សន្និសីទCop27 ដល់ថ្ងៃបិទបញ្ចប់ ប៉ុន្តែ ការចរចានៅតែជាប់គាំង
ចុះផ្សាយនៅថ្ងៃ៖
ស្តាប់ - ០៧:២៩
នៅប្រទេសអេហ្ស៊ីប សន្និសីទអន្តរជាតិស្តីពីអាកាសធាតុ Cop27បានឈានចូលដល់ថ្ងៃបិទបញ្ចប់ នៅថ្ងៃសុក្រនេះ។ ប្រឈមនឹងគ្រោះមហន្តរាយធម្មជាតិដែលបង្កឡើងដោយកត្តាប្រែប្រួលអាកាសធាតុ ពិភពលោកត្រូវការចាំបាច់ កិច្ចព្រមព្រៀងដ៏មហិច្ឆតា ដើម្បីទប់ស្កាត់កុំឲ្យកំដៅលើផែនដី កើនឡើងច្រើនជាង ១,៥អង្សា។ ប៉ុន្តែ នៅតែប៉ុន្មានម៉ោងទៀតដែលសន្និសីទត្រូវបិទបញ្ចប់ ការខ្វែងគំនិតគ្នានៅតែមាន។ ការចរចាដើម្បីឈានទៅចេញសេចក្តីថ្លែងការណ៍រួម នៅតែជាប់គាំង។ តើអ្វីជាគន្លឹះខ្ទាស់ធ្វើឲ្យការចរចានៅCop27ជាប់គាំង?
ចាប់ផ្តើមបើកតាំងពីថ្ងៃទី ៦វិច្ឆិកា សន្និសីទអាកាសធាតុ Cop27 រយៈពេល២សប្តាហ៍ បានឈានដល់ថ្ងៃបិទបញ្ចប់ នៅថ្ងៃសុក្រនេះ។ ប៉ុន្តែ នៅថ្ងៃចុងបញ្ចប់នៃសន្និសីទCop27 រដ្ឋមន្រ្តីការបរទេសអេហ្ស៊ីប និងជាប្រធានសន្និសីទលោក Sameh Choukri.បានប្រកាសថា សន្និសីទនឹងត្រូវពន្យាពេលមួយថ្ងៃបន្ថែម រហូតដល់ថ្ងៃសៅរ៍។ លោកបានអំពាវនាវឲ្យគ្រប់ភាគីបង្កើនសន្ទុះចរចា ព្រោះថា នៅមានបញ្ហាជាច្រើនដែលគេនៅបន្តខ្វែងគំនិតគ្នា ដូចជាការបង្កើតមូលនិធិសម្រាប់ការខូចខាត និងការបាត់បង់ដោយសារគ្រោះការប្រែប្រួលអាកាសធាតុ ការសន្យាកាត់បន្ថយការបញ្ចេញឧស្ម័នកាបូនិក។ល។និង។ល។
ដូចសន្និសីទអាកាសធាតុមុនៗ Cop27 នៅអេហ្ស៊ីប ផ្តោតសំខាន់ទៅលើការចរចាក្នុងសំណុំរឿងពីរ។ រឿងទី១ គឺការជំរុញឲ្យប្រទេសទាំងអស់នៅក្នុងពិភពលោក ប្រឹងប្រែងបន្ថែមទៀត ដើម្បីកាត់បន្ថយ ការបញ្ចេញឧស្ម័នផ្ទះកញ្ចក់ ព្រោះថា ការប្រឹងប្រែងសព្វថ្ងៃនេះ មិនគ្រប់គ្រាន់ធ្វើឲ្យ គេអាចសម្រេចតាមគោលដៅ ការសន្យា ១,៥អង្សា ដែលមានចែងនៅក្នុងកិច្ចព្រមព្រៀងក្រុងប៉ារីស ស្តីពីអាកាសធាតុ ឆ្នាំ ២០១៥។ សព្វថ្ងៃនេះ ការបញ្ចេញឧស្ម័នកាបូនិក ដែលជាឧស្ម័នផ្ទះកញ្ចក់ នៅតែមានច្រើន នឹងអាចកើនឡើងខ្ពស់មិនធ្លាប់មាន នៅឆ្នាំ ២០២២នេះ។
អ្នកជំនាញវាយតម្លៃថា ការបញ្ចេញឧស្ម័នកាបូនិក ដោយសារសកម្មភាពរបស់មនុស្សសព្វថ្ងៃ អាចធ្វើឲ្យផែនដីឡើងកំដៅ ប្រមាណ ២,៨អង្សា នៅចុងសតវត្សរ៍។ សម្រាប់ អគ្គលេខាធិការអង្គការសហប្រជាជាតិ នេះគឺជាសញ្ញាទាញគ្រោះអាសន្ន គ្រោះមហន្តរាយជីវិត មនុស្ស ព្រោះថា សព្វថ្ងៃ ផែនដីឡើងកំដៅប្រមាណ ១,២អង្សាប៉ុណ្ណោះ ប៉ុន្តែ មនុស្សលោកកំពុងជួបរងគ្រោះខ្លាំងរួចទៅហើយ ដោយសារគ្រោះធម្មជាតិ គ្រោះទឹកជំនន់ គ្រោះរាំងស្ងួត អាកាសធាតុក្តៅខ្លាំង មិនធ្លាប់ខ្យល់ព្យុះកាន់តែញឹកញយ និងមានកម្លាំងខ្លាំង។
សំណុំរឿងទី២ ដែលគេកំពុងចរចា តថ្លៃគ្នាខ្លាំង គឺរឿងបង្កើត មូលនិធិសម្រាប់ជួយថ្លៃខូចខាត និងការបាត់បង់ ដោយសារគ្រោះមហន្តរាយធម្មជាតិ។ នៅ ២សប្តាហ៍នេះ ការចរចាភាគច្រើននៅក្នុងCop27 ផ្តោតនិយាយច្រើនតែពីរឿងបង្កើតមូលនិធិពិសេស សម្រាប់ជួយប្រទេសក្រីក្រ ប្រទេសកំពុងអភិវឌ្ឍ ដែលបញ្ចេញផ្សែងពុលតិច ប៉ុន្តែ រងគ្រោះខ្លាំងធ្ងន់ធ្ងរដោយសារគ្រោះធម្មជាតិ ដែលជាលទ្ធផលនៃការប្រែប្រួលអាកាសធាតុ។ ប៉ុន្តែ រហូតមកដល់ថ្ងៃចុងក្រោយនៃសន្និសីទ ការចរចាក្នុងសំណុំរឿងនេះនៅតែជាប់គាំងដដែល។
មូលនិធិជំនួយ៖ ប្រទេសអ្នកមាន និងប្រទេសក្រីក្រ ទាញខ្សែទាញព្រ័ត្រគ្នាទៅវិញ ទៅមក
ការចរចាត្រូវជាប់គាំង ព្រោះភាគីចរចានៅតែនិយាយមិនត្រូវគ្នា ពីរឿងបង្កើតកញ្ចប់ថវិកាសម្រាប់ជួយប្រទេសក្រីក្រ ដែលរងគ្រោះដោយសារគ្រោះមហន្តរាយធម្មជាតិ ដែលជាលទ្ធផលនៃកត្តាប្រែប្រួលអាកាសធាតុ។
ប្រទេសក្រីក្រ ប្រទេសកំពុងអភិវឌ្ឍ នៅភាគខាងត្បូង បានទាមទារឲ្យក្រុមប្រទេសអ្នកមាន ប្រទេសមហាឧស្សាហកម្ម ដែលបញ្ចេញផ្សែងពុល ឧស្ម័នកាបូនិកច្រើន ជាអ្នកទទួលខុសត្រូវ ផ្តល់ថវិកាសម្រាប់ជួយប្រទេសក្រីក្រ ប៉ុន្តែ ក្រុមប្រទេសអ្នកមាន ដូចជាអាមេរិក និងសហភាពអឺរ៉ុបជាដើម អរិភាព មិនចង់ទទួលរ៉ាប់រ៉ងតែម្នាក់នោះទេ។
នៅពេលក្រុមប្រទេសក្រីក្រ នៅភាគខាងត្បូងផែនដី ទាមទារឲ្យមានកិច្ចព្រមព្រៀងជាគោលការណ៍ នៅក្នុងសន្និសីទCop27 ក្រុមប្រទេសអ្នកមានបានទាមទារពេលវេលាបន្ថែម ដើម្បីពិភាក្សា ពោលគឺមិនចង់ឲ្យគេសម្រេចអ្វីភ្លាមៗ នៅពេលនេះទេ។
ការខ្វែងគំនិតរវាងប្រទេសអ្នកមាន និងប្រទេសក្រីក្រ បានធ្វើឲ្យមានការបែងចែកគ្នា ជា២ក្រុមប្រទេសដែលបានរៀបចំ សេចក្តីព្រាងពីរផ្សេងគ្នា ទាក់ទងនឹងរឿងបង្កើតមូលនិធិ សម្រាប់ការខូចខាត និងការខាតបង់ ដោយសារគ្រោះមហន្តរាយធម្មជាតិ។
ក្រុមប្រទេសក្រីក្រ ប្រទេសកំពុងអភិវឌ្ឍ ជាង ១៣០ប្រទេស ដែលមានប៉ាគីស្ថានជាអ្នកតំណាង និងមានចិនជាសមាជិក (G77+ចិន) បានសរសេរសេចក្តីព្រាងដែលចែងថា ក្រុមប្រទេសអ្នកមាន ជាង ២០ ជាអ្នកទទួលបន្ទុកផ្តល់ថវិកាដល់មូលនិធិសម្រាប់ការខូចខាត និងការខាតបង់ ដោយសារកត្តាប្រែប្រួលអាកាសធាតុ។
ប៉ុន្តែ ក្រុមចរចាតំណាងប្រទេសអ្នកមាន បានបង្កើតអត្ថបទមួយដែលថា មូលនិធិ សម្រាប់ការខូចខាត និងការខាតបង់ ដោយសារគ្រោះមហន្តរាយធម្មជាតិ នឹងត្រូវទទួលថវិកាពីគ្រប់ប្រទេសផ្តល់ជំនួយ ដែលមានមធ្យោបាយហិរញ្ញវត្ថុ។ សម្រាប់អនុប្រធានគណៈកម្មការអឺរ៉ុប ដែលបានចូលរួមចរចាផ្ទាល់ ការកំណត់ពាក្យម្ចាស់ជំនួយនេះសំខាន់ណាស់ ព្រោះថា មានប្រទេសកំពុងអភិវឌ្ឍជាច្រើនដែលមានសមត្ថភាពហិរញ្ញវត្ថុ ដូចជាចិនជាដើម។ ថ្វីត្បិតថា ចិនស្ថិតក្នុងចំណោមប្រទេសកំពុងអភិវឌ្ឍ ប្រទេសក្រីក្រ ដែលគួរត្រូវទទួលបានជំនួយពីមូលនិធិ សម្រាប់ការខូចខាត និងការខាតបង់ ដោយសារគ្រោះមហន្តរាយធម្មជាតិ ប៉ុន្តែ សម្រាប់ភាគីអឺរ៉ុប ចិនជាមហាអំណាចសេដ្ឋកិច្ចពិភពលោកទី២ មានលុយក៏ច្រើន ហើយក៏ជាអ្នកបញ្ចេញឧស្ម័នកាបូនិកច្រើនជាងគេដែរនៅក្នុងពិភពលោក។
ចំណុចសំខាន់មួយទៀត ដែលភាគីអឺរ៉ុប តំណាងឲ្យក្រុមប្រទេសអ្នកមានចង់បញ្ជាក់ គឺ អ្នកដែលសក្តិសមនឹងទទួលបានជំនួយពីមូលនិធិ សម្រាប់ការខូចខាត និងការបាត់បង់ ដោយសារគ្រោះមហន្តរាយធម្មជាតិ គឺប្រទេសដែលក្រីក្រខ្លាំង ប៉ុន្តែ មិនមែនប្រទេសដែលមានមធ្យោបាយ និងជាមហាអំណាចសេដ្ឋកិច្ច ដែលមានចិនជាឧទាហរណ៍នោះទេ។
ដោយសារជំហរតឹងរ៉ឹងរបស់អឺរ៉ុប ហើយដោយសារអាមេរិកក៏មិនសូវចេញមុខ រវីរវល់និយាយច្រើនពីរឿងផ្តល់ជំនួយ នៅក្នុងសន្និសីទCop 27លើកនេះ ប្រទេសក្រីក្រមួយចំនួនបានគំរាមថា គេនឹងមិនព្រមចុះហត្ថលេខាលើសេចក្តីសម្រេចណាមួយ របស់Cop 27នៅអេហ្ស៊ីបលើកនេះ បើសិនគេមិនឃើញ ការសន្យាជាលាយលក្ខអក្សរ ដើម្បីបង្កើតមូលនិធិសម្រាប់ការខូចខាត និងការបាត់បង់ ដោយសារគ្រោះមហន្តរាយធម្មជាតិ។
អគ្គលេខាធិការអង្គការសហប្រជាជាតិ៖ គេត្រូវឈប់ចង្អុរ ទម្លាក់កំហុសដាក់គ្នា
បញ្ហាថវិកាជាចំណុចខ្ទាស់ខ្លាំង ប៉ុន្តែ គេសង្ឃឹមថា ក្រុមប្រទេសក្នុងពិភពលោកនឹងយល់ព្រមបន្ទន់ជំហរ និយាយចុះសម្រុងគ្នានៅទីបំផុត។
នៅពេលត្រលប់ពីកោះបាលី ថ្ងៃព្រហស្បតិ៍ លោកអង់តូនីញ៉ូ ហ្គូរទែរស៍អគ្គលេខាធិការអង្គការសហប្រជាជាតិ បានអំពាវនាវឲ្យគេនិយាយចុះសម្រុងគ្នា ព្យាយាម លុបបំបាត់គម្លាត ការមិនទុកចិត្តរវាងក្រុមប្រទេសក្រីក្រ និងក្រុមប្រទេសអ្នកមាន។ ដើម្បីធ្វើដូច្នេះ ប្រទេសអ្នកមានត្រូវគោរពតាមការសន្យារបស់ខ្លួនកន្លងមក។ លោកអង់តូនីញ៉ូ ហ្គូរទែរស៍ចង់សំដៅដល់កញ្ចប់ថវិកា ១០០ពាន់លានដុល្លារក្នុងមួយឆ្នាំដែលក្រុមប្រទេសអ្នកមានបានសន្យា កាលពីឆ្នាំ ២០១៥ សម្រាប់ជួយប្រទេសក្រីក្រ ដើម្បីសម្របខ្លួននឹងការប្រែប្រួលអាកាសធាតុ។ បញ្ហានៅត្រង់ថា រហូតមកដល់ពេលនេះ ប្រទេសអ្នកមានមិនបានផ្តល់ថវិកា គ្រប់ចំនួនតាមការសន្យារបស់ខ្លួនទេ។
សម្រាប់ប្រធានអង្គការសហប្រជាជាតិ ថវិកាសំខាន់មែនហើយ ប៉ុន្តែ កិច្ចព្រមព្រៀង ស្តីពីការប្រឹងប្រែងបន្ថែមដើម្បីកាត់បន្ថយឧស្ម័នកាបូនិករឹតតែសំខាន់ ពីព្រោះថា បើសិន គេនៅតែព្រងើយកន្តើយ មិនព្រមប្រឹងប្រែង ចាត់វិធានការកាត់បន្ថយការបញ្ចេញឧស្ម័នផ្ទះកញ្ចក់ទេ នោះ គឺពិភពលោកទាំងមូល គ្រប់ប្រទេសដែលត្រូវរងគ្រោះមហន្តរាយ មិនថា ប្រទេសអ្នកមាន ឬអ្នកក្រទេ។ ចុងក្រោយ លោក បានទទូចសុំកុំឲ្យគេនិយាយចង្អុរដាក់គ្នា ព្រោះថា គេគ្មានពេលតទៅទៀតនោះទេ។ ប្រមុខដឹកនាំអង្គការសហប្រជាជាតិយល់ថា គ្រប់គ្នា មានកាតព្វកិច្ច ដោះស្រាយបញ្ហាចំពោះមុខ និងរកឲ្យឃើញកិច្ចព្រមព្រៀង ដើម្បីស្រោចស្រង់មនុស្សជាតិ នៅចំពោះមុខគ្រោះមហន្តរាយធម្មជាតិ ដែលកាន់តែសាហាវ គ្រោះថ្នាក់ បំផ្លាញជីវិតមនុស្សលើផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ