អ៊ុយក្រែនរៀបចំវេទិកាអន្តរជាតិស្តីពីគ្រីមេ ម៉ូស្គូស្រែកប្រឆាំង
ប្រតិភូតំណាងឱ្យប្រទេសចំនួនជាង៥០ កំពុងជួបប្រជុំគ្នានៅថ្ងៃចន្ទទី ២៣សីហា ២០២១ នៅទីក្រុង គៀវ ដើម្បីទាមទារយកតំបន់គ្រីមេ ពីរុស្ស៊ីមកវិញ។ នេះជាលើកទីមួយហើយ ដែលអ៊ុយក្រែនបានរៀបចំវេទិកាអន្តរជាតិដើម្បីគ្រីមេ គិតចាប់តាំងពីរុស្ស៊ីបានក្រសោបយកដែនដីគ្រីមេកាលពីឆ្នាំ២០១៤មក។ ភ្លាមមួយរំពេច ម៉ូស្គូបានចេញសេចក្តីថ្លែងការណ៍បរិហារវេទិកាអន្តរជាតិនេះភ្លាមដែរ។
ចុះផ្សាយនៅថ្ងៃ៖
ស្តាប់ - ០២:១៣
"កិច្ចខិតខំប្រឹងប្រែងរួមរបស់អន្តរជាតិ ត្រូវតែរុញរុស្ស៊ីឱ្យចូលមកអង្គុយចរចា អំពី ដែនដីគ្រីមេរបស់អ៊ុយក្រែន។ អ៊ុយក្រែនតែម្នាក់ឯងមិនអាចយកគ្រីមេបានមកវិញទេ ! ត្រូវតែមានការគាំទ្រកំរិតអន្តរជាតិ ទើបអាចរំដោះតំបន់គ្រីមេបាន។" នេះជាសុន្ទរកថារបស់លោក រ៉ូឡូឌីមៀរ ហ្សេឡេនស្គី Volodynmyr Zelenski ប្រធានាធិបតីអ៊ុយក្រែន នាឱកាសបើកវេទិកាអន្តរជាតិស្តីពីគ្រីមេ ដោយបានទទួលការគាំទ្រពីប្រធានក្រុមប្រឹក្សាសហភាពអឺរ៉ុប លោក Charles Michelថា អ៊ុយក្រែននឹងមិនឯកា ហើយគ្រីមេគឺជាអ៊ុយក្រែន។ "ការក្រសោបយកគ្រីមេ" ជាទង្វើរំលោភបំពានសន្តិសុខអឺរ៉ុបយ៉ាងងងើលបំផុត។ នេះបើតាមប្រសាសន៍រប់សលោកនាយករដ្ឋមន្ត្រីស៊ុយអែត។
នេះជាលើកទីមួយ គិតចាប់តាំងគ្រីមេធ្លាក់ក្នុងកណ្តាប់ដៃរុស្ស៊ីមក ដែលមានការរៀបចំវេទិកាអន្តរជាតិដើម្បីគ្រីមេ នៅលើទឹកអ៊ុយក្រែន។ វេទិកាអន្តរជាតិ ដែលកំពុងប្រព្រឹត្តទៅនៅថ្ងៃចន្ទទី ២៣សីហានេះ បានការចូលរួមពីតំណាងមកជាច្រើនប្រទេស និងប្រមុខរដ្ឋ-រដ្ឋាភិបាល ១៥ប្រទេស មានអាទិ៍ប៉ូឡូញ ម៉ុលដាវី ឬស៊ុយអែតជាដើម។ ចំណែកបារាំង អាល្លឺម៉ង់ សហរដ្ឋអាមេរិក និងតួកគី បានបញ្ជូនតំណាងត្រឹមជារដ្ឋមន្ត្រីឬប្រធានសភាមកចូលរួម។
ប៉ុន្តែដោយគ្មានការភ្ញាក់ផ្អើល ក្រេមឡាំងបានបញ្ចេញប្រតិកម្មបរិហារភ្លាម ដោយចាត់ទុកវេទិកាអន្តរជាតិស្តីពីគ្រីមេ ជាព្រឹត្តិការណ៍ប្រឆាំងនឹងរុស្ស៊ី។ បើតាមសារព័ត៌មានអ៊ុយក្រែន រុស្ស៊ីបានដាក់សម្ពាធលើបណ្តាប្រទេសជាច្រើន តាំងពីមុនវេទិកាបើក មិនឱ្យមកចូលរួមក្នុងជំនួបអន្តរជាតិនេះទេ និងថែមទាំងបានដាក់ទណ្ឌកម្មលើរូបលោករដ្ឋមន្ត្រីក្រសួងការបរទេសអ៊ុយក្រែន Dmytro Kouleba ដើម្បីសងសឹងចំពោះសកម្មភាពរៀបចំវេទិកាអន្តរជាតិស្តីពីគ្រីមេនេះ។
សូមរំឭកថា គ្រីមេបានធ្លាក់ក្នុងកណ្តាប់ដៃរុស្ស៊ី នៅខែមីនាឆ្នាំ២០១៤ ក្រោយមានផ្ទុះចលនាបដិវត្តនៅទីក្រុងគៀវ ដែលម៉ូស្គូចាត់ទុកជារដ្ឋប្រហារ។ ហេតុការណ៍នោះបានជំរុញឱ្យមានសង្គ្រាមនៅភាគខាងកើតអ៊ុយក្រែន ទល់នឹងចលនាទាមទារផ្តាច់ទឹកដីគាំទ្រដោយរុស្ស៊ីទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ