក៏ធ្លាប់បានព្រមានរួចហើយថា នឹងធ្វើការវាយបក សងសឹកវិញ បើសិន កងទ័ពអ៊ុយក្រែនវាយប្រហារស្ពានគ្រីមេ និងហេដ្ឋារចនាសម្ព័ន្ធផ្សេងទៀត នៅគ្រីមេ ដែលរុស្ស៊ីបានចាត់ចូលជាដែនដីរបស់ខ្លួនតាំងពីឆ្នាំ ២០១៤។
បើសិនអ៊ុយក្រែន ជាអ្នកនៅពីក្រោយហេតុការណ៍បំផ្ទុះរថយន្តដែលឈានទៅបំផ្លាញស្ពានគ្រីមេ មែន នោះ វាគឺចេតនា បំបាក់មុខមាត់រុស្ស៊ី ខ្លាំងណាស់ ជាពិសេសនៅក្នុងកាលៈទេសៈដែលកងទ័ពរុស្ស៊ីចុះខ្សោយនៅសមរភូមិប្រយុទ្ធជាមួយអ៊ុយក្រែន។
នៅព្រឹកមិញនេះ អ្នកនាំពាក្យរបស់ក្រសួងការបរទេសរុស្ស៊ីបានចាត់ទុក ពាក្យចំអករបស់មន្រ្តីអ៊ុយក្រែន ទាក់ទងនឹងការផ្ទុះឆេះស្ពាន គ្រីមេថា ជាការស្តែងឲ្យឃើញ ពីចរិកភេវរនិយមរបស់អ៊ុយក្រែន។ ចំណែក សមាជិកសភារុស្ស៊ីម្នាក់ទៀត បានទាមទារឲ្យមានការឆ្លើយតបជាបន្ទាន់ បើសិនរុស្ស៊ីមិនចង់ឲ្យមានការវាយប្រហារភេវរកម្មបែបនេះ កើតឡើងកាន់តែច្រើននៅរុស្ស៊ី។
ប្រឈមនឹងបរាជ័យក្នុងសង្រ្គាមអ៊ុយក្រែន លោកពូទីនធ្លាប់បានគំរាមប្រើអាវុធនុយក្លេអ៊ែរតាក់ទិក ក្នុងសង្រ្គាមអ៊ុយក្រែន។ ដូច្នេះ តើការបំផ្ទុះបំផ្លាញ ស្ពានគ្រីមេ ជាមេភ្លើងឈានទៅជំរុញ ឲ្យប្រធានាធិបតី ប្រើធម៌ក្តៅនៅក្នុងសង្រ្គាមអ៊ុយក្រែន? រឿងនេះ គ្មានអ្នកណាដឹង ក្រៅពីលោកពូទីន នោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ