បោះឆ្នោតពាក់កណ្តាលអាណត្តិអាមេរិក៖រលករបស់បក្សសាធារណរដ្ឋហាក់មិនសូវបោកបក់ខ្លាំងដូចការរំពឹងទុក
ចុះផ្សាយនៅថ្ងៃ៖
ស្តាប់ - ០៤:៥៧
នៅសហរដ្ឋអាមេរិក លទ្ធផលនៃការបោះឆ្នោតពាក់កណ្តាលអាណត្តិនាថ្ងៃអង្គារ ទី៨ វិច្ឆិកាបានបង្ហាញជាបឋមថា ក្តីសង្ឃឹមរបស់គណបក្សសាធារណរដ្ឋក្នុងការដណ្តើមអសនៈនៅក្នុងសភា និងនៅក្នុងព្រឹទ្ធសភាពីដៃគណបក្សប្រជាធិបតេយ្យមានតិចតួចជាងការរំពឹងទុក។ ខណៈនេះ ការរាប់សន្លឹកឆ្នោតកំពុងបន្តធ្វើដែលលទ្ធផលផ្លូវការអាចមានប្រកៀកគ្នារវាងគណបក្សសាធារណរដ្ឋដែលអតីតប្រធានាធិបតីលោកដូណាល់ ត្រាំកំពុងចេញមុខខ្លាំង និងគណបក្សប្រជាធិបតេយ្យរបស់ប្រធានាធិបតីកំពុងកាន់អំណាចលោកចូ បៃដិន។
គេអាចនិយាយបានទេថា លទ្ធផលបឋមនៃការបោះឆ្នោតពាក់កណ្តាលអាណត្តិនៅអាមេរិកពេលនេះជារឿងគួរឲ្យភ្ញាក់ផ្អើលគ្មានអ្នកណាបានរង់ចាំ និងនឹកស្មានដល់សោះឡើយពិសេសគឺគណបក្សសាធារណរដ្ឋ។ ក្តីសង្ឃឹមពីដំបូងទីរបស់គណបក្សសាធារណរដ្ឋ គឺដណ្តើមសភា និងបើអាច ដណ្តើមព្រឹទ្ធសភាពីកណ្តាប់ដៃគណបក្សប្រជាធិបតេយ្យដែលកំពុងមានសំឡេងភាគច្រើនដាច់ខាត។ គួរបញ្ជាក់ថានៅអាមេរិក ពណ៌ក្រហមតំណាងឲ្យគណបក្សសាធារណរដ្ឋ ហើយពណ៌ខៀវតំណាងឲ្យគណបក្សប្រជាធិបតេយ្យ។
អ្វីដែលគេគិតពីដំបូង ក្រុមអ្នកប្រជាធិបតេយ្យបាត់បង់សភា មានន័យថា សំឡេងភាគច្រើននៅក្នុងសភានឹងធ្លាក់ទៅក្នុងដៃគណបក្សសាធារណរដ្ឋវិញ។ តែបើតាមលទ្ធផលបថម គណបក្សពណ៌ក្រហមអាចទទួលបានចំនួនអសនៈលើសគណបក្សពណ៌ខៀវនៅសភាមែន តែមិនលើសលប់ដូចការរំពឹងទុកនោះឡើយ។ ក៏ប៉ុន្តែ និងអ្វីដែលកំពុងបន្តមិនច្បាស់លាស់ គឺនៅព្រឹទ្ធសភាដោយគេនៅមិនទាន់ដឹងថា តើនឹងធ្លាក់ទៅក្នុងដៃរបស់គណបក្សសាធារណរដ្ឋ ឬក៏នឹងបន្តស្ថិតក្នុងដៃគណបក្សប្រជាធិបតេយ្យដដែល។
ភាពស្រពិចស្រពិលដោយសារគេកំពុងរង់ចាំលទ្ធផលនៅក្នុងរដ្ឋសំខាន់ៗ ដូចយ៉ាង Georgia ឬរដ្ឋ Nevada។ ដោយឡែក អសនៈនៅក្នុងរដ្ឋ Pennsylvania ដែលរហូតមកដល់ពេលនេះស្ថិតក្នុងដៃគណបក្សសាធារណរដ្ឋបានធ្លាក់ទៅក្នុងដៃគណបក្សប្រជាធិបតេយ្យវិញ។ ក្រៅពីអសនៈនៅក្នុងសភា និងនៅព្រឹទ្ធសភា ចំណាប់អារម្មណ៍ក៏មានលើអសនៈជាអភិបាលរដ្ឋ។ នៅក្នុងរដ្ឋខ្លះ អភិបាលរដ្ឋផុតអាណត្តិមកពីគណបក្សប្រជាធិបតេយ្យ ឬគណបក្សសាធារណរដ្ឋបានជាប់ឆ្នោតជាថ្មី និងរដ្ឋខ្លះទៀតបានប្តូរអ្នកប្រជាធិបតេយ្យទៅអ្នកសាធារណរដ្ឋ ឬពីអ្នកសាធារណរដ្ឋទៅអ្នកប្រជាធិបតេយ្យ។
រលកពណ៌ក្រហមតិចតួចអាចធ្វើលោកបៃដិនក្រពុលមុខ?
នៅទីបំផុត ប្រធានាធិបតីកំពុងកាន់អំណាចលោកបៃដិនបានរួចផុតពីព្យុះរលកបោកបក់ខ្លាំងពណ៌ក្រហម។ តែអ្វីដែលគណបក្សសាធារណរដ្ឋ ឬគណបក្សពណ៌ក្រហមបានទទួលពេលនេះអាចគ្រប់គ្រាន់ដើម្បីរារាំងលោកបៃដិនមិនឲ្យដឹកនាំដោយរលូនដូចមុន។ អ្វីដែលលោកបៃដិនអាចរង់ចាំនាពេលខាងមុខជាមួយនឹងសភាស្ថិតក្នុងដៃគណបក្សសាធារណរដ្ឋ គឺភាពជាប់គាំងមិនចេះចប់ មិនចេះហើយនៅក្នុងគម្រោងជាច្រើនដែលលោកចង់ធ្វើ។ ក្រុមអ្នកសាធារណរដ្ឋច្បាស់ជាមិនទុកឲ្យលោកបៃដិនចង់ធ្វើអ្វីស្រេចនឹងចិត្តបានឡើយ។
សំណុំរឿងក្តៅៗដែលគេសម្លឹងឃើញ គឺទាក់ទងនឹងថវិកាដែលអាចបង្កឲ្យមានភាពជាប់គាំងដែលគេហៅ shutdown ទៅលើរដ្ឋបាលសហព័ន្ធ។ ក្រៅពីនេះ ចំណោតមួយទៀតដែលគ្រប់គ្នាកំពុងសំឡឹងឃើញពីការបោះឆ្នោតពាក់កណ្តាលអាណត្តិពេលនេះ គឺការបោះឆ្នោតប្រធានាធិបតីថ្មីនៅឆ្នាំ ២០២៤ ខាងមុខ។ គេនៅមិនទាន់ដឹងថា តើលោកបៃដិនដែលនឹងមានអាយុ ៨០ឆ្នាំនៅប៉ុន្មានថ្ងៃខាងមុខនឹងឈរឈ្មោះអាណត្តិថ្មីឬអត់ទេ។ តែលោកបៃដិនធ្លាប់បានប្រាប់ពីបំណងចង់ឈរឈ្មោះជាថ្មី។
ចំណែកអតីតប្រធានាធិបតីលោកដូណាល់ ត្រាំក៏គេនៅមិនទាន់ដឹងថា តើលោកនឹងសម្រេចចិត្តត្រឡប់ទៅឈរឈ្មោះជាថ្មី ឬយ៉ាងណា។ តែលោកត្រាំបានបង្ហើបប្រាប់ថា លោកនឹងប្រកាសមហាដំណឹងមួយនៅថ្ងៃទី១៥ វិច្ឆិកាខាងមុខ។ មួយវិញទៀត និងអ្វីដែលគេអាចទាញបានពីលទ្ធផលបោះឆ្នោតពាក់កណ្តាលអាណត្តិពេលនេះ គឺអាមេរិកកំពុងបន្តពុះចែកដែលមានតាំងពីក្រោយបរាជ័យរបស់លោកដូណាល់ ត្រាំនាការបោះឆ្នោតក្នុងឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ